ماما نهلة

بذاك الوكت بيتنا جان جبير .. والدي امكانيته زينه … عنده مكتب بعلوة الرشيد و حتى بعلوة الشعلة هم عنده واحد .. و عنده سيارات ٣ مشغلهم ابويه … طبعا هالامكانية مو ابوية سواها بيده .. هاي جانت ورث جدي لأبوية و لعمتي الجبيرة .. عمتي اخذت حصتها و ابوية اخذ حصته … بيوم من الايام خالي اجه لبيتنا و حاجى أمي و ابوية … ثاني يوم من الصبح ابوية جاب عمال من الي يشتغلون وياه … جابهم للبيت و رتبو غرفة من الغرف الفوك … و بنفس اليوم جابو غرفة نوم جديدة نصبوها .. و جابو غراض هواي .. و ما مر اسبوعين تقريبا .. اجه خالي هو و وياه مريه منعرفها صعدو للغرفة و عاشو بيها ..
عرفت اني خالي راح يسكن عدنا بس الي جان مدوخني اني اعرف خالي متزوج .. و زوجته متحجي وي أمي و اعرف هم ولد خالي الي من عمري و بناته هم .. و كام يجي يبات يمنا يوم يومين و يروح و مرات يجي الصبح و يروح العصر … خطية زوجته جانت تحب تحجي ويانه احنا الجهال .. و جانت تساعد امي هواي بالتنظيف و بالترتيب و بالطبخ … طبعا خالي هم امكانيته المادية زينه وهم يشتغل وي ابوية بالزرع و بالمحلات الي بالعلوة …
زوجة خالي الجديدة جانت كلش تحبنا احنا الجهال .. اني جنت ما احبها كلش …
جنت الجبير بالترتيب بين اخوتي .. احنا ٤ جهال .. اني اكبرهم و جان عمري بذاك الوكت تقريبا ١٣ سنة .. جنت افتهم زين الي يصير بالبيت .. بيوم من الايام شفت زوجة خالي تبجي و جانت تحجي وي امي .. سويت نفسي ممنتبه بس بقيت اذني يمهم .. عرفت ان هاي المرية جانت متزوجة قبل خالي .. و انفصلت بسبب عدم الانجاب .. و خالي تزوجها لهل السبب .. لان عرف هي متجيب جهال .. وهو عنده جهال اصلا ..
من ذاك اليوم الي شفت دموعها بي … انقهرت عليها كلش … و كمت اسولف وياها .. جانت تحير شتسويلي حتى تفرحني … حتى مرات امي متسويلي الاكلات الي احبها بس خالة نهله تركض تسويلي الي احبه .. و بيوم من الايام جتي زوجة خالي الاولى للبيت و صار صياح و غلط و عركة مال نسوان جبيرة .. وراها خالي فترة طويلة ما اجى يمنا للبيت .. و هي خطية بقت يمنا ..
جنت اسمع قصتها من تسولف لأمي .. ابوها متوفي و امها متزوجة .. رجل امها مو خوش رجال .. يضربهم للجهال دائما .. و رجل امها صار عنده من امها ولد و الباقي بنات من ابوها المتوفي …
تكول بس كبرنا اني عمري ١٦ سنة تزوجت .. بقيت وي الي تزوجته ٣ سنوات مصار عندي اطفال .. امه جتي وجه لوجه كالت عيني اني اريد اشوف جهال وليدي .. و انتي عندج مشكلة بسالفة الخلفه …. و ابنها واكف بصفها لا حس ولا نفس ..
بجيت بوقتها بس ما بجيت على حظي لو على الاطفال لو عالطلاق .. بجيت لان راح ارجع لبيت رجل امي … اني ما صدكت طلعت ٣ سنين من ذاك البيت .. والله العظيم بهل البيت شكد ترزلت و شكد انهانيت بس جنت قابلة و مكيفه لان محد ما مد ايده عليا ….
حتى زوجي من تأخرت سالفة خلفتي جان يسمعني حجي و مرات من يشيل جهال اخوته يباوع عليا بنظرة عبالك يحسسني اني قاتله لو مجرمة لو خاينته … و طلكني …
رجعت لبيت رجل أمي .. بس رجعت شوية جبيرة … مجان يضربني بس جان يغلط …. وصلة لمرحلة ما اعرف شنو اسمها العلمي و لا اني قارية و دارسة حتى اعرف اكوله … بس المرحله هي اني ما اهتم لأي شي … يعني الي يغلط خلي يغلط و الي يسب خلي يسب … و كمت اسوي بس الي يريدوه و ارجع لغرفتي ….
فد يوم امي جتني كالت صديق ابوج جايبلج رجال … شنو رايج … ضحكت اني … كلتلها انتي مقتنعة يمه ؟؟؟؟
كالت اي مبين الرجال خوش رجال بس هو متزوج و يريدج ثانية … كلتلها يمه مو هذا قصدي مقتنعة انتي جاية تسأليني و تريدين تاخذين رأيي الي مراح يقدم ولا يأخر شي …
كالت المهم اني كلتلج و كالت اشو احس انتي تكرهيني ولا عبالك امج اني … كلتلها يمه طلعي برى لان تعبانة من شغل البيت و طفي الكلوب خلي اخذلي غفة قبل رجلج لا يرجع من الشغل ….
طلعت امي و مسألت شنو هالحجي ولا كالت شي … امي الوحيدة الي جنت احسها عدو مو أم …. هواي نسمع عن امهات تبيع جهالها علمود الرجال و اني امي بالضبط من هالنوع … و تقدم و تزوجني و جابني هنا يمكم … و هنا يوميا احمد ربي و اشكره اني بنصكم مرتاحة ….

