حضن أمي

عندي عالميز مال المحل مكعب خشب ينفتح مثل الصندوك … جوى ببطنه سيارة صغيرونه مال لعب جهال … قبل فترة بنتي جتي للمحل و لعبت بالغراض و شايله هالمكعب الي ببطنه السيارة مادري وين موديته .. تعاركت وي زوجتي و حتى وي امي علموده .. و طلعت من البيت ضايج و زوجتي كالت بس روح ارجع للمحل واني راح ادوره و ادزه بيد الجهال … و رحت للمحل كعدت و اجه صديق عزيز عليا كعد يمي .. شافني ضايج مقهور كالي شبيك خوية ابو فلان .. كلتله شايف هذا المكعب الخشب الي اخليه هنا دائما .. كالي اي منتبه عليه و دائما اريد اسألك وانسى هو شنو هذا .. كلتله هذا بي سيارة صغيره و جايه القندره بنت القندره (مكرم القارئ) بنتي و لاعبه بي و مضيعته .. و اني جنت ممنتبه عليها .. كالي صدك تحجي انته .. كلتله اي صدك .. كالي شنو سالفة هالسيارة .. اخاف من صديقتك لو حبيبتك قبل الزواج و ضحك .. كلتله لا مو من صديقتي و سالفته طويله و اصلا مراح احجيها الك .. لان بيها تفاصيل عائليه .. كالي اعتذر والله ماعرف .. و تذكرت كل شي … تذكرت كل شي ورى مراح الرجال لبيته … وطبعا الحمدلله المكعب رجعته بنتي لان لكته زوجتي بالبيت … ومن ورى هالموقف رجعت بالتفاصيل كلها ليورى ..
ورى زواج امي اخذوني من بيت جدي ابو امي لبيت جدي ابو ابوية … جنت صغير و ما افتهم شي غير بس الطوبة و الطيارة النايلون والبايسكل و الموطه ام العود و الدعابل … صغيروني و اتذكر لحد هسه من اخذني عمي الجبير جنت لابس بجامة بازه لونها حليبي طوخ و مخططه خطوط زرك بس فاتحه الخطوط و بيها دكم كلش كبار وجيوب ثنين عالستره مادري القميص ماعرف شسمي اصلا .. الجيوب جنت مخلي بيهم ملاعيبي الي اتذكره جنت مخلي سيارتين صغار مال لعب .. الاولى سوده بيها ٣ تايرات و الثانية كامله تايراتها ولونها احمر بس مشخطه هواي .. و جنت مخلي دعابل ٤ عاديات و ثنين حليبيات .. و جنت مخلي مصرع هو والخيط مالته … هاي الملاعيب والهدوم الي بالجياسه كل ممتلكاتي بهل الدنيا بعد وفاة ابوية .. و بعد ما اتزوجت امي ورى فترة طويلة من وفاته .. اني الوحيد جنت لأمي وابوية … بيت جدي اهل ابوية مقبلو على زواج امي .. وكالو بس تتزوج ناخذ حسن يمنا يعيش .. و منقبل يعيش يم رجل امه و يجوز ينضرب لو ينكتل .. و طبعا امي مجانت موافقة عالزواج بس خوالي و جدي جبروها تقبل تتزوج مو علمود اكلها و شربها و اكلي و شربي ثكيل عليهم .. بس علمود تتزوج و متبقى عدهم وحده من البنات بدون رجال … الطريق جان طويل شوية .. غفيت عالكشن .. و وصلنه لبيت جدي طلعت بيبيتي نزلتني من السيارة .. الجهال طلعو يباعون عليا و يبتسمون بوجهي .. اخذتني جوى و سوتلي اكل و اني ايدي بجيوبي لكيت الدعابل ماكو بس السيارات و المصرع موجود … كلت بيبي الدعابل مالتي وكعو بالسيارة اريدهم … كالت باجر اشتريلك كومه حبيبي .. كيفت و اكلت الاكل و نمت .. فرشولي فراش صغير بالصالة يم بيبي .. هي حاولت تحضني من تنام بس اني جنت ممتعلم على ريحتها مثل ريحة امي .. اختنكت لان بيها ريحة دهن .. مو دهن اكل .. دهن مال عظام .. يعني علاج .. جانت كل متجرني يمها اسوي نفسي نايم و اوخر بالصفحه الثانية .. بالاخير عافتني و نمت .. وكعدت بيوم جديد .. كعدت على صوت نسوان عمامي و الجهال .. جابو الصينية مال الاكل و التمينا كلنه داير مدايرها .. طبعا عمامي رايحين لشغلهم ..
