الشقة الفوك
الناس الي جانت تفوت للمحل اشكال و الوان … ناس تجي تسأل و ناس تجي تريد تشتري .. و ناس تدور عالمختار … اني محل ابوية جان غذائية .. و لأن موقعة بصف مدرستين وحدة ابتدائية و الثانية اعدادية مال بنات … قررت اغير بسالفة الغراض … كمت اروح للمتنبي اجيب شغلات مال قرطاسية .. بوقتها جانت اغلب الدفاتر عليها صور الحسناء و الوحش … يعني صورة مسلسل اجنبي جان كلش مشهور بذاك التاريخ … يحجي عن واحد عنده خلل جيني .. ينولد على شكل غريب .. شكله مثل الاسد بس هو انسان و انسان لدرجة جبيرة … تقريبا قصته اقتبسو منها مسلسلات هواي و افلام هواي و اخرها الفلم الي يحجي عن الساحرة الي سحرت واحد سوته مثل الوحش و اذا متحبه بنية حب حقيقي مراح يتغير … المهم هاي السالفة بذاك الوكت جانت مسلسل اسمها الحسناء و الوحش و صورهم جانو يخلوها عالجلاد مال دفاتر حتى يجيبون زبائن و مشتريه … جنت اروح اتسوك هالسوالف و اعرضها بالمحل .. و طبعا ابوية بذاك الوكت سلمني المحل كله لان تعب و كبر … جان شغل المحل زين .. و هالسالفة الي اني طلعتها جابتلي رزق حلو فوك رزق المواد الغذائية .. و طبعا هالشي سويته لان ماكو مكتبة بشارعنا … ولو اكو مكتبة ما اسوي حتى لا يعتبر محاربة بالرزق … و طبعا بوقت الي ماعندي شغل اكعد اقرا .. بس ما اقرا لغرض الدراسة .. لان جنت متخرج بس ممتوظف .. بس جنت احب اقرا قصص عن الحب و قصص لكاتب معروف اسمه نجيب محفوظ … جنت اجيب قصصه من المتنبي … و جنت دائما اعيش بالاحداث و اتخيل راح احب بيوم من الايام حب بالضبط مثل حب ابطال القصص الي يكتبها .. و جنت منتظر هالحب يجيني صدفه .. و ما اجاني هالحب .. و لان اني الجبير بتعداد البيت .. أبوية جان دائما يكلي تزوج حتى اشوف خلفتك … بس متزوجت و للأسف ابوية مشاف خلفتي و توفى .. و بيوم من الايام اكو فوك محلي شقق .. هالشقق جانت يأجروها و مرات ينطوها سرقفلية .. فد يوم جوي عائلة مكونة من أم و اب و بنات ثنين وحده ١٢ سنة و وحدة ٨ سنوات تقريبا و كعدو بالشقة الفوك ..
جان الاب مو زين .. دائما يكتل زوجته … و ما اعرف بصراحة ليش .. و جان كل ميكتل مرته البنات ثنينهم ينهزمون عالدرج .. و هالشي عرفته صدفه ..
لان البوري مال مبردة جان بداخل العمارة بصف باب الدخول للعمارة و طبعا عندي نسخه من المفتاح و اصلا ابو العمارة صديق ابوية كلش .. و يحبني كلش و منطيني حتى مفاتيح باقي الشقق الفارغة حتى اخاف يجي الدلال جايب ناس تريد تأجر اني اصعد وياهم .. يعني مأمني على هالسالفة … اني مره دافتح البوري عالمبردة و شفتهم ديبجون عالدرج كاعدات .. رجعت للمحل مختنك و طلعت موطات و نساتل خليتهم بجيس و رجعت انطيتها الهم … حاول انسيهم .. الصغيره اخذت الجيس مني بس الجبيرة تستحي .. و طبعا بهل الحجي صوت الام عالي دتصيح و هو يكفر و يغلط عليها .. محاولت ابقى حتى لا اسمع شنو نوع المشكلة و اني اصلا ماريد اعرف .. رجعت للمحل بس كلبي مكسور على البنات و حتى على امهم .. و طبعا ابو العمارة مثل مكلت مأمني على موضوع العمارة .. و المفروض اتصل بي اكله هالحاله دتتكرر .. بس خفت اسوي هالشي و يجي يطردهم و انوب الاب يطلع حركته بالام و البنات .. سكتت .. مرة مرتين تلاثة .. كامت تتكرر الحالة و اجاني رجال مأجر شقة بس مسويها مخزن يعني مو سكن عائلي .. كالي اكلك ليش متكله لابو نصير على سالفة هذا الخبل … كلتله يمعود هسه بس يسمع يطردهم و خطية مبين وضعهم تعبان … كال طبه مرض .. كلتله هو طبه مرض بس زوجته و بناته شلون … كال يمعود ذاك اليوم جنت داسوي جرد للغراض و جان يضربها .. سمعت صوت الباب صارت بي طبه قوية .. الكلب (مكرم القارئ) ضرب زوجته عالباب قوي و الله لو سامع الطبة جان انته صعدت كسرته و المصيبة اني ردت اتدخل بس اخاف يكلي انته شعليك .. و متدخلت .. كلتله زين باع .. شنو رأيك اني وياك من تتكرر الحالة نصعدله نخوفة .. كال شلون ؟؟ كلتله يعني نكله اذا صارت هالسالفة بعد نكول لابو العمارة .. كال ماشي بس اني ما اجي هواي هنا بس من اخذ غراض او اجيب غراض ..
