تفرج..

احنا عائلتنه صغيرة … اني و اختي و اخوية … الولد اكبر واحد بيناتنا .. واني الصغيرة و اختي الوسط … ابوية و امي ربونه على الاحترام و المحبه … و جان بابا يزرع بينا هالشي من الصغر … يعلمنه شلون نفكر واحد بالثاني … جان ميكعد عالصينية اذا ميشوفنه كلنه ملموين … من نجمع كلنا هو يكعد ويانه … و من تصير عركة بيناتنا علمود لعبة او اي شغله ثانية .. يجمعنا و يعلمنه انو احنا اخوه و لازم ابد منتعارك و واحد يدافع عن الثاني .. جان مستحيل يجيب شغله وحده .. يجيب تلاثه حتى لا يصير تفرقه .. البيت جان كله حنان و مشاعر عائليه .. و جانو اخوتي ثنيناتهم يدافعون عليا من نطلع نلعب برى وي جهال المنطقة .. حتى بالمدرسة .. من دخلت بصف الاول دخلت بنفس الابتدائية الي اختي واخويه بيها .. ما حسيت بخوف من اول يوم مثل ما حس غيري .. لان بس دك جرص الفرصة بأول درس الي بأول يوم دراسي بحياتي لكيت اختي و اخوية بباب الصف ينتظروني … يعرفوني عالمدرسة … و يعرفون اصدقائهم عليا … ياويله الي يحاول يضربني لو يسمعني كلمه محلوه .. اخوية يجي ركض .. و اختل وراه مثل ما جنت بالشارع من العب و احد يضربني هم اختل وراه .. و اختي نفس الشي …
كبرت بنص هالمشاعر العائليه .. كبرت واني احب اهلي و اخوتي .. و الدنيا اخذت ابوية بالبداية … و بعدين لحكته ماما … ماتو الي أسسو هالبيت .. بس ما ماتت مشاعرهم بداخلنه .. اختي جانت طالبة كلية و اجتي قسمتها و تزوجت و زوجها و اهله سافرو للخارج و راحت وياهم .. اني بقيت وي اخوية .. و اخوية قرر يتزوج و ياريت لو ممتزوج .. تزوج بنية ماكو منها بالدنيا .. شرف و اخلاق و تربية و اسم و فوك كل هالشي جميلة و نازكه و الي يعرفها مستحيل يكول غير هالشي .. خلوقة و متربايه .. هي جوارينه بنفس المنطقة بس يعني مو قديمين بالمنطقة مثلنا .. صارلهم كم سنة من كعدو هنا .. هي عدها خوات ثنين بعد و ولد واحد ..
جتي للبيت عاشت ويانا واني كيفت بيها لان كلت الحمدلله اختي راحت مني و جتي اخت جديدة اليا .. بس من اول اسبوع زواج وي اخوية كمت احس اكو شي مو طبيعي بيناتهم .. البنية جانت متبين هالشي بس اخوية جان عصبي .. من اول اسبوع عاف الزواج و رجع لشغله .. حتى ماكمل اسبوعين اجازه ..كطع اجازته و رجع لدوامه .. جنت اسألها للبنيه اكلها شبي .. تكلي ماكو شي و سعيده وياه .. و حتى تكول هالشي لأهلها .. بس اخوية مو طبيعي .. ابد مو طبيعي .. و ورى شهرين تقريبا من زواجهم فزيت من صوت صياح اخوية .. و هي صوتها تبجي .. اني رحت دكيت الباب مال غرفتهم .. اخوية طردني .. رجعت لغرفتي و نمت .. ثاني يوم شفت زوجته مخليه كريم هواي بوجهها مبين ضامه فد اثر ..مسحت الكريم بيدي و جان مبين ضاربها بوجهها .. كامت تبجي .. اسألها شبيج ؟؟
متجاوب بس تبجي .. كلتلها بابا احجيلي .. زين اخابر اهلج يجون .. لا لا تكلي لا .. و ما حجتلي ابد على الي ديصير بينها و بين اخوية … وكامت تبدي المشاكل بالبيت و كمت يوميا افز على صياحه عليها .. و صوت بجيها .. و بيوم من الايام كعدت الصبح لكيت ابوها و امها واخوها ببيتنا .. انفصلو .. طلكها اخوية .. و الناس اخذو بنتهم و راحو .. اني سألته ليش ولك شبيها البنية .. يكلي انتي شعليج تتدخلين .. اخوية انكلب صار انسان ثاني .. كمت اني اخته الي جنت اختل وراه العمر كله كمت اخاف منه … و ياريت لو بس هيج .. كام يشرب و بالبيت .. اني هنا كمت ما اتحمل بس شسوي ماعندي غيره و شمهما يكون هذا اخوية و حبيبي و ماكدر اعوفه .. بس مشكلته جان ميحجي .. كمت اتواصل وي طليقته بدون ميدري .. وعرفت المشكلة بس حلفتني البنيه ما احجي .. اخوية جان عنده مشكله .. و البنية محجت و تحملت وجان عدها استعداد تبقى وياه .. بس هو تخبل صار بي حاله مو طبيعية .. اني من عرفت تخبلت و حجيت لاختي عالموضوع .. كالت زين والحل .. كلتلها ماعرف بس اني ما اتحمل الي ديسوي بالبيت .. يوميا يشرب و عاف دوامه وشغله .. و كام ميطلع مثل قبل اربع وعشرين ساعة بالبيت ..
