حلم رحيم

حسيت فد شي نغز رجلي و فات باللحم .. مكدرت امشي و روحي رادت تطلع من جسمي .. وكفت و نزعت الترانشوز يعني الحذاء الرياضي (مكرم القارئ) .. طبعا جريته شوية و حسيت فد شي طلع من رجلي … لكيت من هذا الدنبوس الي جنا نستخدمه بالمدارس .. من نعلك فد لوحة (كارتون) عالحياطين .. مثلا لوحه مرسوم بيها لو لوحه بيها شعر او فد مقولة … داخل بنص رجلي .. بقيت واكف بمكاني و افرك المكان حتى يروح الوجع .. و بنفس الوقت امسح الدم … رفعت الحذاء بالمكلوب و طلعت الدنبوس منه .. الحذاء تقريبا ممسوح .. و هذا ثاني حذاء يشتري اليا ابوية بوقتها … اول واحد عبرني كم شهر و هم خرب و الثاني مستحمل بسرعة انمسح .. و بوقتها تذكرت حجاية ابوية اني و واكف بنص الشارع و شايل حذائي بيدي .. جان يكول علكيفكم وي هدومكم و احذيتكم .. حاولو تحافظون عليهم .. و كلت بيني و بين نفسي هسه اذا ارجع اكول لأبوية هذا الحذاء هم خرب شراح يكول .. و طبعا اعترف هالشي هم صوجي و اني مجنت احترم حجاية ابوية .. جنت اركض سريع بالممرات مال المدرسة و اوكف فجاة و ابقى اتزحلك عالحذاء و مو بس اني اسوي هالشي هواااااي جهال يسوون هالشي .. مثل التزلج عالجليد .. و جنت اسويها برى هم بالساحة مال مدرسة و الحصو الي بالكاع (الحصو الصغار كلش) هو يسهل عليا الزحلكة لان الكاع مال الساحة تختلف ارضيتها عن كاع ساحة الممرات مال الصفوف .. جان قوية و خشنة .. و بنفس الوقت العب طوبة هواي و اركض بي هواي .. جنت كلش حرك .. و رجعت للبيت اعرج .. امي جانت بالطرمة دتخبز و شافتني فتت هيج امشي على كيفي .. كالت شبيك يمه شبيها رجلك .. كلتلها فاتت كزازة برجلي .. عافت الخبز و ركضت عليا و نزعتني الحذاء و غسلت رجلي بمي الصوندة مال الطرمه .. و كلبت الحذاء شافته ممسوح .. كالت هذا خلصان مو ذاك اليوم ابوك اشتراه .. كلتلها شسوي يمه يعني .. كالت هسه اجيبلك غيره … بس لا تكول لابوك .. خطية جانت مجمعة كم فلس لأي ظرف طارئ .. و راحت بنفس اليوم اشترتلي بي حذاء جديد .. و كالت لاتحجي كبال ابوك .. خطية امي مرادت تقهرني و مرادت تقهر ابوية .. و من الفلوس الي مجمعتها اشترتلي .. بذاك اليوم حسيت بقيمة الشي .. و كمت ما اسوي الشغلات الي جنت اسويها قبل .. يعني ما اتزحلك بالشارع لو بالساحة و امسح الحذاء مسح .. و كمت ما العب بي طوبة ..
