جنت معلمة مال فنية … دوامي رمزي بالمدرسة … كل المعلمات يحبوني و جنت اصغرهم .. كلهم قديمات بالمدرسة و بس اني جايتهم نقل … المدرسة مو قريبة على بيتنا .. يعني امشيلها فد ربع ساعة … بالطريق الي اروح بي للمدرسة اكو بيوت هواي .. مرة من المرات اني و راجعه من المدرسة .. شفت ولد جان صاعد على نخله ببيتهم .. النخله جان بيها تمر .. اني ما اعرف الية الصعود عالنخله و لا اعرف شلون صعد .. بس المشهد الي شفته مثل الافلام و المسلسلات من يوكع واحد من بناية او مكان عالي … وكع من النخلة .. وكع على الحايط (السياج الخارجي) و بعدين وكع بالكاع بس ما وكع بحديقتهم .. وكع برى عالشارع .. اني ردت اتخربط من الموقف و ركضت عليه و كمت اصيح مثل المخبلة الولد مات الولد مات … و ركضت ادكدك عالبواب مال البيوت القريبة .. طلعو الناس التمو و اهله هم طلعو و اخذو بالسيارة للمستشفى و اني الناس شربوني مي و شكر لان من الهبطة تخربط وضعي … و بقو يتشكرون مني .. و اكو رجال جبير بالعمر سألني على بيتنا كلتله جوى يم نهاية الكوسترات .. كال دقيقة و جاب بنته و طلع سيارته و ركبت بنته ليكدام واني ليورى و وصلني لبيتنا .. اخوية جان واكف برى .. من شافني بسيارة و رجال و بنية .. كبل ركض كالي شكو .. كلتله جوى احجيلك .. و حجيت لاهلي الموقف .. انقهرو عالولد … و رجعت ثاني يوم اداوم … و وراها بفترة .. فتت بنفس الشارع جان اشوف الولد طبعا ايده و رجله انكسرو .. خطية مطلعيله كرسي و كاعد بره .. هو ميعرفني .. و لا شايفني … لان من شفته و ركضت عليه جان فاقد الوعي على اثر الوكعه من فوك .. وصلت يمه و جيت عليه .. سلمت عليه .. هو عرفني رأسا لان اهله حاجيله .. كال انتي المعلمة مو .. كلتله اي .. كال اشكرج والله و خلف الله عليج .. كلتله لا عادي يمعود بس انته شصعدك فوك هيج .. كال والله صارت بعد .. غلطه و ماكو انسان ميغلط … طبعا هو من عمري .. جان يصيح يمه يمه بصوت عالي .. كلتله لا لا داروح .. كال بس دقيقه .. جان تجي امه بقت تسلم عليا و بوستني .. و بقت تسولف وياي و هو يسمع .. طبعا هو عرف اني وين اداوم لان واضحه السالفة .. و بقيت كل ما افوت اشوفه و اسلم عليه … و مرت الايام و وكف على حيله .. و شالو الجبس من ايده و رجله ..
و بيوم من الايام جنت طالعة من الدوام و شفته واكف بره بس بعيد عن المدرسة … جايب وياه شغلتين .. الاولى باكيتين مال حلقوم تصنيع بغداد … وجايب كارتونه ثالثه بيها بسكت و بذاك الوكت جانو الاغلبية يجيبون بسكتات ثنين و يخلون ببطنها حلقومه و ياكلوها … كال هاي للطلاب اريد اوزعهم .. كلتله ليش .. كال لان رجعت امشي على حيلي و اهلي هم ذبحو طلي و بما انو امي تندل بيتكم هي الي راح تودي حصتكم و نوزع الباقي هنا بالمنطقة .. كلتله بس الطلاب طلعو واني جنت متأخرة شوية .. كال لعد لباجر انتي وزعي و اذا تريدين عوفي بغرفة المعلمين .. اخذته منه و تشكرت منه .. و راح .. بس هالمرة جانت الي اول مرة احجي وياه بمكان بعيد عن بيتهم و اول مرة احد ينتظرني قريب من المدرسة … و كمت كل ما افوت مناك اشوفه واكف بس مبدل مو مثل قبل .. و حسيت هالولد وكفاته و انتظاره الي موقته توقيت .. لان يعرف وقت طلعتي و يعرف حفوت منا شوكت … و بيوم من الايام وكفني بشارعهم .. ورى مسلمت عليه طبعا .. كالي اريد احجي وياج ممكن … كلتله اي تفضل خوية … كال لا … ماريد خوية بالموضوع لان الموضوع الي راح احجي بي بعيد على هالكلمة … اني تخصرت و رفعت تك حاجت و كلتله شنو قصدك !!!!!
