مردوده

صديقي هنا يمي .. يگول بالسته و ثمانين جان عمري سبع سنوات ..
بذاك الوكت جانو اغلب الي يسوقون سيارات المهملات مصريين الجنسية .. يعني ناس متغربين على رزقهم .. أمي چان كل ميجي السايق مال السياره تنطي دبة مال مي مجمده و تاخذ من عنده دبه فارغة و رأسا تترسها مي و ترجعها للمجمده ..
و چنت اسمع كلمة (مردوده) من ابويه .. من كبرت عرفت معنى الكلمة ..
احنا وضعنا المادي مچان زين كلش بذاك الوكت .. و منگدر نساعد بشي چبير لهل السايق المتغرب .. ابوية گال لامي ابسط شي نساعد بي هو المي البارد .. لان خطيه الصيف مالتنا حار و هو المسكين و وياه بعد ولد هم مصري يفترون ياخذون الجياسه مال الزبل (مكرم القارئ) من بيت بيت .. ابوية جاب دبتين و جمدهم و انطه وحده للسايق مجمده … و كاله للسايق كل متفوت من يم بيتنا دك الباب و انطينا الفارغة و اخذ غيرها مجمده … جنت اتذكر هاي التفاصيل و حتى من كبرت ابوية جان يحجي بهل الموقف كدامنه و مره سالته كلتله ليش هيج جنت تسوي .. كالي مردوده .. كلتله شنو مردوده .. كال يعني الي تسوي دائما لاتنتظر يجيك رد عليه بنفس الوكت بس ينردلك اذا مو الك لاهلك و اذا مو لاهلك لجهالك .. كلتله زين و نسيت الموقف و مرت سنين العمر و كبرت اني و بعد ما شفت مصريين بالعراق غير بس بالتلفزيون .. بسنة ٢٠٠٧ .. طلعت تهريب من العراق … رحت لتركيا و من تركيا عبرت لليونان بالبحر .. و رحت لأثينا و حاولت اطلع طيران بجواز مزور .. المهرب كالي لا تحاول من مطار اثينا لان شوية عليه عين .. خلي اطلعك من مطار جزيرة .. هناك شوية التدقيق يصير اقل .. و اخذلنه تذاكر بس الطيران من جزيرة (رودس) .. اني و وياي شباب ثنين واحد عراقي و واحد صومالي .. انلزمنه اني وصديقي بالمطار و انكشف الجواز تزوير .. حبسونا اسبوع و طلعونه و لان المهرب بأثينا لازم ننتظر يوم كامل لحد ميجي المهرب يرجعنا لأثينا و طبعا بهل الاسبوع صرفنا فلوسنا كلها بالسجن و اصلا جان مبلغ بسيط بجيبنا و باقي فلوسنا عايفيها يم المهرب و هو على اساس يحولها النا من نوصل للنرويج .. زين احنا بدون فلوس .. شنسوي ؟؟
طلعنا اني وصديقي و بقينا نفتر يم البحر و شفنا مكان بي سفن بس صغار .. احنا كل بالنه هاي سفن مال ناس زناكين يفترون بيها بالبحر .. بس بعدين عرفنا هالسفن الصغار كلش هي قوارب صيد خاصة بالمصريين .. كعدنا على ممر خشب مبني على المي .. بصف قوارب الصيد او سفن الصيد .. فاتو مصرين ثنين بكصتنا .. عرفو شكلنا عربي و سمعونا نحجي عربي سلمو علينا .. السلام عليكم … احنا ردينا السلام .. كالو شبيكم عدكم مشكلة .. حجينا المشكلة مالتنا اني و ياسر .. و كلناللهم تلفوناتنه مخلصه شحن ممكن بس تشحنوهم .. اخذو التلفونات و راحو حجو موضوعنه لصاحب السفينه لان عرفنا بعدين همه عمال وياه .. طلع سلم علينا و جابلنه بطاله مال مي و انطانه جكاير .. بوقتها كلت بيني و بين نفسي المهم ساعدنا .. حتى لو بطل مي و جكاير .. اشو لهناك و طلع واحد من العمال شايل وياه صينيه جبيرة .. متروسة اكل .. و كعدنا كلنا عالرصيف او الممر هذا و بدينا ناكل سوى .. بوكتها جان الجوع كاتلنا .. و شحنولنه التلفونات و حلف المصري ينطينا