جزيرة متلينا

سمعت صوت بجي بعيد عن الواكفين … كمت امشي بسرعة لان صوت البجي جان صوت بنيه .. تقربت عالصوت و ماعرف الي دتبجي اجنبية لو عربية … تقربت و اني اكول (هاي hi عربيه اجنبية انتي هيج كلت حرفيا) .. جاوبتني بالعربي روح منا الله يخليك .. كلتلها عراقية !!كالت اي … تقربت عليها و شغلت جداحة (طبعا الجداحة و الفلوس و اوراقي الثبوتيه كلها جنت ضامها بجيس ببطن جيس حتى ميتبللون و بس نزلنه طلعتهم من الجياسه) من شغلت الجداحه خافت كالت طفي طفي … طبعا اني ماعرف جناسي الي صعدو بالقارب .. وبذاك الوكت العراقيين جانو كلش قليل يطلعون للخارج بسبب الوضع الحكومي … يعني الي ينلزم مصيبة جبيرة عليه تصير … هالحجي كله صار بعد نزولنه من القارب … يعني عبرنا تركيا و نزلنا بجزيرة يونانيه … و اكيد الخوف الي جان بداخلي قل بدرجة جبيرة كلش .. لان حتى لو انلزم هسه مراح يرجعوني يسلموني للجانب العراقي .. لان خلص صرت بدولة اوربية .. من صعدنا القارب اني اصلا مشفت وجوه الناس .. و جنت اسمع لغات الي ديصعدون .. بس الي متاكد منه اكو هنود لو باكستنين لان تقريبا نفس اللهجة و سمعتها هواي .. و متاكد اكو اكراد بس ماعرف بالضبط كراد عراق لو ايران لو سوريا مادري .. و سمعت هم لهجة بس بصراحة مفتهمتها .. وماعرف اصلا اكو بنات ويانه بالقارب و حتى لو اكو هي الدنيا ظلمة مينشاف كلشي .. و حتى من جمعونه المهربين مخلونه بمكان نكدر نشوف بعض يعني من اجه القارب هواي ناس كامت تجي من بين الاشجار وكل مجموعة وياها المهرب مالتها … البنية هاي من عرفت عراقي كالتلي اكو غيرك عراقيين .. كلتلها والله ماعرف .. كلتلها شبيج تبجين ؟؟كالت مابيا شي و رحت تقربت عليها مديت ايدي حتى اكومها لان هي بالكاع كاعدة .. ايدي صارت على راسها و جان لابسه كبوس مال القمصلة .. هي عرفت اني اريد اوكفها .. جان تخلي ايدها بيدي .. من خلت ايدها بيدي .. شكد جان الجو بارد و مطر خفيف بس حسيت روحي نسيت البرد و حسيت اكو انسان صار مسوول مني … اني مشايف شكلها زين و لا اعرف شكلها بس من وكفت حسيت بيها كصير .. يعني توصل لصدري .. كالت شكرا و رجعت سالتها شبيج تبجين .. كالت من دينزلون الناس من البلم (القارب يعني) داسو على رجلي و رجلي انجرحت .. كلتلها تريدين الف شي على رجلج اذا بيها نزيف قوي ؟؟كالت لاااا بس توجعني .. طبعا هالحجي كله جان قريب من المي و الصخور الي هي جانت اخر مرحله نزلنه منها و دخلنه للجزيرة .. و الناس بعدهم موجودين .. و انقسمو مجاميع يمشون سوى .. كلتلها زين انتي وحدج ؟؟