ابو البنية

عندي ولد صديقي كرايبة بتركيا حاليا … يكول كرايبي يشتغل بمعمل مال ملابس ..مرات يلتقي بكهوة مال عراقيين بالمحافظة الي ساكن بيها .. و عنده علاقات وي شباب عراقيين … الولد منتظر يسافر لكندا ..يكول الكهوة الي يلتقي بيها .. يطلعون الكراسي مالتها بره .. يعني الكعدة تصير بره على الرصيف .. و ينصبون نركيلة مرات و هيج سوالف ..يعني الكاعد بره يكدر يشوف المحلات الي عالشارع و يشوف الناس الرايحة و الجاية ..طبعا على لسانه يكول ..اني عندي اصدقاء عراقيين مسجلين على الامم متحدة .. بيهم الي جايين من العراق و بيهم الي جايين من سوريا .. وهالفترة تحديدا هواي عالم جوي من سوريا .. تعرفت عليهم بالكهوة و اكو بيهم تعرفت عليهم بالبصمة الاسبوعية .. لان لازم نبصم مرتين بالاسبوع هنا ..اني شغلي الصبح و ارجع العصرية التقي بالكهوة .. فد يوم كاعد بالكهوة و ولد جان كاعد بسوريا اشرلي على رجال جبير بالعمر و كالي هذا مخبل .. كتله شلون مخبل ..كال باع راح يبقى يروح ويجي بالشارع .. و صدك هذا كام يروح ويجي بالشارع .. كتله تدري اول مرة انتبه عليه ..كالي اني هم انتبهت عليه هاليومين .. كتله زين شنو فلمة هذا ؟كالي مخبل والله .. كتله الله يشافي .. كال هو مسجل على الامم متحدة بسوريا و نقلو ملفة هنا و بعد فترة يطير لأمريكا ..كتله يعني تعرفه من سوريا .. كال يعني معرفة سلام بس ..كتله هذا هسة يروح هناك هم يظل يضرب قدم بنيويورك و كمنا نضحك ..و عادي مثل كل يوم رحت للبيت .. وراها شفته كم مرة للرجال و عادي يفتر بالشارع رايح جاي ..شسويلة يعني عادي .. فد يوم من الايام بالمعمل صار عدنا شغل قوي و المسؤول علينا كال الي يبقى لحد ساعة 10 بليل احسبله دبل يومية … بقيت اني و وياي بعد عمال ..طلعت و رجعت دنيا ليل .. جان اشوفه لنفس الرجال كاعد يلعب بالحاويات مال زبل الخاصة بالمطاعم الي عالشارع ..ما اعرف شنو الي خلاني اروح عليه بيومها .. كتله عمي شدسوي !!كال ممسوي شي و عافني و مشى .. بس من راح شفت جيس اسود عايفة بالكاع بصف الحاوية ..رحت عالجيس فتحته لكيته مجمع فخاذة مال دجاج يعني بقايا منها و شوية كفته و شغلات ثانية .. طلع خطية يروح و يجي يراقب العمال شوكت يذبون الزبل و من يشوف ماكو احد بالساحة مال حاويات المطعم … عالسريع يروح يلم بقايا الاكل .. .. بجيت رئسا و كمت ادفر بالحاوية كل قوتي ..رحت على الولد الي كالي عليه مخبل .. لكيته بالكهوة .. كتله هذا وين ساكن !!كالي ما اعرف والله بس هنا بالمنطقة وين يعني .. كتله زين اذا اريد اندله شلون ؟كالي لو تنتظره هنا من يفتر بالشارع و تلحكة … لو باجر عدنا بصمة انتظرة و لحكة ..و الله انتظرته ثاني يوم بالبصمة و اجه هو بصم واني بقيت امشي وراه .. اندليت وين ساكن ..هو ساكن ببيت ارضي بس صغير .. ومو بنص المنطقة ..مثل هيج بيوت يكون ايجارهم كلش رخيص .. دكيت الجرص وهو طلع ..كتله عمي اني عراقي منك وبيك و اعتبرني ابنك و طلعت فلوس ردت انطي .. جان يحضني كالي ممحتاج وليدي مستورة ..