الفختية

غرفتي صايرة فوك بالطابق الثاني .. عندي شباك بيها و فوك الشباك اكو تطلوعه .. بالبناء مثل الديكور .. وعلى هالتطلوعه اكو فختيه (حمامه) … هاي مكانها هناك و يمكن عدها عش و مبيضه بي .. يوميا هي تفززني .. صوتها مميز و اكيد كل الناس تعرفه .. دائما من ساعه ٦ تبدي تطلع هالصوت .. كعدت و عادي مثل كل يوم كمت غسلت وجهي و لكيت الريوك جاهز .. امي محضرته للريوك و طالعه برى ترش الحديقة و باب الحوش … اكلت و شربت الجاي و طلعت على رزقي .. اني بذاك الوكت جنت اشتغل بسيارة كيا .. خطوط … السيارة مو مالتي .. مال رجال جوارينه و هالرجال ماعنده ولد بعمري .. عنده بس بنية وحدة و المسكينة مريضة .. عدها مرض بعقلها و دائما تصيح بالبيت و تكسر غراض .. و اي علاج ميفيد وياها .. هو جان موظف و زوجته هم موظفة .. من طلعو تقاعد اشترو هالسيارة و طبعا هو اشتغل بيها فترة بس ما دبرها .. اخر شي انطانياها و اني رزقي و رزقه سوى .. طلعت و وصلت الخط و رجعت للكراج حتى ابدي شغلي .. وطبعا قبل نهاية دوام الموظفين الي ماخذهم خط ….
اعوف الكراج واروح اخذهم من مكانهم و ارجعهم لبيوتهم .. بالكراج اجاني رجال جبير .. جنت بعدني ممقبط .. كالي تروح كروه لفلان منطقة .. عندي مناسبة عائلية اريد اودي النسوان و بناتي لهناك و تكسي ميكفينا و بصراحة ماريد اخذ تكسيات ثنين لان ما أمن بأحد و تعرف الوضع هالفترة .. كلتله و شوكت تريد ارجعهم .. كالي ورى التسعه بليل .. تعاملت وياه و قبلت و طلعت وياه …
هالحجي بالالفين وتسعه .. اخذته و بنص الطريق عالسريع مال الدورة طلع سلاح و كالي اطبك … خفت و ردت اشتري روحي و وكفت و فتحت الباب و نزلت .. و رغم كل هذا و اني حتى مقاومته بس ابن الحرام (مكرم القارئ) ضربني طلقة بجتفي و طلع كبل .. المصيبة مو هنا .. طبعا اني كمت ومشيت ورى الطلقة و الحمدلله الطلقة مستقرت بجسمي طلعت .. بس المصيبة السيارات الي دتفوت محد بالجذب وكفلي .. امشي و قميصي كله دم و ابجي .. بجي مو من الوجع .. ابجي على الامانة الي راحت مني و شلون راح اكول للرجال سلبوني السيارة الي رزقك و رزقي عليها .. و وكفت سيارة بيها رجال جبير بالعمر .. كالي شبيك ابني .. كلتله سلبوني سيارتي حجي .. صعدني بالسيارة و اخذني للمستشفى و تعالجت .. و رجعت لأهلي .. حجيت كل شي لابوية و امي .. طبعا همه كالو فدوة الك و اهم شي انته بخير .. كلتلهم و عمو ابو رفل شلون .. صاحو للبيت و المسكين من شافني هيج كام يبجي عليا و كالي فداك الف سيارة .. اني عندي تقاعدي عايش منه و ماكو احد مات من الجوع يا ابني .. طبعا بوقتها اني اعرف السيارة شكد سعرها .. بس منين اجيب سعرها .. ابوية بوقتها عنده كاع عايفها للزمن و سعرها مو ذاك السعر لان خارج بغداد .. باعها و راح ينطي فلوس السيارة لابو رفل .. ابو رفل مقبل ياخذ الفلوس و كاله هذا قضاء و قدر .. بس ابوية قفل الا ينطي الفلوس لان حقه للرجال .. و طبعا فلوس الكاع جانت مبلغ صح مو كلش كلش جبير بس نكدر نجيب بي بعد سيارتين من عده فلوس سيارة عمو ابو رفل .. بهل الحجي جوارينه بالمنطقة تدخلو بالموضوع و كالوله لابو رفل لازم تقبل تاخذ الفلوس لان يعرفون وضع بنته مريضه و تحتاج علاج دكاترة و هم تحتاج ادوية .. الرجال كال اني شسوي بالفلوس .. اني جنت ماخذ سيارة حتى يشتغل بيها فلان و يفوتلي وارد يومي .. كالوله خلص ناخذ سيارة و يشتغل بيها فلان .. كالهم لا مستحيل .. هالمرة ضربو طلقة و اخذو السيارة يجوز المرة الجاية يموتو خلاص .. و قرر يفتح اسواق غذائية بالمنطقة و يسترزق منها .. اني ابوية اخذلي سيارة بس خلاني احلف ما اطلع بيها لمكان بعيد ..يعني اشتغل نفرات من منطقتنا لمنطقة بصفنا ..