و بس النسوان و الجهال بالبيت .. الصينية صح جبيرة بس مترهم كلنا نتربع داير مدايرها .. وحده من نسوان عمامي كالت كومو كومو .. كامو الجهال واني وياهم طبعا .. كعدنا ليورى و همه النسوان كعدو .. وكامو يسوون لفات و يوزعولنه .. كل واحد لفه صغيره و الي يكملها يسووله غيرها .. اني اكلت لفه و مشبعت سوولي الثانية .. و شبعت .. طلعنا برى للحديقة نلعب .. و من الحديقة للشارع .. و بدت حياتي هناك .. تأقلمت وي الوضع .. و اليوم جان نفسه ينعاد لحد ما نقلوني لمدرسة بمنطقتهم و بديت اداوم .. الجهال جانو يحبوني واني احبهم .. و عمامي رياجيل يركضون على عيشتهم .. امي جانت تجيني هي ورجلها بين فترة وفترة .. جان يجوني وحدهم بعدين العدد زاد … بمكان ميجوني ثنينهم .. جويي ٣ … وياهم طفله (اختي) .. امي جابتلي اخت .. جنت اكيف من اشوف السيارة مال رجل امي تجي .. و طبعا باللقاء نكعد بالصالة وحدنا و للامانة محد ميفوت للصالة حتى بيبيتي تكوم تروح للمطبخ .. جان رجل امي ينطيني فلوس و امي هم تنطيني فلوس كل ميجون .. و يجيبولي مرات هدوم .. الفلوس اصرفها على الجهال وعلى نفسي .. العمر ذاك جنت صغير بي … و مجنت افتهم كل شي .. من بديت اكبر و افتهم الوضع .. جنت اسمع حجي هواي على امي .. و كل الحجي يكول (شلون تكدر تعوف ابنها علمود رجال و زواج) .. هاي الجملة جنت اسمعها ومرات بيها غلط ومسبه على امي .. مجنت اكدر اروح بوجههم اوكف و ادافع عن امي واكلهم مو صوجها .. صوج جدي و ولده .. همه فرضو عليها الزواج .. و هالحجي مو بس بالبيت .. كمت اسمعه من الجهال الي من عمري … كمت افتهم يعني .. جانو يسألوني وين امك .. لان جهال عمامي يحجون كبال غير جهال .. يكولون هذا ابن عمنا فلان المرحوم و امه متزوجه وهو عايش هنا يمنا … جنت انقهر .. و الله لا يخلي واحد بهل الناس بهيج موقف .. موقف متعرف شتسوي بي .. يعني هو اصلا ماكو شي غلط و حتى لو اكو غلط معقولة اني اتحاسب عليه و اسمع كلام لان اني ابن امي و ابوية و ابوية ورى ممات امي راحت تزوجت ؟؟؟
جنت انقهر و فد يوم سألت واحد من عمامي سوال ميخطر عالبال ولا عالخاطر .. كلتله عمو امي (……) طبعا الكلمة كلش قبيحه .. هو جان ملتهي وي التلفزيون رأسا دار وجهه عليا كالي شدتحجي انته وكام راد يضربني كالي منين تعلمت هالكلمة .. و شلون تكول هيج على امك … بجيت كلتله لعد ليش يحجون دائما على امي .. كالي منو يحجي .. كلتله خاله فلانة و خاله فلانة و خاله فلانة .. دائما اسمعهم يحجون على امي و اكثر وقت يحجون بي عليها من تجي هي و زوجها واختي هنا .. و يروحون .. كام يصيح بالبيت و التمو اخوته .. جان يكولوله شبيك .. كالهم حسن سألني امي هيج … ردت اكتله بس طلع سامع هالكلمات من نسوانه .. تقبلوها يكول هيج .. واحد من عمامي كاله اي امه هيج لعد المرية الي تعوف ابنها و تروح تتزوج شنو ؟؟؟
