“المهجوم”

شوية شوية جوارينه الي بشارعنه كامو يرجعون … و الصوت رجع للشارع و الهوسة مال الجهال .. بس جان اكو مشكله وحده .. هي الكهرباء … جان ماكو كهرباء .. ابوية (الله يرحمه و يرحم والديكم) … و عمو ابو أمير هم (الله يرحمه و يرحم والديكم) .. اقترحو يسوون حل النا احنا الجهال … يجيبون باتري مال سيارة و يشغلون عليه التلفزيون علمود احنا الجهال نجتمع و نشوف الكارتون .. رتبو الكعدة و همه جابولهم كراسي و كعدو و احنا جابولنه حصيرة كلش جبيرة كعدنا عليها كلنا … و شغلونه التلفزيون .. الفرحة بعيوننه جانت متنوصف .. لان جانت مو فرحه وحده .. اكثر من فرحه .. الحرب خلصت .. و رجعنا لبيوتنا .. بعد ما رحنا محافظات حتى نخلص من القصف .. رجعنا اجتمعنه من جديد .. و الفرحه الجبيرة رجعنا نشوف كارتون … بذيج الكعدة الي اتذكره طبعا .. مقابيل بيتنا جان بيت خاله ام مهند و بنتهم اسراء .. همه جانو راجعين لبيتهم بس هالبيت من دون بيوت المنطقة ميحجون وي احد .. امهم و ابوهم ابد ميسلمون عالجوارين و ميقبلون جهالهم يختلطون ويانه … احنا و كاعدين نباوع كارتون انداريت حتى اخذ من الصينية مي .. و شفتهم فاتحين باب الحوش و كاعدين يباوعون من بعيد علينا .. كلت لابوية بابا صيحهم خلي يجون … ابوية كالي ابني انته صيحهم .. و روح اخذ الاذن من امهم لو ابوهم حتى يجون يباعون وياكم .. ركضت عليهم و قريبين همه مو بعيدين .. شفت امهم ورى الباب واكف هم قريبة منهم ..سلمت عليها و كلتلها خلي يجون يباعون ويانه كارتون .. قبلت الام .. وهاي جان اول مرة يكعدون ويانه .. جوي و خطية كعدو ويانه نباوع الكارتون و من يومها كامو يوميا يلعبون ويانه برى .. بس امهم و ابوهم بقو على حطتهم اي تواصل ميسوون وي الجوارين .. و مرت السنين و اني يوم ورى يوم جانت علاقتي تقوى بمهند و اسراء .. نلعب سوى .. ندرس سوى .. نتعارك سوى و نتصالح بنفس الساعة .. علاقتي صارت بيهم اقوى من علاقتي بكل جهال المنطقة .. جنت ادافع على اسراء اكثر من مهند اخوها يدافع عنها .. حتى جان مرات من يضربها اني اتعارك وياه و اضربه .. وسنه تجر سنه و عام يركض ورى عام و كبرنا و دخلنا متوسطة و المتوسطة صارت اعدادية و الاعدادية صارت كلية .. و علاقتي بمهند بقت قوية بس اسراء لان بنية شوية قللتها .. يعني عادي ميانه و ضحك بس مو مثل قبل لان صارت مرية .. اني اعترف جنت احبها .. بس مجنت اعرف شلون افاتحها بهل الموضوع لان مهند اخوية و حبيبي و صديقي و قريب مني كلش .. كلت احسن شي حتى لا اخسره اخلي هالحب بداخلي و بس اوكف على حيلي مباشرة اخطبها و اتزوجها ..
و امي و ابوية ثنينهم يدرون بهل الشي .. و بالمناسبة كل هالسنين و كل هالعلاقة القوية بيني و بين مهند و اسراء و امهم جانت صح تسلم و ابوهم هم يسلم عليا بس بعدهم على نفس حطتهم مياخذون و ينطون وي الجوارين ..و حتى اكثر من مرة سألت مهند على هالشي يكلي ياعيني ابوية وامي معقدين شسويلهم يعني .. ميحبون يسوون علاقات وي الجوارين هذا طبعهم .. و طبعا هالشي مجان يأثر على علاقتي بمهند و حتى بأسراء بذاك الوقت ..