و اخذت سيارة و بديت اشتغل .. وابد ما اخذت كروة برى المنطقة … صارت بيا خوفه بصراحة .. و عادي اشتغل و ارجع للبيت و ابو رفل هم شغله مشى زين و عشنا و استرزقنا ..
و يوم يجر يوم و تقريبا ورى سنتين من الحادثة توفت ام رفل .. ابو رفل اجانه للبيت كال اني ماعندي احد يداري هالبنية و جانت بس ام رفل هي الي تداريها .. اني ماعندي لا اقرباء و لا احد .. اهلي متوفين واني وحيدهم .. وام رفل امها وابوها هم ميتين وعدها اخت وحده بأستراليا عايشه وي زوجها و جهالها .. أمي كالت اني و بناتي نداريها .. و كامو يجيبوها يمنا هنا يعلموها عالبيت و عالبنات .. البنية مشكلتها عدها تأخر عقلي .. و شكلها واضح المسكينة .. ايدناتها بيهم اعوجاج و مشيتها كلش بطيئه و متمشي عدل الا واحد لازم ايدها … بصراحة متعلمت على خواتي ولا على امي .. مرات تتعصب بدون محد ميسويلها شي و تكسر أي شي بيدها و مرة ضربت اختي طلعت دم من رجلها .. أمي خافت منها بس انقهرت تكول لأبوها .. كالت فوك همه نزيدله هم للمسكين .. و يوميا الصبح امي واختي يروحون يجيبوها يمنا للبيت و بليل ياخذها ابوها .. و فترة و هو الرجل استحى بعد يوميا يوميا يسوي نفس الشي .. حاول يشوف وحده تداريها .. طبعا بذاك الزمن جان اكو مكانات لهيج حالات .. بس بعيده كلش عن منطقتنا .. و اصلا هي البنية بالعمر جبيرة ..
يعني المفروض يودوها من اول ما بدت تكبر بس ما نعرف ظرف الناس ..
