مصلح البايسكلات

بذاك الوكت جان عمري ١٣ سنة … اول مرة بحياتي اشتغل .. جنت اسمع كلمة شغل بس ما اعرف شنو هو الشغل … امي جانت بوكتها تودي غراض للسوك تبيعهم .. اكو مرية بالسوق عدها كماليات نسائية .. هي الي تتعامل وي امي .. جانت تجينا للبيت هواي .. و مرات تجيب هدوم اليا و لاخوتي … احنا خمس نفرات .. ابوية ميت و امي و خواتي ثنين .. بنات ثنين و اني الوحيد ولد .. اني بالتعداد الجبير و عندي اخت بذاك الوكت جان عمرها ١١ سنة و الصغيرة جانت ٧ سنوات .. ابوية وفاته طبيعية بس بعمر صغير يعني مجان كلش جبير .. اجه من الشغل طب سبح طلع تمدد بالصالة دينتظر امي تصبله اكل .. جتي امي جايبة صينية الاكل بيدها تكعد بي ميكوم .. ميت .. عمام ما عندي غير بس عمة وحدة و متزوجه و رجلها هيج هيج يكرهنا ماعرف ليش اصلا … و خوال عندي خال واحد و خاله وحدة و ثنينهم ملتهين بنفسهم و بصراحة يساعدونا بين فترة و فترة بس بشي قليل … اما الاجداد من طرف ابوية و امي كلهم ميتين … امي جانت تسوي شغلات بأيديها و تبيعهم لام الكماليات .. يعني شغلات حرفيه .. مثلا قراصات لو سوارات و تلزك عليهم سوالف بالصمغ .. و خياط هم تعرف تخيط يعني مرات ام الكماليات تجيبلها شغل امي تسوي و تكملة وتودي .. و عن طريق ام الكماليات اني اشتغلت اول شغلة بحياتي .. اشتغلت عامل بمحل تصليح بايسكلات و بنجرجي بنفس الوكت .. ابو المحل اسمه ابو محمود .. طبعا هو ابنه بعمري بس ابنه ميحب يجي للمحل و ميحب اصلا يشتغل .. علمود هالشي جان يدور عامل صغيروني يساعده .. و اني اشتغلت وياه .. جان يعلمني شلون اسوي البنجر و شلون افتح التاير و اطلع الجوب و شلون اعالج الزروف .. و شلون اصلح البايسكل و الزنجيل و سوالف كلها تخص البايسكلات .. و بنفس الوكت جان يعلمني (ازروق) البايسكل .. ازروق يعني اخلي شغلات بالبايسكل تسوي حلو .. مثلا مرايات لو بوصلة لو خرز بالسيامة مال التاير لو هورن لو نشرة ضوئية .. اني جنت من اشتغل ببايسكلات الجهال و اشوف الفرحة بعيونهم اني انقهر بس ما ابين هالشي كدام الجهال .. لان اغار .. جان يعجبني عندي بايسكل و اسوي بي الي يعجبني .. بس جنت اكول بيني و بين نفسي بمكان ما اركب بايسكل و ادفع فلوس عليه خوب انطي فلوسة لأمي و امي اولى بهل الفلوس ..
لان خطية جانت بس تريد تعيشنا بأي شي حلال .. انكسر ظهرها من الكعدة بالصالة بالكاع وهي تلزك بهل النمنم و هل البلك بالصمغ حتى تسوي قراصات لو سوارات .. خطية مجانت تعرف صنعه ثانية ولو تعرف جان سوتها .. بس بابا الله يرحمه جان مدللنه ومن راح اخذ الدلال وياه للتراب .. امي صغيرة جانت من مات ابوية و هي شالت المسوولية و اني جنت احس بهل الشي .. والله العظيم من جنت انام مرات بليل مثلا اكوم اشرب مي او اكوم اروح للتواليت (مكرم القارئ) و الله العظيم اشوفها بالصالة تشتغل .. ساعة اربعه بليل مرات افز وهي خطية بعدها كاعدة تشتغل .. زين مثل هيج اني اساعدها لو اطلب منها فلوس حتى اشتري بايسكل اونس روحي بي ..