مع العلم جانت روحي بالطوبة اني .. و كمت احافظ على ملابسي .. و بديت شوية افتهم و اعرف اهلي شلون ديتعبون حتى يوفرون النا كل شي رغم امكانيتهم البسيطة .. و بصف ثالث متوسط بديت اشتغل .. جنت اشتغل مو علمود اساعد اهلي .. بس علمود اجمع و اشتري ملابس مدرسية للسنة الدراسية الجديدة .. و شغلي جان بس بالعطلة الصيفية .. يعني الجهال تتونس بالعطلة اني اشتغل من اول يوم عطلتي لأخر يوم حتى الم فلوس .. و تعلمت و عرفت ابوية شلون يتعب من يجيبلنه فلوس للبيت .. بس اني جنت ما اتعب لان صغير و بحيلي .. و الطوبة ما عفتها .. أشتغلت عامل يم فيتر (يعني جيب سبانه ودي سبانه) .. وشوية شوية كمت اتعلم .. و بفلوسي و بدون ما اقهر ابوية اشتريت البسة رياضية كاملة .. و جنت اروح العب طوبة .. الفرق الشعبية كلها تعرفني .. و عندي مهارة حلوة و اتحكم بالطوبة مثل ما اريد و جنت العب وسط و هجوم و اجيب كواله حلوة .. هالموهبة ماتت بمرور الوكت .. الي موتها الواسطة و المحسوبية .. كتلوها .. احنا بالعراق مو بس البشر عدنا يكتلون .. اكو شغلات ثانية تكتل بس هي مو بشر .. و الواسطة .. و المحسوبية .. من هالشغلات الي جانت تكتل .. ماعندي احد يرفعني و يقدم موهبتي .. و رحت قابلت و شافوني مدربين و جنت افضل الموجودين بالاختبار و بشهادة الشباب الي رايحين وياي .. بس ما قبلوني .. بوقتها كرهت شي اسمه طوبة من شفت (فلان الي جاي من طرف فلان و الي لعبه على كد حاله انقبل و اني انرفضت) … و بديت ادخن جكاير و الي يدخن خلي ينسى الطوبة اصلا لان نفسه راح يصير مو طويل … جانو مرات اصحاب الفرق الشعبية يجون لبيتنا يريدوني ارجع للطوبة .. اكلهم لا ماريد .. و دائما اذكرهم بلي صار وياي .. و يكولولي عود و يريدون يقنعوني ..
مو فلان جان لاعب فرق شعبية و هسه صار لاعب منتخب .. اكلهم اي فلان يجوز الحظ خدمه بس اني لا حظ و لا عندي احد خدمني .. و بطلت طوبة نهائيا و ذبيت روحي عالشغل .. المدرسة بقيت بيها و داومت اعدادية و جانت درجاتي حلوة و بصراحة و راح احجيها ولو هي مو صحيحة .. بس الاساتذة جانو يساعدوني هواي بالدرجات .. لان اغلبهم عدهم سيارات و يصلحون سيارتهم يمنا .. و بذاك الوكت جان التصليح غالي و الفلوس قليلة لجماعة التربية و التعليم .. يعني المدرسين الي بالمدرسة الهم طنه و رنه .. من يجون يم الفيتر خطية ميعرفون شلون يكولوله ما عدنا .. و كلهم يعرفون بيا اني فيتر و طبعا ابو المحل الي اشتغل وياه ميرجعلي كلمة .. لان يدري بيا ايدي مثل الدكتور .. اخليها على اي سيارة لو بيها اي عطل اشغلها و ارجعها للحياة .. الاساتذة جنت اساعدهم بهل الشي .. و مرات جانو يصيحوني برى و يطلعوني من الدرس .. يشغلون سيارتهم كبالي بالكراج مال المدرسة لو برى .. و يكولولي على فد صوت يطلع بسيارتهم لو بيها فد شغل من تمشي .. حتى المدير الي موكف الاعدادية على تك رجل جان يصيحني مرات .. و من هالباب و للأمانة جانو يساعدوني بالدرجات دائما بس حدهم وياي للبكلوريا وراها لازم اني اعتمد على روحي .. و الحمدلله نجحت من السادس و طلعت معدل زين دخلني كلية .. بالمناسبة بهل السنين الي دتمشي اني ابوية شوية تعدل وضعه المادي و السبب لعمي الصغير .. ساعد ابوية بفد شغلة و الحمدلله مشت العيشة و طبعا اني هم جنت اساعد البيت .. و بالكلية قررت قرار .. قررت ابطل من شغلي بالمحل و جان اصعب يوم عليا يوم الي رحت بي للرجال الي علمني هالصنعة و كلتله اريد ابطل .. الرجال جان معتمد عليا هواي .. بس اني اخذت هالقرار لان اعرف اكو احد راح يساعدة و عنده ثنين وياه و ابنه هم فيترية بس للأمانة مو مثلي .. مو مثلي ما اقصد بيها يا ستار ياربي شي مو زين .. بس الي اقصده يعني اني اساهل بالسعر .. و اذا رجع العطل لسيارة مصلحها اني ماعندي اشكال ارجع اعيد التصليح .. همه مو مثلي .. بس حلو شغلهم .. رحت و بديت افتح مواضيع كومة وي الرجل الي علمني هالشغلة .. عاد هو افتهم .. كالي رحيم من الاخير شتريد تكول كافي توديني هناك و ترجعني منا.. شتريد ؟؟
