فريق شعبي

اليوم جنت كاعد وي ثنين عراقيين من نفس مواليدي تقريبا ثمانيات .. و رجال هولندي هو وزوجته اعمارهم سبعينات تقريبا (طبعا مع الحفاظ على مسافة الامان بالكعده علمود كورونا) … انفتحت مواضيع عالذكريات .. الهولندي طلع صوره قديمة من بيته .. و گام يحجي على الموجودين بالصوره و زوجته طبعا تعرفهم للموجودين بالصوره .. حجو على سفراتهم و صيد السمج و رياضة الركض وايام الكلية و طلعاتهم سوى و طلعو مفترين العالم كله حتى مصر و الجزائر و لمحاسن الصدف طلعو رايحين للعراق هم .. و بدو يكولون و يأشرون باصابعهم عالصوره يكولون هذا ساكن بامستردام جان محاسب و هذا بنفس منطقتنه هنا دكتور مال اسنان متقاعد و هذاك هيج عمله و هذيج هيج عملها … هالحجي كله طبيعي بس الي قهرني اني و الولد العراقيين .. الصوره مال الرجل الهولندي كل افرادها تقريبا عايشين (اتمنالهم الصحة و السلامة ) و صديقي من طلع صوره بتلفونه بيها فريق مال طوبه (فريق شعبي) .. هو جان من ضمن الفريق .. سألو عالموجودين بالصوره مثل ما احنا سألناهم .. صديقي گالهم الاغلبيه ماتو .. الهولندي تعجب و گاله بس همه من عمركم و انتو بعدكم صغار شلون ماتو!!!!صديقي هم استخدم اصبعه و بده يحجي و يگول … هذا استشهد بانفجار و هذوله بالطائفيه استشهدو و هذا انخطف علمود سالفة مساوم فلوس و انقتل .. كلتله كافي بالعراقي .. كالي ليش .. كلتله احنا جايين نقهرهم للعالم لو نكعد شوية وياهم و نروح .. كلتله باع عيونهم راح يبجون .. سدينا الموضوع و من طلعنه كلتله تدري احنا العراقيين كل صورنه هيج .. كال شلون .. كلتله يعني كل صوري مال الاعدادية و مال المتوسطة و حتى صوري بالمنطقة هم تلث ارباع الموجودين بالصورة راحو بأعمار صغيرة .. ليش ؟؟ ليش العراقي يروح ناقص عمر .. شنو ذنبنا انولدنا بهل البلد .. يعني من جينا للدنيا و احنا نوزع شباب باعمار الورد و ننزلهم جوى التراب … ليش .. من وعيت لليوم بس اسمع فلان استشهد فلان انقتل فلان تصوب و تعوق و فلان جابو ملفلف بعلم و و و و و و و و .. ليش نموت ناقصين عمر .. ذنبنا احنا عراقيين ؟؟؟ ذنبنا بلدنا نفطي ؟؟؟ذنبنا كل الدول متحبنا علمود اشياء احنا ممختاريها ولا النا ايد بيها؟؟؟ عمي اخذو النفط و اخذو كل شي بس خلونه نعيش كاملين عمر .. الي مراح بأنفجار لو بطائفية لو بحرب لو بارهاب هم راح ناقص عمر من الهبطات و الفزات و الخوف .. ليش صديقي كال ماتو ليش ما اشر باصبعه و كال (هذا متزوج وعنده ٤ اطفال و حاليا هو محامي بفلان مكان .. و هذا مهندس و متزوج وعنده طفل واحد و و و ) ليش راحو .. ليش انتهت حياتهم و همه صغار .. حالهم حال الي ديروحون يوميا و ميرجعون و همه مالهم اي ذنب بهل الدنيا غير بس عراقيين .. ليش مكتوب علينا هيج من دون الدول .. الرحمه و الخلود لكل عراقي .. انتهى اخوكم ابو بغداد سايق التكسي #ابوـبغداد