دعابل

الحبل الي انشر عليه هدوم … هو مو حبل جان واير مال تلفون اسود … بابا جان رابطه على حايطنه و على حايط جوارينه … بيوم من الايام طلعت شريت الهدوم و طبيت جوى و ورى شوية اجه اخوية الصغير كال الهدوم مالتج الي شريتيهم كلهم بالكاع .. طلعت ركض لكيتهم وصخات و بيهم طين لان الحديقة مالتنه قليل بيها حشيش (ثيل) و بيها مكانات هواي تراب و اصلا الهدوم مبلله شوية … كرهت نفسي لان لازم اعيد غسلهم و نشرهم مره ثانية … عرفت الواير مكطوع بفعل فاعل لان ابوية شاده قوي و مو اول مرة انشر عليه هدوم … رجعت كلت لبابا و بابا طلع شده بالحايط الثاني … و كال هاي همه كصو متعمدين لان اخوج تعارك وياهم علمود الطوبة مالته … بوقتها كلت بيني و بين نفسي شكد عقلهم صغير من يكصون الواير الي نشر عليه هدوم علمود عركة جهال … و من يومها اني ما اسلم عليهم و لا احجي وياهم … بنتهم الي بعمري جانت وياي بالاعدادية من جنت اشوفها ادير وجهي على صفحة الثانية … و كلش كرهتهم .. و هي جانت تسلم واني ما ارد السلام عليها … كرهت العائلة كلها … و طبعا اخوية الصغير بوقتها هو شايف واحد منهم كاص الواير بس ما عرفه منو … ابوية بوقتها هم كام ميسلم عليهم و امي كالت عوفوهم خلي يولون و انطت ماعونين مالتهم جانو يمنا لبيت جوارينه المقابيلنه همه رجعوهم الهم … يعني من النهاية كطعنه علاقتنه بيهم نهائيا … و تقريبا سنة كاملة احنا لا نسلم عليهم و لا همه يسلمون علينه … و بيوم من الايام اجه اخوية حمودي مضروب و كال حازم ضربني … ابوية ركض طلع تعارك وياهم عركة جبيرة لان اصلا احنا متحملين عليهم و جوي عمامي ثنين و كبرت السالفة و بالاخير حلوها بيناتهم و صالحوهم بس شنو … مصالحة مبنية على شي اسمه انته بحالك و اني بحالي … يعني جانت هالعركة هي فاصل لكل شي بينا و بينهم .. و ابوية كام يكتل حمودي اذا يشوفه يلعب قريب منهم و ابوهم يكتل ابنهم اذا يشوفه يلعب قريب من حمودي .. كامو يسوون هيج حتى لا تصير مشاكل ثانية … و مرت سنين العمر و احنا بحالنه و همه بحالهم و حتى اذا تصير فاتحه بالمنطقة و ابوية يروح لو ابوهم يروح محد يسلم عالثاني ..
