(موقفك قوي) #محطةـروح١

حسيتها مكسورة … تريد واحد يجبرها و يداوي جروحها … صافنة و وحيدة … حسيتها عدها غصة … تصرفاتها مو مثل تصرفات كل الواكفين .. هادئة و مبينه ميعجبها تسوي اي تواصل وي الداير مدايرها … مع العلم المكان الي كلنا بي متروس عراقيين و عرب من جناسي ثانية … واكفة بمكانها و تباوع عالوجوه .. عيني ابد ما نزلت من عدها و بقيت اراقب تصرفاتها … جوي وزعو الاكل علينا … اخذت حصتها بس ما اكلتها … ناعمة جانت و بنيتها الجسدية ضعيفة .. عمرها واضح بنهاية العشرينات .. اني كاعد جنت وي شباب عراقيين … هالحجي بمركز تسليم لاجئين بأحدى الدول الاسكندنافية … حاولت اروح احاجيها و اني اعرف كلش زين هالبنية عراقية … حسيت هي عراقية .. جانو بالمركز يسحبون من عدنا واحد واحد يسوون وياه شي اسمه انتر فيو … يعني نفوت لداخل غرفة التحقيق نحجي قصتنا و ليش عفنا البلد و جينا لهنا … والي ياخذوه بعد ميرجعوه .. يكملون وياه تحقيق و يطلعوه من باب ثاني يحولوه لشي اسمه كامب … و طبعا كل كامب بمحافظة … جوي صاحوها .. عرفت اسمها .. لغتها الانكليزية قوية .. اخذوها و راحت و اني كمت افتر بداخل القاعة .. وعرفت مراح اشوفها بعد .. لان الي قبلها اخذوهم راحو بعد مرجعو لهنا … و ورى ساعتين تقريبا صاحو اسمي .. حققو وياي و اخذولي صور و بصموني و حولوني لكامب ثاني .. الكامب عبارة عن كتاب قصص الف ليله و ليله … بي تقريبا ٤٠٠ قصة .. يعني ٤٠٠ انسان .. عوائل و اطفال و شباب … من واحد يمشي بداخل الكامب يحس روحه ديمشي بنص قنوات الستلايت … يسمع لغات .. انكليزي على افغاني على باكستاني على ايراني على عربي على صيني على ارتيري على صومالي .. اني استلموني الموظفين و انطوني جيس ازرك جبير … هالجيس بي بطانية و ماعونين و كوب و خاوليات و جراجف .. ودوني على غرفة .. الغرفة بيها سريرين .. جانو فارغات .. انطوني مفتاحين .. واحد يفتح باب الشقة و باب الغرفة .. و الثاني اقفل بي الكنتور .. و علموني على استخدام الطباخ و دلوني الغسالة وين و النشافة مال هدوم وين …
و انطوني كتاب بي تعليمات في حال صار حريق بالبناية شلون اتصرف و يا طريق اسلك حتى اتفادى الحرق … و انطوني وجبة طعام صغيرة بين ما تطلع هوية بنك استلم بيها راتب اسبوعي و هالهوية ثاني يوم استلمها … بديت حياة جديدة ورى هاليوم … حياة اتكيف بيها وي الناس الموجودين بهل العالم المصغر .. جنت اعرف انكليزي بس مو متمكن من اللغة … و لغة الدولة جنت ما اعرف منها شي غير بس الارقام و شغلات مثل السلام و بيش هذا وشكرا .. طلعت افتر العصرية بداخل الكامب .. جنت اشوف تجمعات من ناس .. كمت استخدم حاسة السمع حتى اشوفلي مجموعة عراقية ادخل بنصهم … و سمعت شباب يحجون عراقي جانو واكفين يم غرفة صغيرة بيها ادوات تصليح و بايسكلات مكسرة و بايسكلات ما بيها شي .. جان المسوول عن هاي الغرفة ولد تونسي … قديم بالكامب هذا او بهذا العالم المصغر … شغلته يصلح بايسكلات و لان كل اللاجئين جايين جدد و وسائل النقل غالية … مجبورين نركب بايسكلات … سلمت و وكفت يمهم و كلتلهم الشباب عراقيين .. كالو اي .. تعرفت عليهم و عرفتهم على نفسي .. و بدينا نسولف .. سألوني جديد ؟؟ كلتلهم اي اليوم جابوني .. كالو اذا تريد بايسكل ابو احمد العراقي يبيع بايسكلات بالاقساط .. يعني من تستلم اسبوعيتك تنطي نص و بالاسبوع الوراه تنطي النص الثاني .. كلتلهم اي اريد واحد .. اخذوني على ابو احمد الرجل جان من بغداد و كلش محترم .. انطاني بايسكل و جان عندي فلوس انطيته فلوس البايسكل كلها .. و الرجل كالي ترى اذا ماعندك عادي على الاسبوعية انطيني .. كلتله لا شكرا خالي متسوى و اصلا سعر البايسكل جان ٣٠ يورو يعني مو مبلغ جبير … اخذت البايسكل و رجعت يم الشباب العراقيين الي واكفين يم عبدالرحمن التونسي … كلتلهم اخذته كالو ديربالك لازم تسويله لايت امامي و لايت خلفي … لان هنا القانون مو مثل العراق … هنا اذا ما بي لايتات و يلزموك يغرموك … كلتلهم اني هوية ماعندي شيغرموني … كالو يغرموك اسمع من عدنا .. و جان البايسكل بي ضوه امامي يشتغل عن طريق الداينمو بس خلفي ماعندي و عبدالرحمن سوالي الخلفي … اخذت البايسكل و طلعت افتر بي ..
جنت مكيف من اشوف البيوت و مرتاح نفسيا و عبالك كاعد افتر بفلم كارتون مو دولة .. البيوت و الخضار و الشوارع النظيفة و الناس الي تسلم و تبتسم بالوجوه .. كل شي جان اليا جديد … بس خفت لا اضيع لان كمت امشي سريع .. رجعت عالكامب و رحت ادور على العراقيين الي همه احمد و روني و صفاء … احمد من اهالي بغداد و روني من الموصل و صفاء من الناصرية … رحت لكيتهم كاعدين على مسطبات بداخل الكامب ديسولفون .. كعدت وياهم كالووو هاي اشو رجعت شبيك دروح للسنتر .. كلتلهم مو ما اندل اخاف اضيع .. كالو امشي خلي نطلع كلنا ندليك المحل العراقي لان اكو محل عراقي مال غذائية كلنا نتسوك من عنده … و راحو جابو بايسكلاتهم و طلعنه كلنه .. رحنا للمحل العراقي و اشتريت من عنده كم شغلة .. و رجعنا للكامب … رحت للشقة و طبعا الطباخ جان مشترك و بداخل الشقة اكو خمس غرف .. كل غرفة بيها سريرين … يعني كل شقة تشيل عشر لاجئين .. بس الشقة الي اني بيها جان بيها بس اربع اشخاص و حتى الغرفة الي اني بيها جنت وحدي و السرير الثاني فارغ .. سويت اكل و طبعا جان اكو طاوات و جدورة مال ناس جانت بالشقة و راحو .. الي طلعله بيت و الي انطرد و الي ترحل … غراضهم تبقى مياخذوها … استخدمت طاوه بعد ما نظفتها زين و سويت اكل و اكلت و رحت لغرفتي … تمددت عالسرير جان الوضع كلش هادئ .. هادئ لدرجة الملل … و بديت احلم … احلم اعادل شهادتي و احلم اتعلم لغة و احلم اطلع ببيت و اشتغل بشهادتي … احلم يصير عندي عائلة … احلم … لحد ما غفيت اني و الاحلام الي جنت احلمها … بذاك الوكت من ضمن الاحلام الي جنت احلم بيها ان اتزوج بنية اقربائي بس بالعراق .. جنت أحلم بس انقبل بهل الدولة اسويلها لم شمل حالي حال الاغلبية هنا و طبعا من سألوني بمركز تسليم اللاجئين عن عندك لم شمل لو لا … كلتلهم اي اني بالعراق بس مو زوجتي ..
