حرامي البايسكلات

الحياة نصين … نص بي حظ حلو .. ونص الحظ بي معدوم و سالفته سالفة الفكر الكاعد بالصحراء و اجاه واحد بصفه كاله شوية اتدنى ليغاد (ملاحظة للاخوة و الاخوات العرب بالصفحة .. اتدنى ليغاد معناها ابتعد قليلا لكي أجلس) …

المهم عندي صديق مثل وجوهكم الطيب من جماعة النص الثاني الي اصلا سامع بالحظ بس مشايفه … بيوم من الايام هالولد خلي نسميه (صفاء) و بدون ذكر اسمه الحقيقي لان هو موجود بالصفحة … و طبعا بعد موافقته كتبت هالموقف او هالقصة القصيرة … صفاء جان عسكري بالكوت … قبل ميلتحق بيومين للعسكرية … جان عند والده مراجعة طبية بالمجمع مال السعدون … اخذ ابوه و راحو و هناك ماعرف شلون صادق بنية مع العلم صفاء حاله من حالي بسالفة تفاصيل الوجه .. يعني من الاخير مينطلع بي … و هم اذا نجي على موضوع اللسان لان مرات اكو دعاية كلنا سامعيها تكول الي عنده لسان مو مهم وجهه .. هم ماعنده لسان للاستخدامات العاطفية .. يعني ميعرف يقرا ..

المهم .. صفاء صادق بنية و اخذ رقمها هم … هالحجي قبل ميلتحق بيومين بالضبط .. اجانه للمنطقة كام يحجيلنا قصص و يوصفلنه لحظة نظرته الها و نظرتها الى .. و طبعا هي هم جان عدها مراجعه لوالدتها … و بعده محاجي وياها بالتلفون و احنا كاعدين بالركن كام يحجي بسالفة البناء … كال همزين بيتنا يتحمل بناء فوك .. بشرفكم عود ساعدوني اذا نويت ابني … ضحكنا كلناله يمعود لا تسرع الامور بعدك ستوك متعرف عليها … و كام يسأل على سعر الدبل طابوك و على الاسمنت من كل عقله يحجي ..

