عافني

وين ما اروح يجي يصير كبالي لو يريد يشوفني نفسه …. و يوميا يدز وحده من زميلاتي تفاتحني بموضوعه …. و يدز رسائل .. و يدز شعر … و دائما الطلب نفس الطلب … فلان بس يريد يكعد وياج بأي مكان عام يحجي وياج و هو والله العظيم قصده و نيته حلال … و هاي السالفة بين فترة و فترة تتكرر و هو ابد ما مل … طبعا بذاك الزمن اني متعلمة من اهلي فد حجاية .. الحجاية تكول الرجال ميتعيب …
و اني هالحجاية جنت مومنه بيها …
و حتى مره وحده من البنات الي جتني و كالتلي اخاف لان شكل سلام محلو انتي متريدين تحجين وياه … كلتلها ابد والله … و اصلا اني اشوفه طبيعي و هو صدك محلو بس يعني رجال و الرجال ميتعيب …. بس اني الي ضايجه منه هو خفيف شوية و يركض ورايا بكل مكان و اني احب الرجال الرزن … الثكيل … كالت ياحبيبتي غير هو ديسوي هالشي علمود بس يتقرب منج … و من وراها بديت افكر اقبل احاجي و كلت خلي افهمه اني مرايده ارتباط ولا علاقة و رايده بس اتخرج و بس …
و قبلت و التقيت بي … الولد هلكد ما فرحان اني كاعدة كبالة حركاته جانت سريعة لدرجة وكع الكلاص مال شربت و مبين ابد ابد ابد ما كاعد وي بنية قبل من حجيه و اسلوبه و هالشي خلاني اقتنع بي و حسيته فقير و صدك رايدني …
و ابد مهتميت بالشكل و هو ابدا مو حلو … و جان خوفي من شغلة ثانية شلون عنده هلكد علاقات بالبنات بحيث بين فترة و فترة يدزلي صديقة و طلع ميعرف البنات طلع يعرف اصدقاء هالبنات و يتوسل بيهم … و من حجيت هل حجي لصندوق اسراري و حبيبتي (اختي الجبيرة) كالت بابا هذا رايدج صدك و اصلا هواي احسن من الشباب الحلوين المرتبين لان دائما الشاب الحلو و المرتب يصير محط انظار اعجاب البنات و اذا تحبين او ترتبطين بواحد حلو و وسيم مراح ترتاحين و الشك عندج ابد ميخلص و تصير مشاكل يوميا … بس مثل مواصفات هالولد مراح تخافين منه و مراح تشكين بي لان منو تكلبه اصلا … و بدت علاقتي بي و جنت عكس كل البنات بالعالم … البنات كلهم اول ميدخلون بعلاقة كل شوية يفتحون موضوع زواج و شي رسمي … اني جنت عكس الكل … جان هو يفتح موضوع ارتباط يوميا و يكلي خلي اخطبج و اني اكله بعد وكت … جنت اريد اعرفه بعد اكثر …
و عرفته اكثر و طلع فطير مثل مكلت و الي بكلبه على لسانه و حبيته … حبيته لان شفته رايدني بكل شي بي رايدني … لدرجة يوميا يسألني تحبيني .. و هالسوال البنات المفروض يطرحوه بس هو يكرره هواي… الله عليج تحبيني … اكله احبك .. يكلي اذا تحبيني ليش لعد متخليني اتقدملج و حتى يصير شي رسمي … كلتله اصبر … و سنه جرت سنه و تخرجنا و كلتله تعال اخطبني … طبعا احنا حالتنه زينه و فوك الزينه هم … بس هو حالتهم المادية مو كلش زينه … بس اني حاربت امي و خالي (لان بابا متوفي) و كلتلهم لو هو لو ما اتزوج غيره و همه جانو رافضين فكرة ارتباطي بسلام نهائيا … لان الولد بعده اصلا ممتوظف و ماعنده مصدر رزق ثابت و عائلته جبيرة و اني حروح اسكن وياهم … قبلت و قنعت ماما .. و قبلت و تزوجت مباشرة … طبعا من انتقلت ببيت اهل سلام … مرتاحيت من ورى هوسة الجهال و البيت جان مزدحم كلش .. اخوته كلهم متزوجين بنفس البيت و جان اكو اختلاف ثقافات بالبيت …
يعني اني متخرجة و دارسة و البنات نسوان اخوته مدارسات و جان ماكو اي تقارب افكار بيني و بينهن … بس جنت احبهن و همه هم يحبني و يسألوني هواي على شغلات .. بس مرتاحيت اني من ورى الهوسة … و للأمانه سلام جان يحاول يدللني على يكدر عليه … امي من شافت هيج الوضع كبل اجرتلي بيت صغير و اثثته بمنطقة بيتنا القديم … و حاجت اصدقاء بابا (الله يرحمه) حتى يشغلون سلام وياهم … ابوية جان شغلة بالاقمشة و معروف كلش بسوق النهر … و جماعته بس يريدون يخدمونه … و شغلوه وياهم و طبعا بذاك الوقت الوظيفة جانت متوكل خبز … و بالبداية سلام ما قبل يطلع من بيت اهله بس بعدين اقتنع من امي حاجته و انتقلنه للبيت القريب من بيت اهلي … و صار عندي حمل و جبت ايه … التهيت بأيه و على كصتها سلام كام يوم ورى يوم ينعرف و كام