خطيبتي .. بذاك الوكت جان الانترنت بالعراق مو مثل هسه … يعني موجود بس قليل الي يستخدموه .. بنت عمي جانت بسوريا لان والدها هناك عنده استثمار .. و لان هي بسوريا اني جنت احجي وياها و طبعا كلت هي بالعراق مقابيل اللجنة الي حققت وياي لان اعرف همه ميطولون بسوريا … عالعموم نمت اني و الاحلام الي براسي و كعدت ثاني يوم على يوم جديد … كعدت من غبشة ساعة سته الصبح .. فتحت شباك الغرفة و جان الجو بي ضباب .. جو اوربي مثل ميكولون .. حسيت روحي محتاج اسمع فيروز و جان عندي تلفون بذاك الوقت نوكيا ان ٧٠ .. بي مقاطع مال اغاني فيروز … رحت سويت جاي و طلعت برى وكفت عالدرج .. و شغلت اغنية فيروز و خليتها على الاعادة .. وشربت الجاي و اني و اباوع عالمكان … وراها طبيت سبحت و طلعت الهدوم من جنطتي رتبتهم بالكنتور .. و صارت بالسبعة و نص و طلعت برى … كمت اشوف الناس بدت تطلع و ياها دفاتر و كتب .. نزلت امشي وراهم و شفتهم ديفوتون لقاعة جبيرة .. عرفت هالقاعة هي مدرسة تعليم لغة بداخل هالكامب … اني جنت جديد ميحقلي ادخل حاليا الا همه يدزون عليا … و رحت على الموظفين المسوولين عني و اني اصلا بالتسعة عندي موعد وياهم حتى استلم هوية الفلوس .. رحت و سلموني الهوية و كالولي كل يوم اربعاء ورى ساعة ١٢ تنزل. اسبوعيتك و تكدر تستلمها من اي مكينة فلوس … و سالتهم على الهوية الشخصية الي راح امشي بيها هنا .. كالو منا ليومين او ٣ راح تجيك رسالة من الوزارة حتى تروح تستلم هويتك من محافظة ثانية … و تشكرت منهم و بديت اتعرف عالناس الي بداخل الكامب … اول قصة او انسان تعرفت عليه معرفة كاملة هو امجد … لان مثل ما كلت المكان الي اني بي عبارة عن قصص .. قصص خاتله ورى وجوه ناس .. ناس طالعه من بلدانها تركض ورى حلم .. تركض ورى امان … تركض ورى عيشه هادئة .. امجد جان وحيد و مبين جديد مثلي … لكيته كاعد كاعد برى شقته و هم صافن عالناس .. ما جان عنده مدرسة مثل البقية و رحت سلمت عليه و طلع عراقي .. كالي تفضل تعال اكعد .. ضحكت كلتله هو اني من البارحة كاضيها كعدة يمعود اريد اشوف الدنيا … ضحك كالي تلحك .. كلتله شنو انته جديد .. كال اي مصارلي هواي سبع سنوات !!!!!!!!!!!! كلتله اكيد خربطت قصدك سبع ايام او سبع اشهر ..
كال لا سبع سنوات .. كلتله هااا يعني متجنس و جاي زيارة هنا للكامب .. كال لا عايش بالكامب .. بصراحة خفت و اتعجبت و صار عندي فضول افهم شديحجي امجد .. كعدت يمه و كلتله شنو سبع سنوات و شنو عايش هنا … كال شنو اول مرة تشوف واحد صارله سبع سنوات بالكامب ؟ كلتله هو اني كل وجودي بهل البلد مصارلي شهر … ضحك كال لعد راح تشوف الي مشايفه قبل بحياتك … كلتله بس فهمني شلون سبع سنوات … كالي اكو عشره و اكو تسعة و اكو ١٢ سنة .. كلتله مستحيل تتشاقى .. كال والله .. كلتله و باقين بالكمبات .. كالي اي و عايشين هيج مثلي … كلتله اسف عالكلمة بس اكيد عندك مشاكل حتى تبقى كل هالسنين هيج .. كال هو الناس تتخيل هالشي بس اني ماعندي مشاكل و امشي بصف الحايط مثل ميكولون ..
