جواريني

المشتمل الي بصفنا جان معروض للبيع … بيوم من الايام جوي ناس اشتروه … و ورى كم يوم نظفوه لان جان فارغ اصلا … و تحولو بي …
بيوم التحويله امي دزت بيدي صينية اكل و رحت وديتها .. ابوهم طلع اخذ الصينية مني و تشكر مني … و كلتله عمو احنا البيت الي بصفكم …
هالحجي بالتسعينات … و وراها جاب الصينية هو الرجال و ابوية طلعله … عرفنا بيومها من ابوية انو هالناس ميحبون يسوون علاقات وي الجوارين و جان مبين هالشي من تصرف الرجال وي ابوية يعني مو من النوع الي يسأل لو يحجي … و صدك جان حتى مرات الاب ميسلم على ابوية و لا يسلم عالجوارين …
يطلع الرجال الصبح يرجع المغربية لبيته … بس الي جان معجبني انو هالناس عدهم جهال بعمري بس ابد ميطلعون برى لا يلعبون و لا حتى اسمع صوتهم بالحديقة … و اني هالشي جان ميهمني بصراحة بس هذا الي اتذكره و الي عرفته من ابوية انو هو اسمه ابو نور … وبس … زين نور وينها ؟؟
ماكو مشايفيها .. و مرة صدفه شفت سيارة تكسي جتي للبيت و طبعا ابو نور كاعد ليكدام … طلعت مرية بعباية و بنات ثنين و صعدو بالسيارة و راحو … و عرفت بيومها هو عنده بنات ثنين و امهم … و مشت سنين و احنا بالمنطقة نعرف انو بيت ابو نور ميختلطون وي أي بشر …. و جانت اكو شغلة هم محيرتنا انو البنات ثنينهم ميروحون مدارس … يعني ما شفناهم ابد بالمدرسة ..
و سنة تجر سنة و اني دخلت كلية و جان عندي اخر سنة قبل التخرج … و رجعت للبيت لكيت فاتحه و اهل المنطقة ملتمين … طلع ابو نور متوفي … و اهل المنطقة همه الي متكفلين بالفاتحه و امي جانت ببيت ابو نور … بوقتها امي عدها علاج تاخذه وقت بوقته … عافت بيت ام نور و كعدة النسوان و جتي لبيتنا …. و طبعا برى بالجادر كل الناس اهل المنطقة و جوي ثنين لو تلاثة رياجيل يعرفوه لأبو نور … اصدقائه … من جتي أمي للبيت كلتلها هاي يمه شنو … كامت تبجي …
كالت لو احجيلك متصدك … كلتلها شنو … كالت أم نور كل هالسنين جانت تتمنى تصير عدها علاقات وي الجوارين بس المرحوم ما يقبل … تكول جان ميقبل حتى تلفون ينربط للبيت … و البنات ميعرفون يحجون مثل العالم …
يعني فاتحه و الدنيا مكلوبة و همه يكولون شغلات مو يم الموضوع … و مبين ماعدهم اي حنيه على ابوهم … و جوي خوات ام نور و ساعة يبجن اني عبالي يبجن علمود الرجال … طلعو يبجون علمود شافو اختهم صار سنين مشايفيها … وطبعا اني الي خابرت اختها الجبيرة … و كل شوية يكومون يبوسوها لأختهم …
و كالت خلي ارجع للفاتحه حبيبي … و رجعت أمي لبيت ام نور … و يوم ورى يوم علاقة أمي بأم نور كامت تقوى و بوقتها الي عرفته ام نور تريد احد ثقة يلزم شغل ابو نور و هو جان عنده محلين مال ادوات بشارع فلسطين … و رياجيل خواتها ما قبلو يشتغلون بهل الشي لان عدهم حياتهم و شغلهم … و ام نور ماعدها اخوان رياجيل و ابوها و امها متوفين و ابو نور جان الوحيد لابوه و امه و هم متوفين والده و والدته …
يعني من الاخير ماعدهم احد … اني بوقتها مجنت اشتغل و جنت اخر سنه كليه قبلت اروح اني اشوف المحل لان امي كالت خطية هذني مساكين و ميعرفن شي بالدنيا و بركبة امهم و يحتاجون مصرف للبيت و قنعتني امي … و رحت للمحل بعد ما دلتني خاله ام نور .. و فتحت المحل و طلعت السجل و مفتهمت شي من السجل و جان اكو عامل يشتغل بالمحل اجه و الظاهر احد من اهل المحلات القريبة متصل بي ….
