من جان يرجع من الشغل ينطي مصروف لأمي و امي يوميا تنطينه اني و اخوتي مصروفنه … عدنا طاسه فرفوري عالثلاجه يخلي بيها فلوس من شغله … يوميا يسوي هالشي و جان حتى الجمعة مرات يطلع يشتغل …. و هم يسوي هالشي … احنا جان عدنا مصروف بس لان جهال نطمع بالزيادة دائما … فد يوم ابو المحل الي بمنطقتنه جاب ملاعيب و ردنا نشتري نفاخات و طوبة … امي كالت جمعو من مصروفكم اليومي و روحو اشتروها … و لأن احنا جهال و ماعدنا شي اسمه صبر … اتفقنا ناخذ فلوس من الطاسة الي عالثلاجة … جبنا كرسي و خليناه بصف الثلاجة و صعدنه ردنه نسحب فلوس من الطاسة .. و طبعا احنا اربعه … ثنين يراقبون الدرج لان امنا جانت تشر هدوم بالسطح … و ثنين ياخذون الفلوس الي عالثلاجة … سمعنه باب السطح انسدت ولان باب السطح حديد صوتها جان كلش واضح … جوي ركض اخوتي الي يراقبون الدرج و اني جنت مخلي ايدي عالطاسة اريد اسحب فلوس … من الخوفة و الرهبة مال الحالة ردت اتزحلك من عالكرسي و بالغلط الطاسة انجرت بيدي و وكعت و اتطشرت الفلوس … طبعا كلنه انهزمنه برى يم باب الحوش … و بقينا واكفين هناك و ما اخذنه الفلوس .. امي كامت تصيح و طبعا لمت الفلوس و حطتهم بطاسه غير هاي و شالت الكرسي من كبال الثلاجة … صاحتنه بس كل شي ما سوت النا … و احنا اربعتنه نبجي نكلها لاتكولين لبابا … و اجه ابوية من الشغل طبعا هم كالعادة خلى فلوس بالطاسة الجديدة و ما انتبه عالموضوع … و طب سبح و راحت امي كالتله … صاحنه للصالة و طبعا احنا عدنا الصالة تخوف لان من نسوي وكاحه هناك العقاب يصير …
صاحنه و كال كعدو .. كعدنه .. كال قبل من جنت بكدكم … جنت كاعد وي بيت اهلي … جان ببيتنا بس ٣ نفرات … اني و عمكم فائز و امي … ابوية جان متوفي و امي الي معيشتنه … وضعنه جان تعبان و امي متقبل تاخذنه نعيش ببيت جدي لان تخاف علينه من خوالي … متقبل احد يضربنه و تريد تطلعنه رياجيل … جانت الليل كله تبجي و تفتح الشباك مال البيت و تحجي … احنا جنا نسمعها … تحاجي رب العالمين و تشتكي … تشتكي من تعبها … و تشتكي من الناس و من ابو البيت لان يريد ايجاره و هو حقه طبعا … و تشتكي من وجع ظهرها … جانت تخبز للناس و تروح للمركز الصحي تنظفه .. يعني فراشة تقريبا … بس مو بمدرسة بمركز صحي بالمنطقة … و اني و اخوية جنا نداوم مدرسة … الناس بالمنطقة مجانو يساعدونه لان كل واحد ملتهي بحياته … بس جان اكو رجال عنده محل مال ادوات منزلية … رجال جبير كلش … كل شهر يجي جايب مسواك و جايب فلوس ينطي لأمي .. و امي شوية شوية بوجود هالرجال … بطلت تبجي من تفتح الشباك بليل … كامت بس تدعي انو الله ينطيها الصحة و السلامة و مياخذ روحها قبل منصير كبار .. لان اذا يصير بيها شي راح نصير اني و عمكم فائز ملطشه بيد كرايبنه … و كبرنه شوية و كمنا نشتغل … و ندخل وارد للبيت اني و فائز .. و الرجال بقى يجيب مساعدة …
و شوية شوية كدرنا اني و فائز نسد مصاريف البيت و شغلنه صار زين … و كلناله للحجي اكو ناس غيرنا محتاجين هالمساعدة .. كال زين بس راح ابقى بين فترة و فترة امر اسأل عنكم اخاف محتاجين شي … كلناله عمي كافي الي سويته طول هالسنين … كال مو فلوسي هاي .. كلناله لعد فلوس منو ؟؟