كلتله اريد ابطل .. هو انقهر بس ما بينلي هالشي .. و كالي بس يبقى هذا محلك و اني ابوك و الي هنا اخوتك .. و شوكت متجي المحل مفتوح الك و اي شي تريد كول بدون متستحي .. طبعا هالرجال صارلي سنين اشتغل وياه .. وهواي مواقف صادفتني بهل الاربع اركان .. اكلت و شربت هنا .. ضحكت .. تعاركت .. تعلمت .. تعرفت على ناس … من عفته و طلعت نزلت دمعتي .. و قررت اصلح سيارات بس بمنطقتي .. يعني ما اشتغل يم احد .. و طبعا احنا منطقتنه شعبية و كلهم يدرون بيا فيتر اني .. و اصلا عندي غراض مال تصليح سيارات بالسطح مال بيتنا .. و صرت اني سيد وقتي .. يعني اشتغل عالمزاج .. جانت اسعاري جوى السوك .. اهل المنطقة لان شعبية هواي بيهم اصحاب تكسيات لو كوسترات لو كيات .. و هم اكو موظفين عدهم سيارات شخصية .. جنت كبال باب بيتنا .. و جان عندي فلوس شوية مجمع .. اشتريت اول سيارة بحياتي برازيلي .. اخذتها بيضه مو تكسي .. بالكلية بذاك الوكت اي واحد يركب سيارة عبالهم يفيك .. همه ميدرون اني جنت اخلص دوام و اطلع اطك طك بيها … جانت علاقاتي كلش محدودة بالكلية .. و فد يوم سيارة مال ولد طالب جانت واكفة و شغلتها سهلة .. الولد جان من جماعة الفيكات .. اني ردت اطلع من الكراج و شفتهم فاتحين بنيد السيارة و الولد وياي بنفس القسم و بيناتنه بس سلام .. وكفت كلتلهم خير بيها شي .. كالو منعرف والله .. وكفت و بخمس دقايق شغلتها للسيارة .. كالولي انته فيتر ؟؟
كلتلهم اي .. ابو السيارة كالي لو تدري شكد جنت اكرهك و عبالي انته مغرور لان متلتقي وي احد و تجي بس تكمل دوامك و تروح .. ضحكت اني كلتله يمعود يا مغرور اني بس اخلص دوام اطلع على باب الله مرات .. كال و لو تدري البنات هم يكرهوك .. كلتله هاي فوكاها .. ومن يومها صار صديقي .. طبعا الولد علاقاته هواي بالكلية .. حجالهم اني فيتر و اشتغل تكسي هم .. اكو بنات جانو محتاجات (خط) يوديهم و يجيبهم .. كالوله بيها مجال ياخذنه .. الرجال كالي و اني قبلت .. همه ٤ بنات .. ثنين منهم بمنطقة وحده و ثنين بغير مناطق بس قريبات وحده عالثانية .. اني شوية بعيد بس على طريقي ..
و من بديت اخذ الخط و علاقتي وي الطلاب كامت تنفتح … و كمت اختلط هواي .. فد يوم من الايام اكو طالب مادري شبي يغار .. مادري يكرهني .. جنا دنسولف على غلاء الاسعار و هو كالي هو كلها صايرة حرامية فيترية و تجار .. حسيت كاعد يسمعني .. كلتله وليش اول شي خليت الفيترية ؟؟
كال اهوووو نسيت انته فيتر عمي انتو ملائكة .. كلتله لا مو ملائكة احنا بشر بس مو كل الفيترية حرامية .. كال حرامية … كلتله زين بالجذب كول حشاك حرامية .. كال اكلك لا تكمز عليا و تبيع عليا سوالف مال شوارع .. هو كال هيج اني متحملت ضربته .. و ضربني و التمو الطلاب .. فاككونه و استدعونه للادارة .. حليناها سلمي .. و تصالحنه بس اني اكرهه و هو يكرهني .. اني نسيته و هو نساني .. اني بوقتها جان عندي علاقة ببنية .. علاقتي بهل البنية مجان بيها حب و هالسوالف بس اصدقاء .. هو عاف كل بنات الجامعة و كام يلحكها و يسمعها حجي .. لان يشوفها توكف وياي دائما .. رحتله و كلتله