المعلمة
عندي طالبة دائما امها تجيبها للمدرسة … توصلها و تروح و ترجع بنهاية الدوام تاخذها … البنية كلش هادئة و محبوبة و كلش كلش ذكية و شاطره … الجهال بالمدرسة يحبوها … غابت هالبنية اسبوع تقريبا و طبعا بهل الاسبوع اني انقلت من دوام لدوام ثاني .. لان الابتدائية الي اداوم بيها .. بيها دوامين صباحي و ظهري و طبعا يتغير على مدار الاسبوع .. اني انقلت للدوام الثاني … و اكو بنية معلمة اعرفها .. بمكاني استلمت الصف الي جنت ادرس بي … و بيوم من الايام جنت طالعه من نهاية دوامي .. جنت صباحي .. الظهري ستوى بدى شفت البنية الصغيرونه وياها ابوها ديوصلها .. اني جنت مستعجلة .. سلمت عليا البنية رادت توكفني .. بصراحة جنت مستعجلة موكفتلها خصوصا شفت ابوها وياها واحنا بالشارع يعني بس ردت اروح … وراها بكم يوم شفت صديقتي الي استلمت الشعبة بمكاني .. سألتها عالجهال و عالبنية هاي تحديدا .. كالت يمعودة شكد تسأل عليج خبلتني .. كلتلها اي جنت احبها لان شاطرة .. كالت جانت شاطرة هسه درجاتها كلها قليلة .. كلتلها ليش خطية .. كالت امها تطلكت و هسه درجاتها كلها بالنازل .. كلتلها خطية .. ثاني يوم جان دوامي ظهري بس رحت من وكت حتى اشوف البنية .. رحت دكيت باب الصف و سلمت عالجهال كيفو من شافوني و صحتها برى .. طبعا بعد ما اخذت الاذن من المعاونة و من المعلمة صديقتي .. من شافتني الجاهلة بجت .. اني انقهرت عليها كلتلها شبيج حبيبتي ليش هيج درجاتج مو جنتي شاطرة .. كالت بابا يريد يبطلني من المدرسة لان بالروحه و الرجعه مالتي كاعد يضوج .. هو خطية عنده شغل .. كلتلها وماما وينها مو جانت توديج و تجيبج ؟؟ كالت ماما ببيت جدو و بابا ميقبل يجيبها … كلتلها شبيهم حبيبتي .. كالت ماعرف تعاركو ثنينهم و اجوي خالي ثائر و خالي محمد اخذوها لماما و راحو .. كلتلها زين .. وانتظرت ابوها بنفس اليوم من يجي ياخذها حتى احجي وياه .. اجه ابوها بنهاية الدوام و طلعت داحجي وياه .. كلتله اخوية بنتك درجاتها بالنازل جان يكول طبها مرض هسه قابل راح تطلع دكتورة هو اني اريدها تبطل بس هي تبجي (هالحجي كدام بنته يحجي) كلتله ليش هيج تحجي اخوية ترى بنتك مثل بنتي … كال اكلج عيني بنتي واني حر بيها تريدين شي ؟؟ كلتله لا عيني ماريد شي و سكتت لان مبين الرجال ابو مشاكل وبصراحة خفت اني .. هالحجي طبعا اني داحجي بنهاية التسعينات .. و بقيت دائما اروح للبنية بس بعد ابد محاجيت الاب … والبنية بدت درجاتها تتحسن لان اني دائما وياها وياها بس للاسف ابوها بطلها .. و انكطعت اخبارها .. اني طبعا المدرسة الي اداوم بيها بنفس منطقتنا .. شكد جنت اتمنى اشوفها للبنية صدفه و جنت اباوع بوجوه الجهال دائما بالسوك لو بالشارع .. بس ابد ما شفتها .. حتى سألت صديقاتها بالمدرسة ميعرفون عليها شي بس دلوني بيتهم … جنت اتمنى اروح اشوفها بس هو اني خفت من اسلوب ابوها انوب اذا اروح الله يعلم شيسوي… و راحت سنين و جتي سنين و اني تزوجت و صار عندي جهال و بطلت من التدريس .. و فد يوم جنت بالسوك داتسوك اكو وحده بنية عمرها يعني ١٦ سنة تقريبا شايله جاهل .. و تفتر بالسوك .. البنية بقت تباوع عليا و طبعا كلش مبهدله و اسفه عالكلمة والله العظيم عبالي (محتاجة) و خصوصا من بقت تمشي ورايا .. تقربت عليا واني مديت ايدي بالجزدان ردت اسحبلها هالقاسمة الله .. جان تكلي انتي مو ست فلانة ؟؟ كلتلها اي !؟؟ جان تدمع عينها و حضنتني هي و الطفل الي بيدها .. كلتلها منو انتي جان تكول فلانة نفس الطفله خطية واصلا بعدها طفله .. كلتلها هذا اخوج ؟؟ كالت لا ابني .. كلتلها ولج ابنج شنو ليش انتي تزوجتي ؟؟ كالت اي ابوية زوجني لابن عمي قبل سنة .. كلتلها يعني شكد عمرج انتي اصلا حتى تتزوجين .. كالت اي والله صارت بعد ست شسوي .. كلتلها و رجلج شيشتغل .. كالت عامل بمحل حدادة .. كلتلها و ليش هيج حبيبتي مبهدلة .. كالت ست هواي حجي .. دليتها بيتي و كامت تجيني للبيت دائما .. بدت تحجيلي خطية شلون ابوها بطلها .. و شلون جان يكتلها من جانت متنظف البيت زين … و من اجتي قسمتها كيفت خطية حتى بس تخلص من ابوها و تكول اني شمدريني راح اطلع من مشكلة وحدة و افوت بكومة مشاكل .. قبل جنت اتعامل بس وي مشكلة وحده الي هي (ابويه) هسه كمت اتعامل وي كومة مشاكل يعني من باب اخوة رجلي و من باب خواته ومن باب امه و من باب ابوه ولازم كلهم اداري نفسيتهم … و المسكينه من جانت تجيني للبيت من تشوف المواعين عالمغسلة كبل تلزمهم تريد تغسلهم و من تشوفني داطبخ كبل تمد ايدها تريد تساعدني خطية المظلومة عبالها اني اريد اشغلها … جنت اكلها انتي ضيفه هنا و تتعاملين معاملة الضيفة وبس لاتمدين ايدج على شي .. تكلي مو ست اني اريد اخدمج ..اكلها اني الي اخدمج حبيبتي لان انتي ببيتي … و كمت دائما اخذلها ملابس حلوة جديدة انطيها مع العلم هي ناعمة و بنتي تقريبا تتلابس وياها بس ما اقبل البسها شي مستعمل حتى لاتحس بنقص حبيبيتي .. و اخذ هدوم لابنها .. كمت اساعدها هواي .. و بيوم من الايام جتني للبيت عينها زركه … كلتلها شبيج ؟؟ كالت رجلي كتلني لان جنت راجعه من السوك و اكو ولد لاحكني واصلا اني جنت امشي سريع حتى بس اوصل للبيت .. و رجلي فات صدفه .. الولد انهزم لان رجلي لحكه و من ما كدر يلزمه طلع قهره بيا اني .. كلتلها يعني هو يكتلج لان ولد لاحكج و حس بغيره و شرفه اذاه .. بس شرفه و غيرته متحركن من امه تدزج يوميا للسوك انتي و هالطفل حتى تتسوكين و هو عنده اخوته بالبيت عطاله بطاله .. كالت مو اخوته ميسمعون كلام لا امهم و لا ابوهم و لا حتى كلامه .. و بقت تبجي خطية .. و راحت و الروحه روحه .. اختفت اسبوعين تقريبا .. و بعدين جتي كالت منعني من الطلعه فترة و امه لحت عليه عالمسواك و خلاني اطلع … بيومها سالتها هاي اول مرة يكتلج … كالت هو عصبي بس يحبني و مو اول مرة هاي يكتلني مرات من يضوج من الشغل لو من يضوج من اخوته لو اهله يطلع حركته بيا … كلتلها وانتي شسوين .. كالت شسوي ابجي شوية وبعدين انسى .. بالبداية جان جسمي يأذيني من انضرب حتى لو ضربه خفيفه بس بمرور الوكت جسمي تعلم و كمت ما اهتم وكامت تضحك بس الدمعه نزلت من عينها … اني حضنتها و بجيت .. هي المظلومة جانت تسكت بيا و تكلي ست لاتبجين عفيه ترى اني نفسي قابلة بالوضع و ماريد شي من هالدنيا بس ابني يكون بخير .. و الي بجاني اكثر من كالت مرة ردت اكتل روحي و بلعت حبوب و سولي غسيل معدة بالمستشفى .. و بقيت اساعدها و صار عدها بمكان الطفل ٤ و اني جنت وي كل طفل اكلها ليش تكلي مو بيدي .. هو يريد جهال و اني اخاف لان مثلا اذا ردت اسوي اي يشي يمنع الحمل وهو عرف ماعرف شراح يسويلي .. و المصيبة هالجهال من واحد يشوفهم بالشارع يلعبون لا لابسين نعلان (مكرم القارئ) لا هدومهم بيها خير .. يعني ماعرف شحجي .. و ياريت لو هالحاله الوحيدة الي صارت و مراح تصير بعد .. هاي حاله من حالات دتصير و صارت و راح تصير .. يعني هسه اني اذب الصوج على منو ؟؟؟ على الاب الي طلك الام و سوى هيج ببنته ؟؟؟ لو عالزوج الي نفس نوعية الاب و مطلع هالطفله تتسوك و لابسه هدوم مبهدله وفوكاها غيرته تخلي يكتلها اذا يشوف شي غلط بحقها بس كلش عادي عنده تطلع بالمطر و بالبرد تروح تتسوك و اخوته كاعدين بالبيت مخلين رجل على رجل .. لو على منو ؟؟ و المشكلة من واحد يسمع هالقصة يكول ليش قابلة هالبنية … ليش متطلك .. اذا تطلك وين تولي ؟؟ وين تروح ؟؟ يعني هسه اذا انفصلت و جتي عاشت يمي شمعرفني ذولة اهل رجلها لو ابوها شيسوي يمكن يهجمون البيت هجم على راسي .. و يمكن ابوها نفسه يكتلها خلاص اذا فتحت حلكها وكالت اريد اطلك … اني بله الحمدلله قريبه منها و اكدر اساعدها بس غيرها منو يساعدها ؟؟؟ (المعلمة) انتهى اخوكم ابو بغداد سايق التكسي #ابوـبغداد