بس عادي مرفوض .. و كالي ماريد اهبط معنوياتك احتمال انته راح تكعد هالكعدة بعدين .. كمت وكفت كلتله انتحر غير انته مخبل باقي هنا .. ضحك كالي اكعد شبيك وكفت .. رجعت كعدت كلتله زين ليش مجربت غير دولة ليش مترجع … كالي اول شي اني مبصم هنا يعني اي دولة ثانية راح اروحها راح تطلع بصمة لجوئي هنا و يرجعوني … ثانيا انته تكدر ترجع للعراق ؟؟ كلتله لا .. كال خلص كل واحد من عدنا عنده ظرف .. و ما اريد اسألك ليش متكدر ترجع و لا اريد تسألني ليش ما اكدر ارجع … بس اتمنى ميصير بيك الي صار بيا .. كلتله داكلك انتحر اذا اتاخر هيج … يمعود اني مصارلي يومين هنا و بديت امل … اريد اروح انخرط بنص المجتمع و اريد اشتغل و اريد ادرس و اريد ….. جان يسكتني و كالي تريد تتزوج و تريد تسافر و تريد يصير عندك سيارة كلهم اعرفهم … المهم اهلا و سهلا بيك … كلتله وبيك .. و اني من كل عقلي هالولد عنده مشاكل و بسبب المشاكل مدينطوه اوراق … بقت هالفكرة براسي … و طلع قصة رقم ثنين من نفس شقة امجد … جان اسمه مازن .. طلع شايل كلاص جاي و جكارة .. اجه بخطوات هادئة عليا و على امجد .. سلم و كال لأمجد منو الولد ماعرفتنه عليه .. كلتله اني فلان و البارحة سفروني من مركز التحقيقات لهنا … كالي اهلا و سهلا … و جان مبين مازن مرتاح من كلامة و عنده فرح بكلامة بعكس امجد … بهل الحجي امجد كال راح اروح اجيب خبز من العراقي تريدون شي مناك ؟؟ كلتله لا رحم الله والديك … و راح و عافني يم مازن … بس راح كلت لمازن صدك امجد صارله سبع سنوات .. كالي اي المسكين .. و غيره هواي موجودين هيج .. كلتله وانته شكد صارلك .. كال اني مصارلي ٦ اشهر و اخذت اقامة و دانتظر البيت يطلعلي …
كلتله عالخير موفق حبيبي .. و بديت اسأله على تفاصيل الامور ما بعد تحصيل الاقامة … كالي هنا القانون ورى الاقامة يحددولك بلدية .. بهل البلدية يطلعلك بيت .. و من تروح للبيت تبدى تدرس .. كلتله مو هنا اكو بالكامب مدرسة … كال هاي مدرسة تمهيدية للمدرسة الجبيرة الي تروحلها ورى الاقامة … كلتله زين اني يصير اروحلها هسه .؟؟ كال ميصير اذا متاخذ اقامة .. حاليا يدرسوك بس بمدرسة الكامب … كلتله زين و اذا اذا اخذ رفض … كال يمعووود دكول يا الله … ليش تتشائم كله من ورى امجد .. كلتله بس فهمني اريد اخذ معلومات عامة … كالي ميدخلوك مدرسة اذا عندك رفض .. و كام يحجيلي على اصدقائه الي اخذو بيوت و بدو يتعلمون سياقة هنا حتى يشترون سيارات و شلون متونسين برى الكامب و يروحون سفرات و يدرسون و يشتغلون .. و افتهمت منه اذا واحد عنده رفض حتى شغل ميكدر يشتغل ولا يكدر يسوق سيارة او ماطور .. اقصى حد يسوق بايسكل .. و جان الولد بي طاقة ايجابية و نفسيته حلوة و كالي شنو رأيك نروح للسنتر نشوف شكو ماكو … كلتله يله اني ماعندي شي .. ركبنا البايسكلات و رحنا لسنتر المدينة .. طبعا كل مكان