المهم .. فد يوم جنت متواعد وي مهند نروح اني وياه نشتري ملابس من الكرادة .. و بالطريق كالي خبر مجنت اتمنى اسمعه .. كالي اسراء جايها خطابة و ابوية وامي موافقين .. و طبعا اني بيومها اختنكت و معرفت شحجي .. و اصلا مجان اكو شي بخصوصي و خصوصها لا رسمي ولا حتى مو رسمي .. يعني جنت مخلي مشاعري تجاها بداخلي بس حتى احفظ شرفها للبنية لحين ما اكدر اتزوج و رأسا افوت .. و المصيبة هالشي مر بسرعه .. يعني ستوها دخلت كلية و بعدنا ستونا كلنا يا الله و اني مخلي فكرة اتقدملها براسي اشو رأسا انخطبت .. و انخطبت و تزوجت و راحت اسراء .. طبعا اني ماريد اوصف الموضوع شلون صار … و شلون اذاني لان عيب واني رجال ولازم اتحمل كل شي و هالشي مر عليه سنين و سنين بس اني من يومها و من ساعتها حسيت روحي بعد مراح اتزوج اصلا .. لان البنية جنت احبها من الطفولة بس هي امرها مو بيدها و يجوز هي جانت تعرف بحبي الها وهم تحبني بس خلص ابوها كال اي خلص يعني اي .. و اني ماريد احجي بيها اصلا لان راحت البنية وصارت زوجه لرجل ثاني ..
عالعموم .. ورى موضوع اسراء اني بالكلية هواي صارتلي فرص اسوي علاقة او ادخل بموضوع ارتباط .. بس اني جنت اتهرب من هالشي لان مالي واهس وجنت ادور مواصفات اسراء بالبنات الي مقابيلي .. و جنت من اسمع اسم اسراء بأي موضوع رأسا عقلي يرجعني ليورى و يوديني لصاحبة الاسم الاصلية .. بس راحت و خلص .. و تخرجت و توظفت و مهند تزوج و انتقل هو واهله لغير منطقة و (تناسيت) اسراء مو نسيتها بس تناسيتها .. و كبرت و كل الي من عمري تزوجو واني ممتزوج .. و بيوم من الايام من ضمن اختصاصي صار عندي شغل بمكان .. و هالمكان اكو شباب بي اشرحلهم طريقة شغلي و همه يسمعون و يسألوني .. واجاوبهم .. وحده من البنات امها جانت تجي تاخذها بالسيارة يوميا .. هي اصغر مني ب١٣ سنة .. امها شافتني مرة مرتين و حبتني مثل ابنها يعني .. و مرات ورى منخلص الجلسة بالقاعة الجبيرة (الي نشرحلهم بيها كل شي عن شغلنه) نطلع برى نوكف و الشباب هم يبقون يسألون و هم يستفسرون بيناتهم و ويانه الي احنا تقريبا سبعه جايين ننطيهم خلاصة شغلنه .. ام البنية مره جانت جاية من وقت و سلمت عليا و بنهاية الجلسة اني مجان عندي سيارة .. سألتني كالت استاذ فلان انته ماعندك سيارة ؟
كلتلها لا والله .. كالت خلي اوصلك اني تعال تعال اصعد .. و صعدت ليكدام و بنتها ورى كاعدة .. طبعا همه عائلة كلش راقية و متمكنين .. من وصلنه يم بيتنا كلتلها تفضلي اعرفج على والدتي .. هي مكالت لا و نزلت والله هي و بنتها .. امي طبعا قامتلهم بالواجب و اكيد اخذت رقمها الارضي و بدو يتصلون سوية .. الي افتهمته اني و الي امي هم افتهمته .. هالمرية تريدني لبنتها .. و جان واضح هالشي كلش .. و طبعا امي صارت وياها ميانه و صارو صديقات .. و اني انتهت