عيب انته جبير .. كالي قابل هي اختك .. كلتله الزم لسانك .. كالي اذا انته رجال تعال برى الحرم الجامعي .. كلتله دحمد ربك ذاك اليوم خلصوك مني .. كال دجرب نطلع برى و اشوفك منو الرجال .. كلتله امشي .. طلعنا برى اشو هذا بنص الطريق احنا و دنمشي حسيته مو طبيعي .. و بعدنا ممكملين مشينا اشو وكع بالكاع و كام ينهز جسمه .. طلع بي صرع المسكين .. يابه كمت اصيح ماعرف شسوي .. جوي الناس و واحد يفتهم يمكن عنده احد من عائلته بي صرع .. كال اهم شي لا يبلع لسانه .. و كام يلزمه و يفرك بي و يحاول يحط ايده بحلكه .. و راحت الازمه بس الولد كام مثل الخدران .. يابه اني لزمتني العبره .. نزلت دمعتي .. عاد غسل وجهه و اني اعتذرت منه و بقيت ابوس بي .. من يومها صار اقرب واحد اليا بالكلية .. عفت كل الطلاب و هو صار صديقي .. الي افتهمته هو طيب بس لسانه عام عليه .. ميعرف يحجي .. و هالشي منين اجه .. من قلة العلاقات بحياته .. الدنيا قصة جبيرة .. اهم شي بيها اللسان .. و اللسان شلون يطلع حجي حلو .. من الاهل و التربية و زائد الاهل و التربية العلاقات العامة .. هو خطية علاقاته على كده و بمنطقته ماعنده اصدقاء غير بس الي يعرفهم هنا بالكلية ..
من كام يلتقي وياي شوية تعدل اسلوبه .. و جنت اخاف عليه كلش لا يعصب ..
المهم .. بذاك الوكت اني جنت اروح للملاعب الشعبية و مرات اخذه وياي .. من جان يشوف شكد ناس يعرفوني بالساحة و شكد يسلمون عليا و جنت اعرفهم عليه يكيف .. يطير من الفرحه .. و كل شوية يسألني انته شلون تعرف هلكد ناس .. جنت اكله اني جنت لاعب مال طوبة بس بطلت .. و بنفس الوكت فيتر بالمنطقة اشتغل عالمعارف .. و اصلا انته دشوف بعينك منطقتنه شعبية و الشارع اذا يفرغ بي خمسين واحد يمشون .. هو خطية عجبه هالشي .. و اشترى سيارة بوقتها بس علمود يجي يمي يوميا .. اني جنت اشتغل كبال باب بيتنا المغربية .. هو يساعدني .. طبعا هو اهله الله ممكن عليهم و امكانيتهم كلش زينه .. كالي شنو رأيك نفتح محل سوى .. كلتله اني اصلا جنت اشتغل بمحل و بطلت .. كال لك مو فيتر .. كلتله شنو .. كال كافتريا لو مطعم .. كلتله واني شمفهمني بهل الاشياء .. كال انته اسلوبك كافي ..
و علاقاتك كافي .. يعني ابسط شي الشباب هذولة الي نشوفهم بالساحة .. اكيد بيهم ناس تشتغل بمطاعم لو بكافتريات .. كلتله اكيد .. كال خلص و نشوفلنه طباخين هم .. كلتله هاي كلها سهله بس اني شنو دوري بالمطعم سيغ مال كص مثلا لو اوكف بالباب الطاب اكله تفضل و الطالع اكله الف عافية .. كال لا انته الادارة عليك .. كلتله والله شغلتك بيها صفنه و بيها فائدة مو بس الي حتى للشباب الي راح نشغلهم .. و صدك والله هو جان مخلي عينه على محلات اربعه طبك .. اخذهم و جنت اني وياه خطوه بخطوه .. و بدينا بسالفة المطعم .. طبعا صبغ و ديكورات و ترتيب كله جنت اني اجيب الي يسوي هالامور … و بعدين تحولنه لمرحله الطبخ .. و جبتله ناس ينشد بيهم الظهر و اني جنت وياهم بكل شي .. و فتحنا المطعم .. الشغل جان زين و خصوصا احنا عدنا علاقات كلش هواي .. حتى طورنه نفسنا و اخذنه قاعة قريب عالمطعم سويناها قاعة اعراس .. يعني هم قاعة نسوي بيها اعراس نأجرها و هم بنفس الوقت احنا الي نسوي الاكل للقاعة .. و كل هذا اني اجيب العمال و الي يشتغلون .. و وضعيتي تغيرت جذريا .. صار عندي علاقات كومة .. و فد يوم اجي لاعب عراقي كلش كلش معروف ..طبعا بدون ذكر اسماء هو جبير هسه .. جان عرس ابنه .. التقيت بي و هو ميدري اني غرفتي جانت متروسة صوره بصغري .. كعدت كباله احجي وياه راس براس ..
