كلاصين نفس النوعية و نفس النقشة و نفس اليده …

الكلاص الاول ببيت مرتب و نظيف و عدد سكان البيت اربعه .. مكان الكلاص بعد الاستعمال بالكاونتر .. على قماشه ناعمه و حلوه تمتص بقايا الماء بعد الغسل .. وطبعا هالكلاص يطلع بس بوقت الاحتياج .. و الايادي الي تلزمة محدودة .. مكانه بنص الكاونتر بنص اخوته الكبار القواري و الصغار الاستكاين .. مرتاح بنص الجو العائلي و المواضيع المفعمه بالطاقة و ريحة البيت تخبل و الاثاث يفتح النفس ..

الكلاص الثاني مربوط بخيط مال گونية شكر من ايده بترمز مال مي بارد .. الترمز مكانه بشارع مزدحم بالماره و بصفه كراج و الترمز يعود الى شخص صاحب عربانه يبيع بيها لفات فلافل .. الكلاص هذا شبع تعب و ظيم و تعرض للاهانة .. مرات يعوفو من يخلصون المي الي بي و يوكع و تتاذة ايده المربوطه .. و مرات من يجيبون الثلج يفصلون قبغ الترمز و يشمروه على صفحة ولان مربوط الكلاص بالقبغ راح يتاذى و ينشمر وي القبغ و ينهان .. و المسكين يتنقل من ايد لأيد ..ايد تشيله و تاخذ غرضه منه و تمتصه مص و تعوفه .. و ايد خشنه تعامله بقسوه ..
المسكين بمرور الزمن تعرض للكسر اكثر من مره .. بس جان يتحمل ليششش ..
لان مجبور يبقى بهل البيئه الي هو مختارها ..
مجبور ..
حتى المواضيع الي يسمعها جانت مواضيع تخص شغل و عمل و عيشه بعكس الكلاص الاول يسمع ضحكات الاب والام و الاطفال ..

الفرق بين الكلاصين ..
محد اختار المكان الي يراح يعيش بي

مع العلم ثنينهم نفس النقشه و نفس الوزن و الحجم بالضبط

/ احنا مثل الكلاصات
مختارينه لا دينا ولا اسمنا ولا جناسينه ولا حتى مستوى ذكائنه
انولدنه كل واحد بمكان
ماكو فرق بيناتنا ابد
لا تضحكون عالناس الي اقل منكم وعي او فهم
لا تكولون عالفقير كلمه محلوه
لا تستغلون الناس لان محتاجيكم
كل الفرق بينكم و بينهم
انتو بالكاونتر و جواكم وصله ناعمه
و همه مربوطين بقبغ الترمز الي بالشارع

المصدر / صفحة ابو_بغداد