صارت سوالف

الحارس جان الوحيد الي يبقى للصبح كاعد …. و اني مرات ميجيني نوم اكوم من فراشي و اروح اكعد يمه … مخلي تنكات مال دهن مكلوبة و شاعل نار و عالنار قوري مال جاي … وكل ما اروح يمه يكلي الجاي عالفحم يختلف من الجاي عالطباخ …. و يصبلي جاي … فد يوم كلتله عمي انته شنو قصتك و انته وين اهلك … اشو من وعيت عالدنيا و اسمع الحارس ابو شاكر و الحارس ابو شاكر … و كل المنطقة و اهل المحلات يعرفوك … بس ما فد يوم شفنا شاكر لو شفناه زوجتك … كال اني ممتزوج اصلا … كلتله لعد منو شاكر … كال اسمي محمود يصيحولي ابو شكريه لو ابو شاكر … كلتله زين اهلك وين … كال اهلي موجودين بس ما احجي وياهم …
كلتله انته عمرك جبير يعني اكيد والدك و والدتك متوفين بس اقصد اخوتك او اخواتك …. كال اي همه اخوتي و خواتي موجودين بس مثل مكلتلك ما احجي وياهم … كلتله زين شنو السبب … كال راح احجيلك لان اني اعرفك من جان ابوك يجيبك للسوك و لازم ايدك يخاف لاتضيع منه … و جنت هنا بالسوك مرات تنزع نعالك (مكرم القارئ) و متقبل تلبسه و بلاخير ابوك كام يلبسك نعال بي لاستيكه حتى ينربط برجلك … و دائما ابوك من يشوفني واكف يعلمك تسلم عليا .. كلتله اي اي اتذكر … كال اني انولدت بنص عائلة صغيرة … اب و ام و خوات ثنين و اخ واحد … بيتنا جان الضحك ميوكف بي … متوفر دائما و ابد مينكطع الضحك … اني و اخوتي كلب على كلب …. نحب واحد الثاني و اذا واحد بجى بينا كلنا نبجي على دموعه و وجعه … جنا نحس روحنا (قطعه وحده) … و دائما اكلنا سوى … لعبنه سوى … عركاتنه سوى … ركضنا سوى …. المنطقة كلها تحبنا …ابوية جان كاسب … يعني يوم يشتغل و يوم ميشتغل … مرة عمالة … مرة تنظيف بيت … مرة فلاح …. مرة صباغ … مرة يوكف بعربانه مال شامية …. و من كبرنا اني و اخوية كام ياخذنا وياه …. ابوية جان اكو نظرة بعينه تقهرني … بس مجنت اخلي ينتبه عليا من اباوع بعيونه … جنت احس هالنظرة معناها لو بيدي اسوي لجهالي الي ممسوي احد قبل بس شسوي هذا حالي … و جان عنده نظره ثانية … من اشوفها تلزمني العبره و اريد ابجي من صدك … هالنظره من جان ابو الشغل يسمعه كلام مو حلو … او يصيح عليه …. جنت اتخبل ولو بيدي اضربه لأبو الشغل شلون يصيح هيج على ابوية … بس من ورى هالخبزة هواي انهانينه و هواي انلعب بكرامتنه … و حاول ابونه على كد المستطاع يوفر النا كل شي و يعلمنه على صنعه بس جانت الصنعة مو ثابته … و كبرنا و المنطقة كلها تعرف بيت ابو محمود و حامد ولدهم يشتغلون كل شي ….