عالعموم .. اكو مرية بمنطقتنا ارملة و عدها بنات ثنين و ثنينهم متزوجات .. وهي وحدها بالبيت عايشة .. المرية مو كلش جبيرة بالعمر يعني بعدها بحيلها .. كامت تجي بالبداية تداري البنية و احنا كلنا كيفنا .. اشو فجاءة سمعنا ابو رفل تزوجها .. امي انقهرت بس كالت حقه .. ما عنده احد يداري بنته المسكينة .. ابوية نفس الحجي كاله .. كال والله احسن شي سواه .. اشو ما عبر سنة على زواج ابو رفل .. رفل اختفت من البيت .. امي جانت تروح بين فترة وفترة تشوف رفل .. جتي أمي مفرفحه و تبجي .. ابوية كالها شبيج .. كالتله ابوها موديها بيده ذابها بالشماعية .. ابوية كالها يمعوده كولي غيرها .. كالت والله و اني متاكده كله من ورى زوجته .. بيومها رحنا اني وابوية للمحل مال ابو رفل .. سألناه كال اي والله تعبتني و هناك يعرفون يتصرفون وي حالتها .. ابوية كاله لعد كل السنين الي جانت ام رفل موجوده اشو ما فكرت توديها ليش بس تزوجت كبل ذبيت بنتك هناك .. جان يتعصب و كام يعيط على ابوية و هو جبير بالعمر و اني احترمة و ما اكدر امد ايدي عليه وهو وابوية ميانة قوية .. كام يصيح هي بنتي واني اعرف مصلحتها احسن منكم .. و ابوية راد يضربه و هو هم راد يضرب ابوية .. جريت ابوية و رحنا للبيت و ابوية كال الي اشوفه منكم يسلم عليه بعد اكتله بمكانه .. هذا المرية خبلته .. بس تزوج ذب بنته .. و انكطعت علاقتنه بي نهائيا .. بس بصراحة ولو ابوية منع علينا نسلم عليه .. بس اني جنت من اشوفه اسلم عليه و الرجل يرد السلام .. طبعا بوقتها امي رادت تزور البنية و جنت اوديها تزورها .. بس البنية متعرف احد .. يعني متفرق بين امي و بين اي بشر ثاني .. و مرت سنين العمر و خواتي تزوجو كلهن واني هم تزوجت و تحولنا من بيتنا كعدنا بمنطقة ثانية .. و بقت علاقتنا وي الجوارين بس تلفونات بس ابو رفل منحجي وياه .. و بيوم من الايام رحنا اني وامي وبس .. دنزور البنية و امي بين فترة و فترة بقت مستمرة على الزيارات و دائما تاخذلها هدوم لان هي هواي تشكك هدومها و تجرجر بيهن .. و كالونه توفت البنية الاسبوع الراح .. غير امي صعد السكر عدها و تخربطت .. انوب اني ابجي على رفل و ابجي على امي .. ماعرف شسوي .. بس همزين البنات هناك الي يشتغلون عدهم خبرة بالتعامل بهيج مواضيع ..
صحت امي و ركبتها بالسيارة .. و تبجي .. كالت لو ميته يمي مو احسن .. طبعا امي و حتى ابوية رادو ياخذون رفل يمنا بس ابوها ميقبل و هي مو قريبتنا اصلا .. و طبعا الزيارات جانت بعلم ابوها .. وهو جان موافق نروحلها .. بس سالفة ناخذها يمنا ميصير اصلا و لو تصير والله جان اخذتها امي .. بس بعد ميفيد الحجي .. و هم مرت سنين و للاسف والدي توفى و بقت بس امي الله يحفظها و يحفظ الجميع .. و قبل فترة قصيرة سمعنا بوفاة ابو رفل ..بقت بس زوجته بالبيت .. و طبعا صار من حقها لان ماعنده ورثه .. اني ما اريد اشيل غيبة المرية .. بس اني متاكد هي جانت السبب بروحة رفل للشماعية ..
طبعا بالمناسبة الي سلبني و ضربني طلقة شكد تمنيت اشوفه بالشارع .. ما شفته ابد .. و لحد هاللحظة اتمنى الكفه بالشارع .. وكل ميطلع برنامج مال مجرمين و سلابه اكعد اكابله واكول هسه يطلع هسه يطلع .. و ما طلع .. بس مدام السيارة جانت من فلوس حلال .. و صح احنا رجعنا فلوسها بفلوس كاع ابوية .. فلوس حلال .. و اكيد راح يجي يوم و يطلع الحق .. لان كلها بصفحة و من اني نزلت و انطيته المفاتيح و يضربني طلقه هاي بصفحة ثانية ..
و اخيرا ..
الله يرحم رفل و والدي و يرحم خاله ام رفل و عمو ابو رفل و ماعرف ليش كل ما اسمع صوت الفختية اتذكر رفل .. و اتذكر ذاك الوكت بكل تفاصيله .

المصدر :صفحة ابو بغداد