لزمتني العبره و انخبطت براسي الذكريات .. ورى مراح الرجال .. دمعت عيني بصراحة ..و اجه صديقي و اخوية و شريكي .. كالي شبيك .. طبعا بهل الحجي احنا متزوجين ثنينا .. كلتله الدنيا صغيرة .. كال شلون .. كلتله تدري اني جانت امنيتي اخذ صورة وي هاللاعب مو احجي وياه وجه لوجه .. و جانت امنيتي اوصل لأي لاعب مو شرط يكون هذا .. بس علمود يساعدني حتى اسمي ينعرف .. بس حرامات .. مرات تجي الامور بس متاخره .. كلش متاخره .. هاللقاء تمنيته قبل كم سنه .. يمكن جان هسه اني غير شكل .. اني رغم هالرزق و رغم ما الله الحمدلله فتح عليا برزقه و عايش و متزوج و حالتي زينه .. بس جنت اتمنى .. اتمنى لو صاير لاعب .. جانت روحي بالطوبه .. كالي خوية مو كل شي نتمناه يتحقق .. كلتله هم صح .. كال تدري اني شنو جانت امنيتي لعد .. كلتله شنو .. كال اصير مدحدح وابو لسان و ابو عركات و عندي اصدقاء المنطقة كلها تخاف منهم .. ضحكت اني كلتله غير امنيه تافهه .. كال احلفلك و داعة جهالي هاي جانت امنيتي … جنت اعرف روحي اني جبان .. جنت بالمتوسطة بصف اول متوسط .. اخاف افوت من يم صفوف الثالث .. لان جانو يتعاركون .. مرات جنت ابقى بالصف خصوصا من تصير عركة .. جنت اخاف لا يعصبوني و تجيني الحاله مال صرع .. و بقيت اتحاشى الناس لحد مدخلت كلية .. و كلها ناس كبار .. بس ماعرف ليش كلت جنت اكرهك .. جنت اغار خصوصا من شفت هواي ناس تلتلم داير مدايرك بالكلية .. و جانو يسألوك و الكل تحترمك .. ردت بس اضوجك و ضوجتك وصارت اول عركه .. بس مجتني الازمة .. و ثاني مرة جتني الازمه كبالك .. ومن شفت تعاملك وياي عرفت انته قيمتك جبيرة و حقها الشباب تلتم داير مدايرك لان مربى و تحب تساعد .. و حبيتك .. و عبالك الله دزك اليا .. جيت لمنطقتك و تعرفت على اهلك .. و على كل اصدقائك .. جنت اشوف بعيونهم الاحترام والمحبه (قبل منفتح المطعم) قبلهاااااا .. مجان عدهم اي مصلحه وياي و يتلكوني بالصلوات … و حبيت عيشتك و شلون تشتغل كبال باب بيتكم ..
امي و ابوية حبوك .. و كالو هذا اعتبره اخوك و همه الي شجعوني بسالفة المطعم بس كالو ديربالك بيوم تخسره لرحيم .. لان هالرجال ميتبدل .. و هاي سنة تجر سنة واني وياك اكثر من اخوه .. خوية انته ما صرت لاعب طوبة مشهور .. بس عندك جمهور بكل مكان .. بمنطقتك .. بشغلك هنا وياي و هاي ابسط شي اليوم لاعب طوبة مشهور وماكو عراقي ميعرفه جاك و اتفق وياك و عرفك و عرفته .. و لا تنسى .. لو صاير لاعب مال طوبة يمكن جان معرفتك .. تقبلها تخسر اخوك ؟؟؟
من كال هيج كمت حضنته و كلتله طزززز بالطوبة اهم شي معرفتك و الله اخوية و اكثر .. و بنفس الوقت انقهرت عليه كلش من حجالي شلون جان يخاف بالمدرسة لا يتعارك من ورى الصرع .. وهاي هيه ..

المصدر :صفحة ابو بغداد