وصلنه لالمانيا بطلعان الروح … دفعنه كومة فلوس حتى بس نسافر … ثنين دكاتره اني و زوجي … ورى زواجنه بسنتين طلعنه و اني وياه متفقين نأخر مسألة الاطفال لورى السفر … وصلنه و دخلنه دورات مكثفة حتى نتعلم الماني و مشى الحال … و عادلنه الشهادة و بدينه ثنينه نشتغل بشهايدنه … وضعنه جان مرتب يعني طبيعي و طلعنه اجازات سوق و الوضعية حلوة .. كعدنا بالبداية بقرية بعدين تقدمنا و كعدنا بميونخ .. الحياة بميونخ تختلف عن حياة القرى … حركة اربع و عشرين ساعة و هوسة عبالك هوسة باب الشرجي بيوم الجمعة … ناس و محلات و سيارات و اسواق و فرص عمل … كدرنا نحصل فرصة عمل زينة و ثنينا اشتغلنة … سوينه اول طفل و حياتنه كلش حلوة … طبعا زوجي اخذته عن قصة حب .. بدت من اول مرحلة و انتهت بزواجنه بعد التخرج ..
حياتنه جانت مرتبة لدرجة ما بيها غلطة … علاقاتنه كلش قليلة بالناس و هالشي من العراق احنا متفقين عليه … و اكثر علاقاتنه وي اهلي بالعراق لو صديقاتي من مرحلة الاعدادية الي همه جواريني اصلا … و هو زوجي هم مثل حالتي … و اصلا وقتنه محدود يعني بين الشغل و بين البيت و بين تربية الطفل و بين احتياجات البيت اليوم يضيع بسرعة … بالخارج اليوم و الساعات و الدقايق تركض ركض .. يعني اكعد و ما احس على نفسي الا واني بالفراش حتى انام و ارجع على نفس الروتين … بس هالشي ما قلل و ما برد علاقتي بزوجي .. يعني جانت المشاعر و الحنيه حالها حال من اعترفلي و صارحني اول مره …
و يزيد يوم ورى يوم …
المهم و الي صار حرفيا .. بيوم من الايام خابرتني اسراء ((و طبعا اسراء اسم وهمي مو الاسم الحقيقي و اختاريته مو عالتعيين لضمان الخصوصية)) كالتلي حبيبتي اني و اخوية نريد نجي لاوربا .. و نريد مساعدتج .. كلتلها صدك جذب بس تعالو … طبعا اسراء صديقتي من ايام الاعدادية بس هي ما كملت و تزوجت و انفصلت … جوي بسنة ٢٠١٥ … وصلو لهولندا و اخوها بقى بهولندا و هي جتي هنا علمود اني موجوده … طبعا اخوها و اهلها قبلو تجي علمود اني هنا و كلش يأمنون بينا لان علاقتنه بيهم هم جوارين و هم صديقتي و اكثر من اختي … جتي هنا و قبل متوصل لهنا اني اتفقت وي زوجي نسويلها غرفة الها … ما قبلت تبقى بالهايم (يعني الكامب او مركز اللاجئين لان دائما بي مشاكل) و كلت لزوجي تجي يمنه لحد متطلع اوراقها و نطلعلها شقة قريبة المهم تصير يمنه … و جتي و رحنا جبناها من الحدود و كعدتها وياي بنفس البيت … جنت اني اروح وياها و اجي علمود الترجمة و حتى مرات اتأخر عن دوامي و مرات زوجي يوديها و جنت اعاملها على انو هي اخت … هي هم جانت مرات تطبخ بالبيت و جان ابني يبقى يمها وهي كلش تحب الجهال …
و كل ميصير عدها لقاء وي المحامي او عدها موعد كبل رجلي يوديها … بذيج الفترة حسيت زوجي متغير وياي و اني من كل عقلي عبالي هو ضايج من الوضع و مدياخذ راحته و متقيد … جنت اسأله يكلي لا بس ضغط الشغل و الوضع شوية تعبني .. جنت اكله عادي حبيبي اني هم مثلك اهم شي احنا مرتاحين .. يسكت .. و شوية شوية كام يطلع عيوب و اذا ابني بالغلط يسوي شي يصيح و يتعارك … و جانت الي تهدي اسراء .. حتى مرات جانت هي تصالحه عليا من يزعل وياي لان اني مرات (اعترف) جنت اتلاسن وياه بالكلام .. و كام يتغير يوم ورى يوم … و بيوم من الايام هيج بدون مقدمات كالي اني بعد ما اتحمل الهوسة و اني شغلي حساس ماريد اغلط .. كلتله يعني انته وحدك شغلك حساس اني هم حالي من حالك قابل انته دتسوي شي و اني اسوي شي … كال اريد اطلع بشقة وحدي بس نلتقي .. كلتله انته لو تخبلت لو كاعد تتشاقى ..