كالت اي .. من كالت اي اني تعجبت و طبعا اني داحجي على زمن التسعينات .. ذاك الوكت جان صعبة تسمع بي بنيه مسافرة وحدها و طالعه تهريب هم .. كلتلها زين شنو اهلج وين .. كالت اكلك لاتسال هواي تريد نكمل الطريق للسنتر مال الجزيرة سوى لا تسال الله يخليك .. طبعا الطريق جان يوم كامل لحد منوصل للمركز مال الجزيرة و مناك لازم نركب سفينة توصلنا للعاصمة (اثينا) … سكتت اني و بدينا نمشي و هي جانت تعرج … كلتلها شسمج كالت رباب .. و هي سالتني شسمك كلتلها موفق .. كالت اني بابا ينتظرني بالسنتر مال الجزيرة و جان وياي بتركيا وصلني للقارب وي المهرب و بعدين راح و هسه اكيد ركب من المطار و اجه لهنا .. كلتلها ليش ابوج شنو عايش بتركيا ؟؟ كالت لا ابوية متجنس الماني .. كلتلها و امج وينها .. كالت ميته و رادت تبجي .. كلتلها كلنه على هالطريق و بدت هي تحجيلي احنا ونمشي مقتطفات عن وضعها .. الي افتهمته هي امها ميته وهي صغيرة تقريبا تسع سنوات عمرها من ماتت امها .. و كبرت ببيت جدها ابو ابوها .. ابوها جان مسافر بعمان شغل .. من توفت امها طلع لالمانيا بعد ما تواصل وي اهله و خله هالبنيه امانه يمهم لحد متكبر شويه و ياخذها .. و من كبرت صارت تقريبا ٢٢ سنة قرر ياخذها يمه و طبعا التقى بيها اكثر من مره بس بعمان لان بالعراق ميكدر يفوت لاسباب مفتهمتها و مسألت عنها بس اكيد يخاف لا ينسجن … و اقتنعت البنية تجي لالمانيا و لان ميكدر يدز عليها بشكل رسمي بسبب وضعه لان هو طالع مو اصولي لالمانيا .. يعني ميكدر يروح للسفارة العراقية بذاك الوقت حتى يرتبلها على جيه رسمي .. قرر يطلعها تهريب .. و هو ينتظرها بالجزيرة .. كالت انته وين راح تسافر .. كلتلها اني اخوية هم بالمانيا و رايح عليه .. كالت اكيد بابا يعرفه ..ضحكت اني كلتلها ليش عبالج المانيا صغيرة .. كالت يعني انته هم راح تعيش بالمانيا .. كلتلها الله كريم خلي نوصل و يصير خير … بالطريق هي جاعت و طبعا الطريق للسنتر مال الجزيرة طريق مهجور و كل ساعتين تفوت سيارة و احنا نختل لان منعرف هالسيارة يجوز سيارة جيش لو شرطة .. بس الي دوخني بالموضوع .. المنطقة سياحية و بيها بيوت هواي بس الي افتهمته محد ميجي لهل البيوت بس بالصيف .. يعني بذاك الوقت البيوت كلها فارغة .. شفت واحد من البيوت الباب الخارجي مالته مفتوح .. كلتلها تعالي خلي نفوت لهل البيت بلكي نلكه شي ناكله .. فتنا و طبعا هو مو بيت هو شاليه .. شلون بيوت الحبانية المتشابهات هيج النظام .. فتنا للبيت و سديت الباب ورايا .. هي خطية جانت تفرك ايد بأيد من البرد و تنفخ على جفوف ايدها هوى من حلكها .. حاولت افتح باب البيت الداخلي مكدرت .. كلتلها شنسوي هسه الباب صعب تنفتح امشي نكمل طريقنه .. كالت تعبت .. كلتلها كعدي هنا و طبعا كعدتها بالزاوية مال الحايط حتى بس احاول اخليها تدفى .. بس مرهمت السالفة بردت اكثر لان الكاع مرمر و بارد هم .. كلتلها شعجب مشايله جنطة هدوم وياج .. كالت كلهم وي بابا كالي حتى لا تثكلين بالمشي هو اخذهم .. كلتلها زين و طلعت من جنطتي تيشرتات رجالية مالتي و كلتلها لبسيهم .. طبعا لبست اربع تيشرتات شكلها يضحك جان بس اني مضحكت بالبدايه و مكدرت الزم روحي و ضحكت .. هي ضحكت هم و جانت احلى ضحكة اشوفها