خط التلفون الاراضي

جنت اشتغل سايق كوستر بس شغلي خطوط و أعراس و فواتح و زيارات و سفرات بس .. أبو الكوستر الي اني سايق بيها يخاف على سيارته و ميريد يشغلها ٢٤ ساعة حتى لا تتعب .. صعدني بيها سايق لان يدري بيا عندي خبره بالتصليح مو بس بالسياقة .. بمنطقتنا اني علاقاتي قليلة جانت .. و اعرف اشكال الشباب بس عن طريق السلام و الروحه و الرجعه بس .. يعني افوت للشارع اسلم و اطلع من شارعنا اسلم … حافظ اشكال الشباب الي من عمري بذاك الوكت .. فد يوم اخذت خط مال بنات لكلية .. و تعجبت اكو بنيه من البنات بيتهم بالشارع الورانه .. البنية جانت حمامه .. هادئه كلش و صوتها كلش ناصي .. من تصعد تسلم و اسمع صوتها اتكهرب … هي اول وحدة بالخط جانت و الكوستر فارغة .. اخذها و بعدين اكو اربع بنات عالشارع العام ينتظروني و وراها اروح لمنطقة ثانية هم يصعدون كم وحده وياي .. الكوستر مجانت تقبط بس الشهرية الي يدفعوها اهل البنات زينه (يعني مبلغ زين) .. اوديهم الصبح و ارجعهم بنهاية الدوام .. البنية هاي من شفتها اول مرة والله العظيم حبيتها .. من اول مره شفتها بيها .. من دون البنات جنت اباوع عليها بس هي ولا تنطيني عين .. ولا حتى تباوع عليا و ما بيني و بينها حجي غير بس السلام الي تسلمه عليا الصبح .. عرفت اسمها عن طريق البنات (يعني سمعتهم يحجون وياها) اسمها عذاراء .. مكدرت احجي وياها ابد .. جانت بيا خوفه من هالشي و اخجل لان جوارينه .. بس اني من اول مره شفتها تخيلتها زوجتي .. و كمت اصفن هواي من وراها ..و بكل صفنه تجيي براسي .. حبيتها من طرف واحد … حبيتها و اني اصلا ممحاجيها .. و جنت احس بفرق بيني و بينها .. يعني هي طالبة كلية واني ممكمل دراسة .. هالحجي حجيته لاخوية الاكبر مني .. اخوية كالي شوف اذا حبتك البنية حتى لو اهلها يرفضون تكدر هي تليين راسهم .. بس لازم تحاجيها .. واني اصلا مكدرت احاجيها .. بقيت احاول اشد انتباها بس محاولات كلها فاشله لان البنية متباوع عليا .. و للاسف ابو الكوستر قرر يبيع السيارة و يسوي مشروع ثاني .. و باع الكوستر و اني بقيت فترة بدون شغل .. لحد ما فد يوم اخوية اجاني كالي شنو رأيك نفتح دلاليه .. كلتله واني شمفهمني بالدلالية .. كالي معليك هي ميرادلها شي بس علاقات واني علاقاتي هواي بالمنطقة .. وصدك اخوية ماكو واحد بالمنطقة ميعرفه .. و فتحنا دلاليه .. طبعا بالدلالية بديت اقوي علاقاتي بالمنطقة و الشغل بالبداية جان قليل و حتى اول ٣ اشهر فلوس الايجار تدايناها من صديق اخوية .. و وراها انطلقنا بالشغل .. الحمدلله كدرنا نبيع بيت و طبعا نسبة الدلالية للي يبيع بيت زينه .. كدرنا ندفع فلوس الدين الي علينا و مشت السالفة و كمنا نشتغل .. و بيوم من الايام اني جيت للمكتب شفت اخوية واكف وي ولد .. سلمت عليهم و وكفت وجانو يحجون بموضوع بعيد عن الشغل .. وراح الولد و اخوية كالي عرفته .. كلتله لا والله منو ؟؟ كالي لك هذا اخو البنية ام الكليه .. كلتله جذب ! كال والله .. كلتله همه كم ولد و كم بنية .. كالي ولد ثنين واحد متزوج وكاعد بغير منطقة و الثاني هذا و البنية الي انته عينك عليها و امهم و ابوهم متوفي .. كلتله شيريد منك .. كال لك ميريد شي بس هو ديشتغل هسه وي فلان ابو الخياطة .. و هو يعرفني و شافني و اجه وكف يمي (طبعا الخياطة الي يشتغل بيها الولد بالعمارة الي بصفنا) .. كلتله اها .. ومن يومها كمت احاول اذب وياه ميانه .. و مرات اذا ماعنده شي اصيحه يجي يمنا يكعد بالمكتب خصوصا بالصيف لان الخياطة الي يشتغل بيها