طبعا اساعدها .. و لان كلبي نظيف و ما اريد اتعب اهلي .. ابو محمود فد يوم سألني كالي شعجب ماعندك بايسكل .. كلتله ما احبه .. كال ماكو واحد بعمرك ميحب البايسكل .. سكتت مجاوبته لان جنت داشتغل ببنجر .. كالي من تكمل الشغل الي بيدك اصعد فوك للطبكة اختار لشه نظيفة و نزلها .. كملت شغلي و صعدت فوك للطبكة مال المحل كمت اكلب باللشات مال بايسكلات (لشه يعني هيكل البايسكل بس بدون كلشي فارغ) .. لكيت لشه نظيفة نزلتها جان يكول هاي يا قياس .. كلتله اربعه وعشرين .. جان يجيب وياله و تايرات و بده يشتغل و اني اساعدة و جاب زنجيل و بريكات و سواه بايسكل كامل .. كال بله اطلع بي جربة .. كلتله شوية جبير عليا بس عادي اسوقة .. طلعت افتر بي و جانت احلى فرة بحياتي .. رجعت للمحل كلتله كلش زين .. كال يله هذا الك .. مصدكت نفسي و بوسته لابو محمود و لزمتني العبره ردت ابجي .. كالي و خلص اليوم شغلك روح اتونس بي .. طلعني من الشغل من وكت .. طلعت افتر بالبايسكل و ادور الجهال الي جانو يجون يصلحون بايسكلاتهم يمنا .. و افوت من يمهم و طبعا جانو يسلمون عليا لان كلهم يعرفوني .. كيفت بذاك اليوم و رجعت للبيت امي جانت تخبز بالطرمة .. شافت البايسكل كالت هذا منيلك .. كلتلها ابو محمود انطانيا فرحت خطية .. بيومها منمت الليل .. من الفرحه .. و ثاني يوم بديت ازروق بي و ارتب بي .. سويته يخبل .. و كمت يوميا اخليله شغلة و بعلم ابو محمود .. و فد يوم اني موكفة برى للبايسكل جان يجي ولد سأل على سعره للبايسكل .. عباله عراضي للبيع .. ابو محمود كالي بيعه و اخذ بفلوسه واحد غيره .. كلتله بس انته هديته اليا هالبايسكل .. كال واني داكلك بيعه .. بعته بسعر كلش زين .. و بفلوسه ردت اشتري بايسكل ثاني بس ابو محمود كالي لا .. كال اصعد فوك للطبكة جيب لشه و هم خلي نرتبها .. و علمني على شي جان غايب عن عقلي .. اي شي منحتاجه مو شرط نذبه .. لان يجيله يوم يصيرله قيمه .. و هالشي مشى وياي للكبر .. كمت اشتري شغلات متسوى و ارتبها و ابيعها .. كاونتر حديد تعبان اجيبه اضربه كاغد جام و اطكة صبغه حلوه و ابيعه .. مبردة تعبانة ارتبها و ابيعها .. تانكي مال مي بي خياسات اسوي خياساته و اصبغه و ابيعه .. كل هالشي اسوي بالحديقة .. و بذاك الوكت جنت بعمر عسكرية و لان مبطل اني لبست بالجيش .. بالجيش تعرفت على جنود من كل محافظات العراق ..
و جنت التقي بس الي مثل وضعي يعني يشتغلون لان الفايخين يدفعون فلوس للضباط و ينزلون .. و جان كل واحد بيهم عنده امنية شكل عن غيره .. واحد بيهم يريد يسافر ورى ميكمل عسكرية و واحد يريد يتزوج بنت عمه بس اهم شي يثبت بشغلة مستمرة و واحد يريد يفتحله مطعم صغير .. اني الوحيد بيناتهم جانت امنيتي غير شكل .. امنيتي جانت ازوج خواتي و استر عليهم وبس .. يجوز همه جانت من ضمن امنياتهم ان يسترون على خواتهم .. بس ميكولون هالشي لان ولد كاعدين .. اني مستحيت وكلتها .. كلت اني المسوول عن امي وخواتي واتمنى بس الله يكتب الخير لخواتي برياجيل يسترون عليهم و يخافون عليهم .. و يوم يجر يوم و كملت العسكرية وتسرحت .. بفترة الجيش جان اكو ولد حلاق ويانه يداوم .. جان كلبه كلش طيب و طبعا هو لحد الان صديقي .. من سمع اني اهلي مسوولين مني و اني الجبير كالي انته سالفة شغلك بالبايسكلات و بالتعمير مال شغلات قديمة و تبيعهم ترى شغل مو دائمي و ميعتبر صنعه .. كلتله بس المهم داسترزق منه .. كالي ليش ما اعلمك حلاقة و تفيدك للزمن .. يعني باجر عكبة وكف شغلك تكدر تشتغل حلاق .. و كام يعلمني شلون الزم المكص و المشط و شلون اتعامل وي المكينة و جان اصعب شي عليا اول مرة من زينت واحد .. ليش اصعب شي .. لان بوقتها هو جان اصبعه مضروب و ميكدر يزين .. و اكو ضابط راده يزينه لان جان متواعد .. و كاله خلي حيدر يزينك .. الضابط كالي تعال .. كلبي جان يرجف و كلت هسه اذا اخربط بحلاقته يشمرني بالسجن .. بس دعوات امي و خواتي جانت وياي وين ما اروح .. زينته و كيف بالحلاقة .. من رجعت سألت وسام (الحلاق) كلتله لك زينته و ولا غلط سويت .. كالي اذا مو هيج متصير حلاق حيدر .. و من يومها راحت الخوفة من كلبي و من جنت ارجع اجازة للبيت ازين جماعتي بالمنطقة .. و مثل ما كلت كملت العسكرية .. و كمت اشتغل شغلتين .. الشغلة الاولى حلاق .. و الشغلة الثانية ابيع و اشتري بالغراض ..
