تعويدي

من جنت اسمع كلمة هاكر ماعرفها شنو بالضبط بس الي الي ادري بي هو يفوت يسرق الاميل … و لأن بذاك الوقت بالعراق جان ستوى فايت النت … الهاكر من يبوك هالسوالف ميستفاد شي … اني بذاك الوكت جان عندي حساب اسمه ياهو ماسنجر … الياهو عبارة عن برنامج محادثه … كامرته توكف و تمشي و بي صوت بس يخربط مرات … بيوم من الايام تعرفت على ولد عن طريق برنامج جات … صار صديقي و هو عراقي بس ساكن بالبحرين … فد يوم حسابي الياهو تهكر و هو الي هكره و رجعلي الباسورد الجديد و كالي ترى سويتها للضحك .. توسلت بي حتى يعلمني شلون اصير هاكر .. انطاني برنامج اسمه (كيلو جر) … هالبرنامج يصنع صورة وهمية و بداخل هالصورة اكو شي ……. من المقابيلي يستقبل (الصورة الملغومة) مني و يفتحها .. راح تنقلي هالصورة شكو حرف ينطبع بحاسبة المقابيلي .. يعني يفتح اميلات و يخلي الباسورد كبل يجيني بصندوق الرسائل الخاصة بيا .. تجيني كل المحادثات و شكو احرف تنطبع بالكيبورد كلها … و اول اميل سرقته من عنده انتشرت .. كمت شكو واحد اشوفه فاتح اميله و صاير اصفر ادزله الصورة و اخذ اميله و بديت اتفرع مثل الشجره … من كل اميل ادز صور للناس و بيومين اني جنت ماخذ اقل شي خمسين او ستين اميل … جنت اشوفها متعه بس هي سخافة … و بيوم من الايام فتحت واحد من الاميلات المسروقة … و شفت بنية فاتحه كامرة .. طبعا جان يطلع بلائحة الاصدقاء شكو واحد فاتح كامرة و تكدر تضغط عالكامرة و اذا انطاك قبول راح تطلع كامرته يمك … البنية انطتني قبول و شفتها … جانت نسخه متتكرر و مستحيل اشوف مثلها بحياتي … تخبل … تخبلت عليها و عفت كل شي .. هي وراها طفت الكامرة و كتبتلي .. كالت شلونك فلان (طبعا هي تخاطبني بأسم صاحب الاميل الي اني فاتحه) كلتلها ماشية شكرا .. و كلتلها مشتاق … هي هم كالت اني مشتاقه و بدينا نسولف … اني جنت من خلال حجيها احاول اطلع الحجي … لان ماعرف صاحب الاميل شيصير منها … كالت شلونه دوامك .. كلتلها عادي .. و بدينا نسولف و عرفت انو هي بتركيا و مسجلين على الامم المتحدة …
و جانت طالبة وي الولد صاحب الاميل و تحديدا (ادارة و اقتصاد) .. و الحلو ماعدها رقمه للولد .. ولا الولد عنده رقمها … يعني يحجون بس عالنت .. و هالشي كشفته من الحجي الظاهر جانو مجرد اصدقاء و الظاهر هم الي اني داحجي من اميله جان صديق صديقتها … لان سالتني هواي على بنية اسمها استبرق … وكلتلها علاقتي انتهت بيها لان صارت مشاكل و كالت يمعود كول غيرها انته جنت تحبها و هي تحبك … كلتلها مصارت قسمة و كمت اكتبلها قصص مصايرة اصلا …

و من يومها عفت سوالف الهكر و اصلا اني مو هاكر … جانت نزوه مال واحد مشايف … يعني ردت اجرب هالشي و من عرفت يضر بالناس بطلته … بس بقيت اتواصل وياها بشكل يومي …
و كمت اطلب منها تفتحلي كامرة يوميا .. و هي جانت تفتح من باب الثقة لان هي تعرفه للولد ثقة و جان زميلها … جنت اسرح بشكلها و هي طلبت مني افتح كامرة بس كلتلها ماعندي كامرة بالكمبيوتر … و بديت اتعلق بيها ..
و حسيت هي هم كامت تتعلق بيا بس هي متعرف اني بايك الاميل و مو صاحبه … هي بدت تتعلق بالشخص صديق استبرق الي اسمه سامر … و فد يوم كلتلها اني عندي سر اريد احجي و اخاف لا اخسرج .. كالت ليش تخسرني ..