و امي نفس الشي اذا تروح للجوارين و امهم موجوده هم متسلم عليها و طبعا هواي جوارين رادو يصالحونه بس مرهمت لان خلص … طبعا بهل الحجي اني موظفة .. جنت اروح و ارجع بخط يذبني براس الشارع و ارجع مشي … اني ناعمة يعني جسمي ميبين اني موظفة و جبيرة بالتلاثينات .. جسمي و شكلي عبالك وحدة بالاعدادية لو متوسطة .. بيوم من الايام راجعة من الدوام و دنيا ظهر ماكو بشر بالشارع و واحد لحكني .. و يمشي ورايا و يكلي بس خلي احجي وياج كلمتين زين بس اخذي الرقم .. اني زهكانه من الحر و من الوضع و تعبانة جان اندار عليه و عطت عليه بصوت عالي ولييي منا … و بنفس الوقت الي عيطت بي جان تجي ام حازم ركض و طبعا هي مريه جبيرة طلعت جانت تمشي ورانه … ركضت جان تضرب بجيس المسواك و هو انهزم … و كالت بنتي خو ما سوالج شي .. كلتلها لا خاله ماكو شي .. و بقت تمشي وياي لحد ما وصلنه للبيت و فتت جوى .. و هي فاتت .. و طبعا ما سلمت عليا و لا اني سلمت عليها … حجيت الموقف للأمي و اخوية جان كاعد … أمي كالت خلي تولي لو شيسون يبقون (…..) يعني غلطت عليهم … اخوية كام يضحك و طبعا بهل الحجي اخوية كبر و صار رجال … كال بعدكم تكرههوهم … امي كالتله شنو نسيت … كالها يمه اذا اكلج شي يمكن تضربيني سجين … امي كالتله شنو … كالها تذكرين بيت ام خضير الي جانو كبالنه و شالو للحبيبيه … كالتله يمه وين اكو منهم والله مشتاقتلهم ذكرتني هسه اخابرهم .. كالها تذكرين ابنهم الصغير الي جنت العب وياه اسمه مظفر .. كالتله اي ؟؟
كالها فد يوم لعبنه دعابل اني و مظفر و حازم .. حازم جان خوش يلعب دعابل … خسرنه كل دعابلنه و تعاركنه وياه كلناله انته تزاغل و تقدم اصابيعك من الخطه مال طنب و طبعا هو جان يلعب عدل بس احنه ردنا نرجع دعابلنه منه … و ما قبل يرجعهم و ضربنه و ضربناه و راح لبيتهم و اخذ الدعابل مالتنه … مظفر طلع الطوبة مالته و كام يضربها قوية على باب حوشهم حتى تطلع صوت عالي .. و ابوهم طلع صيح علينه و تعاركنه بوقتهم وياهم اذا تذكرين .. و ابوية طلع .. و عبالكم العركة علمود الطوبه و بيومها اني و مظفر كطعنه الواير مال شر هدوهم و اني كلت لأبوية شفت ايد كطعته علمود يتعارك وياهم هههههههههه .. و بوقتها زاعلتوهم و اني كيفت لان كلش كرهته ابن الاوادم اخذ دعابلي … امي بهل الحجي كالتله كوم اطلع ابن الكلب (مكرم القارئ) من المطبخ و كامت تصيح عليه الله لا ينطيك كله من وراك هالسنين كلها احنه منحجي وياهم و طبعا اخوية يضحك لان مرت سنين على هالحاله … و من اجه ابوية امي حجتله بس شيسوي يعني سنين العمر مشت و احنه منحجي وياهم و كرهناهم من ورى عركة جهال و اصلا السبب اخوية و طلع كل الي صار اخوية مرتبه … طبعا بيومها فد انقهرت بس شنسوي يعني .. اكو امور من تمر عليها سنين مترجع مثل مجانت حتى لو بينت الحقيقة .. و هالشي مو بس بالعلاقات و الصداقة بكل شي يصير هيج .. بيومها انقهرنه و رجعنه نسلم عليهم بس بقت العلاقة باردة لحد هاليوم و هالساعة .. لان خلص الي صار صار .. علمود هالشي مرات من تصير عركات بين الجهال لا تصدكون كل شي لان الجهال يبقون جهال .. و مو شرط يكون حجيهم صدك و هالشي مو ذكاء لو دهاء .. بس عقلية اطفال .. و المصيبة احنا بوقتها تأثرنه بهل العقلية و اندفعنه وراها و خسرنه جار العمر بسبب شي مموجود اصلا .. و هسه كل ما اكعد بيني و بين نفسي اتذكر وسن شلون جانت تباوع عليه بالمدرسة و اني ادير وجهي .. لو شلون تجي تسلم واني ما ارد السلام اريد ابجي والله بس شنو الفايدة .. منكدر ورى هالسنين نروح نكلهم يابه ترى حمودي سوى هيج و هيج ..بس عالاقل رجعنه نسلم عليهم و خطية همه يردون السلام و ميدرون الي صار بالضبط شنو .. و مثل ما كلت ميفيد الحجي بالراح لان الراح راح ..

المصدر / صفحة ابو بغداد