الأحمر

ورى ما خلصت العركة و كل شي انتهى بكعدة صلح … اني ما جنت موجود بنصهم .. اني جنت نايم بمستشفى بمكان بعيد … سمعت و عرفت من أمي هالحجي .. أمي الي جانت تجيني يوميا .. تجي يوميا شايله وياها جيس مال اكل و كل يوم ميقبلون يدخلون هالجيس و تكعد تتوسل حتى يدخلولي الاكل … بالمستشفى اني رجلي سولها اكثر من عملية .. طبعا انضربت برجلي ست طلقات .. و ما اعرف شلون عشت اصلا .. من وكعت بالكاع توقعت روحي متت .. بس ماعرف شلون رجعت للحياة .. يعني هالطلقات حسب ما سمعت من الدكتور .. مو كلها من سلاح واحد .. اكو اختلاف بأحجام الاطلاقات .. ماعرف شلون ما وحده من هالسته جتي فوك بصدري لو براسي و موتتني .. يجوز عشت حتى يصير الي صار وياي …
و حتى يجي يوم احجي كل شي ..
المهم .. العركة جانت بينا و بين عائلة ثانية .. احنا كاعدين بمنطقة ببغداد .. شارعنا بي ٣ بيوت عمامي .. و الشارع الورانه هم بي كرايبنا .. البيت الي تعاركنه وياهم هم مثلنه .. كرايب بنفس الشارع .. و طبعا هالشي موجود بهواي مناطق ببغداد و حتى اكو شوارع كاملة حاليا (تتسمى على اسامي العشاير الي كاعدين بيها) .. العركة جانت علمود طير .. اي طير .. طير من نوع احمر .. هالطير مو نادر و سعره هم مو غالي .. الطير راح يم واحد هم عنده طيور .. و لزمه .. اجه كرايبي على ابو الطير كاله هذا طيري يمك وانته لزمته رجعلياه .. كاله ما ارجعه .. كرايبي تخبل .. راح جاب مصيادة و بالصجم كام يضرب طيوره للولد الي من العشيرة الثانية .. و طبعا الطيور (الحمر) من يطيرون يطيرون بتجمع واحد و مو صعب ينضربون .. كوم الولد الثاني انزل اضرب كرايبي .. و كرايبي هم ضربه .. و علكت بيناتهم .. اخوة الولد طلعو ضربو كرايبي و كرايبي جاب اخوته و دك داك دك داك صارت بالاسلحة .. و اني اكلت ست طلقات برجلي .. طبعا بيوم الي هدينه عليهم .. اني مسألت هواي ليش و شلون .. كبل انطوني سلاح و ركضت وي اخوتي و ولد عمي .. وصار الي صار .. طبعا هي انحلت بعدين و صار بيها فصل .. و اني تعالجت و طلعت بس رجلي خرطت العافية .. لو ماعرف شيصير متصيرلها قائمة .. يعني بلاتين بيها و اعرج و مستحيل راح امشي عدل بيوم من الايام .. و تصالحو العشيرتين مثل ما كلت .. طبعا احنا وضعنا المادي عادي .. و اني جان شغلي بالبناء ديكورات .. ورى منضربت بقيت اشتغل بنفس شغلي بس مو مثل قبل .. لان رجلي أثرت على وضعي هواي .. طبعا هالحجي قديم كلش .. و مو بس أثرت على وضعي بالشغل .. نفسيتي هم انكسرت و ثقتي بروحي صارت صفر .. جنت اخاف من اللقب .. جنت اخاف لا يكولون عليا فلان الاعرج .. و كالو .. كامو يسموني فلان الاعرج .. مجانو يكولوها كبالي لان يخافون بس ورايا اكيد تنحجي و تنكال .. هالشي بالنفسية .. و بالنسبة للمشي هم نفس الحالة .. اتعب بسرعه .. بس امشي مسافة اتعب .. زين اني تنقلاتي بوقت الشغل بالكوسترات و ماكو كوستر تاخذني من باب البيت و ترجعني لباب البيت .. لازم امشي لراس الشارع .. عشت سنين صعبة .. لحد ما تغير وضعنا المادي شوية و بطلت من هالشغلة و صار عندي سيارة .. و طبعا تزوجت و لان اني ماعندي علم قوي و شهادتي متوسطة جنت خايف لا يطلع ابني هم اعرج .. احجيها و ما اخجل و مو عيب الي ميعرف .. العيب اذا ميعرف و يسوي روحه يعرف .. اني سألت و كالولي ماكو هيج شي .. بس مجنت اصدك و توقعت راح يطلع عليا الطفل .. و الحمدلله انرزقت ب٣ جهال .. بنات ثنين و ولد و كلهم ما بيهم شي …