اني من كال هيج كبالي طكيت من البجي وجان اكله انته هيج و هيج وغلطت عليه ولو ادري مغالط .. والله لو يرجع بيا الوكت ما اغلط .. شالني و شمرني عالمعرض الخشب الي بالصالة .. المعرض الي بي تلفزيون و تحفيات و كلهن كزاز … فقدت الوعي هلكد مجانت الضربة قوية .. صحيت بالمستشفى … جان عندي كسر بضلعي و بيدي .. رجعوني للبيت بس من يومها صرت مثل الاخرس .. كمت ما احجي و من جتي امي تزورني .. سالتني شبيك كلتلها وكعت من الطابق الثاني لان جنت لاحك طير .. ردت الزمه للطير و هو عالحايط و تزحلكت و وكعت من الحايط وصار بيا هيج .. زوجها كال ناخذك ويانه تبقى يمنا لحد متصير زين .. و حسيت من كلمته او دعوته هو كالها بس ديجامل بيها .. المصيبة همه جانو يتوقعون اني طفل و من اكبر انسى هالسوالف .. مجانو يعرفون اني جانت ذاكرتي نظيفة و جديدة و تحفظ كل الي ديصير .. يابشر اني جنت طفل .. نص جودلية تكفيني اندفن عليها .. اكلي خبزايتين و بيض باليوم كافي عليا .. حتى ملاعيب ماريد .. ياربيي يا خالقني مجنت اريد غير بس اعيش حالي حال الجهال و ما اسمع كلمات على امي .. جنت اريد حضن امي .. اريد ريحتها .. اريد امي وبس .. اريد من انقهر لو انكتل لو اوكع اركض احضن امي .. اريد من اخاف اركض اختل وراها .. مجنت رايد شي جنت جاهل .. مجان اثرت على الاكل و الشرب مجان اخذت فلوسكم حتى اصرفها على روحي .. بس مريدوني .. من يومها حسيت حتى امي متريدني و مرتاحه لان اني عايش هنا .. صرت مثل الاخرس و صار عندي شي اسمه لا مبالاة بكل شي .. و طبعا مجنت اعرف الي عندي اسمه (لا مبالاة) بس من كبرت افتهمت اني جان عندي هالشي .. كمت ما اهتم .. يحجون .. يسبون ..
طززززززز بأمي و طز حتى بأبوية الميت لان عنده هيج اخوه ميعرفون يسيطرون على حلوك نسوانهم .. كبرت و بديت اشتغل و بطلت من المدرسة من صف رابع اعدادي .. طبعا امي صار عدها ٣ بنات من زوجها .. و بقت تجيني هي و رجلها كل فترة .. وجنت اشوف بعيون رجل امي خوف من يباوع عليا .. لان اكعد كباله و عيني بعينه .. جان يعجبني اخوفه مني بس والله تلزمني الضحكه .. لان ماريد اسويله شي بس اكرهه .. ما اسويله شي لان شمهما يكون صار اب لخواتي .. عمامي طبعا كامو يحترموني من ديشوفوني اشتغل .. و هم جانو يخافون مني لان جسمي جان ضخم … و مرات من تصير مشاكل وي ولد عمامي اني اتصدر المجموعة بالعركه .. هي مو فخر بس اني جنت هيج .. كلبي جان ميت .. و ما اخاف .. بيوم من الايام عمي الجبير فتح موضوع عالزواج .. راد يزوجني بنته .. طبعا هي اكبر مني ب٥ سنوات .. وكالي ليش ما ازوجك فلانه .. كلتله ماريدها .. واني ماريد اتزوج الا يصير عندي بيت وحدي و ما ظل شي راح اخذ بيت وحدي .. ضحك كالي شلون .. كلتله من حصتي من ورث ابويه من هالبيت و من محلات شارع العسل و من المكتب مال فواتح الي بشارع فلسطين و من البيت الي منطي للدكتور ايجار و ميسوي مذخر مال ادوية .. هذني كلهم عندي حصه بيهم لو اني غلطان ؟؟
