(زنجيل كل واحد بينا حلقة)
ابني الجبير عمره حاليا ١٥ سنه … مدلل و ممخلي يحتاج شي … بس اسلوبه محلو وياي و لا وي امه … حتى وي اخوته الي اصغر منه هم اسلوبه محلو و دائما يغلط و مرات يكفر … اني ما اضربه و دائما احاول ارزله بس بيني و بينه لان عمره مو صغير … قبل كم يوم ضرب اخته و انكسر اصبعها الصغير .. روحي طلعت للسما من شفت الموقف و اول مره بحياتي اضرب ابني هيج ضرب … ضربته قوي لدرجه وجهه صار كله دم … و طبعا فقدت اعصابي و من حسيت على روحي وهو جوايه و اني اضرب بي رأسا حضنته و بجيت … اني اعرف هالشعور محد مراح يحسه غير بس الي عنده اطفال … حضنته و بجيت وهو اصلا جان يبجي .. سكت و طببته للغرفه حجيت وياه و كلتله البنيه متنضرب .. طبعا هو ذب الصوج بيها لان هي معاندته على شغله تافهه اصلا .. و سديت الموضوع و راضيتهم ثنينهم .. بس هو من ورى هالموقف صارت بي خوفه مني .. كعدت بيني و بين نفسي اتذكر من جنت بعمره شلون جنت عايش وي اهلي … اني قبل كل شي احمد الله و اشكره على الرزق و العيشه الي حاليا اني عايشها … لان دائما جنت اكول جملة بيني و بين نفسي من اشوف شخص مدلل و يملك كل شي و حياته ما بيها اي تقدم … جنت اكول (ياريت لو عندي ربع الي عنده جان هسه حالي غير حال) .. و اني اعرف هسه اكو ناس تكول هالحجاية على ابني … اني لا زنكين كلش و لا غني .. بس الحمدلله كل شي عندي و اهم شي بيت ملك .. هالحجي الي راح احجي اني حجيته الف مره لابني بس هو ميقتنع بي لان ملتهي بالانترنت و الفيس بوك .. بلكي من يقراه على نفس الشي الملتهي بي يتغير و يفكر بالنعمه الي عنده … اني انولدت بعائلة جبيرها الي هو ابويه (الله يرحمه حاليا و يرحم والديكم) جان يشتغل بمجمع مشن عامل بمحل … المحل يبيع تايرات و باتريات و دهن (يعني شغلات خاصه بالسيارات) … و امي مريه على كد حالها و متعرف تقرا و تكتب .. و عندي اخوان ثنين و اخت وحده … اني جنت الجبير .. و بديت من عمر ٩ سنوات اروح وي ابويه للمحل الي يشتغل بي .. جنت اشوف شغلات اكبر من عمري بهواي … و جنت اسمع كلمات هم اكبر من عمري بهواي … الفشار و الغلط و كلمة (عرك و ويسكي و جن) تعلمتهم كلهم هناك .. حتى الفايسوري ابو التقاطع اتذكره .. ليش ؟؟ لان جانو يدزون ابويه يروح يشتريلهم هالشغلات … و يأكدون عليه حرفيا (فايسوري ابو التقاطع مو تصير غبي و تجيب غيره) … ابويه جان ينهان كدامي .. و الاهانة تختلف من اهانة الميانه .. لان اكو كلمات تطلع بحكم الميانه بين الاصدقاء .. بس اكو كلمات تطلع ابد مو يم الميانه ولا بحكم الصداقه .. و ابويه جان مجبور يتقبل الوضع لان بذاك الوقت الشغل و العيشه جانت صعبه .. و شغل مثل شغل ابويه كلش صعب يتحصل .. و اذا يبطل منين يعيشنه ؟؟؟؟ عالعموم .. هو طلعني وياه للشغل علمود يعلمني شي يفيدني بدال الشهادة الي جانت متوكل خبز بذاك الوكت بسبب الرواتب الشبه رمزيه … جنت ابقى بالمحل اني يمهم و هو يروح يجيب الشغلات الي طلبوها منه … و جنت اسمع كلمات الغلط و الفشار القوي .. و تعلمت منهم كلمات كلش تعبانه و ابد محلوه .. من الاخير طفل و يذبوه بنص هيج مكان شراح يتعلم مثلا .. و شوية شوية تعلمت الشغل و كمت اعرف القياسات مال تايرات من يجي واحد يريد يشتري و عرفت انواع الباتريات و انواع الدهن و تعلمت حتى عالغش لان جانو يغشون ببعض الامور .. اني مجنت اعرف هذا الشي غلط و لا اعرف انو الغش هو شي هم حرام و هم ممنوع … جنت اعرف انو هالشي يجيب فلوس و بس .. و كبرت بنص هالشي … من كبرت ابويه توفى واني بعمر ١٦ سنه … و اني الي لزمت البيت .. طبعا ابويه تزوج على كبر .. يعني