افوت بي اتاخر لان اريد بس اباوع .. و مازن يكلي يله … اخذني لمحلات الالبسة و محلات الغذائية الكبار و اخذني لمحلات مال الكترونيات و اجهزة كهربائية بس مستعملة كالي من تجيك الاقامة منا تعال اثث بيتك .. و فهمني انو الدولة تنطي قرض حتى الواحد يأثث بيته بي … و هو اصلا جان يشتري شغلات بسيطة يضمها بغرفته تمهيدا لحد ميطلعله البيت و يروح ينتقل و ياخذ الغراض وياه … و بوقتها اشترى بردة خشب و اشترى اوفن مستعمل .. من رجعنا بالطريق كالي عندك كمبيوتر .. كلتله لا والله .. كال شلون راح تمشي يومك لعد .. كلتله علواه الكه كمبيوتر رخيص حتى احجي وي الاهل بالانترنت .. كالي عدنا واحد بالكمب يبيع كمبيوترات اقساط .. كلتله ابو احمد ؟؟ كال لا ابو احمد بايسكلات يبيع بس ابو رضا يبيع كمبيوترات مستعملة و هم اقساط .. كلتله شنو فلم الاقساط هنا ؟؟
كالي هنا كل شي اقساط بس اخوتنه العراقيين عدهم فلوس جوى ايدهم يشترون بايسكلات مثلا بالفلوس لو شغلات و يبيعوها اقساط و يحملون عليها شوية يعني بالضبط مثل بالعراق مو اكو هيج شي .. كلتله بس حلو .. كالي اي … كلتله زين و الانترنت شلون ؟ كالي عن طريق تلفونك تربطه بكيبل و تنزل برنامج بالكمبيوتر تكدر عن طريقة تفتح الانترنت بالكمبيوتر .. و رجعنا للكمب و رحت لابو رضا و انطاني شاشة و كيس بسعر مناسب و دفعتله جزء من الفلوس و الباقي كل اربعاء اكمله .. و علمني مازن عالبرنامج و ساعدني بتنصيبه و فتحت الانترنت بغرفتي .. بذيج الفترة جنت احجي وي بنت عمتي الي بسوريا يوميا بليل .. هي جان عدها لابتوب بالبيت … و عرفت راح يرجعون للعراق بعد فترة .. و ورى يومين بالضبط … جتني رسالة من وزارة الهجرة حتى اروح استلم هويتي من الوزارة .. الهوية الي امشي بيها بالشارع .. و انطوني كارت اكدر اتنقل بي بالقطارات ..و انطوني خريطة و اسامي المناطق و ارقام القطارات الي راح اركبهم … و حتى الباصات لحد ما اوصل للوزارة .. و طبعا سألت مازن هم فهمني و دلاني و كالي باع مدام عندك كارت لا ترجع بسرعة .. روح ورى متستلم هويتك للعاصمة افتر لان هذا الكارت مفتوح .. و رحت للوزارة و جان مقابيل الوزارة اكو مكان بي مي و بط هواي … و اكو ناس كاعدين .. اني بوقتها عجبني اكعد هناك و جنت اباوع بوجوه الاجانب .. و صدفه عيني صارت على بنية دتنطي صمون للبط … البنية هي نفسها الي جانت وياي بمركز التسليم .. القصة رقم ٣ … من شفتها كلت معقولة هيج صدفه تصير و اشوفها بعدين تذكرت هي وياي سلمت يعني من السالفة مو صدفه .. تاريخ استلام هويتها وياي لان نفس التاريخ .. و هالشي عادي .. و قررت اروح احاجيها .. و رحت سلمت جان ترد السلام بصوت مثل الخايف و المتردد .. كلتلها ترى اني شفتج قبل كم يوم من جنا بفلان مكان .. كالت اي صح بس ما انتبهت عليك اسفة .. كلتلها انتي عراقية كالت اي .. كلتلها اني اخوج هم عراقي ..