كالي يعني تقبلها احنا كل هالسنين نستحي نفتح موضوع الورث بيناتنه حتى منتفرق و عايشين كلنه سوى .. وهسه علمودك ينفتح الموضوع و ينباع كل شي و يتقسم .. كلتله ليش تبيعون كل شي .. نكدر نقيم كل شي و تنطوني حصتي على حسب التقييم … و مو صعب هالشي .. كالي واني كل هالوكت عبالي انته فقير .. كلتله لا اني مو فقير اني ابن (———) نسيت لو اذكرك .. اذكرك بيوم الي شالني عمي فلان و دكني عالمعرض و اتكسرت .. كالي اسكت عيب هالحجي .. كلتله زين .. طبعا بوقتها اني جنت مرتب على هالموضوع و بديت بي من صدك … اول شي سووه عمامي كالو مدام تريد تفرقنا اطلع من البيت .. و راح نسوي الي تريده بس منريد نشوفك روح شوفلك مكان عيش بي .. وحسافة كل هالسنين انته عايش بنصنه .. ضحكت اني و بوست بيبتي و طبعا هي جانت كلش كبرانه وعيونها متشوف بيها زين .. و عفتهم ورحت كعدت ببيت ولد صديقي بالشغل وياي .. و صدك سويت الي براسي و طشرتهم .. و اخذت حصتي على داير المليم (على كولة المصريين) .. النذالة وين تصير بعد .. كل هالفلوس و جانو يبجون بوجه الله .. كل هالفلوس و من شافوني اشتغل شغل تعبان بالجذب مكالو تعال الزم فلان مكان لان انته حالك من حالنه .. جانو كل ميشوفوني رايح للشغل الجلاب (مكرم القارئ) يكولولي والله انته بطل .. يقشمروني بهل الكلمه ههههههه .. عالعموم اخذت حصتي و اشتريت بيت صغيروني و فتحت محل مال بنجرجي و تبديل دهن عالشارع العام .. و اخذت محل ثاني سويته اسواق .. شغلت ولد صديقي بالمحل مال بنجرجي و اني وكفت بالمحل مال اسواق ..
و تزوجت .. بس زواجي جان هيج لا حب ولا شي .. اخت الولد الي يشتغل وياي بمحل البنجرجي تزوجتها … والحمدلله شغلي جان ماشي و عيشتي زينه .. ولد عمي يجوني دائما .. و طبعا يحبوني كلش واني هم احبهم … بس يدرون بيا اضوج من عمامي ونسوان عمامي (يعني اضوج من اهلهم) .. اني كرهتهم من ورى حجيهم على امي … شمهما يكون هاي امي .. اني بالمناسبة ما احب امي .. بس تبقى أمي لو شيصير هي امي ….. جانت تجي لبيتي هي وخواتي ..
بس من جانو يجون اني اخلي فلوس بيد خواتي مو هي تخلي فلوس بيدي مثل قبل .. خواتي كلش يحبوني .. و اني صار عندي ولد ..
و مشى العمر و توفى زوج امي و البنات كبرو .. طبعا اني وضعي المادي زين و كمت اني اروح لخواتي و امي بين فترة و فترة .. اكبر وحده بخواتي مره خابرتني تبجي .. كالت اريد اشوفك .. كلتلها تعالي حبيبتي لو اني اجيج .. كالت تعال اخذني اريد ابقى يمك كم يوم .. رحت جبتها و اخذتها يمي ..
