المدلل

جنت اتوقع أمي تزيد بالحجي … و تريد تطلع نفسها مغلطانة … بس من كبرت عرفت حجي امي صدك … الاشياء الي جنت ما اتذكرها هو حجي أمي على تعامل ابوية الها …
تكول جان يضربني و من الضرب اركض يم امه لو ابوه اختل وراهم مثل الطفل حتى بس يعوفني و امه و ابوه ميسووله شي غير بس الكلام .. استهدي بالرحمن ابني .. عوفها يمعود صوتها كبال الجوارين … شكو شبيك كافي …
هاي الجمل الي جانو يكولوها بيبيتي و جدي لأبوية من جان يضرب أمي .. و طبعا هالحجي كله اني مشفته بعيوني و ما سمعته بأذني …
بس جان منقول من أمي …
من كبرت و سألتها ليش اطلكتي من ابوية حجتلي هالحجي … و خالي الوحيد جان ينقلي نفس الكلام و من سألته انته شفت هالشي لو صار مقابيلك يكلي لا … بس امك جتي للبيت هنا زعلانة ٣ مرات … اول مرة مشيناها و قناعناها ترجع … ثاني مرة جتي مضروبة و كال بالغلط ضربتها و عصبية و فقدت اعصابي وطلب يحجي وياها وحدهم و هي ورى ما كعدت وياه كالت خلص ارجع وياه … بس اخر مرة جتنا ايدها مفصوخه و عينها حمرة دم و داير مدايرها ازرك و رجليها طكع طكع زرك .. و انته جنت صغير مواعي على شي و بيدها شايلتك ..
و ورى هالحالة اطلكت …
وهم مثل ما كلت جنت اصدك و ما اصدك و كل هذا ليش ؟؟؟؟
لان أبوية جان كل فترة ياخذني يمهم ابقى يومين و مرات ٣ ايام … بكل مرة ياخذني اشوفه حنين عليا و يحير شيسوي حتى يرضيني … حتى حنيته عليا غير عن خواتي .. لان هو عنده من زوجته الثانية بنات ثنين … جنت دائما اكول ماكو احد بحنيته و ما اعرف ليش امي تطلكت منه …
حتى ورى كلام خالي هم جان عندي شك .. و سألت ابوية على سبب الانفصال كالي مشاكل حبيبي و اذا حجولك شي عني ترى مو صح … طبعا اني حاليا عمري ٣٧ سنة .. متزوج و عندي ٤ اطفال … و هالحجي كله قديم … بس قبل يومين قريت عن قانون الحضانه الجديد … و تذكرت كل هالتفاصيل …
و هسه نجي للحجي الصح … اني ابوية هو و اهله من النوع الي (يركب زوجته و امه ليورى بالبيك أب) و اني يكعدني بالصدر لان شنو اني ((رجال)) .. اكو مسائل مو مال شقى و ضحك و مو مال اكعد اجامل بيها على حساب اسمي و لقبي و اني منين جاي …
لان بهل الدفاع راح اضر كومة ناس … اني اعترف بهل الشي … ابوية من هالنوع و طبعا ابوية متوفي حاليا … من جنت اروح يمه مثل ما كلت جنت اشوف حنيته عليا مو طبيعية و بعكس تعاملة وي خواتي … و جنت اتوقع هالشي يسوي لان مشتاقلي … بس هو جان يسوي وياي لان اني رجال او الولد الوحيد عنده … و جنت ما اشوفه قاسي مثل متكول امي و يكول خالي لان من اروح يمه يلتهي بيا … و يطلعني وياه و يوديني لشغله و يصرف عليا و شريد ينطيني … و من ارجع ابات هاليومين او التلاثه ما اشوف منه اي تصرف مو زين … لحد وفاته يله عرفت هو هم جان يضرب زوجته الثانية الي تزوجها ورى طلاك امي …
و هالحجي عرفته من امي و كالت اسألها … اني ما سألت بيومها بس بحكم عندي خواتي يمها لازم اروح و التقي بيهم كل فترة …
و مرة بروحه من روحاتي افتهمت انو هو جان يضربها و حتى مرة كاتلها و كايللها انتي لو بيج خير جان جبتيلي ولد …