كالت اهلا و سهلا .. و طبعا مجان اكو اي نية سوء تجاه البنية لان اني بنت عمتي ما ابدلها بالدنيا كلها و بس اريد تفرج عليا حتى ننجمع سوى .. و هالبنية مجرد فضول عندي جان تجاها .. حجيت وياها و عرفت اسمها جان اسمها دنيا … كلتلها انتي بيا كامب كاعدة .. كالت بفلان كامب و طبعا اسم الكامب او اسم المنطقة تقريبا سامعه .. و سالتني هي عالكامب الكاعد بي هم كلتلها .. و سالتها على موضوع الاقامة كالت بعد ما اخذت القرار .. و اني هم كلتلها بعدني .. و كلتلها عادي اخذ رقمج و خلي ببالج شي قبل كل شي ترى اني خاطب و بس اريد الله يفرجها حتى اجيب خطيبتي هنا و نتزوج يعني بس من باب الاخوة اريد رقمج و اخاف بيوم احتاجج او تحتاجيني .. جان تنطيني رقمها و سلمت عليها و رحت للوزارة .. اخذت الهوية و سويت مثل ما مازن علمني .. طلعت بالقطار للعاصمة بقيت افتر هناك .. طبعا مريت بموقف ما انحسد عليه .. هناك بالعاصمة من جنت اتمشى بالشوارع هواي اكو جناسي جايه لغرض السياحة .. اكو ولد بقى يمشي ورايا اني عبالي نشال بس كلت ممعقولة هنا اكو نشالة … الولد من صار ورايا كالي عربي ؟؟ كلتله اي و هو جانت لهجته عربية و من دول المغرب العربي يعني لو تونسي لو مغربي لو جزائري هيج لهجته .. كالي ابيض ؟؟ كلتله لا اسمر و ضحكت .. رجع كرر الكلمة كالي ابيض تريد ابيض .. كلتله شنو ابيض ترى ما افتهمتك ؟؟ كالي تريد ابيض كوكا .. من كال هيج عبالك رجليناتي خرطت من الخوف و افتهمت قصدة .. جان قصده كوكاين يعني مخدرات .. كلتله لا ماريد شي و جان امشي سريع و كلت بيني و بين نفسي يابوية خلي اطفر بعدني مصارلي شهر هنا انوب انلزم بسالفة مخدرات و كمت امشي سريع و اتلفت ورايا .. ابن القندرة (مكرم القارئ) طلع الونسى من خشمي و رجعت لمحطة القطار و كرهت حتى السفرة و ركبت قطار و رجعت للمحافظة الي ساكن بيها ..
و بس وصلت عالكامب حجيت لمازن و لامجد خربو من الضحك كالو ترى عادي هنا كل شي تشوف .. و نمت و وراها بيوم اجاني موظف من المسوولين عنا و كالي عندك مواعيد وي الدكتور و هاي هوية الدكتور و عندك مدرسة بداخل الكامب من باجر تبدي بيها .. و عندك لقاء وي الشخص المسوول عن قضيتك و بعد اسبوع عندك روحه للمحامي حتى تتناقش وياه على قضيتك و على كل الكلام الي حجيته بمركز التسليم .. و رحت ثاني يوم للمدرسة و للدكتور و بالمدرسة تعرفت على ابو امير و زوجته و جانو القصة رقم اربعة .. عراقيين .. و مقيمين .. حالهم حال مازن .. طاقة ايجايبيه عدهم .. و يريدون ياكلون اللغة اكل .. بسرعة يتعلمون المفردات .. و اني هم جنت مثلهم بسرعة اتعلم الكلمات .. و مر كم يوم و اجاني اللقاء وي المحامي و جان يومي بين كعدة يم الشباب و بين احجي وي بنت عمي بالانترنت و بين روحتي للسنتر شبه يوميا و بين روحتي للمدرسة الي بداخل الكامب .. و رحت للمحامي و طبعا جان اكو مترجم موجود هو الوسيط بيني و بين المحامي .. المحامي سألني كم سوال و كالي (موقفك قوي) عن طريق المترجم .. كيفت من سمعت هالجملة ..