الحاصل .. خابرها و اندل بيتهم و كالتله اني ما اكدر اطلع الا وي أمي لو أختي و صارت صدفه امي بيوم المراجعه جانت يم الدكتور و اني بقيت وحدي و سولفنه … كالها حتى لو اشوفج من ورى الباب هم قابل و بوقتها كلف واحد من جماعتنه يكتبله رسالة و يرسم عليها قلوب حب و هاي السوالف مال الشعر و الزخرفه عالورقة .. و كتبها و حضرها كال اروح التحق و من ارجع نروح نوديها اني وياك …بذاك الوكت اني جنت اشتغل تكسي … كلتله تدلل يمعود .. و راح صفاء للعسكرية و هناك متعاقب و مزيني اكرع .. و رجع اصلع من العسكرية … يكول تدرون هالفترة الي رحتها ابد ما حسيت بيها مو مثل كل مرة … كلناله ليش ؟
كال مو افكر بيها و ارسم وجهها براسي بكل مكان اروحله بالوحدة العسكرية … كلناله حلو .. و قرر يوديلها الرسالة ..
و يشوفها من ورى الباب بحجة دتغسل الطرمة … و رحنا اني وياه … هو بوقتها جانت ضاربته الشمس صاير اسود و بشرته مكسبه من الحر لان ستوى جاي من الجيش … و بذاك الوقت مجان اكو ملاعيب حتى واحد يعدل بشرته جانت اقوى فقرة الخيط .. و هم نستحي ناخذ خيط .. ولبس صفاء احلى سيت هدوم عنده .. و طك الحذاء الروغان ابو اللمعة (مكرم القارئ) و البنطرون ابو الكسرات .. و طلعت اني وياه رحنا لمنطقتهم .. منطقتهم جانت منطقة راقية .. يعني مو مثل منطقتنا كل بيت كباله فرصه مدرسية و جهال كومة .. بيت البنية جان بشارع هادئ و حتى الشارع جان جوه خريفي … يعني الاشجار الطالعة من الحياطين موكعة اوراق بالكاع .. و الشارع بي هدوء حلو .. كلتله شوف اني راح اوكفلك بالركن بالسيارة يعني .. وانته روح شوفها و انطيها الرسالة و نرجع .. كال ماشي .. وقبل مينزل باسني من راسي و كالي والله مراح انسى وكفتك وياي و اذا جاني ولد اسمي على اسمك .. كلتله دكوم لك لاتخليني اغلط قابل طالعين بعركة و واكفلك .. كال لا مو انته مقبلت تاخذ كروه .. كلتله دروح لك .. و راح نزل … اني بقيت بالسيارة و جان الباتري مال سيارتي بسرعة ينام .. يعني اذا انسى كلوب مشتغل لو اشغل مسجل ياكل النارية مال الباتري كلها و يجسي الباتري .. شسويت .. بقيت السيارة مشتغلة و شغلت كاسيت اغاني … ما عبرت عالسالفة نكول عشرين دقيقة جان اسمع طبه قوية عالباب و شفت صفاء ديحاول يفتح الباب بسرعة بس مديعرف و فتحها و صعد نص جسمه جان يكلي اطللللع .. اني رأسا دست بانزين و طلعت جان اشوف بالمرايا مالتي ثنين شباب ديركضون ورانا … هو صعد جسمه و سد الباب بس شنو شفايفه مكلوبه بيض من الهبطة و الفزة .. و ميكدر يحجي .. وفوكاها يكلي خلي ايدك على كلبي … خليت ايدي على كلبه طبعا ايدي كامت تنهز لان دكات كلبه كلش سريعة .. كلتله شنووو لكفوك ؟؟ اشرلي بيده لا … كلتله اخوتها؟؟؟ كال لا .. كلتله شرطة دولة لعد ؟؟ كال لا … كلتله لعد شكوووو ؟ كال اوكف خلي اخذ نفسي .. اخذ نفسه وارتاح جان يكلي اني متفق وياها تفتح باب الحوش و ترش …كلتله اي ادري ؟ كال بقيت اروح و ارجع بالشارع و اباوع على بيتهم .. كلتله وانته شلون اندليت بيتهم .. كال بالتلفون يمعود كالتلي لون بابهم و حتى رقم البيت شبيك … كلتله زين لعد شصار ؟ كال ماكو تأخرت و بقيت اروح و ارجع و اروح و ارجع و هي ماكو .. و اكو جهال ثنين بالشارع ديلعبون يم بابهم واحد بيهم كلب ابن كلب (مكرم القارئ) بقى يباوع عليا جان يصيح هذا الي باك البايسكل و القناني مال الغاز … و كام يصيح بصوت عالي و فات جوى يركض و طلعو هذول الاثنين يركضون ورايا ههههههههههههههههههههههههههههههههههه … يكول من الخوف ما كدرت اوكف و حتى لو واكف جان صارت هوسة و طلعو باقي الجوارين و اذا سألوني شعندك هنا شجاوبهم .. و اذا يعرفون انته واكفلي بالركن و تنتظرني بسيارة يصير عدهم شك اكثر انو اني صدك الحرامي .. طبعا خربت من الضحك من ديشرح الموقف … كلتله و الرسالة .. كال رحمه لأمك و لأبوك لا تحجي الي صار بالمنطقة و انعل ابو الرسالة لابو الحب …
كلبي راد يوكف والله .. كلتله هسه انته جان انتظرت شوية شعرك يطك يله تروح .. تريد الصدك صدك وجهك وجه الحرامية .. اكرع و اسود و شكلك عبالك طالع من الخفيفة مال ابو غريب … كال كل شي اقبل ..اغلط عليا سبني .. بس لا تحجي كبال المنطقة … لان يلزموها عليا و تعرف جماعتنا اذا تلزك حجاية بلسانهم ميبطلوها لحد ما اندفن .. كلتله صدك جذب مع الاسف عليك … و رجعنا … بيومها من كعدنا بالركن .. سألونا باقي الشباب .. ها شصار … خطية صفاء يباوع عليا … كلتله جاوبهم شبيك تباوع عليا .. كال ها .. كلتله جاوبهم … كال انطيتها الرسالة و رجاء بعد لا تفتحون الموضوع لان تطور الموضوع و راح تصير اهلي هههههههههههههه … سكتو الشباب و اني لزمتني الضحكة … ورى ما رجعنا كلتله خوش حجاية سديت بيها حلوكهم حتى بعد ابد ميفتحون وياك الموضوع .. كال بس مو تدك الناقصة بيا و تفضحني .. و طبعا راحت سنين و جتي سنين و صفاء انتهت علاقته بالبنية و هي الي كطعت العلاقة .. و اصلا ما جان بيناتهم غير بس حجي عالتلفون فترة و انتهى كل شي … و هسه صفاء متزوج و جهاله بطوله و اصلا حاجيلهم هو بلسانه هالموقف .. و كل مرة نحجي و نتذكر الموقف و نضحك .. اكو ناس ماعدها حظ بأبسط الامور … و صفاء من هالنوع ..
عالعموم .. صارت سوالف … و اتمنى الخير لصفاء و لكل الناس .. و الاهم .. اريد اكول كلمة .. الحب مو عيب .. بس العيب النهايات .. العيب اللعب بأسم الحب .. اني متاكد لو معايفته لصفاء البنية جان اتزوجها لان الولد جان صافي .. و ماعنده علاقات و هاي جانت اول تجربة بحياته .. و بعدين مر بتجربة و انتهت بالزواج .. الي يريد يتزوج و الي يريد يرتبط .. ميوكف يم تفاصيل صغيرة .. بس الي يوكف يم تفاصيل صغيرة راح تكون حجج يرسم بيها نهاية العلاقة ..

المصدر / صفحة ابو بغداد