كلتلها والله مادري شنو اكلج بس اني متاكد اذا حجيتلج راح تعوفيني … طبعا اني وجهي مينطلع بي … و ماعندي ثقه بروحي .. و مكظيها كاعد عالحاسبة اكلب بالانترنت لو اطلع اكعد بالركن يم جماعتي … و ممكمل دراسة …
بس والدي امكانيته زينه و اني عايش بخيره … كالت احجي … كلتلها اني غلطت غلط و من عرفتج بطلت اغلط … كالت شنو يعني .. كلتلها يعني من يوم كمت احجي وياج و اشوفج بالكامرة بطلت كل السوالف الغلط الي جنت اسويها ..
كامت تضحك كالت شبيك سامر … كلتلها ممكن تخليني احجي و تقرين كلامي للنهاية و بعدين تجاوبيني … كالت كول …
كلتلها اني مو سامر و اني اسمي رائد و من سكنة فلان منطقة و حجيتلها على العراقي الي عايش بالبحرين و سولفتلها كل القصة … و كلتلها من يوم دست عالكامرة مالتها و هي قبلت تنطيني قبول و شفتها اني تعلقت بيها و عفت كل البرامج و بطلت ادز هاي الصور الملغومة للناس و بس افتح الياهو علمود اشوفها لو احجي وياها … كالت انته اكيد دتتشاقى … كلتلها عندي كامرة و راح افتحلج و شوفي … و فتحت الكامرة و شافتني و هم ما صدكت كالت سامر كاعد يمك و انته وياه متفقين تسوون فلم عليا … كلتلها لا والله الي حجيته كله صح … خافت مني بس بنفس الوقت من حلفتلها و كلتلها من شفتج هيج صار بقت تحجي وياي … و بذاك الوكت طلبت مني شي … اني حلفت كلتلها هالشي صار صدفه و بعد ما اسوي لان غلط … بس حلفتني اسوي الشي الطلبته مني اخر مره …
كالت صديقتي المقربة مني بالعراق و تحب ابن خالها عايش باستراليا و شاكه بي عنده علاقات … تكدر بس تجيبلي الباسورد مالته … و سويت هالشي اخر مره و طلع عنده علاقات وي كومة بنات … و صارت مشاكل وي خطيبته و بالاخير تصالحو و هو بطل كل شي …و هاي جانت اخر مرة استخدم بي هالبرنامج و من وراه بطلت نهائيا هالسوالف و مسحت كل البرامج …
و بقيت وي علاقة بالبنية و صار بيناتنا تلفونات من عده الانترنت و يوم ورى يوم زادت علاقتنا و قررت اروح لتركيا اشوفها … هي اصلا جانت منطيتني معلومات عن سكنها بيا محافظة … بس ابد بفترة علاقتنا مكلتلها راح اجي و راح اشوفج … و جنت اني بعلاقة صداقة بس صداقتننا بيها تفاصيل هواي … يعني حتى الكلمات الي جانت تحفظها بالتركي تجيني فرحانه و تحجيها الي و تكلي اليوم كلت لابو الاسواق اريد هيج و افتهمني … جنت حتى الافلام الي تحبها اطلعها و اعيدها و احفظ الاحداث .. و نفس الاغاني الي تسمعها هم كمت اسمعهم … و كمت احس اني احبها لهل البنية … و بيوم من الايام قررت اروح سفرة لتركيا … و سفرتي بس علمود اشوفها … وكلتلها باجر راح اروح لبيت عمي ابات يمهم و منكدر نحجي … انقهرت لان يومها جان ميكمل بدوني و صرتلها تعويد و هي هم صارتلي تعويد … و اني سويت هالشي لان ثاني يوم طيارتي لتركيا … و طرت لتركيا و رحت لنفس محافظتها و لكيت عرب بالمحافظة سالتهم على مقهى مال انترنت … و رحت بنفس الوقت الي تفتح بي نت … و فتحت نت و شافتني فاتح كبل دخلتلي و طبعا البرنامج الي جنت اني وياها نستخدمة بي مكان مثل الجرص … من تدوس يطلع صوت قوي و كلمة بووووز بالانكليزي … بس شافتني فاتح دزت هالجرص و كالت هاي شنوووو اشو فاتح مو كلت راح تروح لبيت عمك … جان تدك عليا صوت … و لبست السماعات و كلتلها اني هسه ببيت عمي … كالت مكلتلي عدهم انترنت … كلتلها نسيت .. و كلتلها تعرفين شنو اريد اسوي .. كالت شتريد تسوي ؟ كلتلها اريد اجي لتركيا التقي بيج و اشوفج …
كالت اتمنى والله .. كلتلها شفت بالصور مال انترنت اكو تمثال مال واحد جبير بمحافظتكم .. كالت اي صح ؟؟