و رجعت فرحان و اني احس الاوراق تقربت و راح احقق كل احلامي .. و رجعت حجيت هالحجي للشباب و كيفولي و حتى امجد كيف خطية .. و رحت كلت هالحجي لام امير و ابو امير و هم كيفو و كالو خلص لعد تقربت اوراقك و كعدو يسألوني وين تختار البيت اذا جتك اوراق .. وكمت اسال عالمناطق … و بقيت مستمر بيومي بس الي زاد انو كمت اخذ كورسات اللغة بالكامب و بنفس الوقت احجي بليل وي بنت عمي و ابشرها بموضوع المحامي ..
اليوم جان ينعاد بس بي تفاصيل تزيد .. يعني بالبداية جان بدون بايسكل .. و بدون كمبيوتر و بدون دروس لغة .. بعدين زاد بي اللغة و البايسكل و الكمبيوتر .. و زاد بي العلاقات بالقصص .. يعني بالناس .. و اليوم جان يطير هنا … و الاسبوع هم يطير .. و حتى الشهر هم يطير .. و فتحت عين سديت عين طارت ست اشهر .. و شوية كمت احجي لغة و بنفس الوقت اندل اكثر بالمنطقة .. و اجتني رسالة من الوزارة .. الرسالة تكول انته راح تاخذ رفض .. مو اخذت رفض .. بس راح تاخذ رفض .. الي قرولي الرسالة من الشباب القديمين وجوهم تغيرت .. بس ما حجو .. اني حسيت اكو شي و خفت اروح لاامجد اسأله لان هو اقوى واحد عنده لغة بالكامب .. بس كلت هذا كلش كئيب و هسه يكأب ام ام امي … خلي اروح للمحامي و اشوف السالفة .. و سويت موعد وي المحامي عن طريق المنظمة المسوولة عني و انطوني الكارت مال القطارات و الباصات .. بس هالمرة ما طلبت خريطة لان اندليت المحامي و رايحله قبل .. و رحت للمحامي .. نفس المترجم جان موجود .. المحامي شاف الرسالة و نفس الحجاية كالي .. كالي موقفك قوي .. و طبعا عن طريق المترجم .. اني كل الخوف الي بداخلي تغيرت .. من سمعت سالفة موقفك قوي .. و رجعت للكامب و حتى بيومها ما استخدمت الكارت حتى اروح للعاصمة .. رجعت مباشرة و كلتلهم هيج المحامي يكول ..
طبعا بهل الحجي مازن جان طالع لبيته الي هو بنفس المنطقة الي بيها الكامب … اني مجان عندي احد افرحه او احزنه وياي هنا .. جنت وحدي و اذا اريد افرح احد او افرح احد هي بس بنت عمي الي اصلا بذاك الوكت عافو سوريا و رجعو لبغداد .. و باقي الناس الي بالكامب .. و بهل الحجي بيت ابو امير و ام امير هم طلعلهم بيت و جانو ديجهزوه و اني رحت ساعدتهم بالصبغ و الديكورات و طبعا قبل بيت ابو امير اني هم رحت وي مازن ساعدته بترتيب البيت … عالعموم .. من اجه الليل كبل رحت عالكمبيوتر ربطت تلفوني و فتحت الانترنت و حاجيت بنت عمي .. كلتلها شلون جنت خايف من الرسالة ..