الي يريد يتحول يدز علينا … الي يريد يصبغ بيته هم يدز علينا … الي يريد ننظفله قطعة كاع متروسة زبل (مكرم القارئ) هم يدز علينا … و جانت تطلع الخبزة منا و منا … و بيوم من الايام ابوية متعلمين عليه يكعد الفجر … بس ما كعد … توفى … سويناله فاتحه و اني و اخوية الاكبر مني صرنا المسوولين على خواتنا … عدنا خوات ثنين و امي … و هم شغله منا شغلة مناك مشت الامور … و بيوم من الايام اخوية لكه شغله يم واحد عنده مزاد … معروف كلش … الشغلة جانت بالتصعيد و التنزيل مال الغراض و مرات نروح نجيب غراض … ابو المزاد جان يحب اخوية … ليش .. لان اخوية جان شيريد منه يسويله …. يعني يروح يجيبله شرب … يروح يجيبله اكل … يدزه يسويله شغلات بعيده … تعلم عليه … اني جنت اضوج من هالسوالف … اني شغلتي تحميل و تنزيل و بس … بس سالفة العنقره ما احبها … (بالمناسبة العنقره او العنقرجي هذا مصطلح يستخدموه بالسجون و بمكانات ثانية معناه واحد يخدم واحد بكل شي و حتى هدومه يغسلهم و يطلق هاللقب بس عالرجال) … وبيوم من الايام اخوية طكت رجله بالغلط و نام بالبيت … ابو المزاد لان يحبه و لان معتمد عليه اجانه للبيت … و شاف اختي الصغيرة الي بذاك الوكت جانت ممكملة ١٥ سنة و هو جان عمره ٥١ سنة … فات للبيت و ورى كم يوم خطبها …. طبعا اني موافقت و اخوية بذاك اليوم لأول مرة يضربني بحياتي …. كالي اني الي اكول اي لو لا … لان اني الجبير … كلتله يا اخي بكد ابويه هذا الرجال … كالي المهم نستر على اختنه … كلتله متزوج و جهاله بكدها … كالي مدام الله ممكنه خلي يتزوج اربعه شنو يعني … و ما قبلت و زوجها غصبا ما عليا … بطلت من الشغل وياه … و اشتغلت حارس بعمارة … طبعا اني و اخوية ممكملين دراسة بس خواتي جانو بعدهم يدرسون … امي مجان عدها رأي لان اخوية هو رجال البيت .. بس جانت رافضه الفكرة … تزوجها و للأمانة و هالشي اتحاسب عليه باجر عكبة …
الوضع ببيتنا تغير جذريا … جنت مرات اروح للبيت و بكل مرة اروح اشوف البيت متغير و اثاث جديد و ثلاجتين صار عدنا … و السكف جان طالع الشيلمان بي صار مصبوغ و حتى نقشات بي … بس اختي من جانت تجينا زيارة اشوفها ممرتاحه .. جنت اتوقع السبب لان كاعدة وي زوجته الاولى بس مطلع هذا السبب … بقيت الح عليها لحد ما طكت بجي و كالت ابنه لرجلي يتحارش بيا و اخاف اكول لاحد لا تكبر السالفة … من كالتلي اختنكت مكمت اعرف اطبب نفس لصدري … و كمت رحت لاخوية للمزاد … و تعاركت وي صاحب المزاد (رجل اختي) و كلتله هيج و هيج …
الي صدمني بذاك الوكت اخوية طبك وياه ضدي … و كالي ماكو هيج حجي هاي اختك تطلع قصص من راسها لان معاجبها تكعد وي زوجته الاولى و صارلها فترة تلح على بيت وحدها و هذا رجلها و سأله … رجلها كالي اي و اني حتى لو عندي امكانية ما اطلعها بيت وحدها … تبقى حالها من حال جهالي و زوجتي … كلتله لك ابنك يتحارش بيها … كال جذب ولدي متربين احسن تربية و يصيحولها خاله و من تريد شي يركضولها ركض … و سدو الموضوع و خلوني اشك حتى بكلام اختي … و رجعت التقيت بيها ورى اسبوع جان اشوف جسمها كله ازرك … كاتلها رجلها و هنا بعد ما تحملت جريت بوري و رحت … و ضربته و ضربت ابنه و شالوني الشرطة و انحكمت بوقتها … رحت للسجن و بقيت طول فترة المحكومية اني ما احجي وي اي بشر … لان ما اريد احد يسألني شنو جابك لهنا … و جانت امي و اختي يجوني زيارات بعدين كطعو … و طلعت لكيت امي متوفية و اختي الباقية متزوجه اخوه لأبو المزاد و هم زوجة ثانية و هم رجلها اكبر منها … و اخوية هم متزوج … لميت غراضي و واحد تعرفت عليه بالسجن كالي من تطلع تعالي … الرجل جان عنده مشكلة قانونية تخص عقارات و بيوت … و كال اني غلطت … و انلزمت … رحتله ورى ما طلعت من السجن … شغلني حارس بالبداية بكراج سيارات … بعدين شغلني حارس بعمارة وبكل مرة ينطيني سكن .. لحد ما اخير شي جابني لهنا و هو صاحب السوك الي حاليا اني وياك كاعدين بي … جنت بين فترة و فترة اروح لأختي و جانت تشوفني بالبوكه … ابن زوجها الي جان يتحارش بيها تزوج و طلع من بيت ابوه … و كالت من ورى العركة مالتك القديمة هو بطل يتقرب عليا … وطبعا صار عدها ولد وبنية .. و اخير شي رجلها حس هي دتشوفني راد يطردها اذا تحاول تشوفني … اني سحبت نفسي … و اخوية اصلا ميريدني …
