قصص من الغربة

من سالوني اول مرة قابلت بيها بالتحقيق الي على اساسه اخذ الاقامة … كالولي انته متزوج .. كلتلهم لا .. كالولي انته خاطب … كلتلهم لا … كالولي مصادق كلتلهم لا … يعني كل الاجابات جانت لا .. و حتى سالوني عندك اطفال و بوقتها جنت متوقع السوال يضحك و حتى ضحكت .. المحققه سالتني ليش تضحك … كلتلها لان كلتلهم ممرتبط منين اجيب الاطفال .. كالت اني قصدي اطفال غير شرعيين حتى بعدين تجيبهم ورى الاقامة … كلتلها لا و طلع هالشي روتيني و لازم الواحد ينسأل … اخذت الاوراق و استقريت و بديت اشتغل .. اني بالعراق ماعندي اي شهادة و دراستي لحد صف ثاني متوسط … هنا تعلمت اللغة و تعلمت ودخلت مكان يأهلني للعمل بمجال البناء .. شغلي جان مرتبط بالتأسيسات .. انطوني شهادة و بديت اشتغل … خلال كعدتني هنا صادقت اكثر من بنية اجنبية … طبعا كلهم مجانو يدورون ارتباط و زواج و جنت بعدني صغير … يعني علاقات ما بيها اساس … مجرد صداقة … وجانت بيا خوفة من الزواج من اجنبية … و حاولت اصادق عربية و اغلبهم بذاك الوكت جانو مولودات هنا … و مجانو العرب هنا هواي .. يعني اعداد قليلة … صادقت عربية طلعت حالها حال الاجنبية .. ما بيها اي فرق … لان مولوده هنا و متربية هنا و حتى اللغة مالتها مكسرة و اصلا بيهم هواي ميعرفون عربي … اشتغلت بمكانات هواي … و تنقلت بكل اوربا … مره سويد مره هولندا مره المانيا … و اخر شي استقريت بمحافظة ايسين الالمانية … اشتغلت بالبناء كالعادة نطلع نأسس مباني و هالامور … شغلي زين و مستمر ادور على شي اسمه بنت الحلال و مثل ما كلت اني بالبداية بالتقديم ما كلتلهم متزوج او مرتبط حتى اكدر اسوي لم شمل اذا اروح للعراق اتزوج … يعني كلت اتزوج منا و ممعقولة ماكو وحده بنت اوادم …
جنت استحي افتح الموضوع وي العرب الي يشتغلون وياي او اهل المطاعم العربية الي التقي بيهم … و جنت هم التقي بمقهى بي عرب و هم نفس الشي و هالشي بي اسباب .. اولا اني وحدي … يعني ماكو ام لو اب عدهم علاقات عائلية وي غير ناس حتى يشوفولي … كل شي لازم اسوي وحدي … ثانيا اني من طبعي اشوفها صعبة اسأل احد اريد تشوفلي بنية اتزوجها … وكلت بلكي الكالي وحدة … و صدفه بيوم من الايام اكو مطعم لبناني بنص ايسن يجون بي عرب … طبعا اني قليل اروح بي … رحت و جان عدهم كراسي و ميوزه منصوبات بره … طلبت اكل و كعدت اكل و فاتو بنات ثنين مبينات عربيات … كمت لحكتهم و نسيت ادفع فلوس الاكل … بقيت امشي وراهم و شفتهم بيا عمارة صعدو … قريبين من شقتي بس مشايفهم قبل … رجعت لابو المطعم دفعت الحساب و كمت يوميا اروح اكعد اكل بهل المطعم .. علمود بلكي تفوت هالبنية و اشوفها … و شفتها و لحكتها و حاولت احجي وياها … طلعت عربية بس مو عراقية … و طبعا ولا كلمة عربي تعرف غير بس الكلمات الرئيسية .. و صادقتها .. كمنا نطلع سوى و نسولف سوى و كلتلها اني نيتي زواج … طبعا هي هم شكلها عربي بس ثقافتها و تفكيرها الماني ميه بالميه … و هم جانت ممهتمه لسالفة زواج … و هم فترة اشو هاي كبل اني ما اريد اكمل وياك … يابه ليش .. بدون اسباب .. هيج فجاة متريد تكمل وياي .. عفتها … او الاصح هي عافتني …