بحياتي .. تضحك و تمسح بدموعها … و كعدنا تقريبا ساعتين و طبعا سولفتلي على منطقتهم .. هي من اهل شارع فلسطين .. يعني بعيده علينا .. اني بيتنا جان بالعبيدي .. و كملنا طريقنا و وصلنا لسنتر المدينة .. بالسنتر مال مدينة نزعت التيشترتات مالتي حتى شكلها ميلفت الانتباه .. طبعا اكو مطاعم و محلات .. ابوها جان بعده مواصل و هو الظاهر قبل جاي للجزيرة او يعرف احد بالجزيرة كايللها اكو مكاتب مال حجز تذاكر بس مال سفن .. مكتب بصف مكتب .. هواي مكاتب .. مقابيل المكاتب اكو مساطب و منتزه صغيروني .. هناك تنتظره .. طبعا الي يطلعون تهريب ميحتاجون احد يدليهم الطريق بالجزيرة .. لان اكو معلومة كل المهربين يستخدموها .. الي هي تخلي المي بظهرك و تمشي على ايدك اليمنى و توصل للسنتر .. بقينا نفتر بين المحلات و اشترينا لفات و اكلنه .. و احنا و دناكل اللفات سالتني.. كالت موفق اذا وصلنا لالمانيا راح نبقى نتشاوف لو لا .. كلتلها بس خلي نوصل و طبعا نتشاوف و هسه اخذ عنوانج من ابوج ..بهل الحجي فاتو شرطه ثنين … شفتهم اني و رأسا حجيت وياها بالعربي كلتلها شرطة اكو وراج خلي نتمشى بمكان ثاني .. و من سوء حظنا ثنينه لحكونه الشرطة لان اصلا بهل الجزر بهيج توقيت من السنه بس اهل الجزيرة يبقون و اصلا ميجون غربه سياحه .. يعني من الاخير الشرطة شكو بأمرنه و خصوصا هناك الشرطة بالجزر مفتحين عيونهم لان يعرفون الجزر هاي هي معبر معروف للناس الي تطلع تهريب من ازمير (تركيا) .. وكفونه اني وياها و سألونه على اوراق ثبوتيه و طبعا ثنينه منعرف يوناني و كامو يحجون ويانه بالانكليزي .. اني جنت اطكطك انكليزي وهي هم .. من الاخير عرفو احنا فايتين تهريب و اخذونه لمركز شرطة هناك .. بالمركز مال الشرطة جابولنه مترجم عربي هو لهجته مغربية ..كال انتو منين كلناله عراقيين و كلتله هاي زوجتي لان خفت عليها و هي هم كالت هذا زوجي .. كال تحبون تطلبون لجوء هنا باليونان .. كلناله لا نريد نروح للالمانيا كال ماشي بس لازم ننطيكم اوراق تمشون بيها بداخل البلد و هالاوراق هي لشهر واحد فقط و اذا مطلعتو من البلد لازم تجددون الاوراق .. و حجزونا اسبوع بعد ما بصمونه بصمه جنائية .. طبعا حجزونه اني وياها متفرقين هي بمكان مال نساء و اني بمكان مال رجال .. بقينا اسبوع بالحجز و بعدين اطلقو سراحنه ويانه الاوراق الي نمشي بيها شهر .. من طلعنه من السجن بالشارع هي حضنتني و بقت تبجي و كالت اني تبهدلت مجنت متوقعه راح افوت سجن بحياتي .. بستها من راسها و كلتلها هاي حظنه بس هسه اهم شي نتصل بوالدج .. دكينه على رقم هو منطي لبنته في حال صار شي .. هالرقم هو رقم واحد بتركيا صديق ابوها .. ابوها جان ذكي .. كايللها اذا صار شي اتصلي بفلان و كوليله شيصير وياج و اني راح اتصل بي حتى اعرف شيصير يوميا .. هالرقم بس في حالة صار شي تتصل بي .. طبعا بذاك الوقت والدها جان ماعنده موبايل و مو