تعلمت اني اوكف بالمحل من ابوية يروح يجيب غراض من محلات الجملة …. المحل جان صغيروني كلش و المنطقة مالتنه كلها تعرفه … جنت من اكعد بالمحل الهي نفسي بهواي شغلات … مرات جنت اجيب الطوس مالات الروبة النايلون و انظف الحواشي مالتها … لان طوس اللبن النايلون من تجي بيهم زوائد من فوك … اني احكهم و اوخرهم .. و مرات ارتب النساتل و مرات ارتب باكيتات الجكاير الاجنبي وحد و العراقي وحد … و مرات ارتب جياسة الخمرة الصغار … اهم شي ما ابقى كاعدة … اسوي شغلات هواي .. و بنفس الوقت اقرا .. كتبي يمي و اقرا .. من يجي ابوية افوت جوى … اني الجبيرة بالبيت … عندي بعد بس اخت اصغر مني … امي حبيبتي جانت متكدر تمشي بسبب مشكلة برجلها … طبعا هي جانت تمشي قبل بس ركبات رجليها صار بيهم مشكلة بسبب الوزن الزائد و ابوية تداين من كرايبنه و حتى من الجوارين و سوينالها عملية و سبحان الله ورى العملية رجليناتها اصلا كامت متشيلها … طبعا بوقتها ابوية اشتكى بس كل شي ما تغير و بقت امي بمكانها و بعدين قبلت تكعد على كرسي بعد ما جانت رافضه الفكره تماما … امي مجانت جبيرة .. بس حياتها خربت من ورى خلل طبي … و جبنالها كرسي و لحد هسه اتذكر الترتيب الي صار بعد ما كعدت عالكرسي … جان عدنا طباخ جبير … ابوية باعه و جاب طباخ من هذا الصغير ليش ؟
حتى يخلي على مكان ناصي و امي تعرف تطبخ عليه … و هالشي جان طلب من أمي .. حتى المغسلة .. عندي خالي يشتغل بالتأسيسات الصحيه … اجه لبيتنا شال المغسلة (السنك) و رتب تأسيس للبواري جديد و سواه ناصي حتى امي تعرف تغسل بي المواعين و تستخدمه … بس الثلاجة ما بدلناها و جنه نخلي الغراض مال الطبخ كلها بالمكان الجوى و ما نخلي اي شي فوك (يعني بمكان متكدر توصله ايد امي) … و الكوانترنت ما لعبنه بيها لان اصلا كل غراض الطبخ بالبواب الجوى … و تعلمت امي تسوي كل شي وهي عالكرسي … بالبداية جان صعب عليها بس بعدين تعلمت … اكو امور هواي اني تحملت مسووليتها .. مثلا اي شي فوك بالطابق الفوك اني اسوي رغم ما جنت صغيرة بس جنت اسوي … تنظيف الزوالي و شر الهدوم فوك .. و تنظيف الفوك .. الطابق الفوك كله عليه و حتى جوى هم .. جان بابا من يكعد بالمحل يصيحني … يكلي حبيبتي ما اريد ابد ماما تنقهر و حاولي تساعديها بدون متبينين هالشي .. ابوية جان يحب ماما كلش .. علمودها عاف شغلة الاصلي و فتح محل صغير من البيت حتى بس يبقى قريب منها … لان تحتاجه هواي … جان من يفوت يساعدها اني اطلع اكعد بالمحل … و ابد ما بينلها بيوم هو تعب من وضعها .. و اني و اختي هم نفس الشي … مرات جنت اسأل بابا اكله شنو امنيتك … يكلي حبيبتي امنيتي هسه لو قبل .. اكله هسه .. يكلي اربيكم احسن تربية و الله ينطيني عمر و صحه حتى اسوي هالشي و يفرحني بيكم و بنفس الوقت امكم ابد متضوج .. اكله زين بابا وقبل شنو امنيتك ؟؟
يكلي امنيتي قبل يصير عندي ولد حتى يساعدني … بس هالامنية تغيرت هسه لان انتي و اختج عندي تسوون الف ولد .. جنت اكيف و احضنه و بين فترة و فترة اسأله نفس السوال و هو يرجع يجاوبني نفس الجواب … جان عندي جوابه شلون من بنية تحب واحد و كل شوية تسأله تحبني ؟؟ و هو يجاوبها اي احبج و ترجع تكرر السوال تحبني .. هي تعرفه يحبها بس تكرر السوال لان تحب تسمع هالكلمة … اني نفس الشي جنت احب اسمع هالحجي من بابا … و مرت سنين العمر و بقى الوضع كما هو عليه بس الي تغير … اني و اختي كبرنه و درسنه و تخرجنه …