و شفتها ورى فترة مصادقة ولد تركي … وبيوم من الايام ورى اشهر من هالحاله اتصلت بيا نفس البنية … كامت تحاول ترجع العلاقة … واني ما قبلت و بالاخير انقهرت عليها لان كلش لحت … رجعت وياها و بدينا نطلع و نطب و كالتلي غلطة ترى الي صار … و بعدين ورى مده هم عافتني و رجعت لنفس الولد والله العظيم هههههه طبعا بوقتها اني حتى اكون صريح كلتلها ماشي نرجع سوى بس شيلي فكرة الارتباط من راسج يعني اني وياج مجرد اصدقاء و بس … المهم من صار هيج الموقف كلش كرهت نفسي و بطلت علاقات نهائيا … و مشت السنين و اني بس اشتغل و اجمع فلوس و هاي هي … من اخذت الجنسية قررت ارجع للعراق اتزوج و اسوي لم شمل لان عندي شغل و عندي جنسية و راتبي زين و كل شي رسمي … رجعت للعراق و اهلي شافولي وحده كرايب جوارينه … اتزوجتها و سويتلها معاملة طولت شوية بس اخر شي جبتها لالمانيا … البنية حبابة … بس يوم ورى يوم كامت تحس بملل لان اني اطلع للشغل من الستة الصبح ارجع ساعة سبعة او ستة العصر … كامت تكلي اريد اسوي شي اني مداتحمل كعدة البيت و طبعا موضوع الاطفال تأخر و جنا ناخذ علاج ثنينه و نراجع اطباء اختصاص … كلتلها شتريدين تسوين يعني كوليلي … كالت اريد اشتغل .. كلتلها لغتج مو قوية شلون تشتغلين .. كالت اتعلم لغة يعني كامت تمشي نفسها …
اشتغلت بمكان متحتاج بي لغة هواي … و هي و تشتغل صار حمل … كعدت من الشغل و صار عندي منها بنية … و بطلت نهائيا و البنية كبرت شوية كامت تفتهم .. زوجتي صارت طلباتها هواي و اقسم بروح ابوية و داعة امي ما جنت اقصر وياها … رادت تتعلم سواقة و رادت سيارة واني لان عندي ما قصرت …كامت تطلع و تطب و صار عدها علاقات وي بنات هواي … مرات جنت ارجع من الشغل الكه بنتي نايمة مقابيل التلفزيون و زوجتي ماكو .. اخابرها تكلي طالعة وي البنات دنفتر … اني هالشي كام يضوجني .. و تعاركت وياها اكثر من مرة .. طبعا هي من صار عدها علاقات هواي وي بنات كامت تسمعني القوانين الي اصلا اني اعرفهم … يعني تسمعني .. تكلي اكو وحدة من صديقاتي زوجها تعارك وياها و دائما يتنحس وياها و يصيح عليها انفصلت منه وهسه كاعده هي و جهالها ببيت وحدها … جانت تختار قصص بيها تهديد بين السطور بس متكلي طك بطك ديربالك … هالحجي مشت السنين و هي تجنست … طبعا ما صار عدنا جهال بعد غير بس هالبنية .. بنتي عربيتها مو قوية .. جنت اكلها يابه علميها عربي .. تكلي و شتسوي بالعربي اذا هي عايشة هنا … يابه قوي لغتها اني دائما بالشغل و ماعندي وقت .. تكلي ماشي و من اسال بنتي تكلي صح هي تعلمني بس من يجيها تلفون تبطل تعليم و تروح تبقى تحجي وي صديقاتها … المشاكل زادت يوم ورى يوم .. اخر شي هي بنفسها جتني كالت اريد انفصل اني ما اتحمل بعد هالنحوسية مالتك .. كلتلها انتي صدك تحجين لو تتشاقين ؟؟