مثل هسه الموبايلات بيها انترنت و بيها خطوط تشتغل بكل الدول .. جان هالتقنية بعدها ممشتغل بالعالم .. اتصلنه بالرجل التركي من مكتبه بالجزيرة و فهمنا و كالنه الرجال انو ابوها دايخ بس هو بعده بالجزيرة لان عرف الناس وصلو للجزيرة .. رحنا لنفس المكان الي متفق وي بنته عليه .. و ورى ساعة تقريبا اجه ابوها .. كام يبجي من شافها و هي تبجي الموقف جان كلش حزين و اني دموعي نزلت عليهم ثنينهم .. عرفته عليا و كال مدام وكفت لبنتي شتريد اني حاضر .. كلتله عمي ماريد شي بس سلامتك .. كال زين خلي نوصل لاثينا سوى شنو رأيك .. كلتله ماشي .. و كصينه تذاكر بالاوراق الي انطونياها الشرطة .. و سافرنه سوى لاثينا ..السفينه جانت تجربه جديده عليا .. السفينه جبيرة كلش و جنا اني و رباب نخلص الوقت فوك عالسطح مال سفينه نباوع عالمي و نسولف و ابو رباب جان يبقى جوى نايم اغلب الوقت .. العلاقة بيني و بين رباب صارت قوية لان بدينا نسولف هواي امور عن حياتنه .. اني حجيتلها وضعي العام و حجيتلها عن اهلي و حتى حجيتلها عن امي و جوارينه و المحلات بمنطقتنه و حتى شلون جنت اقضي يومي ببغداد .. وهي جانت تحجيلي عن مدرستها و عن صديقاتها الي اشتاقتلهم طبعا .. و تحجيلي عن شنو تحب .. وصلنا لاثينا و جنت اتمنى ميخلص الوقت و نوصل .. جنت اتمنى الطريق للاثينا يبقى طول العمر .. حتى بس ابقى وياها اسولف .. وصلنه و افترقنا بس الفراق جان حزين .. صح اني عرفتها ايام .. بس الوضع و الحالة خلتني اتعلق بيها .. ثنينا غربة بطريق تهريب .. طريق خوف .. انسجنه سوى .. طلعنه سوى .. مشينه سوى .. الموضوع كله جان مثل الفلم .. بلحظة الفراق اني اخذت عنوان والدها ورقمه و انطيته عنوان اخويه و رقمه .. هي عيونها دمعت من مشيت اني و بس عبرتهم مسافة اني هم دمعتي نزلت بس صار عندي هدف .. هدفي مو بس اوصل لاخوية .. هدفي التقي برباب من اوصل لالمانيا .. و رحت للمهرب الي باثينا و طبعا الحمدلله من اول محاولة كدرت اوصل لالمانيا .. المهرب سوالي جواز مرتب و عبرت بي من اول مرة .. وصلت لالمانيا و التقيت بأخوية جان لقاء هم متروس دموع و ذكريات .. الطريق بالقطار لبيت اخوية جان طويل .. بس كل الطريق نضحك اني وياه من نتذكر سوالفنه و عركاتنه وي جهال المنطقة .. حتى جان واحد كاعد كبالنه بالقطار كلتله لاخوية بشرفك هذا مو يشبه ابن ام حاتم الجبير بس على اشكر .. ابن ام حاتم جان مربيلنه عله اني واخوية .. يوميا يضربنه من يشوفنا .. حاط راسه براسنه مع العلم احنا جنا صغار .. اخوية مات من الضحك من كلتله هيج ..و حجيتله على رباب و على ابوها .. اخوية كال اهووو ذوله بعيدين كلش .. كلتله بس اريد التقي بيهم .. كال سهله يمعود .. و بديت مرحله جديدة بحياتي .. مرحلة اللجوء .. طلبت لجوء و انقبلت طبعا .. و بكل فترة اللجوء قبل ما اخذ اوراق جنت ساكن وي اخوية .. و جنت اتصل بابو رباب بين فترة و فترة حتى اعرف اخبارهم و طبعا هم وصلو بسلام من اثينا .. و اخذت اوراق و رباب هم اخذت اوراق .. و سويت موعد حتى نروح اني واخوية نشوفهم و نبارك لرباب على الاقامة .. و رحنا .. و التقينا و جانت السفرة كلش حلوة و الاحلى بعد هو اللقاء بعد الفراق ..