سالفتي بالقاعة مال الشرح و بعد ما التقي بيهم .. بقت امي تحجيلي بيها للبنية لحد ما اقتنعت اتزوج .. و خطبتها للبنية و تزوجت .. نسيت شي اسمه اسراء و حبيتها للبنية كلش … و للاسف ظروف العراق الاقتصادية جانت تتخربط بين فترة و فترة مثل ميعرف الكل .. اني جنت ادور على مصدر رزق ثابت خصوصا اني متزوج .. الوظيفة شمهما تكون مراح تكون بالطموح القوي الي يوفر شي جبير للمستقبل بذاك الوكت .. و لكيت فرصة عن طريق معارفي اشتغل بيها خارج العراق .. و جنت اروح مرات و ارجع .. زوجتي اعوفها يم امها و اروح و ارجع .. لحد ما قررت استقر فترة بعمان و جان الشغل ثابت .. رحت لعمان و جان عندي بذاك الوقت بس طفل واحد .. استقريت وحدي بالبداية .. و بعدين جبت زوجتي و ابني … و هي معجبها الوضع بعمان و علمودها عفت شغلي بعمان و رجعت للعراق .. جنت اسمع كلامها هواي لان احبها .. و رجعت و بديت بشغل جديد بس هم مجان قوي .. و صار عندي طفل ثاني بهل الشغل .. وهي جان براسها حلم انو نسافر بس لاوربا … طبعا بهل الحجي سنين العمر تمشي ..
و كدرت ادبر شغل قوي بقطر .. و هي وافقت على سالفة السفر لقطر .. طلعنه اني وياها و الجهال و استقرينا بقطر .. وصار عندي بمكان الطفلين اربعة .. يعني صارو عندي بعد جهال ثنين .. و شغلي ماشي و الحمدلله .. والجهال بدو يكبرون .. و طبعا اني جنت مخلي زوجتي على راحتها تسوي الي تريده .. من باب الثقة .. هي جانت كلش زينة و تحبني و تحب الجهال .. بس من دخلت عالم الانترنت كامت شوية شوية تهمل البيت و تهمل الجهال .. جنت مرات ارجع للبيت من الشغل تعبان الكاها مطابخه شي و الجهال جوعانين .. و هي كل حجاية والثانية ندز اكل من برى .. و مكابله التابلت مالتها و التلفون .. و عدها كروبات مسوية عالفيس بوك و عالوتسب .. و من عده هالشي .. من ورى هالكروبات تعرفت على بنات من عمرها قريبين من عدنا .. وكامت تطلع و تطب وياهم .. و هملتني و هملت جهالها و هملت حتى البيت .. و بدت تصير مشاكل بيني و بينها .. يوم ورى يوم العركات تزيد .. و العركة الي جانت بدون صوت و نحلها بسرعة .. كامت تصير عركة جبيرة و جوارينه بالعمارة يسمعون الصوت .. و بدت تطلب انفصال .. اني علمود جهالي كلتلها ماشي ننفصل … بس تبقين هنا بالبيت علمودهم و ماريد يفقدوج مع العلم اكدر اربيهم وحدي والله .. كالت ماشي بس ابد متتدخل بيا و بتصرفاتي .. و اني من جانبي الجهال ميحسون بشي .. بس اطلع اطب ابقى عالانترنت مالك حق تتدخل بيا .. كلتلها ماشي .. و عشنا على مدار سنتين بنفس الشقة بس احنا منفصلين .. و هنا الاطفال كبرو شوية و بدو يفتهمون .. و هي ملتهية بلبسها و طلعتها و طبتها و مواقع الانترنت الي تديرها .. و بيوم من الايام رجعت للبيت لكيتها ماكو .. عايفه الجهال و مموجوده .. كلت عادي ترجع بعدين يجوز يم وحده من صديقاتها .. بس اليوم خلص و ما رجعت .. اتصلت بوحده من صديقاتها فلسطينية الاصل .. كلتلها ام عبدالله وين فلانه ؟؟