كلتلها هذا التمثال اذا جيت لتركيا نلتقي يمه ماشي .. كالت بعد كل ما افوت من يمه راح اتخيلك تجي هناك و نلتقي .. كلتلها زين هو قريب على شقتكم ؟؟ كالت شغلة عشر دقايق مشي .. كلتلها دتعالي هناك لعد اني انتظرج … جان تكلي انت شدتحجي … كلتلها هسه انتي خسرانه خسارة .. اذا جيتي و ما لكيتيني معناها كسبتي تمرين مجاني و حركتي رجليناتج .. و اذا جيتي و لكيتيني تكسبين اجر و حسنات لان بصراحة ما اندل شي هنا و اريد تدليني فندق ههههه .. كالت جذاب والله .. كلتلها دتعالي لعد و نشوف .. كالت زين ترى والله اسويها … كلتلها عمي سويها راح انتظرج يم التمثال يله .. و سديت الانترنت و دفعت الحساب و طلعت رحت يم التمثال وكفت … و جان تجي من بعيد لابسه تراكسود و لافه على ركبتها شال صوف لحد هسه اتذكر الموقف و اللون مال الشال … من تقربت و شافتني واكف جان تأشر بيدها عليا و تفتح حلكها … كلتلها شبيج احجي .. كالت تدري هالشي الي سويته متوقعت بحياتي راح يصير بيا ابدااااا .. كلتلها ولا اني و جان اضحك … جان تتقرب مني و مديت ايدي سلمت عليها و هاي جانت اول مره بحياتي الزم ايد بنية من قريب … الاحساس هذا كل ما اتذكره تجيني مثل الهزه بصدري … و كعدنا اني وياها بمطعم قريب من التمثال لان الجو بره بااااارد … الكعدة كلها اني اباوع عليها و هي تباوع عليا حتى الاكل الي اكلته ما حسيت بطعمه و عبالك الدنيا داير مدايري تفتر و الشي الوحيد الثابت و الي اكدر اركز عليه هي … و رحنا اني وياها لفندق قريب حجزت بي … و رجعت وصلتها قريب يم البيت و رجعت للفندق … و طبعا اشتريت سم كارت تركي و كمت احجي وياها بالتلفون … طبعا هي عائلتها بس ابوها و امها …
و هالبنية الوحيده الهم .. عشت احلى ٢٠ يوم بحياتي … جانت يوميا من ساعة تسعة الصبح تجيني و نطلع لحد المغربية … و جانت تكول لابوها و امها هي تروح يم بنية صديقتها هم عراقية و بنفس المحافظة … و حبيتها و حبتني … و للأسف صار الي ما جنت متوقعه يصير … اخوية استشهد بوقت الطائفية .. و بنفس الوقت الي جنت بي بتركيا … و خابرتني اختي كالتلي الخبر … عفت البنية و عفت تركيا و رجعت … الطريق كله اني ابجي … و وصلت للعراق و رحت للبيت طلع اخوية و اصدقاءه ثنين وياه مستشهدين … جايه سياره راشتها رش بالطلق و انهزمت السيارة ..
و دخلت بحالة نفسيه حقيرة … اخوية حزام ظهري … اخوية الايد الي تنمدلي من اعثر راحت … اخوية نفسي الي اتنفسه و نظر عيني راح … بقيت شهرين بالبيت و كرهت الدنيا كلها … و ورى الشهرين رجعت لوضعي و كمت احجي وياها بالتلفون … و كالت والله لو تدري عندي خبر ما اعرف وقته او مو وقته بس لازم تعرف … كالت طلع قبولنه على امريكا و طيارتنه بفلان شهر (طبعا بذاك الوقت الامم متحدة جانت تسفر العراقيين الي بتركيا بسرعة مو مثل هسه سنين تطول) .. كلتلها يعني مراح نتشاوف بعد … كالت متكدر تجي قبل فلان شهر .. كلتلها والله مادري … طبعا هي جان اكو حجي بداخلها بس متكدر تطلعه …
لان حسيت بهل الشي … وبقيت الح وياها كالت مو الكلام الي اريد اكوله مو وقته والله … كلتلها احجي كولي حتى لو مو وقته … كالت اني اذا رحت لأمريكا بعد ما اتوقع اجي للعراق ابد … كلتلها اي ؟؟؟ كالت الشي الوحيد الي اني اكدر اسوي و الغي سفرتي وي اهلي هو الزواج … يعني منا لست اشهر لازم ترتبط بيا و اني مستعدة اعوف كل شي و ارجع للعراق و ابوية و امي خلي يروحون وبس ياخذون الاوراق يكدرون يجون سفرة لتركيا اشوفهم لان بابا ميكدر يفوت للعراق … كلتلها والله ماعرف شنو اكول و اني ماريد اخسرج والله بس مو وقتها ..