و من يريد شي يصيح و اذا ما اسويله الشي بنفس الدقيقة يغلط .. و مره اني نايمه و هو يصيح يصيح مجاوبته لان والله نايمه .. فات لغرفتي دفرني وهنا اني متحملت .. انفجرت عليه .. كلتله يا اخي البيك مو انته اختاريته .. و ماكو شي ميتعالج راجع دكتور .. ميصير هيج راح تموت من الشرب ..
اني حجيت هيج هذا اتخبل بالزايد وكام يضرب بيا كل قوته .. وحده من عيوني هلكد ما ورمت كمت ما اشوف بيها لان الورم صاعد .. و خشمي دم طك من الضرب .. عافني و كام يصيح هاي الهيج والهيج جذابه .. (قصده على طليقته) .. اني الي عفتها مو هي عافتني واني ما بيا شي .. اني عفتها .. و ميكول ليش عافها لان الخلل بي خطية .. كمت انام ببيتي وقافله بابي عليا و هم ادفع الكوميدنو ورى الباب من الخوف .. واصعب شعور عالبشر من ينام ببيته ممأمن على روحه .. و كمت ادعي من الله بس اخلص منه .. راحت اورام وجهي و رجعت للدوام .. جنت بوقتها طالبة كلية .. بالكلية كمت ادور ارتباط .. جنت كل هالسنين رافضة هالفكرة مال علاقة و حب .. و جنت اصلا ممقتنعه بيها ..بس من ورى الي صار وياي ..و الي ديصير خفت .. ردت بس انهزم من البيت .. و المصيبة اخاف اكول لاحد و يروح يحاجي لاخوية و يعرف اني مطلعه السالفة برى ..
يعني هم خوف و هم ماكدر احجي .. و تعرفت على طالب وياي بالكلية .. هالولد طبعا دخلي بموضوع الزواج .. حاله حال غيره .. ٩٩ بالمية من الطلبة من يريدون يدخلون بعلاقة يحجون بالزواج .. اني كيفت .. كلت راح اخلص من مشاكل اخوية لان اخوية ميصيرله حل .. و حتى لو يصيرله حل هو ميريد الحل .. هو يريد حياته تبقى هيج .. و اصلا مياخذ و ينطي بمشكلته ..
المهم .. من جنت اسمع كلام الولد عالزواج و ما بعد الزواج و الاطفال .. جنت اطير بخيالي .. واكول بيني و بين نفسي هو هذا الي راح يخلصني من الواقع الي عايشته .. جنت ما احسه للولد انسان و حبيب و بس .. حسيته امي و ابوية الراحو … حسيته هو البيت .. أي البيت الي نسمع عنه من امهاتنه … شلون جانو يحجون على البيت الملك و يوصفوه … شلون يحفظ الكل بين حياطينه .. احسه البيت السكف الي يلمني و يحميني .. حسيته مثل الابن الي طال انتظاره من امراه عجزت من مراجعة الدكاتره حتى يصير عدها طفل … حبيته .. تعلقت بي .. جنت ارجع للبيت و انتظر الليل يخلص حتى الصبح اروح للدوام والتقي بي .. و أمنت بي .. طلعت وياه و جنت ابد ما اخاف منه .. لأن مأمنه بي .. جان يحاول مرات وياي يسوي اشياء مو زينه ما اقبل .. و اتعارك وياه .. بالبداية جان عادي يعبرها .. بعدين من شافني اتعلقت بي .. كام يزعل .. و مره حجاها طك بطك .. كال قابل شمسوين احنا اول وتالي راح اتزوجج و حصر علاقتي بي بهل الموضوع .. و عرفت هو جان يريدني بس علاقة وكل الي صار جذب بجذب .. جان يريد يوصل لمكان معين و من شافني ما انطيته مجال عافني .. بالبداية جان يحاول و يحاول .. بس من شافني اتعلقت كام مثل الي يكول بس بطريقة غير مباشرة (لو اخذ الي اريده منج لو نتعاوف) .. و عفته .. عفته و الحلم الي حلمته وياه راح .. و بنفس الشهر الي تعاوفنه بي .. شفته وي غيري بالكلية .. بجيت هواي .. و جنت من ابجي ماعرف بالضبط الدمع الي ينزل من عيوني على شنو ينزل .. ينزل على اخوية و تعامله وياي .. ينزل عالرجال الي حبيته و طلع جذاب .. ينزل على البنية الي اخوية طلكها وهي متستاهل غير بس الخير .. و ردت ابطل من الكلية و طبعا اخوية ميهمه ابطل ابقى .. و بطلت .. حصرت روحي بالبيت .. الوكت الوحيد الي ارتاح بي من احاجي اختي .. وبقيت سنتين على وضعي .. كطعت علاقتي بالعالم الخارجي .. واخوية على نفس وضعيته .. ميقبل اي تدخل و يوميا تقريبا يجيب شرب يشرب و ينام .. طبعا احنا وضعنا المادي شوية زين بسبب الي عافه ابوية ..