عمره جبير و تزوج و امي جانت صغيره بالعمر من اخذها .. و مثل مكلت امي فقيرة من اهل الله يعني متعرف تعيشنا وحدها على الرغم من هالشي هي كامت تبيع روبه بكاسات نايلون للمنطقة و كامو يصيحولنه بالمنطقة بيت ام الروبه .. اي اني ابن ام الروبه و افتخر بأمي الي حاولت بذاك الوقت بس تدخل مصدر رزق ثاني لهل البيت حتى تعيشني اني واخوتي .. و طبعا اني هم موكفت عن الشغل و بقيت بنفس الشغله … راح احجي بصراحة و بدون ما اخجل من كلمة .. بعمر ١٧ سنة اني شربت و دخنت و التقيت بشباب من عمري جانو هم اغلبهم حالتهم الماديه مثل حالتي .. جانو تقريبا ضايعين … جنت عايش بوضع اني و هالشباب غير وضع البيت و الغرفه و الكتب و المسطره و القلم و المساحة .. وضع اسمه شلون نتسابق حتى نطلع فلوس … و ماعدنا احد يحاسبنه و هالشي جان اصعب شي بهل المعادله … حتى الي ابوه عايش من هالاعمار جان يحس روحه هو المسوول عن نفسه و ابوه ميكدر يتحكم بي .. وجان يسوي الي يريده .. عالعموم .. بيوم من الايام ابو الشغل الي جنت اشتغل يمه و طبعا هو غير ذاك الي ابويه جان يشتغل يمه لان غيرت اكثر من مكان شغل بعد وفاة ابويه .. سمعني حجاية محلوه او بالاحرى غلط عليا و سب امي .. متحملت اني رجعتله المسبه بعشر مسبات و اني اصلا لساني جان زفر (مكرم القارئ) .. تخبل ابو الشغل و كام راد يضربني ضربته قبل ميضربني و جان يطردني بنفس اللحظة .. طلعت من المحل و جنت مقهور و بجيت و جنت كل شويه ارفع التيشرت الي ريحته كلها دهن و هسه جتي بخشمي من داحجي .. جنت ارفعه و امسح الدموع بحجة عيوني دتحكني و اني و امشي بنص الشارع .. حتى مشيتي جانت مو مستقيمه .. جنت مرات اروح يمين و مرات اروح يسار لان من اصعد التيشرت و امسح الدموع ما اشوف الطريق .. بالاخير كعدت عالرصيف .. بس اختاريت مكان ما بي احد .. جانت دنيا ظهريه و حاره كلش .. كعدت عالرصيف ابجي و اتذكر ابويه شلون جان ينهان و شلون جانو يدزوه منا و منا … ابجي على وضعي و على وضع امي الي تبيع روبه و تدز اخويه الصغير يجمع كاسات النايلون من الجوارين .. ابجي على اخوتي الي خطيه انكسرو بعد وفاة ابوية و كل اعتمادهم على رزقي و رزق امي .. اني وكاعد بالكاع طبكت سيارة كراون تكسي بيها بنجر .. نزل رجال جبير بالعمر و لحد هسه اتذكر اول لقاء بي .. جان لابس بنطرون قماش ازرك و قميص ابيض .. التاير عبالك اختار مكان يبنجر بي الا نفس المكان الي اني كاعد بي ابجي .. نزل الرجال فتح الصندوك و اني بطلت بجي و اباوع عليه .. جان يكلي شعندك كاعد بالحر .. مجاوبته و درت وجهي عالصفحه الثانيه .. جان يطلع بطل مي بارد لافه بخاولي حتى الثلج ميموع .. جان يكلي هاك اشرب .. شربت و رجعتله البطل .. جان يكمل البنجر و اجى كعد بصفي .. كالي دكتها بيك مو ؟ كلتله شنو ؟ كال الدنيا دكتها بيك .. يابه من كال هيج عبالك جنت منتظر لحظة حتى ارجع ابجي .. جان اطك من البجي .. حضني الرجال الي اصلا ماعرفه والله .. جان يكلي كافي انته رجال اش اسكت .. كلتله يعني اذا رجال ميصير ابجي وطبعا اني احجي حجي مخربط و ممفهوم بسبب البجي .. جان يكلي ابجي ابجي ابني .. بجيت و هو بقى كاعد يمي .. وراها بشويه هدأت ارتاحيت .. كالي شبيك .. كلتله شحجيلك والله ماعرف شكلك .. كالي احجي الي يعجبك .. كلتله ابن الهيج و ابن الهيج غلط على امي و بطلت من الشغل .. كالي هاي سهله .. اني ادبرلك شغل .. كلتله شلون .. كال اني ماخذ خط عمال بمطعم ولد منطقتي همه و يحجولي على الفلوس الي يحصلوها دائما يكولون زينه لان مكان المطعم و اسمه كلش معروف .. كلتله و شيشغلوني لا اعرف اطبخ و لا اعرف اسوي