و الحمدلله مشت السالفة .. صديقي ابو الحلاقة الي هو بنفس السوك الي جنت اشتغل بي عامل يم ابو محمود .. فد يوم اجاني للبيت و شاف اختي .. خطبها مني و الحمدلله تزوجت الجبيرة .. و طبعا الولد هذا يتخلى عالجرح يطيب .. حباب كلش و مربى .. و الحمدلله اختي مرتاحة وياه وابد ما اذاها بيوم .. اني كلش اخاف على خواتي .. مجنت احس روحي اخوهم وبس .. جنت احس روحي اني الاب عليهم مع العلم ماكو فرق جبير و بينهم بالعمر .. بس من مات ابوية هيج حسيت .. جنت افرهم ورايا بالبايسكل و اشتريلهم كلشي يحبوه .. و جنت ابد ما اخليهم يتعاركون .. امي جانت كلش مأمنه من هالناحية .. و دائما تكول اذا اموت اني مأمنه على خواتك لان انته موجود واني جنت ما اقبل تحجي هالكلام و اتعارك وياها واكلها عمرج طويل وان شاء الله يومي قبل يومج لو يوم خواتي .. بس حرامات متحقق دعائي و امي توفت .. توفت و عافتني اني و خواتي بهل الدنيا .. بيوم وفاة امي حسيت هاي الكاع الي نمشي عليها .. الكره الارضية الي نشوفها بالتلفزيون شكد جبيرة .. حسيت هالكاع ببشرها بكبرها بهمومها بحروبها بدولها كلها خلوها بكونية و الكونية لحموها لحيم بظهري .. حسيت روحي احدب .. انكسر ظهري .. امي راحت .. صح امي جانت ماعدها كلشي و مموفرتلي كلشي بس جانت تحاول تدللنه بلي تكدر عليه .. و رغم قلة حيلتها بس جنا فرحانين بدلالها .. حبيبتي امي .. جانت من تخيلطي قطعة هدوم و تنطينيها .. جانت فرحتي بهل القطعه مال هدوم اعظم مليون مرة بفرحتي بقطعة هدوم جاهزة .. بس راحت امي .. و شلت الكاع على ظهري و كملت حياتي مهموم .. جنت يوميا من ارجع للبيت اتمنى الكاها مثل كل مرة وي اختي كاعدت بالطرمة عالجودلية .. بس جنت اشوف بس اختي .. اختي هم مثلي تكوم و تكعد تذكر امي وتبجي .. و كملنه حياتنا .. حاولت اطلع اختي الصغيرة من هالجو و جنت احاول اغيرلها نفسيتها و كدرت الحمدلله .. و ورى وفاة امي بسنتين تقدم ولد على اختي .. الولد امه جانت صديقة امي .. و سألت عالولد اني جنت اعرفه بس سلام بيناتنا .. و سألت عليه طلع متخرج جديد و هو موظف بالكهرباء .. و افقت اني بس موافقتي جانت مشروطة بموافقة اختي .. و وافقت اختي و تزوجت ..