عاد طببني جوى كعدنا بالصالة .. بيته ما بي غراض .. حتى تلفزيون ماعنده ..جتي مرته حجية جبيرة جابت جاي .. و بنفس الوقت سمعت صوت ونين جوى .. كالها عوفي الجاي اني اصبله و روحي شوفيها ..طبعا حسيت بوقتها اكو شي مو طبيعي !!كتله عمي الله عليك لا تستحي مني انت محتاج شي ؟ كال ابني اني سالفتي سالفة .. كتله شنو ؟كال تعال كوم .. رحت وياه للغرفة الثانية وياريتني مرحت ..شفت بنية بس من هذولة الي عدهم ضمور بالعضلات و نايمة بالكاع و امها مخليه راسها على رجليها و كاعدة توكلها ..كالي هاي سبب طلعتي من العراق .. كتله اي و اريد ابجي كلبي انعصر عبالك واحد لزمة و حيل عصره ..كال بعت بيتي و طلعت لسوريا قبل متصير الاحداث بسوريا .. و كعدت هناك و سجلت على الامم متحدة .. و طلعلي قبول بس صارت الاحداث و جيت لهنا ..المشكلة هناك بسوريا اشتريت شقتين .. وحدة كعدت بيها و الثانية اجرتها حتى اعيش بفلوس الايجار .. وصارت الاحداث و جيت هنا .. عفت الشقتين همه وغراضهم و جيت بس اني و الهدوم .. الحمدلله جانت عندي فلوس جوى ايدي بس مو مبلغ قوي .. اجرت هالبيت و الحمدلله بعد شهر وشوية اطير لأمريكا بس انت مثل ابني والله خلصت فلوس و مرات اروح الم هالقاسمة الله من الحاويات ..كمت حضنته و بجيت بجي .. والله العظيم بيوم وفاة اخوية مبجيت هيج ..كالي شبيك وليدي هي كلها شهر و تخلص كل معاناتي ..كتله عمي ليش مرجعت للعراق .. كال والله من بدت احداث سوريا عرضت الشقق للبيع و ردت اصفي و ارجع بس منباعن .. و بالعراق ماعندي احد .. بس اخ واحد و متوفي و ولده موجودين وكل واحد ملتهي بحاله .. و زوجتي هم ماعدها احد و تريد الصدك ..الانسان ثكيل بهل الوكت وليدي و خصوصا احنا عدنا حالة خاصة .. يعني محد يتحملنا ..طبعا هو يحجي واني اشهك بالبجي .. كالي اسكت شبيك عادي ابني هسة اطلع وهناك الوضعية تتحسن و تجيني واجيك ..كمت كتله اروح بشغلة واجي ميخالف ؟كالي ابقى عالغده .. انوب هو كال هيج طكيتها ببجية قوية .. كتله عمي هسة اجيك ..رحت على الكهوة العراقية و حجيتلهم .. غير انتفضو و ابو الكهوة الله يستر عليه كام كال هسة وديني عليه .. عزل الكهوة و رحنا عليه احنا و الشباب .. بس شنو كل واحد تسوك هالقاسمة الله .. و رحنا عليه للبيت .. خطية كام يبجي بعد عمري .. حضن ابو الكهوة و ثنينهم بجو .. ابو الكهوة اكبر واحد بينا .. عاد خلينا الغراض و اكو ولد بالكاعدين صاحني على صفحة ..كالي عندي تلفزيون بالشقة امشي نروح نجيبه .. رحنا جبنا تلفزيون عالسريع و رجعنا و شديناه .. و ابو الكهوة خطية جابله صحن و ستلايت ثاني يوم .. و عيشناه احلى شهر بحياته حسب اقواله ..قبل ميسافر ودعناه .. طبعا يكول بحياتي كلها مرتاحيت و حسيت عندي ولد رياجيل … بكد هذا الشهر الاخير الي عشته بتركيا .. و خطية سافر هو و زوجته و بنته و بقى على اتصال ويانا و ابد ماكطع .. هناك مطلبو من عنده يشتغل لان جبير .. و يكول الحمدلله مرتاح بس منتظركم تجوني من يطلع قبولكم ..اللهم ارحم العراق و العراقيين ..(ابو البنيه)انتهىاخوكم ابو بغداد سايق التكسي#ابو_بغداد..