كال لاااا لا تفتهميني غلط انتي … ترى والله مو قصدي شي … بس اني من اول مرة جيتي بوجهي و اني جنت كاعد عالكرسي … اسف عالكلمة اسف اسف بس عجبتيني كلش .. ضحكت اني كلتله و ليش تتأسف .. كال مو اني ما اريد اكول اي كلمة محلوة بحقج .. كلتله زين و المطلوب شنو ترى اريد اروح للبيت .. كال اريد اخطبج .. كلتله تكدر تجي انته و اهلك لبيتنا لان هالشي مو هنا و لا بهل المكان ينحجي بي … كال اني بس سوال عندي .. واريد اعرفه وبس .. و طبعا امي سالت هالسوال امج بس بطريقة غير مباشرة و عرفت الجواب بس اني كلت اسألج لان مرات متكونين مخطوبة صح .. بس احتمال عندج احد .. كلتله لك انته متستحي اني مو من هالنوع .. كال احلى رزالة سمعتها بحياتي .. مدام معناها انتي ماكو احد بحياتج و انتي مو من هالنوع الف شكر خلص روحي واسف لان وكفتج … طبعا هزيت ايدي و كلتله والله يا الله وكملت طريقي .. بس شنو كمت اضحك … لان هو طريقة كلامه و خجله مني كلش حلو … و الناس ما عبرو اسبوعين من الموضوع … جان يجون يمنا للبيت … و خطبوني و وافقت … و ما طولنه شهرين من الخطوبة تزوجنه وانتقلت لبيتهم … و خلاني ابقى اداوم بالمدرسة لان اني احب الدوام كلش … طبعا بيوم عرسي … اول ما فتنا لغرفة النوم اني وياه … كالي عندي شي اريد مسوي و محضره بس ما انطيتجياه الا تفوتين هنا لبيتنا … كلتله شنو ؟؟؟ جان يطلع ظرف مال رسائل … و طلع من داخل الظرف سلسلتين … وحده ذهب و وحده فضه … و بكل وحده خرزة نفس الشكل تماما .. و بكل وحده بهل الخرز اكو شي ما ميزته عبالك خشبة … كلتله شنو هاي الي ببطن الخرز … كال هاي نواييه … ضحكت كلتله نواييه مال شنو … كال نواييه مال تمره … كلتله اي !