اني مهندسة و اختي صيدلانيه … و تغيرت امنية بابا … زاد عليها هواي امور .. مثلا يكلي تعرفين شتمنى .. اكله شتتمنى .. يكلي اتمنى يوميا الناس تسألني بناتك شنو يدرسون لو شنو مخلصات و اني بصوت عالي اكول الجبيرة مهندسة و الصغيرة صيدلانية … و الفرحه الي جنت اشوفه بعيونه تخبل .. و امي حبيبتي هم كيفت بينا و طبعا رغم ما كبر عمرها بس هم هي الي بقت تسوي الاكل و متقبل احنه نسوي .. تكول ابوكم يحب اكلي انتو الي عليكم تنظيف و شغلات ثانية بس الاكل و الطبخ عوفوه عليا .. امي فرحتها بالطبخ و فرحتها الاكبر من نلتم كلنه بنفس المكان … و بيوم من الايام احنا بالبيت و جنت مكيفه كلش لان بديت اشتغل بمكان كلش كلش زين … و امي طبخت برياني و عليه دجاج لان بابا يحبه كلش و احنه كلش نحبه … و كالت روحي صيحي بابا خلي يتعشى .. طلعت للحديقة لان المحل مالتنا من الحديقة مطلعي … شفت ابوية مخلي راسه عالميز و اني عبالي راسه يوجعه … تقربت اكعد بي .. بابا بابا شبيك .. اشو بابا ميتحرك .. جان اصيح بصوت عالي .. طلعت اختي و امي … اختي ركضت شافت النبض و كامت تلطم و تصيح و التمو الجوارين … مات بابا … مات بابا و الاكل بالصينية بنص الهول … بابا كوم الاكل عالكاع حاضر و عالميز الي انته سويته علمود ماما … بابا كوم الله يخليك ماما مسويه برياني الي تحبه و عليه افخاذ … بابا كوم افرح ويانه اني اشتغلت بمكان زين … بابا .. باباتي … بابا فرحتي من الدنيا ابوس رجلك كوم … بابا عفيه الله يخليك لا تعوفنه .. النسوان يجرون بيا و اني احاجي بابا عفيه تعال الاكل حاضر … و راح بابا و عافنه وحدنه … جنت قوية بوجوده و ما جنت احس بشي اسمه خوف ..
بس من بابا راح ماعرف شصار بيا … الناس يشوفونه من الخارج قويات اني و اختي و يشوفونه سباع و شاطرات وحده مهندسة و وحدة صيدلانية .. بس ميدرون احنا من جوى تكسرنه بروحة بابا … عزلنه المحل بس بقت غراضه بي … نظارات بابا عفناها بمكانها … حتى الراديو الي معلكه عالحايط وراه بمكانه … سبحته بمكانها … حتى الغراض عفناها بمكانها ما بعناها والله … و بقينا نشتغل اني و اختي و وضعنه تحسن كلش بس حرامات بابا ما فرح فرحتنه … ومرات من جنه نحتصر نفتح باب المحل و نكعد نبجي نبجي بالمحل و بعدين نطلع … و مرت خمس سنوات على وفاة بابا … و اختي جتي قسمتها … الي اخذ اختي دكتور مال اسنان … ابن اوادم و حباب و اهله كلش طيبين … و اني وراها بسنتين تقدملي رجال شافني صدفه بموقع جنت اشتغل بي … و هو امكانيته زينه كلش … طبعا اني بوقتها طلبت اكعد وياه و احجي .. من كعدت كلتله اكو وضع خاص لازم تعرفه … كالي شنو .. كلتله اني امي متكدر تمشي و بالبيت مالتنه مرتبيلها كلشي يتناسب وي وضعها .. و اصلا هالبيت ماكدر اعوفه حتى لو ما اتزوج طول عمري .. لان كل ذكرياتي بي و الاهم من كلشي بي المحل الي على حطته من بابا توفى لليوم … كالي الي تريدي اسويلجياه .. كلتله اذا تريد تتزوجني تعال اكعد ويانه … كالي صدك تحجين .. يعني اني عندي امكانية اشتري بيت بأي مكان ببغداد … اجي اكعد يمكم شلون تقبليها … كلتله لعد عوف الموضوع .. بس الرجل جان معجب بيا و طبعا سأل بالمنطقة و الناس اكيد مجاوبته احنه شنو و منو … بالبداية ما قبل بس بعدين وافق و تزوجنه و كعد ويانه .. من تعرف على امي كام يحبها مثل امه … و بقينا بالبيت و الحمدلله طلع ابن اوادم … بس اني مشكلتي شوية عصبية و هالشي صار بيا ورى وفاة بابا … جنت مرات اتعصب عليه على اشياء متسوى تنذكر .. هو جان ينقهر و يروح يكعد بالمحل … طبعا فد انقهر من اشوفه كاعد بالمحل اتخيل كاعد يشكيني لبابا … و اروح اعتذر منه … و الحمدلله صار عندي منه ولد ثنين و بنيه .. و جهالي عايشين احسن عيشة و طبعا المنطقة كلها تحب زوجي و يكولون دائما سبحان الله .. الله اخذ من عدنا ابوج الي جان احن و اطيب رجال بالمنطقة و انطانه ابو علي زوجج .. و مرت كومة سنين و المحل بعده على حطته …
والمصيبة بنتي ماعرف عليمن طالعه … اذا تريد شي و متاخذه تسوي دراما و تبجي و تروح يم المحل مال بابا تهددني و تكلي لو جدو جان عايش جان سوالي هالشي .. اني اكلها ولج بنت الاوادم انتي وين شايفته لو تعرفي و اضحك … و اسويلها الي تريده … و الحمدلله على كل حال … الله رزقني بحياتي برياجيل ثنين .. ابوية و زوجي .. الي اتمناه ولدي يطلعون مثلهم … و الله يرزق كل بنات الدنيا برياجيل يصونونهم و يحبوهم و الاهم حنينين عليهم ..

المصدر صفحة ابوـبغداد