فلوس بس احنا ما قبلنه و حلف ينومنه يمه حتى لا ننام بالشارع .. بس احنا مقبلنه لان هالشغلة احتمال تضره قانونيا و احنا منريد نضر احد .. بيومها عرفت الي ابوية جان يسوي وي جمعة المصري .. انرد اليا .. و صدك مردوده .. و طبعا وراها لغيت سالفة السفر للنرويج و جيت لهولندا و هنا اول منزلت موصلت لهولندا جانو العراقيين كايليلي بس تشوف شرطي تسلم روحك .. و اني بأمستردام اركض ورى الشرطة و محد ميقبل يستلمني هههههه .. وراها كمت ادور شغلة اسمها (بوليس ستيشن) يعني مركز شرطة .. امشي و اسأل بالناس وين البوليس ستيشن .. دلوني مركز .. اشو رحت للمركز ماكو لاندكروزات و لا حراسات و لا ناس شايله سلاح .. باب زجاجيه مسدوده .. منفتحت مسدوده .. دكيت الجرص وچان تجاوبني وحده من الحاكية .. كلتلها اي ام اراكي .. اي ام كوم رفرجي .. يعني اني عراقي و جاي لاجئ هههههههههه .. فتحت الباب و فتت .. كلتلها اني جيت من عراق و اريد لجوء ..
هي ابتسمت كالت شنو اسويلك ؟؟
كلتلها يعني اسلم نفسي .. كالت هنا مو مركز تسليم لاجئين .. و طلعتلي خريطة و انطتني تكت مال باصات … و انطتني بطل مال مي و خمسة يورو من جنطتها الشخصية كالت بس هالشي اكدر اساعدك بي .. اني طلعت الفلوس من جيبي كلتلها اني ممحتاج فلوس اني اريد مساعدة .. كالت اني ماكدر اساعدك بس بهل الشي … ولازم تروح لمكان اسمه (تير أبل) و طبعا موضحته بالخريطة .. و رجعتلها الخمسة يورو و اخذت بطل المي بس و تشكرت منها و طلعت .. رحت افتر بالسنتر مال امستردام .. ادور أي واحد يحجي عربي لان لغتي الانكليزية مو قوية و هنا الناس بس يحجون هولندي .. و اكو مكان اتوقع اغلب العرب الي ساكنين بهولندا يعرفوه .. هالمكان ينسمع بي اغاني ام كلثوم و عبدالحليم حافظ و فريد الاطرش .. سمعت ام كلثوم .. المكان مطعم مصري معروف كلش بامسترادم .. اني كمت اتتبع الصوت و شفت كتابة عربي غير روحي رجعتلي .. لان اريد احد يوصلني لهل المكان الي بالخريطة و المصيبة ماكو تكسيات بالشارع توكف .. رحت للمطعم سلمت و هم كلتلهم اني جاي من العراق هههههه .. اول شي سوو اليا كالو لازم تاخذ خط اتصال هولندي .. حتى احنا نساعدك بالترجمة اذا صرت بعيد .. و اشترولي من محل مال ولد هندي خط (سم كارت) اسمه لايكا .. يصيحوله خط الفقراء هههههه .. و صبولي اكل و حلفو مياخذون فلوس ..
و لمحاسن الصدف واحد من الشباب المصريين اخته متزوجه عراقي .. خابر عليه و رأسا اجه لان شقته قريبه من السنتر .. اسمه صباح .. الولد من اهالي الحبيبية و صارله ٢٢ سنة متغرب بوقتها .. حلف ما انام بفندق .. الا بشقته .. و ثاني يوم اخذني لمركز اللجوء بسيارته الشخصية .. و حجيتله سالفة ابوية (مردوده) كلتله يعني بطريق سفري الي سووه امي و ابوية انردلي مرات متكرره .. مره باليونان و المرة الثانية هنا بالمطعم و مره بالمركز و مره وياك و و و و كومة انردلي .. و كل ما اكعد بنص ناس اسولف المردوده … الف رحمه على روحك يابه .. حجايتك بوقتها ما كلش اهتميتلها و متوقعت راح تنردلي .. بس انردت يابه .. العبرة على كولة ابوية .. ساعد و لاتنتظر بنفس الدقيقة ينردلك الي ساعدت بي .. بس اول و تالي شنووووو مردوده ….