حاولت انفرد بيها و انفردت بيها .. كلتلها مشتاقلج .. كالت اني اكثر موفق .. كلتلها اريد احجي وياج اكثر و كل ما اتصل ابوج يرد عالتلفون شلون شنو الحل .. كالت خابرني الصبح هو يكون بالشغل .. كلتلها ماشي .. و من رجعنا لمحافظتنه .. بديت اتصل بيها الصبح بس .. كمت يوميا اخابرها الصبح و نحجي ونسولف .. و طبعا علمودها اشتغلت شغل مسائي حتى الصبح يكون عندي وقت احجي وياها .. و بدت علاقتنا تتطور يوم ورى يوم لحد ما فد يوم اتصلت بيا و جانت تبجي .. كلتلها شبيج .. كالت ابوية من وصلت هنا عرفني على صديقه و ابن صديقه بعمري تقريبا .. جان يحاول ابوية يقرب العلاقة بيني و بين الولد .. اني بالبداية جنت احس هالشي طبيعي و حتى ما امل من الوضع .. بس البارحة ابوية صدمني كالي اني جنت اقرب فلان منج لان اريده يتزوجج .. الولد شايف صورج وياي و كايل لابوه اريدها .. و الولد حباب و ميتعيب .. و هالحجي صح اني ما اكول الولد مو زين .. بس الولد ماريده اريدك انته .. كلتلها ماشي اني اتقدملج وهسه عندي شغل اني و بعد شهر راح اخذ سكن وحدي .. و تقدمتلها و طبعا تفاجئت من معاملة ابوها وياي و وي اخوي .. حتى كالي حجاية مجنت متوقع اسمعها منه .. طبعا هو جان سبب رفضه انو اني بعدني ممتجنس و شغلي مو ثابت .. و اني اكبر من بنته .. اخويه شوية صار بينه و بين ابو رباب شد بالحجي .. ضاج ابو رباب كاله اكلك ليش هو ياهو الي يساعد وحده بشغله يتزوجها ؟؟؟اني جاوبته كلتله عمي اني مو هالشي الي خلاني اتقدملها اني البنية اريدها لان بنت اوادم و متربايه .. رفض رفض قطعي و كال سدو الموضوع .. رجعنا و طبعا طريق الرجعه كله اخويه يكلي متفيدك لان ابوها واضح من حجية يريد يزوجها للولد ابن صديقه .. انساها خوية و انته بدوله متروسة نسوان عرب و اجانب .. اذا مشكلتك الزواج هسه من ننزل من القطار ازوجك عشره .. كلتله اني اريد رباب .. كالي متصيرلك والله .. كلتله ماشي و ثاني يوم اتصلت بيها الصبح و بس سمعت صوتي كامت تبجي .. كالت اني هسه اكدر اروح للدولة اكلهم ماريده و اكدر هسه اخذ سكن وحدي و اسوي الي اريده و اتزوجك غصبا ما على ابوية بس اني ممرباية اصير هيج .. اني ماكدر اسوي هيج .. عفيه الكالي طريقة و قنع ابوية يقبل .. و اني هم راح اكله اريدك .. و عفت الشغل و عفت كلشي و رحت بقطار لوحدي لمنطقتهم .. انتظرت ابوها بباب العمارة .. بس اجى رحتله كلتله عمي عندي حجي وياك ممكن نتمشى سوى .. قبل الرجل و تمشى وياي .. كلتله عمي اني راح احاجيك كلام رجل لرجل .. و الي اتمناه منك بس تسمعني للنهاية .. و وراها لو تكلي اي لو تكلي لا و بعد