بقيت وحدي بالبيت .. خواتي يوميا جاييني لكينالك مرة و شوف فلانة و شوف علانه .. اني جنت ما اريد اتزوج هيج .. جنت اريد احب او اختار وحده اني بنفسي اختارها .. و فد يوم بالبيت كاعد وحدي و صافن عالتلفزيون .. جريت الخط الارضي و خابرت على صديقي .. جاوبت بنية .. كلتلها بيت كرم ؟
كالت لا … و جان صوتها كلش حلو .. كلتلها بس اني متصل على هالرقم قبل كالت عادي صار غلط برقم يجوز .. ماعرف ليش ردت بس احجي وياها … هي نهت المكالمة بسرعة بس اني الرقم جان بعده مخزون بخاصية اعادة الرقم .. و خفت اذا ادوس اي رقم ثاني ينمسح الرقم القديم .. اني عرفت اني جنت مخربط بس ممتقصد بهل الشي .. و رجعت دست الدكمة الي تعيد الرقم و هي جاوبت .. كالت شتريد .. كلتلها هسه اذا احلف كلشي صار ممتقصد بي تصدكين .. كالت و بعدين ماشي صدكتك .. كلتلها بس الحلو بالموضوع انتي بنت منطقتي لان الي دكيت عليه من المنطقة و كلنا بدالة وحدة .. كالت زين و بعدين انته شتريد .. كلتلها ماريد شي غير بس نحجي اني مختنك .. كالت من شنو .. كلتلها عايش وحدي و كاتلتني الوحده كتل .. كالت وين اكو واحد عايش وحدة بهل الوكت .. كلتلها اني .. و بديت احجيلها قصتي .. اول مبديت احجي قصتي سكتتني هي .. كالت كلي رقمك شكد .. خلي اسجله يمي اخاف ينكطع الاتصال لو يفوت واحد من اهلي واسده .. حتى بعدين اني اخابر عليك .. انطيتها رقمي و كتبته يمها .. و كلتلها اسمي هم .. و كمت احجيلها .. انقهرت عليا .. بس لان هي من المنطقة طبعا عرفت السوك و عرفت ابو محمود ابو البايسكلات ..
و كلتلها اني حلاق … و دليتها حتى الحلاقة .. و بدت يوميا هي الي تتصل بيا … يوميا كمنا نسولف بس اني ماعرفها منو و لا اعرف رقمها بس الي متأكد منه رقمها نفس رقم بيت كرم بس اكو رقم واحد مختلف و ماعرف وين الاختلاف بيا رقم و اصلا ماعرف الرقم ياهو .. و اذا اريد اجرب مراح الكاها اصلا .. و يوم ورى يوم بديت اتعلق بيها و نستني الخنكه الي اني بيها … و جانت دائما تسألني على أمي و على خواتي .. و كل ما اكلها اريد اشوفج تكلي مو وكتها .. تعلقت بيها للبنية كلش .. و كمت يوميا من اروح للحلاقة بالسوك اباع بالوجوه و من اشوف بنية شابة اكول بيني و بين نفسي يمكن هي .. و مرات جانت تكلي قميصك حلو اليوم .. و مرات تكلي شعجب لابس كابوي مو الجو حار البس بنطرون قماش .. جانت هي تشوفني بس اني ما اشوفها .. و مرت على علاقتنا ٥ اشهر واني مشايفها بس متعلق بيها و ليلي ميخلص اذا متحجي وياي حتى لو كلمتين .. و بديت احجي وياها بموضوع الزواج ..
و طبعا اني حلاق و طالعه عيشتي و اكدر افتح بيت و بنفس الوقت مرات اشتغل بالبيع و الشراء و هالقاسمة الله احصل .. يعني ظرفي يسمحلي اتزوج .. و هي جانت قابله بالفكرة و كالت خلص اطلبني .. و اني لحيت على سالفة شوفتها .. و هنا جانت المفاجاة الكبرى الي متوقعت بيوم من الايام راح تصير … طلعت هي اخت كرم و اني ممخربط بالرقم .. و كالت تعال لكرم واني افتح الباب و راح تشوفني .. طبعا من كالتلي هيج انقهرت .. حسيت روحي طعنت صديقي بظهره .. و سألتها ليش مكلتي انتي اخت كرم … كالت ماعرف والله جنت ضايجه من أمي ومتعاركة وياها .. و زعلانة و كاعدة فوك .. و خط التلفون الارضي فوك مصعدي و اصلا بالبيت قليل كلش نستخدم التلفون .. و دك التلفون انته .. كلتلك غلط و انت رجعت دكيت .. و اني جاوبت و عبالي راح تكول هذا رقم كرم بس انته ردت تسولف واني مشيت وياك بالحجي .. و بصراحة اني سامعه اسمك و اصلا شايفتك قبل مرة يمكن وي كرم بالسوك .. و حجيت وياك و مجان ببالي شي و انقهرت عليك من كلت مختنك و كلت خلي يكمل كلامه و يفرغ حزنه و بعدين من تسد التلفون اني ما اجاوب بعد عالتلفون ابد .. بس من حجيت على امك و ابوك و شلون بحياتك تعبت بقيت مستمرة وياك و اني الي كمت اتصل بيك بس جنت اخاف اكلك انته ممخربط بالرقم واني اخت كرم .. وهسه لان نيتك زواج و ارتباط تعال و اني افتحلك الباب و شوفني .. كلتلها لا والله ..