و اختي ذيج رجلها هم ميقبل تشوفني … لان ضربت اخوه و ابن اخوه و سبحتهم بدمهم … و بقيت لوحدي … و ما حسيت على عمري الا هو ويركض ركض بيا … ردت اتزوج اكثر من مرة بس مرهمت .. و اخير شي كلت خلي ابقى حاير بروحي و اشو العمر خلصان خلصان … و ما بي حيل احتار بأكل و جهال و التزامات … اني مرات انسى روحي يومين ما اكل و بس جاي و جكاير … بس الزواج يرادله اهتمام و ترتيب … عالعموم .. هاي قصتي .. و اني متاكد ورى هالسنين تغيرت هواي تفاصيل بحياة اخوية و خواتي و جهالهم هسه كبرو .. و اني دائما ادعيلهم بالخير بس ما احب اروحلهم و صار سنين مرايحلهم لأن اذا اروح اعرف اخوية ميريدني و ميحجي وياي اصلا …
و خواتي كل وحده ملتهية بحياتها و جهالها … …………………… .. كلتله زين عمي ابو شاكر وين كاعدين خواتك و اخوك … كال بفلان منطقة و بقيت ابوك لسانه و طبعا هو ذكي كلش و جان ميريد ينطيني اي معلومة حقيقية تخصهم بس فلت من لسانه و كال بيت اختي بفلان منطقة بصف بيت حكم مال طوبة معروف و بعدين بدل كال مطرب مشهور … و بقت كل المعلومات براسي و رحت لأبوية حجيتله و مجان صعب على ابوية يجيب بيت اخته وين …
لان ابوية عنده علاقات هواي بحكم شغله و بكل مناطق بغداد عنده عرف …. و عرفنا الحكم و هو جان الوحيد الحكم بذيج المنطقة … و سأل ابوية منو هنا جان عنده مزاد …. وعرفنا و امي راحت التقت بأخته و حجتلها على وضع اخوها و طلعت اخته صار سنين تدور عليه ورى وفاة زوجها (ابو المزاد) و جابتها امي لأخته و دلته المكان الي ينام بي لان هو الصبح ينام بغرفه و بليل يكعد يحرس … و صار بجي و هو كام يبجي و اخته نزلت بالكاع تبوس برجله .. و طبعا هي جهالها كبرو و ورثو بس اخته الثانية للاسف طلعت هي و ولدها مسافرين برى صارلهم كومة و هم رجلها ميت … و اخذته وياها و كعدته ببيتها و طبعا ابنها و بنتها جوي وياها همه الي قنعوه … بس اخوه ميقبل يحجي وياه … و رحتله زيارة ورى فترة لبيت اخته … طبعا متغير و سمنان هههههههه و صاير يلبس كله دشاديش … قبل جان دائما يلبس بنطرون قماش و قميص و يلف على ركبته يشماغ … كال يحبوني … و معتبريني اني الجبير .. و للأسف اخونه ميقبل يحجي ويانه وعنده حياته … بس لو تدري قبل كم يوم شسوينه اني و اختي … رحنا يم بيتنا القديم اول بيت جينا بي للدنيا … طبعا اخوية طالع منه لان هم الله وفقه …. طلعتنا مرية كلنالها نريد نفوت نشوف البيت ممكن … فوتتنه جوى و شبعنا بجي … كمنا نلزم الحياطين نحسها تحجي ويانه … والله العظيم الحياطين جانت احن عليا و على اختي من اخونه الي غيرته الدنيا و غيرته الفلوس و المصلحه … حسيت الحياطين ذكرتنا بلمتنا و كعدتنا بالهول … سمعت صوت ابوية و امي من لزمت الحايط… سمعت صوت امي من تكول ديربالكم على خواتكم من جنا نروح نشتري من الدكان و احنا جهال … سمعت صوت ابوية من جان يكول لأمي هسه يكبرون و يشيلون الحمل و نرتاح … بجيت و اختي بجت و حضنتها … ام البيت الكاعده بي عرفت احنا عدنا ذكريات بهل المكان خطية انقهرت علينا و جهالها صافنين علينا … و من طلعنا اختي كالت لو تدري شكد ارتاحيت من رجعتلي … ابني جان يدور عليك و ما خلى احد ما سأله عليك .. ليش ما رجعت .. كلتلها يعني رجلج عندي طلابه وياه و رجل اختنه فلانه عندي طلابه وياه لان ضارب اخوه و ابن اخوه و اخوية ميريدني و طابك وي زلمكم المن ارد و المن اجي ؟؟؟؟
كالت حقك و الحمد لله و الشكر مرتاح كلش وياهم بالبيت و هواي يستشيروني بشغلات و احلى شي حسيت بي من ابن اختي وداني اخطبله قبل كم يوم … حسيت روحي اني مسوول عليه … كلتله هم زين بس الله عليك ابقى مر علينا و خلينا نشوفك مو تمشي على المثل الي يكول (من لكه احبابه نسى اصحابه) كال لا شلون تكولها انته ابني ..

المصدر /صفحة ابو بغداد