كالت والله اني بعدني صغيرة و اريد اطلع و اطب و ممسوية شي غلط ترى .. كلتلها يابنت الناس طلعي و طبي بس البيت اهم من الطلعات و الطبات .. تكلي انته كل شي تذبه براسي و انته متسوي شي .. كلتلها عمي اني من الصبح لليل بالشغل قابل رايح بارات لو ملاهي … عندي دفوعات و حتى سيارتج بعدني مموفيها لان ردتي حديثة و صدك سيارتها حديثة و غالية كلش و اني ما اخذتها كاش .. اخذتها اقساط … و الله العظيم صرفت عليها صرف كومة .. مو بس هيج … اخوها بالعراق جان ضابط بالشرطة و تعرض لحادث و رجله صار بيها مشكلة … بطل من الدوام و كعد بالبيت .. هي يوميا اخوية و اخوية يريد يفتح مشروع و لازم نساعدة … ساعدته … اختها كل فترة تريد شغلات منا و سوالف نسوان ملابس و عطور و اني ادفع ولا فكيت حلكي … امها رادت عملية هم دفعت … و غيرها و غيرها … و هالحجي ما احجي لو ما طك كلبي و محترك حرك والله .. انعل ابو الفلوس بس هي تغيرت و كامت متحس … واني لازم بس ادفع و اسكت … و اخر شي تجي تتعارك وياي و تريد تنفصل لان على حجايتها اني صرت نحس و ما اقبل تطلع هواي … بوقتها سكتت هي و سدينا الموضوع و اني الي اعتذرت … اعتذرت لان ما ردت بنتي بهل المشاكل … و هم تغيرت هي فترة وراها رجعت لنفس الوضعية و زادت لدرجة جتني تكلي اريد اروح سفرة اني و البنات لفرنسا … كلتلها اي ؟؟
كالت بس مناخذ الجهال ويانه الله عليك اخذ اجازة اسبوعين بس .. كلتلها متروحين … كالت اروح … و صارت مشكلة و صياح بيني و بينها و اني هنا للامانة و بدون ما اطلع نفسي ملاك … كسرت المطبخ كله … طبعا بنتي جانت بالمدرسة … اني فقدت اعصابي .. جوي الشرطة و اول ما جوي اني الي كلتلهم اريد انفصل … لان اعرف هي راح تطلب هالشي قبل ما اكوله … و هي كالت همزين طلعت منك و ما طلعت مني … و انفصلت منها و اخذت بنتي و هسه اني عايش وحدي و كل فترة بنتي تجي يمي كم يوم و ترجع يمها … و هي هم عايشة حياتها بهل الطلعات و الطبات … اهلها زعلو مني و ميحاجوني … و اهلي يكولون نشوفلك غيرها … وعايش هسه وحدي ..
سبب كتابة القصة يا خويه ابو بغداد اول بارحة انت نزلت قصة على الدكتورة الي عايشة بالمانيا و صديقتها اخذت زوجها منها … اني حاليا عمري ٤٢ سنة … عندي شغل ثابت و عندي بيت ملك بس بعدني ممكمل اقساطة و عندي اهلي بالعراق بغداد تحديدا ساكنين بساحة ميسلون … اني اريد اتزوج و قريت قصة الدكتورة … و حسب فهمي للقصة البنية تقريبا عمرها من عمري و اني هالقصة كتبتها حتى تقراها الدكتورة … اذا قبلت نتعرف و اتقدملها اني حاضر و اهم شي ثنينه بنفس الدولة … و مستعد انطيها عنواني و بيت اهلي وين و خلي تسأل علينه … و هنا اني ساكن بمحافظة ايسين الالمانية و هم خلي تسأل عني … اذا قبلت بهل الشي خلي تكلك و اني حاضر .. والبقى من عمري اخلصه وياها لان هالمسكينة تاذت بحياتها للأسف … و اني ثق و اعتقد كل الي كتبته حقيقي وحتى اعترفت اني جنت بفترة من الفترات صاحب علاقات بس جنت طايش و حجيت كل الي صار وياي حتى اذا قرته الدكتورة تعرف كل شي عني … و البي خير يقدمه رب العالمين ..

المصدر / صفحة ابو بغداد