يتعرف على ناس و جان مجمع مبلغ من المال و كال ما اريد بعد اشتغل يم احد … اكو واحد صديقي يريد يفتح محل مال البسة رجالية بباب الشرجي و يريدني ادخل وياه شريك و المحل تحديدا بعمارة الخيام و هناك الشغل خير من الله فلوس … بس عندي نقص بالفلوس … و حاجيت امي و دبرتله فلوس و بطل من شغل الاقمشة و فتح محل هو وصديقه و شغله صار زين …. بعدين بنفس منطقة بيت اهله اخذ محل ثاني و مشت امورة … و بهل الحجي تمر ايام و سنين و جبت محمد و نور … صارو عندي تلاثة و هو صار عنده بمكان المحل ٤ محلات البسة … و عنده علاقات بكل تجار الالبسة الي بالعراق … و بيوم من الايام ردت اروح لبيت اختي علمود طهور ابنها … و خابرته كال ماكدر اجي اوصلكم اخذي تكسي … اخذت تكسي و كعدنا كلنه ورى اني و ايه و نور و حمودي … ابو التكسي جان شاب صغير … يمشي سريع وعالسريع مال الدورة التاير طك و انكلبت بينا السيارة اني ورى اول فرتين فقدت الوعي لان راسي ماعرف بشنو انضرب … و حسيت روحي بالمستشفى و سلام موجود و امي و اختي و رجلها و عرفت باترين رجلي … و فدوه رجلي مو مشكلة بس المصيبة نور توفت و السايق هم توفى .. ما ايه و حمودي عدهم كسور .. طبعا بذاك اليوم حسيت روحي متت اكثر من مرة … ما اعرف ابجي على رجلي الي انبترت لو على بنتي لو عالجهال المكسرين لو عالسايق لان شمهما يكون حتى لو غلطان بشر هو و مات … و بقو اهلي يصبرون بيا و سلام يصبر بيا و دكتورة نفسية ورى مطلعت من المستشفى كامت تنطيني علاج لان تخبلت … وفوكاها على كرسي كعدت راح يبقى لازك بيا طول العمر و ميعوفني لحد ما انزل للتراب … و كل الي مصبرني جهالي … و سلام …
و تعلمت عالكرسي و بديت بكل طاقتي احاول اعرف شلون انتقل للفراش بدون مساعدة احد و شوية شوية تأقلمت وي الوضع .. بس سلام تغير عليا … كمت احسه ما يهواني مثل قبل … و يوم ورى يوم كامت تزيد طلعاته و يتاخر و حتى الجهال كبرو و كامو يفتهمون … كامو يكولون ابونه وين … و سكتت و تحملت اخر شي حسيت هو عنده شي … و تعاركت وياه عركة قوية و كسرت غراض بيومها و همزين الجهال جانو بالدوام … جان يكول اني تزوجت عليج وهذا حقي .. و اذا ميعجبج خلي ننفصل .. كلتله طلكني و هذا سلام الي جان يتمنى مني اباوع عليه ما فكر حتى ان يكلي لا … كبل طلكني .. كبل طلكني الي جان يتوسل بكل اصدقائه حتى يدزولي صديقاتهم يطلبون مني بس احجي وياه كلمة … سلام الي ساعدته و بنيته من الصفر عافني … عافني على كرسي وي جهاله وراح عاش وي زوجته الجديدة و جان كل علاقته بهل البيت يجي ينطي فلوس لجهاله و يروح … وبقيت اني وي الجهال ابينلهم اني قوية و عادي الي صار … و بنتي مره سالتني سوال معرفت اجاوبه عليها … كالتلي ماما هو كل واحد متزوج و مرته تندعم يطلكها لو بس بابا سوى هيج … كلتلها حبيبتي بابا ما طلكني علمود اندعمت بابا طلكني لان اني عصبية و اتعارك و ذبيت الصوج بيا حتى ما اخلي بنتي تخاف من الارتباط باجر عكبه … لان لو كايتلها بس ابوج لو كل الرياجيل هيج … جان صارت بيها خوفه بالحالتين من الارتباط … تخاف لا يصير بيها شي و تنعاف مثلي … و روح نور و ورح نور لو صاير وياه هو هالشي ما اعوفه لأخر نفس بعمري … بس هو عافني .. و من باب ثاني افرح نفسي بنجاح ابني و بنتي دائما و اكول هاي هي اخذت قسمتي اني من هالدنيا و بعد ميهمني شي غير بس ابني و بنتي … وطبعا هو خلف من زوجته الجديدة و اني دائما اكول لبنتي وابني هذولة اخوتكم بغض النظر عن الخلافات بيني و بين ابوكم و دائما اكلهم تواصلو وياهم و لاتخلون الي بيني و بين ابوكم يأثر على علاقتكم بيهم … بس بداخلي اكرهه .. اكرهه لسلام لدرجة من يجي لو من يخابر ابد ما احجي وياه .. لان صوته يذكرني بأول لقاء بالكافتريا … شلون جان يحجي و يخربط بالحجي … صوته يذكرني من جان يسألني تحبيني يوميا يوميا … صوته يذكرني من جان يتوسل علمود يصير رسمي بيني و بينه و جان خايف لا اصير لغيره … اكرهه لان عافني ولو اني بمكانه ما اعوفه للموت ..

المصدر /صفحة ابو بغداد