المهم و الي صار .. قبل فترة ابن اخوي تزوج .. و الي اعرفه انو ابو البنية اعمى .. بس مسألت شلون صار اعمى من الولادة لو طب شي محلول بعينه يعني مو مهم جان عندي اعرف هالشي .. و اصلا ما رحت بخطوبته .. و ورى مدة صارت مناسبة و هو جان حاضر و كاعد بصفي كرسي لزك بكرسي … و بدينا نسولف اني وياه .. كالي منو انته .. كلتله اني فلان ابن فلان و ابو فلان و اخو فلان وفلان (الفلاني) .. كالي والنعم .. و راد يعرف عن نفسه كلتله اعرفك انته ابو فلان و فلانه الي اتزوجها ابن اخوي و اعرفك .. كالي لا اوكف اني مردت اعرف روحي بهل الطريقة .. كلتله لعد شنو .. كالي بس مو تاخذها بحساسية لان ردت اتشاقى .. جان يكلي اني فلان الي انتو و عشيرتكم طفيتو عيونه ثنينهم .. سكتت اني و هو ابتسم .. كلتله صدك تحجي انته لو تتشاقى .. كال شفت الوكت .. انتو اخذتو عيوني مني و اني انطيتكم بنتي و هم ابتسم .. طبعا هو يتشاقى هواي و ينكت و مجان قصده شي .. اني خليت ايدي على ايده كلتله انته صدك تحجي و شوكت هالشي صار .. جان تطلع نفس العركة الي تعاركناها وياهم .. علمود الاحمر .. طبعا بنفس اليوم مكملت كلامي وياه .. وراها بيومين رحتله لبيته .. رحب بيا الرجل و كيف بيا كلش و هو من النوع الي يتلكه الناس من يروحوله و يقوملهم بالواجب و يحير شيسوي حتى يرضي خطاره .. ولده هم طيبين مثله .. كعدت وياه بالصالة و بدينا نسولف .. طبعا هو الطلقة ضاربته بوجهه بس صفح .. يعني مجاية عدل بوجهه لان جان موتته بمكانه .. فايته صفح و مخترقه المنطقة مال عيونه و طالعه .. شاكه وجه شك بس مو بالعمق .. شطح .. وعاميته بمكانه .. طبعا عملياته مسوي كومة مو علمود يرجع يشوف .. بس علمود يعدلوله شكله وجهه .. لان حسب ما حجالي جان شكله يخوف كلش ورى اول عملية .. و حاطيله هسه عيون كزاز ..
حجينا هواي سوالف و رجعنا ليوم العركة .. كالي تدري اني لو يرجع بيا الزمن شسوي .. كلتله شتسوي .. كال من اجه عمي وانطاني السلاح و كالي اطلع .. لو يرجع بيا الزمن اشمر السلاح بوجهه .. واكله اني مو رجال .. الرجولة متنقاس برفعة سلاح علمود سالفة متسوى فلسين .. طير .. عيني راحت من ورى طير .. اني ابو فلان الاعمى .. صرت اعمى علمود طير .. صرت اعمى لان شلت سلاح ودافعت عن كرايبي ضد واحد عراقي مني وبيا .. صح مو من عشيرتي بس عراقي و دمي من دمه .. شلت سلاح و ضربت طلقات و ما اعرف اصلا طلقاتي المن ضربت بذاك اليوم .. بهل الحجي اني كلتله اني هم بذاك اليوم ماعرفت طلقاتي المن ضربت .. كالي ليش انته جنت وياهم من هدو علينا ؟ كلتله اقدملك نفسي و جان اجر ايده خليتها على رجلي .. كلتله اني وياك ابو فلان (الاعرج) .. رجلي من العمليات اتعوجت و صار عندي عرج ميتعالج .. وعشت كل هالسنين اني اعرج .. و هم ماعرف شي جنت و جوي خلو بيدي سلاح و كالو يله .. و طلعت وياهم و رميت و انرميت ..
و صرت اعرج علمود نفس الطير .. يعني انته عيونك راحو واني رجلي راحت علمود طير .. يعني مجان نكدر نثبت احنا (زلم) بطريقة ثانية ؟؟؟
لو الزلم الا تشيل سلاح و تطلع ضد الغلط زين وين الغلط اصلا ؟؟؟
زعاطيط تعاركو علمود طير و كبرت السالفة هو هذا الغلط الي من وراه انته اعمى واني اعرج ؟؟؟؟ عشيرتين كعدت و فصلت و السالفة راحت انست و الدليل هاي تزوجنه منكم و تزوجتو من عدنا بس رجلي و عينك الراحن منو يرجعهم ؟؟؟ مو بعيد يجوز اني طلقاتي هي الي عمتك و مو بعيد يجوز طلقاتك الي وكعن برجلي .. ليش ؟؟؟
ليش هالمنطق و ليش هالعركات و ليش اصلا السلاح بكل بيت موجود .. يعني لو هالسلاح الي بالبيوت ينباع والله ميظل فقير بالعشيرة .. الشجاعة مو ان تهد على ابن بلدك و تضربه بعركة عشائرية .. لان هو صح يختلف وياك بأسم العشيرة بس انته وياه من نفس البلد ..الشجاعة تعيش عدل و تطلع رزقك و متحتاج لا انته ولا اهل بيتك .. الشجاعة تساعد المحتاج .. اخ شيرجعى للوكت .. اخ لو يرجع .. والله ما اشيل هالشي الي يكتل بدون ضمير .. و لو يكولون عليا انته مره (اكلهم اي اني مره و شبيها المره اصلا) المره الي جابتني و جابتكم .. المره لو مو هي محد ينولد … اي مريه اني لان ما اريد اكتل ولا انكتل بس ميفيد الحجي .. اني سنين عمري جبتها اعرج … وانته سنين عمرك جبتها ظلمه بظلمه .. وكله من ورى شنو ؟؟
احمر ….

المصدر :صفحة ابو بغداد