ابوية مجان يشرب … ابوية مجان يلعب قمار … ابوية مجان يدور علاقات غير شرعية بالحرام … و جان يصلي و يصوم و ملتزم … بس عقليته متحجرة و عنده المريه شي ثانوي .. بس الرجال بالنسبة لأبوية شلون الهة الاغريق الي نسمع عنهم او نقرا عنهم قصص و همه خرافات .. اله الحب و اله القوة و اله الجمال ….. هيج ابوية يشوف الرجال خصوصا اذا من صلبه ….
اني مدلل … ابوية مدللني … زوجة ابوية ما مدت ايدها عليا … مثل ما نسمع من بعض القصص … ابوية جان هادئ وياي … ابوية جابلي الي يحلم غيري يملكه … بس … بنفس الوقت … اكو اربع من البشر عدهم خلل نفسي بسبب ابوية … و اكو بيهم الي رفض يبقى بهل الخلل و طلب الانفصال و تطلك الي هي (أمي) و اكو ٣ بقو تحت رحمته ليش .. لان زوجة ابوية ماعدها حل غيره .. لان هي ابوها متوفي و عدها بس اخت وحده و امها عايشه … ام زوجة ابوية عايشة يم بنتها .. يعني في حال انفصلت وين تروح ؟؟؟ يم اختها وزوج اختها الي معيشين امها يمهم وفواكها جاره وياها بنات ثنين صغار ؟؟؟
علمود هالشي جانت قابله و خاضعه و ساكته .. و الحالتين الباقيات خواتي … خواتي ورى وفاة ابوية من جنت اروح يمهم زيارة اشوفهم لازكات يم امهم و ميحجون بس صافنات عليا … من اتشاقى وياهن ضحكتهن مجانت طبيعية … ضحكتهن صوتها عالي عبالك جانو محرومات من الضحك و هسه متعلماته جديد … و ميحجون هواي و مرات اتخيل روحي رايح امثل كبالهم مو رايح التقي بخواتي … يباعون عليا من اتحرك يمين و يسار و ميحجون هواي … و من يحجون بيناتهن يتشاورن … خواتي يتشاورن مو لان ميريدوني اعرف شنو اكول … يتشاورن لان يخافن من صوتهن … ابوية علمهن عالخوف … رباهن عالخوف … ماشي مودبات و حبابات و الغلط ميطلع منهن حلو .. بس مريضات عدهم خلل نفسي بالتعامل وي الاخرين … حتى زوجة ابوية … هم مو طبيعية .. جنت من اروح اتشاقى وياهم هواي و اضحكهم … و جنت اخذ امي وياي .. طبعا الورث كله صار النا .. لان ابوية جان عنده اخ واحد و بحادث سيارة توفى قبل ما انولد اني … و جدي و بيبيتي هم توفو .. اني صرت الوريث و طبعا خواتي هم زوجته و امي .. انتقلت للبيت هناك و اخذت امي … و عشنا سوى … صرنا بيت واحد … خواتي بمرور الوكت تغيرو … و زوجة ابوية هم …
زين .. اني ولد … و كلت اني مدلل جنت .. بس لو عايش وي ابوية و شايف الضرب الي يضربه لزوجته … لو الغلط الي يغلطه عليها … هم جان صار عندي خلل نفسي .. كل شي يتعالج بهل الدنيا الا الذكريات .. الا الوجع النفسي .. الا القهر … كل الامراض الها حل … بس القهر سرطان ماله حل يبقى وياك للموت ….
من تموت يروح … زين هذا ابوية الي مايشرب و ما يزني و يدور مكسرات هيج يتعامل وي المراة … لعد الي يشرب و يزني و يقامر و فوكاها هسه عدنا الشاذ … هذولة كلهم اذا اخذو الطفل للحضانه بعمر صغير شيطلع ؟؟؟
يطلع شايل امراض ابوه اذا جان مو زين … و من باب ثاني … ما انكر اكو حالات لنسوان متستاهل و لا ذرة شفقة … بس الطفل اذا ميربى ببيئة صالحه يطلع ماعرف شيطلع … بس الام .. مستحيل احد يربي مثل الام .. اتمنى من الله محد يصير بي الي صار وي أمي و صار وي خواتي و زوجة ابوية … اتمنى … لان الحجي مو مثل الشوف .. و الشوف من بعيد هم مو مثل ما تعيش الحالة نفسها و تكون انت الطرف (المظلوم) و طبعا اني ضد هالقانون بس مو ضد ان تكون اكو ناس تسحب الطفل من الام او الاب في حالة شافو الاب او الام مو كد المسوولية و مو زينين .. هذا الي اتمناه ..

المصدر / صفحة ابو بغداد