اقسملك مراح تشوفني بحياتك اذا كلت لا .. كال تفضل .. كلتله انته عرفتني معرفة ايام معدودات .. معاشرتني .. مكعدت وياي كعدات طويلة .. متعرف اني من يابيئه جاي من يا مجتمع .. متعرف طريقة تفكيري غير بس امور سطحية كعدنا سولفنه بيها .. كلتله انته كلت مو كل واحد ساعد بنية معناها يتزوجها واني وياك بهل الشي .. بس اني من ساعدت بنتك لو اني ابن حرام (حشى ما اكول بوجهك) جان اكدر اسوي الي اسوي وي رباب واحنا بجزيرة لوحدنا .. جان كدرت كل شي اسوي و محد ميعرف .. بس اني اهلي مربيني عالصح .. من ساعدتها و شفتها هي بسيطة و بالطريق حجتلي عن وضعها و حجتلي عن وضعك حبيتها و اسف عمي اكول هالكلمة حبيتها مع العلم اول مره اشوفها بحياتي .. حبيت بيها البساطة .. حبيت بيها طريقة تعبيرها عن حالها .. حبيت بيها حبها الك و قبولها ان تطلع طريق بي موت و طريق مو نظامي حتى بس تكمل حياتها وياك ..مع العلم انته نفسك خفت على وضعك و على اوراقك و ركبت طيارة و رحت لليونان و مخاطرت و ركبت القارب و اني وياك بهل الشي و حقك لان لو لازميك جان اعتبروك انته المهرب و حتى جنسيتك يسحبوها .. حبيت بنتك و شفت بيها بساطة اهلي .. و انت كلت اني بعدني ممتجنس و عمي العمر يركض ركض غمض عين فتح عين اخذ الجنسية .. و حتى انته من جيت للبلد هم جنت مقيم .. اني اعرف سبب رفضك شنو بالضبط واعرف انته ميهمك الجنسية لو العمل .. اني راح اعترف اعتراف الك و اتمنى متأذي رباب .. اني رباب اتصلت بيها و اعرف انته تريدها لابن صديقك .. بس والله راح تكسر كلبي و تكسر كلب بنتك طول العمر .. بنتك مربايه و راح تقبل بلي انته تريده .. و راح تقبل بالولد الي انته اختاريته مو لان هي موافقة .. بس لان هي متريد تكسرلك كلمة بس راح تكسر كلبها .. و اني اريدها و احبها يا عمي ..طبعا بهل الحجي من كلت اريدها و احبها ياعمي مسيطرت على نفسي و بجيت .. من شافني ابجي هو انقهر و حضني .. كالي رباب الك و متصير لغيرك .. من كالي هيج كمت اكمز .. بالشارع اكمز .. هو ضحك و كالي كافي لك فضحتنه .. طبعا اتذكرت شكل رباب من جانت لابسة التيشرتات مالتي و تبجي و تضحك من ضحكت عليها وعلى شكلها .. صار بيا نفس الموقف يا سبحان الله .. اضحك و ابجي و امسح بدموعي .. من الفرحه .. و تزوجت رباب .. اني حاليا احجي هالحجي لزمتني العبره .. لان تفاصيل هواي جتي على راسي و رجعت لزمن بعيد .. اني حاليا عندي بنات ثنين و ولد واحد .. و مرت سنين على هالحادثة .. بس احلف بالله العظيم حبي لرباب بعد كل هالسنين ما تغير ولا قل … بالعكس يوم ورى يوم يزيد .. هالقصة داحجيها لان مرات اسمع و اقرا مواضيع مضمونها (الحب بعد الزواج يقل) هالحجي اني اي ثقه ماعندي بي .. لان ببساطة (الحب) من اسمه حب و هاي هي .. الله يحفظكم و يبعد عنكم كل شر و يحفظلي رباب و جهالي من كل سوء …(جزيرة متلينا)انتهى اخوكم ابو بغداد سايق التكسي#ابوـبغداد