كال بيوم الي صعدت عالنخله .. صعدت من ورى تمره … تمره جانت بالحديقة واكعه من العثك الفوك مال النخله … اكلتها و شمرت النواييه هاي نفسها بالزاوية مال الحايط الي ورى النخلة .. و صعدت .. من وكعت و صار الي صار … ربطت كل الاحداث بالتمره … لان من ورى هالتمرة الي نوايتها مقسومة نصين بيني و بينج … من وراها تعرفت عليج … من وراها شفتيني اني و داوكع …. من وراها اني شفتج اول مرة ورى الحادث و حسيت اني مربوط بيج … من ورى هالتمره انتي اليوم يمي و صرتي مرتي .. طبعا بيوم الي شفتج واني برى كاعد عالكرسي … كلت لاخوية من ديفوتني جوى .. كلتله بله روح ورى النخله شوف اكو نواييه .. كالي والله بطران انته … كلتله والله راح تلكاها لان ورى النخله بالزوية مال الحايط ماكو زرع و بس تراب .. و مصار عالسالفة كم يوم .. و اصلا دنيا صيف حتى لان نكول مطرت الدنيا و غركت بالتراب ..موجوده والله روح دورها … اخوية كالي بابا اني مو قصدي هيج … بس هي نواييه اول و تالي يعني شنو قيمتها .. قابل راح تزرعها و راح تطلع نخله … كلتله لا اريدها لان ذكرى للي صار بيا … كالي اذا هيج ماشي و راح دور و لكاها و انطانيها و ضميتها و يوم ورى فكرت شسوي بيها شسوي بيها … ورى ما خطبتج رحت لصايغ و كلتله اريد تقسم هالنوايية نصين .. و تكل نص تخلي بخرزة .. تعجب على طلبي بس سواه … و هسه هاي نص الج الذهب .. وهاي الفضة نصي الي .. طبعا اني من ديحجي دمعت عيوني و تخيلت نفسي بفلم رومانسي قديم ابيض و اسود … وكلت معقولة اخذت هيج رجال رومانسي و كيييييفت كلش .. و لبسته النص مالته و لبسني النص مالتي .. و عشت وياه عالحلوة و المرة … و عزلنه عن بيت اهله لان اخوته هم تزوجو .. ورى ما عزلنه شوية الوضعية المادية تعبت … و بذاك الوكت جان عندي بس باسم عمره سنه و نص .. و شلون مجان مشيناها و ابوية جان يساعدنه و اهله يساعدوه .. بس الحلو برجلي ..
شكد يتاذى من العيشة برى و شكد تصيرله مشاكل بس ابد ميجيبها للبيت .. و جنت دائما اني احاول اهون عليه … و اضحكه .. و اشيل من همومة .. و جتي علينا ايام بحيث اني جنت اشتغل ورى الدوام بالبيت .. و هو جان رافض الفكرة بس قنعته .. لان الشغلة ما بيها طلعه و بالبيت .. الشغلة جانت اني و المعاونه .. نشتري بدلات مال اعراس و مناسبات و نأجر بيهن .. ولان رجل المعاونة كلش نحيس .. اني رتبت الشغلة يمي .. و بذاك الوكت جان عندي باسم و حمودي .. جهالي .. صغار .. و طبعا حجيت كبال نسوان المنطقة و من وحده لوحده .. والحمدلله .. كامو يجون يأجرون مني و يرجعوهم و طبعا اني اوديهم غسل و كوي لواحد بمنطقتنه .. و كمت اساعد رجلي بالمصرف .. هو جان موظف و بنفس الوقت يشتغل .. و مشت السنين و ورى ٢٠٠٣ وكف من الوظيفة و الشغل فترة و بعدين رجع .. و بذيج الفترة حتى اني مجنت اكدر اشتغل لان وين اكو اعراس .. و شوية شوية كامت تمشي الدنيا بس بسرعة مرت السنين .. تأذينه بس بالاخير فرجت .. الرواتب تغيرت و هو وظيفته كبر بيها و كام يسهل امور عن طريق مكانه و الوضع تغير جذريا .. من تغير الوضع .. كل شي تغير وياه .. بس السالفة صارت تدريجيا … يعني بالبداية تغير موضوع الاكل بالبيت .. كمنا يوميا نروح مطعم .. هو يجي