راح اتقدم عليج و بدون ما اشوفج و اذا سألوني منين عرفتها و طبعا اني متاكد مراح يسألون لان اني صديق كرم و مية بالمية راح يكولون شايفها صدفه بالسوك او من جاي لكرم ..
بس اني هالشي راح اسوي علمود بلكي يقلل من الغلط الي سويته وياج .. كرم صديقي و اني احبه .. و قابل بيج شلون متكونين ..
و اني اصلا احبج يابنت الناس .. و اخذت رياجيل خواتي و اهلهم و تقدمنا للبنية و صارت الموافقة .. والله العظيم و روح اهلي مشايفها اني .. و كلت شلون متطلع خلي تطلع .. و شفتها بعدين .. طبعا البنية ما بيها قصور و حلوة .. و هواي شالت من الحمل الي على ظهري ..
و بدت تنسيني القهر .. و عرفت انو الله ياخذ من صفحة بس ينطي من صفحة .. و بنص فرحتي على لحظة اجاني خبر وفاة اختي الصغيرة .. بعدني ستوني مصارلي سنتين من تزوجت … اختي الصغيرة حبيبة كلبي ماتت هي و رجلها و بنتها بيوم واحد ..
سيارتهم انكلبت على طريق الكوت .. يعني اني مقدرلي هالكون ما اعيش بسعادة .. و من ارتاح شوية لازم يصيرلي قدر يحركني حرك .. من صغري و اني الفرحة ممكتوبتلي .. و تالي بس شوية فرجت صار عندي شغل و خلصت عسكرية امي ماتت .. و راها لكيت الفرحة بزوجتي و هم يا فرحة ما تمت .. اختي و رجلها و بنتها بيوم واحد … ليش .. ماشي قدري هيج .. بس اني ممسوي شي اتحاسب عليه .. ومن يومها صارت بيا خوفة .. صار عندي جهال و جنت ما اخلي راسي عالفراش اذا ما اتصل على البقالي بهل الدنيا (اختي)اسأل عليها و على رجلها و على جهالها ..
و الصبح اسوي نفس الشي بعد ما اشوف جهالي و مرتي بخير .. و الخوفة بدت تزيد عندي يوم ورى يوم .. و هالخوفة اثرت على جهالي من بدو يكبرون جنت احصرهم بالبيت كبالي يله ارتاح .. و هالشي مجان يعجبهم لان خطية جهال بيهم طاقة و يريدون يلعبون .. و حسيت اكو شي غلط عندي ديصير و بديت اراجع اخصائي نفسي .. و بديت اتعالج و طلعت مريض بشي اسمه وسواس قهري obsessive compulsive disorder و يوم ورى يوم علاج و ادوية بدت تقل عندي الحالة .. بس المصيبة العلاج جان يأثر على شغلي خصوصا اني حلاق .. و كعدت فترة من الشغل (بالمناسبة اني عندي حلاقة لوحدي حاليا) و تعالجت اخيرا .. اني اعرف هواي ناس مرت بظروف و فقدت اعزاء عدهم و بحالات ثانية هم صار عدهم هالشي .. بس ماكو افضل من العلاج و هسه اني طبيعي بس مرات ترجعلي الحالة للأمانة و بأوقات ابد مو مناسبة اتصل على اختي و افززهم بالبيت .. و مرات هيج بدون سابق انذار اكوم اركض اشوف الجهال نايمين بالغرف .. بس شي على شي بالبداية وين و هسه وين .. يعني بالبداية جنت اكرر هالسوالف بكثرة .. و عالعموم .. حقي .. حقي لان الي صار وياي مو هين ..

انتهى

المصدر :صفحة ابو بغداد