تاليها شبر واربع اصابع
قبل فترة رحت لتركيا … رحت لمطعم بوراك التركي … رحت للفرع مال تقسيم و سألت العمال على بوراك وينه ؟؟كالو بالفرع الثاني (ردت بس اضوگ اكله صدك طيب لو دعايه).. انطوني عنوان بكارت صغيروني و طلعت اخذت تكسي و رحت للعنوان الثاني .. فتت للمطعم لكيته متروس ناس بس اكو كم ميز فارغ .. و شفت بوراك يفتر عالميوزة و يضحك هاي ضحكته المعروفة و يسأل الناس على الاكل (طيب لو لا) و هو شوية يطك طك عربي .. اذا يشوف الزبائن عرب يحاول يحجي وياهم بالعربي .. الولد امانة وجهه بشوش .. طبعا السالفة بيها رباط .. المهم .. وراها بفترة هم رحت مطعم بس مو بتركيا بدول ثانية مو عربية .. هم شفت اصحاب المطاعم من يشوفون واحد (اجنبي يعني مو ابن الدولة) يسألوه عالاكل طيب لو لا .. و هالشي فن بصراحة .. فن يستقطبون بي الناس حتى يرجعون يزوروهم و يفيدوهم .. هالشي حجيته لصديقي و تذكرنه اني وياه موقف بالعراق … فد يوم رحنا لمطعم بالعراق (وماكو داعي لذكر اسم المطعم) ..اني و صديقي نفسه … هو جان مشتري سيارة و عزمني .. كعدنا بالمطعم عادي و طلبنا الي نريده .. العمال جانو يشتغلون حلو و يضحكون بيناتهم و يتشاقون و اكو جو كلش حلو بالموضوع .. عموما الانسان الطبيعي من يشوف احد يضحك او يبتسم من جوى من داخله يحس براحه .. و فجاءة العمال وجوهم تغيرت و كامو يأشرون واحد للثاني بالعيون .. حسيت اكو شي مو طبيعي صار .. اني مكاني بالكعدة (يعني الكرسي مالتي) مقابيل باب المطعم .. جان اشوف واحد فات اقسم بكل قسم بهل الدنيا يشبه السياره الفولكس واكن القديمه .. فات كعد عالميز و طبعا عرفت من دخلته هذا ابو المطعم .. صار هدوء بالمطعم و العمال سكتو .. و رأسا صاح بصوت اجش (عبالك بالع كرسي ببلعومه) كال جيب الجاي وليدي .. و واحد ركض من العمال جابله جاي .. و بقى هالرجال صاحب المطعم يشخص بينا الكاعدين .. و نظرته جانت ممفهومه ههههههه يعني خلاني اشك بروحي اني بيا شي غلط لدرجة جريت الكرسي شوية و صرت و رى صديقي حتى ما اشوفه .. الحاصل .. جان اكو عائلة كاعدين بالمطعم هو من شاف العائلة بيها نساء شغل الليزرات .. كام يشخص بيهم ويلعب بشواربه .. اني هنا بديت اضوج .. بس المصيبه احنا جنا طالبين اكل .. يعني لو مطالبين جان كمت طلعت .. الاكل مو بس طعم و ما اكول المطعم ما عليه زبائن و ما عليه صيت و مشهور .. بالعكس المطعم كلش معروف ببغداد .. عالعموم الاكل مثل مكلت مو بس طعم .. الاجواء اهم شي بالكعده . المهم.. هو مو كام يباوع عالبنات شسوى (حتى يبين للناس هو ابو المطعم) كام يصيح عالعمال تعال ابني شيل هالمواعين .. تعال فلان نظف الجامة مو كايلك الف مره من برى و من جوى تنظفها .. و بقى كاعد مورم ورى الميز و بس يوزع اوامر للعمال (مع العلم العمال يعرفون شغلهم) اني هنا ما اكدر اسكت بعد و صديقي هم ميكدر يسكت لان بصراحة صارت الكعدة مو مريحه .. صديقي صاح بصوت عالي حتى يحجيي للابو المطعم .. صاح شنو السالفة الاكل ما خلص (بس بصوت عالي) .. ابو المطعم كاله على كيفك صوتك هسه يجيك الاكل ..صديقي عله صوته كاله مو صار ساعه دننتظر هسه لو طالبين باجه هم جان استوت .. بهل الحجي اجه واحد من العمال ركض على صديقي و شاوره كاله هذا ابو المطعم .. صديقي كاله ادري ابو المطعم شنو قابل هو الي يدخل الناس للجنه .. اشو صارله ساعه يصيح محترمنا ولا احترم الكاعدين .. و بس يشخص بينا عبالك عدنا طلابه وياه ..حتى هالزقنبوت منريده .. و كالي كوم خلي نروح يمعود .. كمنا و جان يصيحنا كالنا شبيكم .. كلتله خالي من فتت للمطعم لحد هسه تصيح هاي اول شي .. وثاني شي الاكل تعطل و ثالث شي انته تعرفني قبل ؟؟كال لا .. كلتله لعد شبيك تشخص بيا و تباوع عليا مو حتى الكرسي فريته من وراك .. ادري جايين مطعم لو الشعبة الخامسة .. حسستني انته طالبني فلوس .. كالي عادي اني باوعت عالكل .. كلتله خالي يرحم والديك تعامل وي العمال احسن و ترى العمال يعرفون شغلهم يعني محاجه تصيح عليهم كبالنه .. تكدر تتنظر وقت يكون المطعم ما بي احد و بكيفك صيح تعارك .. كال هذا شغلي تعلمني بشغلي .. صديقي كالي اهو دعوفه يمعود امشي .. و جرني و رحنا .. الخلاصة و الرباط .. ليش اكو مو بس اهل المطاعم .. حتى اكو شغلات ثانية .. من يجي ابو الشغل يشمر عالكل و يريد يبين للناس انو هو صاحب الملك لو صاحب الشغل .. و يتعامل وي العمال على اساس عبيد عنده مو عمال و ديقدمون خدمه و مقابيلها يتقاضون راتب .. زين هذا ابو مطعم و ممعروف بس بداخل بغداد وهيج يسوي (وطبعا ما اشمل الكل) .. لعد السياسي شلون ؟؟؟؟؟زين هذا بوراك الناس كلها تعرفه وهيج يتعامل و يضحك و يبتسم .. وهو صاحب سلسلة مطاعم .. وغيره و غيره هواي اكو يتلكون الزبون من الباب ولا يبينولك همه اصحاب الملك .. بالعكس وجهم يضحك و يجبروك ترجعلهم بعد مره بتعاملهم الحلو .. بس اكو (البعض) مورم عبالك ضارب بوتكس بخدوده و كصته و نافخ روحه ورى الميز تكول ديج هراتي نازل عركة .. و يرسم على وجهه تفاصيل مال واحد معصب و طابك حواجبه بحجة هو معاجبه شي .. و من يشوف جنس ناعم .. يحاول بكل الطرق يبين لهل البنات هو صاحب المطعم .. ولو اكو من هاي السماعة (اللاقطه) يشيلها و يصيح اني ابو المطعم يابنات .. اني والله اني .. ليش ؟؟؟ليش يا منفوخ .. ليش يا بطريق .. ليش ؟؟الفلوس و الملك كله يروح .. ومتبقى غير الكلمة الطيبة .. لاتطغون اذا صارت عدكم فلوس .. لان كالوها اهل قبل(تاليها شبر و اربع اصابع)انتهىاخوكم ابو بغداد سايق التكسي#ابوـبغداد
