(رياض كاندال)
فد يوم صاحبنا رياض گاندال طالع على باب الله كالعادة … يكول ..الصبح طلعت على باب الله و عادي مثل كل يوم قبطت من نهاية الفورتات و انطلقت .. الصبح واحد شوية يصير عصبي وروحه بخشمة … اكو ولد سايق على الخط اكو بيني و بينه مشاحنات ..هو يكرهني و اني هم الصراحة اكرهه .. دائما اني اعضه و هو يعضني ..(مصطلح يعضني واعضه يعني هو مرات ياخذ سرايه و اني مرات اخذ سراه و واحد يبوك من الثاني عبريه )الحاصل .. طلعت الصبح لكيته واكف ديقبط كبل طلعت فارغ كمت الم العبريه الي بالشارع .. بس جان سراه للولد .. مشيت الم عبرية و قبطت تقريبا و عبرت لبغداد جديدة .. مقابيل مرطبات حسان لحك بيا هو ..كسر عليا بالكوستر مالته و افتر الستيرن بيدي لأول مرة بحياتي .. جان اصعد بتك تاير الجزرة الوسطية و اطخ سيارة برازيلي تكسي ..المرور مال قاطع بغداد الجديدة عرف .. جوي سوولي تخطيط و الصوج بيا طبعا .. ابو البرازيلي انطيته عنواني و رقم البيت و فضيناها بس بعد ما رحنا اني وياه للقاطع الرئيسي ..طلعت من القاطع عيوني بكصتي .. افور نار ..ركبت السيارة و طلعت تايلبر حطيته على الكرسي الكلابي الي بصفي و رحت للكراج …بيني و بين نفسي كلت اليوم لو قاتل لو مقتول و شيصير خلي يصير ..وصلت للكراج جان الولد بعده مجاي ..شافوني السواق و يدرون بالسالفة لان كلهم نفس الطريق للكراج و نفس الخط ..كالولي عوفه متسوى و من هالحجي ..كتلهم بله لحد يدخل نفسه رجائا ..هذا الحجي الصبح كله طار اني بالقاطع مال مرور جنت .. يعني ساعه 11 تقريبا لو 12 ..اجه العينتين فات للكراج و طبك السيارة ..ركضت عليه ضربت الجامة مال سيارته بالتايلبر انفطرت من الطول للطول بس منكسرت .. لان جام السيارات جلاتين و صعب ينكسر بسهولة .. ضربت الايتات و هو نزل عليا هم شايل حديدة حرف ال مال جك الي يفتح بيها ستدات التايرات ..ضربني بضهري و ضربته و الناس كامت تفاككنا و اخذو مني التايلبر و هو وكع من ايده الحرف ال …اني كتلهم هاي هي عوفوني لان مجلبين بيا و مجلبين بي .. كتلهم هاي هي والله كافي بس عيوني على الحديدة الي وكعت من ايده .. اندليت مكانها بنص الرجلينات مال السواق ..و جان ادنج عليها و شلتها و كمزت من نصهم و شمرتها عليه بكل قوتي ..ليش مو ابن الاوادم يوخر و تجي برجل بنية طالبه خطية جانت تمشي لا بيها و لا عليها ..وكعت بالكاع و كامت تبجي ..رئسا كل السواق التمو عليها و اني ركضت عليها بالكوة وكفتها على تك رجل و صعدتها بالكوستر و صعدت وياي رياجيل شياب سواق مال كوسترات حتى لاتخاف خطية ..طلعنا بيها للمستشفى طلع كسر برجلها ..اخذت عنوان اهلها و طلعنا لبيتهم .. طلع ابوها متوفي و عدها اخوة ثنين واحد يشتغل بمجمع المشن .. و الثاني يشتغل بمطعم بالكرادة ..امها وحدها بالبيت جانت .. عدنا سايق جبير اسمه ابو عمار هذا خوش يحجي .. هو اجه وياي الرجال …هناك يم بيت البنية كالي عوفني اني اوصللها الفكرة حتى لاتخاف ..كلتله ماشي ..البنية طلعت طالبة بمعهد معلمات ..كام يحجي وي امها ابو عمار و صدك قنعها بس شنو تبجي المرية خطية تبجي و تلطم ..