شي .. كالي انته مو تريد شغل اسكت .. كلتله اي شغله اريد والله بس بعيده عن هالشغل القديم لان كرهت المكان كله و كرهت شكو شي تعلمته هنا .. كالي انته وين بيتكم .. كلتله بفلان منطقة .. كالي كوم اركب وياي .. كمت ركبت وياه كال دليني بيتكم وين .. و اخذته لبيتنا اندله و كالي باجر بفلان وقت اجيك اني والعمال ناخذك .. كلتله معقوله يقبل ابو الشغل .. كال معليك الله كريم .. و ثاني يوم انتظرته و جاني هو وعمال ٣ وياه .. سلمو عليا و عرفني عليهم .. الشباب جانو بعمري بس محترمين كلش .. كالو حاجينالك ابو المطعم وقبل تشتغل ويانه و معليك احنا نعلمك الشغل .. و رحت وياهم للمطعم .. طبعا ابو المطعم يعرف ابو التكسي الرجال الجبير .. و يحبه كلش .. الرجال الجبير اسمه ابو علي .. ابو علي طلع هو محاجي و كايله عليا و هو رأسا موافق يشغلني .. و اشتغلت وياهم ولاول مرة احس بشي اسمه حب للشغل .. حبيت الشغل كلش .. وعرفت صدك معنى المثل الي يكول (مو كل اصابعك سوى) .. لان هذا ابو المطعم ولو ميصير اكول اسمه و اسم المطعم بس مكان المطعم بشارع الصناعة و كلش معروف .. طبعا ابو علي ورى يومين من الشغل كالي تعال اريد احجي وياك .. و طلعت كعدت وياه و تشكرت منه هواي على مساعدته الي .. كالي شوف لاتشكرني .. لان اني و انته و كل الناس زنجيل .. وكل واحد منا حلقه يكمل حلقه ثانيه .. اني من بنجر التاير ماعرف راح التقي بيك .. بس اكو شي ترتب وعلى اساسه وكفت يمك و شفت وضعك بالحر كاعد عالرصيف وحدك .. و اني قبل هم غيرك وكفلي و لغيري هم احد وكفله .. زنجيل ابني زنجيل .. بس اهم شي لاتفقد الامل .. لازم يجي يوم و تفرج .. و اني هسه عندي طلبين يمك .. الاول ساعد الي تكدر تساعد بي .. و الثاني شوفلك وسيلة نقل تروح و تجي بيها للشغل هههه لان شلعت كلبي بهل اليومين اجي اخذك و خطيه الشباب ديطلعون من وكت علمودك لان طريقهم ابد مو على طريقك .. كاعد اخذهم من وقت و نجيك طريق طويله … طبعا بساعتها ضحكت من كل كلبي و كلتله والله اني ردت اكلك لان حجولي الشباب وين بيوتهم و انته وين بيتكم … و بديت بهل الشغل و الله وفقني وتعلمت من هالشباب هواي امور و صرت طباخ و حتى كمت اطبخ للاعراس و للفواتح و حتى بالمناسبات الدينيه و بمحرم هم اطبخ و طبخي كله لاعداد جبيرة .. و الله وفقني بهل الشغله و طبعا ابو المطعم الله يرزقه جان يوميا من نخلص شغل يحملنه جياسه اكل لبيوتنه .. و حياتي انكلبت .. عفت الشرب و عفت الفشار و المسبه و لساني تعدل .. و جبت اخويه هم شغلته وياي و الحمدلله كدرنا نسوي شي لنفسنا بمرور السنين .. هالحجي كله دائما احجي و اكوله لابني … اكله ابني انته ممحتاج شي .. و مدلل و ممطلوب منك تجيب مصرف للبيت .. وفوكاها تصرفاتك محلوه و تكفر و تعيط عليا و على امك .. المصيبة اني فار الدنيا فر و اعرف الصغيرة و الجبيره بهل الدنيا .. يعني هو من مرات يجذب عليا عباله اني غشيم .. بس هو ميدري اني امشيله سوالف هواي بس علمود ادلله .. و تاليها يضرب اخته و يكسر اصعبها علمود تلفون لو علمود برنامج بتلفون مادري لعبه .. و اني اختي تزوجت و جهالها بطولي هسه و ما مدينه ايديناتنه عليها لا اني ولا اخوتي .. والله والله اكو شباب بعمر الولد يتمنون ربع الي عند ابني مثل ما اني جنت اتمنى هالشي .. و عايشين يدورون عالرزق و حامدين ربهم و شاكري .. ماعرف شحجي .. بس الفضل الاول و الاخير لله و لابو علي و ابو المطعم و الشباب الي علموني كل شي .. و اخير شي اكول .. الله يصلح حال الكل و يرزق الجميع .. (زنجيل و كل واحد بينا حلقه) انتهى اخوكم ابو بغداد سايق التكسي #ابوـبغداد