كال اتخبلت .. و سواها صدك اخذ شقة وحده بحجة هو يريد راحة و صح اعترف ابني كلش كلش حرك و هواي يصيح و يكسر لان الوحيد و مدلل .. اني بيني و بين نفسي جنت اريد اقنع روحي هو صدك يريد يرتاح لان شغلة حساس ..
يعني جنت اقنع روحي بس الحقيقة غير .. بذيج الفترة اسراء جان عدها رفض و اقامة ماعدها … و هي بس تريد تحصل اوراق حتى تطلع سكن وحدها و تشتغل و طبعا تريد كل شي نظامي و تخاف تشتغل بالاسود (يعني بدون علم الضرائب) و حقها و حق كل واحد اني من الناس ما اسويها و لا حتى زوجي يسويها …
المهم … جنت اكلها حبيبتي انتي اختي و اكثر و لاتخافين بيوم عسى ما تبقين طول العمر بدون اوراق انتي يمي … و نتقاسم كل شي سوى .. والله العظيم و داعة ابني من اطلع اتسوك هدوم اخذها تشتري الي تريده … اني راتبي زين و البنية اختي و صديقة عمري .. ما بخلت عليها بيوم … و طبعا زوجي اخذ شقة قريبة و جنت اروحله و هو يجي بس علاقته بردت بيا لدرجة كمت اكله انته اخاف صرت الماني من صدك … شبيك وياي ..
يكلي مالي واهس بكل شي عوفي كل المواضيع هسه فترة و ارجع طبيعي … و بيوم من الايام تعاركت وياه عركة قوية بشقته و جانت اول مرة بحياتي يمد ايده عليا … ضربني .. من ضربني كبل كلتله طلكني و بصوت عالي .. عبالك جان متحضر لهل الشي و عبالك مرتبله .. كبل طلكني … طلعت بيومها من شقته واني ضغطي نازل بحيث تخربطت بالشارع .. ردت بس اوصل للسيارة مالتي ماكدرت .. الناس التمت و خابرو الاسعاف و اخذوني للمستشفى طلع عندي انهيار عصبي .. بقيت بالمستشفى كم يوم و جانت اسراء تجيب ابني و تجيني يوميا …
لحد ما طلعت و اخذت اجازة و كعدت بالبيت … بقيت بالبيت ٣ اشهر اني و اسراء و ابني … و بيوم من الايام اسراء كالتلي اكلج عندي حجي اريد احجي بس ماريد تفتهمي غلط .. كلتلها كولي حبيبتي شكو .. كالت ترى اني يوميا اتواصل وي طليقج و اريد بس ارجع الوضع بينج وبينه … كلتلها عوفي ماريده .. كالت هو يريد يساعدني بسالفة الاوراق بس مترهم اذا ما اكلج .. كلتلها شلون يساعدج ؟؟
كالت يتزوجني بس عالورق حتى احصل اقامة .. و انتي دشوفين وضعي .. كلتلها انتي شدتحجين يعني هو كالج هيج …
كالت اي بس من باب المساعدة .. كلتلها والله ماعرف شكلج اذا بيها مصلحتج اتزوجي .. طبعا اني بوقتها جاوبتها هيج و سويت نفسي غشيمة بس والله العظيم و اكمع ابني عرفت كل الي صار … لان سالفة الزواج و تحصيل الاقامة ماكو شي اسمه عالورق .. لازم تصير مساكنة بينها و بينه لان الدولة هنا مرات تسوي تفتيش مفاجئ حتى يعرفون صدك هذولة متزوجين لو زواج مصلحة و هنا زواج المصلحة منتشر .. اكو هواي ناس تتزوج مقابيل فلوس حتى يجيبون اقايم و جناسي لغيرهم … يعني يجي واحد يتزوج وحدة و هالوحدة مو مقيمة و تنطي فد مبلغ جبير .. الدولة مو غشيمة علمود هالشي يروحون يشوفون و يراقبون حتى يعرفون صدك هذولة متزوجين لو جذب … كلتلها ماشي و هي ما صدكت و بعدين عود هي تسوي روحها كل شي متفهم تكلي اكلج حبيبتي صدك الي يتزوج لازم يسوي مساكنة حتى كبال الدولة يبين صدك .. هنا اني متحملت كلتلها اسراء فوتج بيتي و ساعدتج بكل شي تالي تاخذين رجلي منج .. جان تكلي انتي شدتحجين بابا يا رجلج يا صخام … كلتلها انتي كل شي تعرفين و هو تغير من انتي دخلتي بيتنا … طبعا هي بهل الحجي طبت لمت هدومها الي نصها اني مشتريتها الها … وعبت جنطها و اندك الجرص اجه واحد ابو تكسي عراقي اعرفه والله العظيم اعرفه صديق طليقي .. اجه سلم عليا و شكله مقهور جان … شال الجنط وياها و راح وصلهم لشقة طليقي و راحت سكنت وياه .. ابو التكسي اسمه ابو احمد ((طبعا هم الاسم وهمي و مو اسمه الحقيقي)) ابو احمد رجع عليا ..
كالي اكدر احجي وياج .. كلتله تفضل … كالي قبل فترة انتي و فلان (يقصد زوجي) قبل فترة جان عدكم شغل و متكدرون تاخذون اجازة .. زوجج اتصل بيا اودي هالبنية للهايم جان عدها مقابله .. اخذتها و بالرجعه دك تلفونها و كامت تحجي .. جانت تكول حبيبي و حبيبي بالحجي .. يعني دتحجي وي حبيبها .. و بنص الحجي كالتلي هاك التلفون يريد يحاجيك .. من اخذت التلفون تفاجئت رجلج عالتلفون كالي عود اني احاسبك .. تريد احولك لو تريد كاش .. كلتلها لا من نتشاوف عود انطيني .. و رجعلتها التلفون .. بيومها ردت اجي اكلج والله العظيم بس خفت .. خفت لا ينهدم بيتكم .. و خفت لاتصير مشكله جبيرة من ورايا .. واجيت يم شقتكم و شفتج من صعدتي و ردت اصيحج بس بعدين كلت لا .. لاتدخل نفسك تعرفين ليش .. لان شفتج انتي وياها دتتمشون و تصدكين بالله العظيم اني كل عقلي هالبنية اختج تصير … حتى بيومها ردت ازوع (مكرم القارئ) كلت شنو هالقذارة الي دتسويها هالبنية .. بعدين عرفت هي مو اختج .. عالعموم الله يكون بعونج والله يكتبلج كل الخير و هالحجاية بقت بكلبي .. كلتله اخوية شسوي يعني الي صار صار .. اني دخلتها بيتي و كله من ورايا … و راح الرجال و بوقتها بقيت فترة طويلة كاعدة بالبيت و بطلت من الشغل .. و اخر شي تحولت من المكان الي جنت بي و رجعت لنفس القرية الي اول مرة جنت كاعدة بيها .. لان جنت اخاف اطلع للشارع و اشوفها هي وياه .. صارت بيا خوفة لا اشوفها لو اشوفه … خربت بيتي و اخذت زوجي .. صديقتي و اكثر من اختي …
اخذت زوجي مني .. و هسه ابني كبر و طبعا بالجذب ابوه ميسأل عليه … ولا عبالك عنده ابن .. و اني حاليا اشتغل هنا و عايشة وحدي اني وابني .. صار عندي علاقات وي جوارين المان و اتراك وعندي بس عائلة عراقية وحدة يجوني و اروحلهم … و بالدوام ملتهية .. هاي قصتي .. و هاي حالتي ..

المصدر /صفحة ابوـبغداد