كال فلوسكم و حقكم … كال هاي الفلوس دين … اني انطيتها الكم و انتو راح تسددوها بيوم من الايام لغير ناس … احنا بوقتها مفتهمنا الي كاله … و منعرف اصلا منو الي يطلبنه و من منو اصلا احنا متداينين … و الحمدلله مشت الامور و وضعنا صار زين و المسكين الحجي توفى .. طبعا رحنا للفاتحه مالته و انصدمنا هناك … الناس الي جايه تارسين الجادر و واكفين برى ينتظرون ناس تطلع حتى يفوتون … و جوى بالجادر الكل تحجي عن هالرجال شكد مساعد عالم و شكد العالم تحبه … رجعنا للبيت .. بس بقت براسنه هالامور كلها … من كبرنا و تزوجنه … امنا تمرضت … و حرنا بيها بالمستشفيات بس ما فاد العلاج و توفت … من توفت امي اني و فائز تخبلنه … و منعرف شنسوي … فقدنا الشخص الوحيد الجان مخلي لون لحياتنه … حياتنه صارت ابيض و اسود .. نشتغل و نرجع للبيت محد يلتكانه من الباب … بليل كمنا نكعد مقابيل الشباك الي امي جانت تدعي يمه و نبجي … بذاك الوكت جنا مأجرين محل اني و فائز نشتغل بي فيترية … شغلنه كلش زين و الحمدلله ما نغش بالشغل .. اكو غيرنه هواي جانو يغشون بس احنا السيارة الي نصلحها مستحيل يرجعلنه … بيوم من الايام جتي مرية للمحل جايبه ابنها وياها … تريد تشغله يمنا .. من شفناها اني و فائز عفنا الشغل و ثنينه تذكرنه أمي … كلنالها وين ساكنه … جان تكول بفلان مكان .. كلنالها عوفيه هنا و كمنا شوية شوية نعلمه عالصنعه و مرات نروح نوصله للبيت و هم ننطي هالقاسمة الله للمرية .. عدها خمس جهال و زوجها موجود بس المسكين يشتغل بالبناء و واكعه عليه ستارة مال حايط و كاسره ظهره … و لازم يبقى مده طويله بالفراش … احنا بطيلة هالفترة ساعدناهم لحد ما وكف على رجله و الرجال صار مو صديق … صار اخ النا … و عن طريقة تزوج فائز … فائز اخذ بنت عمه للرجال … تعرفون خاله حنان زوجة عمكم .. تصير بنت عمه لهل الرجال الي جان ظهره مكسور … و طبعا بمرور الوكت فائز كدر يفتح محل لوحدة و قرر ينتقل لغير منطقة علمود ام زوجته … خطية جانت مريضة و كل بناتها متزوجات محافظات .. ماعدها ولد خطية .. كعد بنفس منطقتها حتى زوجته تساعد امها … واني هنا بقيت وحدي فترة .. و بعدين تزوجت امكم .. امكم مثل متعرفون جوارينه و جدكم يعرفني واني جنت بعمركم … و بقينا نساعد … اني و عمكم ..
مخلين هالطاسة عالثلاجة .. و نخلي بيها هالقاسمة الله من شغلنه … و كل فترة ناخذ الفلوس ننطيها لأصحابها … هالفلوس ميصير نمد ايدنا عليها … هالفلوس مو فلوسنه .. فلوس ناس محتاجتها … تقبلون مرية جبيرة تبجي الليل كله ؟؟؟ تقبلون جهال بعمركم ماعدهم حذاء (مكرم القارئ) لو ماعدهم قمصله لو ماعدهم بجامة ؟؟؟ تقبلون الجهال ينامون بدون عشى … طبعا بوقتها ابونه من جان يحجي احنا اربعتنه نبجي … نتخيل الجهال شلون ينامون بدون اكل و شلون امهم تبجي و نتخيل امنا يصير بيها هيج و ركضنه حضناها لأمي و امي كامت تضحك و تبوس بينا .. تكول حبايبي مراح يصير هيج بس بابا يكول تقبلون … احنا نبجي و نكول لا بابا منقبل … ابوية اجه بوس روسنه و كال عفيه … و كال من تكبرون اذا كدرتو هم خلو طاسه بالبيت … و كبرنه و الحمدلله كل واحد من عدنا عنده طاسه … و هم اذا تزوجنه و صار عدنا جهال هم راح نفهمهم قصة هالطاسة … و نعلمهم اذا كبرو هم يعلمون جهالهم على هالطاسه …

انتهى

المصدر /صفحة ابوـبغداد