مابيها مبردة .. بس مروحه سقفية .. يعني حار المحل مالتهم .. يجي يمنا يكعد ونسولف و فد يوم سالته كلتله ماعدكم تلفون ارضي .. كال لا والله ياريت .. كلتله شعجب مو شدو للمنطقة خطوط ارضية شعجب مسجلتو .. كال جان عدنا خط بس ابوية باعه قبل ميتوفى بكم سنة .. كلتله اكو خط جو ايدي للبيع مال ناس باعو بيتهم و الي اشتراه ميريد تلفون ارضي .. شنو رأيك تاخذوه وسعره كلش مناسب .. كال ميبيعوه اقساط و ضحك .. اني من كال هيج كيفت .. لان جنت بس اريد احجي وي البنية و كلت لاخوية ورى مراح الولد .. اني راح ادفع فلوس الخط مال هذا الرجال و ابيعه لفلان بالاقساط .. اخوية كالي انته مخبل شنو تذب هيج فلوس علمود هيج شغله لك بابا خوب نروح نتقدملها ونخلص .. كلتله انته مو نفسك كلت انته لازم تحاجيها و اني بصراحة اخاف اروح اتقدم و ترفضني البنية لان هي دارسة و اني على كد شهادة المتوسطة .. كالي طبك مرض شتسوي سوي هي فلوسك قابل فلوسي .. كلتله ماشي .. و صحته للولد و كلتله قبل ابو الخط يبعلكياه اقساط انته شكد تدفع شهريا .. كالي سعر كلش قليل .. طبعا ردت الزكه بالنفاضة الي بالمكتب بس شسوي لازم اتحمله .. كلتله شوية بحبحها يمعود … و وصلت وياه لقسط شهري يعني هو هيج هيج قليل بس قبلت .. و وراها بكم يوم شدو الخط ببيتهم .. كمت اراقبه من اشوفه هو بالخياطة اتصل .. خمسين مره سدته بوجهي و اخر شي زهكت كالت انته شتريد متكلي و منين جبت رقمنا و منين تعرفني اصلا .. كلتلها اني اعرف حتى اسمج و اعرف وين تداومين و صارلي اكثر من سنة مراقبج و اني اصلا من المنطقة .. و ترى كل نيتي خير والله .. اني لا من الشباب الي يدورون علاقات خارج اطار المألوف ولا من جماعة حب و حبانية .. كالت مدام انته مراقبني و مدام جبت رقمي و تعرف اسمي اكيد تندل بيتنا و تعرف لون بابنا شنو .. عدنا باب و عدنا بيت و عندي اهل .. تكدر تدخل من الباب بكل احترام افضل من التلفونات و هذا الاسلوب .. كلتلها زين اني هذا الي اريده و ياريت بس غير بالبداية تعرفيني و تعرفين وضعي .. كالت اي اشرح وضعك لاهلي و عرف نفسك لاهلي اني عندي اخوه ثنين و امي .. كلتلها بس سمعيني و بقيت اتوسل كومة لحد مسمعتني .. كالت احجي .. و بديت احجيلها عن اهلي و عن وضعنا و عن شغلي من صغر عمري و كلتلها اني تركت الدراسة علمود الشغل و هي جان حجيها حلو و موزون وياي و كالت مابيها شي اهم شي البشر ميمد ايده .. و بديت احجي وياها بس مو يوميا .. يعني بالاسبوع مرتين لو تلاثة .. و كل هالحجي اني مكايللها اني منو .. و من جانت تسأل جنت اتهرب من هالسوال و دائما اكلها اكيد راح تعرفيني و خلي ببالج لو نيتي مو زينه جان طلعت طبه و طلعه و نلتقي .. جانت تكلي انته حدك وياي بس بالتلفون اني لا تربيتي و لا اخلاقي تخليني اطلع بدون موافقة اهلي .. و ذيج كليتي روح اسأل عني شكد مرزله شباب .. بس انته كلت رايدني زواج و على هالاساس داحجي وياك .. كلمة وحدة وياي محلوة تحجيها و بيها سوالف محلوة اسد التلفون و بعمرك بعد متسمع صوتي .. و صدك والله جانت كل مواضيعنه محترمة و اخير شي كلتلها اني منو .. بالبداية سوت نفسها ناسية شكلي بس جذابة طلعت هي هم تدري بيا اني جنت اريد احجي وياها بس جانت تتهرب .. و طبعا هالحجي بعدين عرفته .. الحاصل اني من كلتلها اريد اتقدملج و جنت خايف من هالشي ضحكت .. كالت اني بعمري ممفكرة بهيج شي مال شهادة و خريجه و لازم الا اخذ واحد خريج .. اهم شي رجال الي اخذه رجال و مو كل رجال رجال .. كالت بس أجل هالسالفة لورى امتحاناتي