عدنا محلات ملك بمنطقة زينه ببغداد ناخذ منهم ايجار .. و الايجار كلش زين .. علمود هالشي جان اخوية ميهتم لشغله و اصلا عاف كل شي هو .. و اخر شي كام يجيب وياه رجال ماعرف منين عرفه يجيبه للصالة يشربون سوى .. هنا اني متحملت و كلتله هالحجي و هم ضربني و كالي كعدتنا بالصالة قابل شنو مفوته لنص البيت .. و سكتت بس كلت لاختي هالحجي … و خابرته و كالتله و تعارك وياها .. وهم تعارك وياي .. سكتت و كلت خلص .. ردت انتحر .. وروح بابا و وروح ماما فكرت انتحر .. لان لا اب ولا ام .. و حتى الاخ السند هم صار غريب .. وحتى الي حبيته طلع حابني علمود غايه و من ما حصل هالغاية طلعت حقيقته .. و بلعت حبوب ماعرف مال شنو .. يمكن مال امي الله يرحمها باقية بالكاونتر قديمة .. و تخربطت .. اخوية لكاني بالهول واكعه من القنفة على وجهي و بالكاع .. وداني للمستشفى و سولي غسيل معده و كالوله هاي منتحره .. هو تخبل .. و كسر جامة بالمستشفى بيده من العصبية و ايده طكت دم .. عالجوه و فات لغرفتي يبوس برجلي و بيدي .. يكلي انتي هم تريدين تعوفيني .. مو كافي ابوية و امي و اختي و فلانه (طليقته) عافوني .. كلتله انته متريدنا حبيبي مو احنا منريدك .. يبجي بصوت عالي .. و كال يحرم عليا الشرب بعد ..
بس لا تسوين هيج .. و طلعت من المستشفى و صدك بقى تقريبا شهر ميشرب بعدين كام يطلع بره يروح يشرب .. كلت بيني وبين نفسي همزين هسه كام ميشرب بالبيت .. و هم يرجع سكران و شوية شوية رجع لنفس طبعه .. كلت هسه اني شسوي .. و بيوم من الايام هيج صدفه لا عندي خبر ولا اعرف شي .. جوي ناس لاخوية من الجوارين خطابة عليا .. اني اعرفهم هالناس بس الي اعرفه ماعدهم ولد بعمري .. الي افتهمته انو هو كرايبهم و كم مره شايفني صدفه من جان يجي يمهم .. وباقي يفكر بيا و سألهم عليا بس جان مشكلته هو ستوى متخرج و جان متعين جديد و ممكون نفسه .. علمود هالشي ما تقدملي .. بس من رتب نفسه جابهم و اجاني .. قبلت رأسا بدون س و ج .. و اخوية هم قبل حتى يخلص من لساني .. و تزوجت .. تزوجت شخص ما اعرفه .. و لا يعرفني .. شخص اصلا مشايفته .. اذا اكول ملاك محد يصدك .. رجال محترم .. يعني حتى وياي بالتعامل و بالحديث هم محترم .. وي اهله وي اخوته .. وي كل الداير مدايره.. رجال الي نسمع عنه بالقصص .. من هذا الي ميطلع الكلمة اذا ميكون موزنها بميزان و يعرف قيمتها بين الناس يله يحجيها و ينطقها … ماعنده شي اسمه مشاكل او صياح … عنده شي اسمه تفاهم .. ما فد يوم كالي لا ..
حتى كام يحاول يساعد اخويه وقنعه يراجعون دكاتره بس للأسف اخوية مشكلته متنحل .. شغله متشعبه بس اهل الطب يفتهموها .. و ارتاحيت .. ارتاحيت ونساني كل شي .. و مر على زواجي اليوم ٧ سنوات .. و عندي اطفال الحمدلله .. بس محد يصدك اذا اكول طيلة هالسبع سنوات مصارت مشاكل بيناتنا جبيرة ؟؟
مشاكل تصير بس صغار صغار .. و ميقبل انام زعلانه منه … لازم يراضيني .. و محد يصدك اذا اكول طيلة هالسبع سنوات هو كل فترة ياخذني لبيت اهلي القديم (يعني يم اخويه) انظف البيت و ارتبه و هو يبقى يسولف وي اخوية و يحجون و يضحكون .. مع العلم لو رجال غيره يكول طبه مرض هو راضي بروحه هيج اني شسويله .. بس هو يحاول يساعد اخوية حتى لو بالكلام .. و دائما يعزمه و يروح هو يجيبه .. مرات اكول بيني وبين نفسي .. هذا الرجال الي لا اعرفه ولا يعرفني لو مشايفني .. جان هسه اني شنو مصيري .. جان متت من القهر .. بس ورى كل صبر اكو فرج .. و دائما السيء اكو الاحسن منه .. ..