اني الطريق من بيت البنية للمستشفى كمت ابجي و الوم نفسي بس ابد مخليتها تحس اني الي ضربتها لان ابو عمار مكالها هذا الي ضربها ..وصلنا للمستشفى المرية شافت بتها و طكت من البجي .. عاد شوية من سمعت حجي الدكتور و كالها يمعودة كسر و كلها فترة و تكوم بخير و سلامة شوية هدأت ..ابو عمار كام يحجي وياها و يكلها احنا شتريدين حاضرين و من هالحجي .. المرية كالت منو الي ضرب بنتي اريد ابلغ عليه الشرطة ..عاد اني رحت عليها بهل الحجي .. كتلها يمه اني ضربتها و مستعد لكل شي ..كالت زين روح خلص ما اريد منك شي ..من كالت هيج معرفت شحجي .. سكتت بس بقيت بالمستشفى .. عاد كمل الدكتور كلشي و البنية طلبت منه ورقة حتى توديها للمعهد لان متكدر تداوم مدة ..عاد كتب الورقة و اخذتهم رجعتهم للبيت ..رجعت للبيت لكيت السواق كلهم كبال باب بيتنا و اخوتي الكبار حالين السالفة بيني و بين السايق الي صارت المشكلة من وراه ..ثاني يوم من صباحيات الله اخذت امي و رحنا لبيت البنية .. لكيت اخوتها بعدهم مطالعين للشغل …طبعا اخوتها ميعرفون اني ضارب البنية و امهم معلمه بنتها شتحجي .. و كايله كبالهم اتزحلكت بالكراج و انكسرت رجلها .. حتى لاتصير مشاكل و يجون يتعاركون لو شي من هالقبيل ..اني من شفتهم استقبلوني و استقبلو امي رئسا عرفت ماكو شي و همه ميعرفون شي ..عاد سمعت الام تكله لأبنها بطريقك مو تنسى تودي الورقة مال الدكتور لمعهد اختك لا يفصلوها .. اني رئسا كمت و اخذت الولد للمعهد و طبيت وياه جوى قدمنا الورقة للادارة و طلعنا .. الولد خطية كالي خلف الله عليك البارحة جبت اختي للبيت و اليوم ساعدتني و هو ميدري الفلم شنو ..اني كتله يمعود قابل شمسوين صدك جذب الدنيا طارت ..امي من رجعت اجيبها من بيت البنية … كالت يمه يمه يمه شكد طيبين ذولة الناس ..يمه يمه يمه شكد حبابين و شكد رويحة حلال ..والله والله مشايفه مثلهم خطية عايشين على الرحمن الرحيم و كلش كلش من اهل الله ..كتلها والله .كالت والله هاي البنية صارت سالفتها صدفة بس والله لو تزوجها لان فقيرة و اخوتها و امها فقره ..كتلها يمه شتحجين انتي ؟كالت والله متلكي مثلها خطية .. حبابة و طيبين كلش ..كتلها والله هي البنية حلوة و حبابة بس مترهم ..كالت معليك عوف الشغلة عليا ..و صدك امي كمت اوديها هي وخواتي بين فترة و فترة .. لحد مكامت البنية على حيلها و خطبتها اليا و تزوجنا ..الحلو بالموضوع اكثر من شغلة ..اول شغلة السايق الي من وراه تعرفت على البنية و اتزوجتها هو دفع فلوس التصوير مال العرس و ركص بالعرس اكثر حتى من اخوتي و صار اكثر من اخوية ..الشغلة الثانية ورى 3 سنوات من زواجي اخوة البنية عرفو حقيقة الموضوع و شلون تزوجت اختهم و كتلهم اذا تريدون تطلكونا و تكتلوني كتلوني بس تقبلوها ابني يصير يتيم .. لان صار عندي ولد الحمدلله و الشكر ..ماتو من الضحك و كالو لا يمعود و حتى لو عارفين بوقتها يجوز جان اتعاركنا وياك بس متوصل للقتل لان هاذا قدر ..الشغلة الاخيرة .. بطلت عصبية نهائيا و البنية كصتها كلش حلوة عليا اشتغلت بمجال ثاني بعيد عن السواقة و الله فرجها عني و حاليا وضعي المادي خير ونعمة من رب العالمين ..(رياض كاندال)انتهىاخوكم ابو بغداد سايق التكسي#ابوـبغدادر