ما بقى شي .. و طبعا عرفت هي مكان الدلالية مالتنا و كالتلي اخوية يمك بالخياطة مال ابو فلان يشتغل .. من كالت هيج رأسا اني اخذت دور المزهرية ام الورد و سويت روحي ماعرفه و كلتلها ايباخ الدنيا شكد صغيرة يا سبحان الله .. و هي المسكينة مربطت التفاصيل سوى انو اني جبت الرقم لان اني اصلا بعت الخط لاخوها .. ما ربطت خطية و يمكن اصلا اخوها مكايللهم هالشي .. و من وراها كمت افتح المكتب من صباحيات الله بس علمود من تفوت بالخط تسلم عليا هههه .. على كولة اخوية انت انشط دلال بالدنيا .. وين اكو دلال يطلع من ثمانية للمكتب … اني جنت اطلع بثمانية الصبح حتى بس اشوفها و تشوفني .. ومن ترجع للبيت هم انتظر الخط يجي و اوكف برى و مرات من ما اكون موجود تسألني من نتخابر وين جنت .. اكلها طالع وي ناس داشوفهم بيت لو مشتمل لو قطعة كاع يعني على حسب شغلي .. المهم .. خلصت امتحانات و تقدمت و اخوها كيف كلش و طبعا هي وافقت و امها وافقت و تزوجنا .. بس بقت هي تداوم كلية و رادت بس تاخذ الشهادة و كالت ماريد اتوظف بس اهم شي الشهادة اخذها واني موكفت ضد رغبتها و اخذت شهادتها و سويتلها احلى حفلة صغيرونه (بيناتنا عائلية يعني) بيوم نجاحها و جبتلها هدية هم .. عالعموم .. هالحجي كله قديم بس ليش انفتح .. اني هسه ابني الجبير (الله يحفظة و يحفظكم اهلكم و اولادكم) ابني الجبير بالكلية سنة اولى .. طبعا هو من النوع الي يسأل هواي و ذكي كلش و محبوب بس مشكلته يدور علاقات واني ما اقبل على هالشي .. كلتله الي تريدها ازوجكياها بس علاقات بدون نهاية ما اقبل .. امه الله يسلمها تحجي هواي و متضم سر و طبعا هو يعرف بكل هالقصة من لسان امه .. اني محاجيله هالتفاصيل كلها بس امه الله يسلمها حاجيتله و حاجيه لاخته الاصغر منه .. ذاك اليوم هو وخاله جانو ديسولفون و رايح حاجيله هالسالفة و كايله اني ما اتزوج الا ورى علاقة حب قوية مثل علاقة حب امي با ابوية .. خاله كاله ياحب ياصخام ابوك شاف امك مره وحده و سال عليها و طلبها .. ضاحك هو و كايله هاي انته جنت نايم و رجلك بالشمس و خارطله كلشي و خاله خابرني كالي هسه تجي .. رحت للبيت لكيته عيونه حمر و ضايج .. كالي اني هسه عرفت ليش بعتلي التلفون اقساط .. (طبعا اني وياه ميانه كلش قوية) جان يغلط عليا و همزين ابني مموجود .. ضحكت اني كلتله شبيك ياخط .. جان يكول صيحها صيحها (على زوجتي ههههه) صحتها .. جتي ركض .. كالها يعني جنتي تحاجي بدون علمي مو .. ضحكت هي كالتله منو كالك .. كالها ابنج .. و زعل من كل عقله ورى خمس جهال هههههه و جبيرهم بالكلية زعل خالهم … بوسته من راسه و كلتله يمعود جذب والله هاي هي رادت تسويلها قصة مثل قصص الافلام و حجتله هيج و طبعا هو يعرف كلامي جذب و كلام ابني صدك بس مشاها لان شيسوي المسكين ههههه .. جهالي بطوله و بنتي بعمر زواج و ابني رجال .. زين .. هسه اني اعرف احتمال الي سويته غلط بالبداية بس والله العظيم نيتي جانت زواج و جنت بس اريد اتقرب للبنية حتى ما انرفض لان اني ماعندي شهادة .. و داعة جهالي و داعتها هي الي لو اموت ما احلف بيها جذب لان هي اغلى شي بعمري بعد امي (الله يرحمها و يرحم والديكم) والله لو ادري هي متفكر بسالفة الشهادة جان مسويت الي سويته .. بس ردتها .. ردتها الي وحدي .. زوجتي و ام بيتي و ام جهالي تصير … والحمدلله على كل حال .. اللهم اسعد كل الناس و لاتفرقهم عن الي يحبوهم .. لان صعبه واحد يحب شخص و ميصير من نصيبه ..(خط التلفون الارضي) انتهى اخوكم ابو بغداد سايق التكسي #ابوـبغداد