كالت راحت للعراق .. كلتلها شنو راحت للعراق ؟؟
و خابرت امها .. امها كالت انت صارلك سنتين مطلكها وعايشة وياك .. هسه تريد ترجع تستقر هنا .. كلتلها انتو صدك تحجون لو تتشاقون لو مخابيل ؟؟
زين بالجذب جان كالت قابل راح امنعها ؟؟
اصلا هي ورى الطلاق جنا متفقين كل شي تريد تسوي خلي تسوي بس المهم تبقى وي الجهال حتى لا يحسون بهل الشي .. كالت اي هي ضايجه خلي تبقالها كم شهر هنا و ترجع .. كلتلها لا اصلا ماريد ترجع .. ورحت ثاني يوم وقفت اوراقها لان هي مقيمة هنا على ضوء اقامتي .. و كلت للجهال كل شي .. كلتلهم اني وامكم منفصلين صار فترة و اني محجيت هالشي علمودكم بس هي عافتكم و راحت للعراق .. و اصلا مكالتلي .. و خلي يفيدها الانترنت و الكروبات مالتها .. و هي اول سنة ابد متصلت بيا .. و بقت مونسة نفسها هناك بالعراق بهل المواقع و هل الانترنت الي دمر بيوت هواي من الناس ومن ضمن البيوت بيتي .. و ورى السنة الاولى حست بفعلتها .. و حست هي سوت شي غلط .. و بدت تتواصل وياي و وي اقربائي و اهلي و تريد بس تشوف الاطفال .. طبعا الاطفال همه نفسهم ميريدون يشوفون امهم .. و يكولون عافتنه و راحت للعراق .. و ميقبلون يحجون وياها من تتصل مع العلم اني بيدي اشيل التلفون و اودي يمهم .. بس ميريدون هالشي .. و هسه الاطفال يمي و هي كل متتصل ميقبلون يحجون وياها .. و فوكاها تذب الصوج بيا لان اني جنت اريدها تهتم بالبيت و تعوف هالصخام الي اسمه انترنت .. وسبب انفصالي عنها هو هالمهجوم والله .. و اخير شي .. اني حاليا اطفالي عايشين احسن عيشه و احسن مدارس يدرسون بيها .. و عدهم مربية تساعدهم بالصغيرة و الجبيرة .. بس البيت كله خرب و خسرت زوجتي بسبب الانترنت .. و جنت اتوقع اني الوحيد الي انضريت من هالمهجوم بس للاسف عرفت كومة قصص شبيه لقصتي و اتعس هم … مرات اكول بيني و بين نفسي .. يجوز هالشي صار بيا لان ما اخذت حب عمري الاول .. لان مرات يكولون الي مياخذ حبه الاول يظل طول عمره معل عل .. بس مستحيل .. اني تزوجت هالبنية و حبيتها .. بس ليش هيج جانت النهاية .. طبعا هي هسه دتسوي المستحيل حتى نرجع .. بس خلي نكون واقعيين .. اني مجنت طالب شي مستحيل .. طلبت تتخلى عن الانترنت و تعتني بالاطفال و البيت الي هاملته .. طلبت تعوف الطلعه و الطبه و تبقى وي جهالها .. مطلبت تصير خدامة لا سامح الله .. طلبت بس تعوف المواقع الي لا تقدم ولا تاخر .. و تساعدني .. لان اني من الصبح اطلع على رزقي و رزقها و رزق هالجهال .. ماكدر اسوي اكثر من شغلة بنفس الوقت .. عالعموم .. اني اتمنى الخير للجميع .. ماعرف شحجي بعد .. بس اتمنى اكون مظالمها بلي سوته ..

المصدر : صفحة ابو بغداد