كالت صح انته اخوية و رجال و دمك حامي من وكت ما جنت جاهل .. وعشت وحيد و عرفت تشتغل و عرفت حتى تطلع حقك من عمامك .. بس مراح اخاف منك واحجيلك .. كلتلها ابد لاتخافين .. كالت اني احب ولد و يريد يتزوجني بس وضعه المادي كلش تعبان .. و كاعد ببيت جده .. كلتلها هم امه متزوجه .. كالت لاااااااا .. هذا امه وابوه موجودين عايشين بس وضعهم المادي كلش تعبان و كلهم عايشين ببيت جدهم .. و هو اذا يبقى هيج مراح يكدر يتزوجني اصلا .. كلتلها زين خلي يصير شي رسمي على الاقل حتى اساعده .. يعني معقولة بالله اجيبه افتح وياه موضوع و اكله لان انته حبيب اختي راح اساعدك .. اكوم هسه اسلكج بالمزهرية بنت المزهرية قابل احنا كاعدين بتكساس و اني لابس شورت مشكك و تيشرت عليه بوسه ورديه .. ضحكت هي و حضنتها كلتلها انتي مو بس اختي انتي بنتي .. جان تكول هو يريد يحاجيك و يطلب ايدي منك .. كلتلها هو واهله .. ميجيني وحده .. جان تكيف و صدك اجه خطبها و قبلت اني و ساعدته للولد .. و كدر يأجرله مشتمل صغيروني و يتزوج بي .. ساعدته بشغل طبعا .. ورى زواج اختي امي رادت تجيب البنات وتعيش يمي .. كلتلها البنات يجون عادي بس انتي صعبه .. كامت تبجي كالت ليش .. كلتلها اني ما احبج ..حقيقة ما احبج .. جنت بعمر معين احبج و ردت حتى لو مرة بالشهر انام بحضنج .. كالت مو بيدي .. كلتلها يمه جان تكدرين تقنعين رجلج مو صعبه .. والي شفته اني و عرفته رجلج جان جبان مو صاحب شخصية قوية و يخوف .. كالت هاي بس كبالك .. والله جان وياي يخوف و يرزلني و يتعارك .. و اصلا اني مردت اتزوج لو مو ابوية واخوتي ..
كامت تبجي .. انقهرت و جبتها يمي للبيت و طبعا زوجتي هم لحت عليا اجيبهم لان تحب خواتي هواي .. جبتهم يمي و عشنا سوى .. خواتي ثنينهم تزوجو .. و بقت هي يمي .. طبعا علاقتي بيها مو قوية .. و هي كبرت ..
عالعموم .. اني بريتها الذمة و مداريها لان امي .. و نسيت كل شي بفضل زوجتي و جهالي و خواتي و بفضل العيشه هم ..
يعني شغل و هوسة الحياة لازم الواحد يحاول ينسى كل شي … بس مرات من اكعد بالمحل اطلع من المجر السيارة الوحيدة البقت من ذكريات الطفوله .. السيارة ام ٣ تايرات … كل شي خسرت بطفولتي .. ابوية .. امي .. طفولتي .. و بقت بس هالسيارة الصغيرة ..جانت شاهد على الي صار .. من يوم طلعت بالبجامة البازة ونمت عالكشن .. لحجي الجهال و نسوان عمامي و عمي فلان و كلمته الحلوه (اي هو صدك امه هيج ـــــــــ ) لنومتي لوكت طويل عالجودلية بالصالة و جنت دائما ما اشبع نوم لان باب الصالة بصف باب المطبخ و دائما افز من صوتهم .. و نهاية لأخذ حقي منهم .. مرات اكو شغلات اي قيمه ماديه ما بيها (صفر) قيمتها الماديه صفر .. متساوي فلس .. بس اوف عالقيمه المعنويه .. جماد هالسيارة بس تحجي .. تحجي و تعرف دمع عيني .. اي تعرف دمع عيني .. جنت من ابجي و امسح دموعي بيدي .. الزمها مرات .. عدها علاقة بدمع عيني .. جانت تسمع صوتي من ابجي و اني محتاج حضن امي .. (يمه وينج اريد اشم ريحتج) .. و هسه .. كلها صارت سوالف .. بس رغم كل محاولاتي للنسيان .. طلعت فاشل .. فاشل انسى الي صار بيا .. عالعموم .. الله يحفظلي جهالي و زوجتي و يحفظ امي هم .. و يبعد الشر عن كل الناس و يرزقهم بحياة حلوة بعيده عن الحزن .

المصدر : صفحة ابو بغداد