ياخذنا و نروح .. و الجهال كبرو شوية .. كل واحد بيده تلفون و ايباد .. و عدهم بايسكلات .. عدهم بلي ستيشن و همه بس ولد ثنين طبعا .. عدهم غرف كل غرفة بذاك الحساب و هالشي كلش حلووو واني مرتاحة كلش .. اني اشتري الي اريده .. سفرات رحنا اذربيجان و تركيا و ارمينيا و اوكرانيا .. بيروت رحنا مرتين .. مصر رحنا .. متونسين .. وجهالي مرتاحين .. و بديت احس اكو شي بضرغام تغير .. راح زرع بتركيا شعر .. و سوى سنونه .. و عنده مكانات سوالها نحت .. اني هنا حسيت اكو شي غلط .. من جنت اواجهه واكله انته عاجبني مثل ما انته .. يكلي ترى كل الي داسوي علمودج و علمود شكلي بين الناس .. جنت اسكت .. بعدين كام يروح سفرات وحده بحجة السفرة بس رياجيل .. و كام ميجاوب مرات عالتلفون لو يقفله مرات .. و وصلت بي يكلي انتي تزنين هواي واني ممسوي شي وكلها اوهام براسج .. و بيوم من الايام اني بالبيت و هو اجه و حضني … حسيت بي متاذي بس ماعرف وين بالضبط .. كعد يم باسم و حمودي .. و كام يلعب وياهم .. و بليل من نمنا .. كالي اذا احجيلج شي تساميحيني .. كلتله اي و اني بصراحة جنت بس اريد ابوك لسانه .. كال قبل فترة جتي بنية و امها للدائرة .. عدهم شغلة جانت مستعصية .. كلتلهم اني احلها و انطيت للأم رقمي .. كلتله اي ؟؟
كال وراها بنفس اليوم الام كتبتلي و وراها بساعة البنية كتبتلي .. كالت اني اعرفك و معجبة بيك و طبعا هالحجي اني ماعرفها و جنت متوقع انتي دتتشاقين والقران … كلتلها اي مصدكج و جنت اضحك .. و بعدين اتصلت مباشر عالوتساب .. صوتها مختلف عنج و هم بقى عندي شك اخاف صديقتج و دتجربيني .. جان تكلي اني بنت المرية و من كالت بنت المرية بقيت احجي وياها وعرفت هي مو من طرفج .. كامت تسولف عالوضع وهي طالبة بكلية .. و حجي حجي حجي و طبعا كلتلها اني متزوج وعندي ولد ثنين باسم وحمودي .. كالت عادي و بقت تسولف .. و التقيت بيها اكثر من مرة .. و تقشمرت وياها بأسم الحب .. و شوية شوية كامت تدور زواج و مجان عدها اي مشكلة تصير زوجتي الثانية ..
كلتله اي !! كال بوقتها جنت كل ما اخابر عليها تتعطل يله ترد و اتعارك وياها وين جانت .. تكول تلفوني مو زين .. اخذتلها ايفون و طبعا هي متفتهم بالايفون ولا شي .. بيوم الي اشتريته معرفت تفتحه و سألتني شلون افتحه .. سويتلها حساب ايكلاود .. و حساب ايتونز مربوطات بأميلي .. و فتحته .. طبعا اني بذاك الوكت هم مو قوي بالايفون .. وعبالي حساب الايكلاود مثل حساب السامسونج من واحد يفتحه .. يعني مابي اي اهمية .. و اتفقنا نتزوج بس مو هسه .. لان جانت تريد مشتمل ملك .. و اني جنت ادورلها مشتمل .. امها فد يوم جتي و جايبه وياها صديقتها عدها معاملة .. و سمعتني انو هي محتاجه تلفون .. و جبتلها ايفون و ردت افتحه لان كلت هسه متعرف تفتحه .. كلت بيني و بين نفسي شكو مدوخ نفسي و اسويلها اميل .. خلي تفتحه مو فاتح اني تلفونين بحساب واحد .. دخلت الحساب مال ذاك الاميل و الباسورد .. و كام يسالني اساله مجنت مفتهم معناها بس الي افتهمته ان ينقلي كلشي لهذا .. والله العظيم و لا جنت اعرف بهل الخدمة و لا افتهم بس عبالك الله يريد يكشفها .. انقلت صور و ارقام .. و شفت صور ماريد اتذكرها اصلا .. و شفت سوالف ردت ازوع و كلت شكد جايف اني .. يعني عندي مرية و عندي بيت و جهال و رحت لوحده خبلتني و عيشتني بحالة ماعرف راسي من رجليا و بالاخير طلعت مصادقة ٣ بنفس الوكت .. و حجي يشيب الراس .. و رحت و واجهتها .. و غلطت عليها و طلع وجهها الحقيقي .. الغلطة رجعتلياها بعشره و امها طبكت وياها .. و طردوني .. اني غلطت .. غلطت بحقج و بحق جهالنه .. وهسه جايج اعترف .. تسامحيني .. كمت وكفت كلتله اطلع بره .. كال شبيج .. كلتله اطلع بره من الغرفة .. بجى عباله راح انقهر .. اخذ مخدته و جر بطانية من فوك الكنتور و طلع .. بجيت بجي .. بس بجي بخنكه لان ماريد ولدي يسمعون .. يعني بس اريد افتهم .. هي لو ممسوية وياه هيج و لاكفها جان تزوجها ؟؟؟
جان اتزوجها والله .. يعني جايني لان لاكفها تحجي وي شباب .. ولو ملاكفها هم جان تزوجها .. يعني اني شحجي .. عيب احجي عالوكفات الي وكفتها وياه وعيب اتذكر السنين لان مرته .. و هالشي بدمي .. اوكفله ولو طالب مني روحي انطيها .. طول عمرنا ننطي و ما ننتظر رد من الي نحبهم … و اني جنت هيج .. انطي و ممنتظرة يردلي شي .. وتاليها من الله وفقنا و وضعيته تغيرت و صار عنده فلوس راح يريد يتزوج ؟؟
و جايني يعتذر لان بس لكفها .. يعني لو ملاكفها لو ماعدها شي جان هسه متزوجها … و بكل بساطة جاي لان كسرته و داسته جاي المن ؟؟ للي تتحمل .. للعراقية الي مفروض تقبل كلشي و تسكت .. ليش !! لان تتحمل … ليش .. لان ام الوكفات … ليش لان تقبل تعيش وي رجلها على بسطية و مخدتين .. ليش .. لان الملحه حزام الظهر .. من كل عقله جاي و يريدني ما اخذ موقف .. ولحد هذا يومنا .. هو بمكان ينام واني بمكان .. و كلتله ابقى بالبيت ماشي بس اعتبر روحك ماعندك زوجه وكله علمود حمودي و باسم … و هسه باقية وياه كدام العالم متزوجين بس اني ما احبه .. ولا اريده و اهم شي عندي ولدي ثنينهم .. و حتى المصرف الي يعوفه ما اشيل منه فلس .. لان ممحتاجه عندي راتبي و كلش مكفيني .. و اهله يجون و اهلي يجون و كدامهم عادي احجي وياه بس يروحون يطلعون من باب البيت .. اروح لغرفتي واعوفه .. و كل ميريد يحجي وياي اكله شوفلك وحده بلكي تطلع زينه .. وتزوجها .. و انساني .. ولاتنسى انته لو ملاكفها جان هسه متزوجها ويجوز حامل منك .. بس يله هاي لكفتها غيرها يمكن تطلع زينه لو يمكن متلكفها .. بس اني انساني ولا تطلع صوتي علمود الجهال .. و يوميا من انام الزم الزنجيل الي بي نص النواييه و ابجي .. ابجي ابجي بس اضحك من اتذكر شخصيته بذاك الوقت و شلون جان يحبني قبل متدخل الفلوس لبيتنا .. يامه و يامه ناس صار عدهم فلوس متغيرو وي نسوانهم .. و يامه و يامه ناس صار عدهم مناصب وشافو اشكال والوان نسوان وهم متغيرو وي نسوانهم .. بس اكوووووو هم يامه و يامه اول مصار عدهم فلوس لو منصب يفكرون بالثانية و للأسف ابو النواييه واحد منهم .. مرات اكول لو من شايفته واكع عايفته يتصفى بدمى و طبه مرض .. بس مرات اكول جذب ما اسويها لان بذاك الوكت جنت ماعرفه و ما عبالي راح يصير قطعه مني بيوم من الايام و بالاخير يدوسني بس لان صار عنده ماده .. عمت عين الفلوس الي خلتك و خلت غيرك تدورون نسوان علينا ..

المصدر / صفحة ابو بغداد

…