الولد اكبر مني بالعمر و يفتهم بكل شي … حجالي عن موضوع شغل المحل و فهمني الاسعار و منين يجيبون الغراض جملة …
و الولد جان كلش امين … بس الي افتهمته من حجيه السالفة ما بيها ذاك الربح القوي … يعني المحلات تطلع فلوس شغل الولد و متطلع ذيج المبالغ القوية .. يعني من الاخير يطلع فلوس العيشة …
بس الحلو بالموضوع المحلات ثنينهم ملك … يعني ماكو ايجار بالموضوع … و قررت اغير نشاط المحل و اجيب مكينة مال موطه سوفت … و شربت بطيخ و كيك جاهز قطع … و سويت هالشي و المحل صار عليه رجل مو طبيعي … و بالشتا كمت اجيب بقلاوه و زلابية وحلويات … و خير من الله صار شغل المحل …
و جنت اودي الفلوس اول بأول للمرية … و من تخرجت تعينت بس بقيت اشتغل … يعني لازم المحل .. و لان جنت ماشي وي ام نور و بناتها عدل … جانت تجيني شغلات منا و منا و بكل شغلة استفاد …
و بيوم من الايام رجعت للبيت امي كالتلي ليش ما اخذلك نور … كلتلها اخذيها و اني رايدها اصلا … لان هالناس ما شفت من وراهم غير كل الخير … و اتزوجت نور و اكو موظف وياي صديقي كلش جان يريد يتزوج … حجيتله على اخت نور و تزوجها و الحمدلله زواجهم جان ناجح …
و ورى كل هالسنين مرات نور تسألني سوال و تعيده عليا … ما اعرف اجاوب عليه لهل السوال …
تكلي اني و اختي ابوية ما دخلنه مدارس و مجان مقتنع بسالفة البنية تروح مدرسة … و جان مقتنع بسالفة البنية باجر عكبه تتزوج و اخرتها لزوجها و لجهالها … ماشي اني مقتنعه بكلام ابوية … بس ابوية جان ماعنده علاقات وي الناس و اصلا ماعندي عمام و ولد عمام … و حتى بشغله هو مجان عنده علاقات و انسان كلش حدي بطبعه … و حتى فاتحته اكبر دليل ماجوي غير ثنين يعرفوه و الباقي اهل المنطقة خلف الله عليهم … منين جان اجاني الرجال اني و اختي ؟؟؟؟ منين ؟؟؟
زين هو ما فكر ان حياة الانسان نفس صاعد و نفس نازل و احتمال بلحظة هالنفس لا يطب و لا يطلع مثل ما صار وياه الله يرحمه … ما فكر احنا شنسوي وراه .. يعني بله لو مو انتو احنا شجان سوينا … امي مريه جبيرة و كلها امراض … و اني و اختي حرف منعرف نكتب … و ماعدنا اي علاقات بالدنيا غير بس ابونا و امنا … و حتى حجي منعرف نحجي غير بس الي نسمعه من ابونه و امنا و الي نشوفه مرات من التلفزيون … يعني لو نفرض انت و امك و الجوارين مموجودين شجان صار بينا هسه ؟؟؟
جان بعنا المحلات و صرفنا فلوسها على الاكل و الشرب و تاليها رحنا اشتغلنه اي شغله متحتاج شهادة … و الله يعلم الي راح نشتغل يمه شجان استغلنه و شجان سوى ويانه لان دتشوف اني و اختي و حتى امي من اهل الله و نثق بكل الناس لان اصلا ماعدنا خبره بهل الدنيا … جنت اكلها والله ماعرف شيصير وياكم … و جنت انقهر عليها و لحد الان انقهر و حتى اختها والله العظيم اتعامل وياها عبالك بنتي ولا عبالك اخت مرتي … لان صدك هالبنات فقيرات …
و علمود هالشي اني دائما انصح كل الي اعرفهم ان يخلون بناتهم يدرسون حتى لو لمرحلة المتوسطة … المهم يفتهمون الدنيا شلون ماشية … لان ياستار ياربي خصوصا هالوقت ميفيد بي الانسان المغمض .. لان يروح بالرجلين … الدنيا لازم واحد بيها يكون على الاقل فاهم الاساسيات .. هو احنا المفتحين بالدنيا و اصحاب الشهايد و الوظائف مرات تعبر علينا سوالف …لعد كيف الانسان الي ماعنده خبره … و فوكاها يكون بنيه … هواي اكو ناس مثل حال ابو نور الله يرحمه … و ارجع واعيد النصيحه خلو بناتكم يدرسون حتى لو للمتوسطة … المهم يفتهمون و يعرفون الحياة … و دائما صيرو قريبين منهم .. و مو عيب اذا تفهموهم الشارع شكو بي … و الدنيا شلون ماشيه … و صيرو اصدقاء لولدكم و بناتكم … و لا كلش ترخون الحبل و لا كلش تضبو لدرجة الخنك و تخلون جهالكم يكروهوكم … صيرو اصدقاء وياهم … خصوصا بهل الزمن .. و اللهم يحفظكم و يحفظ اطفالكم و يطلعهم احسن الناس … و يرزق الما عنده جهال بأطفال من يكبرون يصيرون رفعة راس الهم ..

المصدر / صفحة ابو بغداد