كالت شفت مو كلتك مو وقتها …
سكتت و بقيت افكر … و راحت هي و مر اسبوع على حجينا هذا و رحت لأبوية كلتله اريد اسافر لتركيا … ابوية باوع عليا بنظره و بدون ميحجي ولا حرف افتهمت معناها … معناها متروح … و كعدت بصفه كلتله يابه اريد احجي حجي بس ابد مو وقته … كالي احجي … كلتله يابه هيج و هيج السالفة … جان يكوم يضرب الغراض بالصالة و كالي لك فلان (قصده على اسم اخويه الله يرحمه) كالي لك فلان دمه بعده بالكاع مناشف و انته حاير بروحك … و كام يصيح و امي جتي تركض و امي جانت بس تريدلها حجه حتى تبجي و حقها والله … جان تبجي و اني كمت ابجي و كلتله يابه انسى والله ماعرف شلون طلع الحجي من لساني … و رحت حجيت هالحجي للبنية و كامت تبجي كالتلي ليش رحت حجيتلهم … اني كلتلك هالحجي مو وقته …
بقيت اسكت بيها لان تبجي … جان تكلي اني مدابجي بس علمود الي حجيته لأهلك … اني دابجي لان مراح نصير واحد للثاني بس والله اني حبيتك … و كامت تغص بالبجي و سدت الاتصال … و اجه ثاني يوم و هي متصلت عليا لا بالتلفون ولا بالنت … جنت كل شوية اشوف الرسائل مال التلفون ماكو … و كمت افتح الكمبيوتر اكابل الياهو ماسنجر و اتخيل الدائرة ام الوجه تصير صفره لان الدائرة من تصير صفره معناها الشخص متواجد عالانترنت .. بس يوم يجر يوم ماكو … و اني كمت اطلع وي ابوية للشغل بمكان اخوية الشهيد .. و هي ماكو .. ادك عليها اتصال تطلعلي وحده تحجي بالتركي معناها التلفون مغلق او السم كارت مغلق … و كل ميقترب الشهر الي راح يسافرون بي ازيد اتصالات و اروح اكتبلها عالماسنجر وهي ماكو … و اجه الشهر … و راح الشهر … و جتي السنه … و راحت السنتين … و التلاثه و الاربعه و وصلنا لعام ٢٠٢١ و هي ماكو … بكل هالسنين اني اسأل عليج كل واحد احاجي و اعرف صدفه هو بأمريكا … بس ما اسأل بأسمج لان اخاف عليج … اسأل على بابا و ماما … بس ياهو الي اسأله يكلي امريكا جبيره … و هواي بيها عراقيين … اني اعرف انتي صارتلج حياتج و متأكد مية بالمية من هالشي … و اني هم صارتلي حياتي … بس ما اكدر انساج … تذكرين من كعدنا يم هاي العائلة التركية الكبار بالعمر .. و من كام الرجال شلون لزم ايد زوجته و وكفها … تذكرين شلون جان يخاف عليها من الثلج لا تتزحلك … و كلتي بوقتها شوف شلون يخاف عليها و يحبها .. كلتلج اتمنى … كلتيلي شتتمنى ؟؟؟؟ كلتلج اتمنى الله ينطينا طولة العمر و نوصل لعمرهم و الاهم ينطيني القوة مو حتى اوكفج و الزم ايدج و بس .. حتى اشيلج على جتفي … انتي ضحكتي و شمرتي عليا ثلج من الكاع كلتي ما اصدك … بس والله العظيم جنت صادق بكل حرف كلته … ولو مو الي صار و الوقت الي انحكمت بي و انتي هم انحكمتي بي .. جان هسه اني ما كتبت هالاحرف و لا مسحت عيوني لان هالنقطة مال دمع هم نزلت .. جنت صادق بكل حرف .. العشرين يوم الي عشتها قريب منج جانت حياتي … جانت تعويدي ياتعويدي انتي .. بس الي صار اكبر مني و منج .. الطائفية مو بس اخذت ارواح ناسنا و اهلنا .. الطائفية فرقتنا ..

المصدر : صفحة ابو بغداد