من سمعت قصتها حبيتها كلش … و كمت مرات اصيحلها ماما نهلة … تموتنا بوس من نكلها ماما نهلة … و يوم ورى يوم كلنا احنا الجهال صار عدنا امهات ثنين … يمه لو ماما هاي امنا الي جابتنا من بطنها … و ماما نهلة هي امنا الثانية …
و مدلل و يعيش احلى عيشة الي عنده امهات ثنين … و كبرنا و احنا عدنا امهات ثنين … طبعا ورى وفاة خالي ماما نهلة دخلت بحالة نفسية مو زينه …. لان هي حساسة و فكرت انو هي غريبة يعني و لازم ترجع لبيت اهلها …
ابوية و امي تعاركو وياها و كالولها هذا بيتج و هذولة جهالهج اذا عفتيهم وين يولون و شيسون …
و اني رغم ما جنت جبير بجيت و كلتلها ها ماما تريدين تعوفينا … و اقتنعت انو هي قطعة من هالبيت و مستحيل تطلع منه …
و توفى ابوية و اني واخوتي لزمنه الشغل و تزوجنا و صار عدنا جهال .. و قبل سنتين من اليوم توفت أمي الجابتنا …
و ما بقى عدنا بالبيت غير بس ماما نهلة … طبعا نسوانه ممدققات بالموضوع و احنا مكايلين هاي زوجة خالنا كبالهم …
عبالهم زوجة ابونا ..
و قبل كم يوم هي ماما نهلة حجتلهم السالفة … زوجتي بليل احنا و نايمين كالت اكلك حبيبي اكو شغلة خايفة احجيلكياها … كلتلها شنو كولي ؟؟
كالت ماما نهلة لازم توديها دكتور مال نفسية و اعصاب ..
كلتلها ليش شبيها ياستار و كمت كعدت رأسا …
كالت ما بيها شي بس يمكن عدها خرف او هذا المرض الي ينسون بي زهايمر … كلتها ليش احجي شبيها ..
تكول اليوم المغربية جنا كاعدين سوى و كالت اني مو زوجة عمو فلان الله يرحمه … اني زوجة اخو فلانة الله يرحمها يعني على خالك … تكول جانت زوجته و عاشت وياه احلى ايام …
من حجت هيج احنا النسوان وحدة كامت تأشر للثانية و سوينا نفسنا مندمجين وياها بالحجي …

طبعا اني ضحكت ضحك ههههههههههه صوتي هز البيت ..
كالت شبيك تضحك …
كلتلها تدرين احنا منحب نحجي بهل الشي بس مدام هي كالته خلص … اي هي زوجة خالي بس هي الي ربتنا و كبرتنا و هي امنا … كالت شكد عيب و اني و البنات عبالنا اخرفت المرية …
و حجيتلها السالفة و رجعت انام …
زوجتي منامت .. و سألتني سوال ..
كالت اكلك زين انته تحجي و كل حجيك حلو بس اريد اسألك انته تشجع عالزواج بالثانية لان خالك مثل متكول اخذها على زوجته ثانية و بدون متدري الاولى و صارت مشاكل من عرف الاولى ؟؟
كلتلها اني ما اشجع بالزواج بالثانية ابد … بس ماما نهلة حاله خاصة … بس اذا تسأليني هسه عالزواج بالثانية ابدا ما اشجع ابد ابد … و خلي ببالج شي … خالة نهلة لو مو ظرفها وي رجل امها و امها الي ابد ماعدها حنيه على اطفالها … جان ماما نهلة هم متقبل تصير زوجة ثانية … بس هي ظرفها خلاها تقبل حتى بس تطلع من يم رجل امها … ويمكن هسه اي شخص يعارض الزواج بثانية لو ينحط بمكان ماما نهلة بذاك الوقت يقبل و يضرب كل المثاليات و الشعارات بعرض الحايط … و اتمنى طولة العمر الها لان ماكو احن و احلى من كلبها الطيب .

المصدر / صفحة ابو بغداد .