بس ارتاحيت اليوم لان المحامي يكول موقفك قوي .. كالت همززززين .. اني هم جنت خايفة حبيبي .. كلتلها ماكو شي .. و ما مر شهر على هالحجي جان يدزولي رفض .. استلمت الرفض و رحت ادور على احد يترجملياه .. ما لكيت غير امجد .. كلت بيني و بين نفسي هالمسكين شعليه .. اذا رفض رفض و اذا اقامة اقامة .. و رحت جان يكلي ماعرف بصراحة لان بي كلمات قانونية و مداعرف اقراه … ليش متسوي موعد وي المحامي احسن … كلتله لعد يكولون انته بلبل باللغة طلعت عصفور .. كال مو كلمات قانونية .. طبعا تشكرت منه و رحت بس بعدين عرفت انو هو كل كلمة و كل نقطة و كل سطر افتهمه بس مراد يقهرني لان يعرف هالشعور و حاسه قبل .. و يعرف هالرفض معناها مصيبة .. و سويت موعد و رحت .. و هم لكيت نفس المترجم و بصراحة كمت ما اتفائل بهل المترجم .. و لا حتى هالمحامي بس ماعندي حل .. الدولة موكفتلي هالمحامي … و هم انطيته الرسالة و رجع كالي موقفك قوي .. كلت معقولة !!! رفض و موقفي قوي !!! زين هاي شلون رهمت ؟؟؟؟ و هم كلبي هدأ و رجعت للكامب و جان بنفس اليوم بيت ابو امير دينتقلون .. ساعدتهم بالنقل اني و امجد .. و حجيت لامجد الي صار .. كالي اي خلص مدام كالك هيج لاتخاف .. كلتله لا ما اخاف و هم اجه الليل و رحت لبنت عمي حجيت هالشي .. بالمناسبة اني بذيج الفترة جنت اتصل بأمي و ابوية كل اسبوع مرة .. لان الاتصال غالي و اهلي مجان عدهم انترنت .. بس اي تفاصيل ما كايللهم على موضوع الرفض و جنت مرات اخلي بنت عمي هي تخابر امي تنطيها اخباري لان بنت عمي بالعراق و الاتصال ارخص .. يعني احجي وياها بالنت و اكلها خابري امي طمنيها … و هم مرت ٣ اشهر جان يجيني طرد ؟؟؟؟؟؟؟؟ اجوي الموظفين مال الكامب كالو انته عندك رفض و لازم تترك الكامب .. يابه اترك الكامب وين اروح ؟؟ كالو مو شغلنه .. كلتلهم عندي محكمة و طبعا هذا كلام المحامي .. كالو اي تنتظر محكمتك بس مو بالكامب ..
رحت يم مازن لان ماعندي احد غيره و الرجل ما قصر … خابرت المحامي و سويت موعد سريع بس شنو نار نار مشتعله براسي .. و سوالي موعد و رحت .. طبعا على حسابي الخاص واني اصلا بذاك الاسبوع مجان عندي فلوس هواي و حتى القطار ركبته بدون ما ادفع تذكره لان استحيت اتداين من مازن … و وصلت للمحامي وهم لكيت المترجم الفكر كاعد .. اول مكعدت كبال المحامي كلتله للمترجم قبل متكول شي .. اريد تترجم حرفيا الي راح اكوله للمحامي .. كالي تفضل .. كلتله كول للمحامي اذا كال موقفك قوي انعل والديه (مكرم القارئ) .. كالي العفو ما فهمت .. كلتله باع .. كول للمحامي اذا كالي موقفك قوي احرك والد والديه لان هسه اني بالشارع وين الموقف القوي الي صار اشهر يكلي بي .. وينه … و طبعا وصل كلامي للمحامي و يمكن موصله بطريقة حرفية بس كام يضحك المحامي و كاله حقه يتعصب و كالي راح بس يرادلك صبر .. كم اسبوع و اني ارجعك للكامب .. كلتله وين اروح .. كال يم اي صديق بس اصبر و سهله ارجعك للكامب .. و من هاللحظة بديت بحياة جديدة ..

المصدر / صفحة ابو بغداد