كلتله ماشي .. و بيوم من الايام سمعت صياح و مجان موجود هالرجال .. كلت خلي اصعد وحدي و شيصير خلي يصير .. صعدت و شفت البنات عالدرج و دكيت الباب … فتح الباب و كلتله خوية شنو فلمك انته يوميا عركة متكول اكو ناس بالعمارة متكول صوتكم يطلع برى ترى معايش وحدك انته … كال و انته منو اصلا و غلط عليا … و راد يضربني و قبل ميضربني اني ضربته .. انوب البنات انهزمو للشارع و اني فقدت اعصابي بعد و اصلا اني مو قليل شر بس اني اريد اعيش بسلام بس شسوي بعد جتي المشكلة للحلك .. و مضارب مضارب و جوي اهل المحلات و الي عرفته بعدين البنات صاحوهم .. فكونه و انوب واحد رايح موصل الخبر لاخوتي الي اصغر مني و عندي اخوه ميخافون من الدنيا كلها بس من يخافون .. جوي و شايلين تواثي و لزمت التواثي شبعتهم ضربو و انهزمو مني .. و عزلت المحل و رجعت حصرتهم بالبيت كلتلهم يعني اني تعاركت ماشي .. انتو جايبين تواثي و تريدون تضربوه على اي اساس .. شايفيني ما اعرف اتعارك .. همه ساكتين ميحجون .. و طبعا كل الي سويته اني لان مقهور عالبنات و على امهم .. و اعرف اخوتي ميستحون كلش و ميخافون .. كالو يعني هاي فوكاها … كلتلهم اي فوكاها هالتواثي و هالسجاجين اذا ثاني مره اشوفهم بالبيت لو اشوفهم بيدكم اني اعرف شسوي .. و كامو بوسوني و اعتذرو و كالو والله من سمعنا معرفنا شنسوي .. و انسدت السالفة و طبعا اهل المحلات قررو يكولون لابو العمارة و اني رحت اتوسل بيهم ..
و كلتلهم لخطار جهاله .. و للأسف واحد من الجوارين رايح مخابر ابو نصير و كايله .. و اجه ابو نصير و سألني و توسلت بي يعوفهم .. بس ابو نصير رجال الناس تحلف براسه هلكد مو طيب .. كال هذا اذا بقى بالعمارة تصير سمعة و الانسان شعنده غير سمعته .. ماشي اهله خطية بس هو راح يبقى يكرر السالفة .. و طرده و راح .. و بيوم النقله البنات جوي رادو يسلمون عليا بس خافو من ابوهم ..
و راحو … اني بقيت بشغلي و سنة تجر سنة و بعدين الشغل تعب بالمحل و كلبته حلاقة .. كلبته حلاقة لان اخوية الوسطاني جان يشتغل حلاق و هو قنعني و مو بس هيج علمني اني هم صرت حلاق .. و صرت احسن منه على كولته لان حبيت الصنعة كلش … و الشغل جان زين و بنفس الوقت اخوية الصغير جان يشتغل يم دلال .. و اكو محل من المحلات الي بصف الحلاق فرغ .. اخذناه و اخوية لزمه .. و طبعا الوسطاني تزوج و الصغير هم جنت اريد ازوجه … و بيوم من الايام جان قبل العيد بيومين .. الشغل علينا هواي .. و شباب كاعدين و شباب ينتظرون برى .. و اكو واحد تعارك بالحجي وي اخوية .. اني تعاركت وياه وهو ابن المنطقة اصلا … و صار شد بالحجي و غلط و اخوتي رادو يسوون مشكلة بس سكتتهم … و راح … بالعيد اني ما طلعت بقيت بالحلاقة .. لان هم اشتغل و اصلا اني مو من النوع الي اطلع اساسا … اجه هذا الي تعاركنا وياه و جان سكران … كام يشمر بالحجي و اني متحملت و طلعلته .. الناس التمت و عيد اصلا … و دنيا ليل يعني نكول بالتسعة بليل تقريبا .. الولد جر سجينه و راد يضربني و لان سكران خفت لا يضرب صباح الي جان ديجر بي .. ركضت اريد اجر السجينة من ايده و جان يضربني بيدي اليمنه .. السجينة جانت حاده لدرجة فاتت جوى .. يابه شاخت روحي و لو ممطلعها هواي احسن … من جريتها من ايدي عبالك بركان من ينفجر بس ما انفجر نار .. دم كام يطفر لان جنت مشدود و معصب … و من شفت الدم هيج طفر تخربطت من الفزة .. هو انهزم و ودوني بالسيارة للمستشفى القريب من عدنا … خيطوها بس عندي اعصاب انضربت .. بحيث اصابيعي كامت متشتغل مثل قبل .. و طبعا الولد انهزم محافظات و بلغنا الشرطة عليه .. بس منلزم و بعدين بمرور الوكت انحلت و اني تنازلت عن الدعوى لخاطر امه والله … بس ايدي اليمين مو مثل قبل .. هي تشتغل بس مال الزم مكص و ازين احد مستحيل … عفت الحلاقة و كعدت بالدلالية .. و صرت دلال وي اخوية .. و طبعا مجان صعب عليا هالشي … و فد يوم من الايام اني و بالدلالية اجاني تلفون .. بنية .. صوتها عبالك بي حنيه ..
سألتني على الايجارات و كالت فتت صدفه و جنت جايه لبيت خالي و اخذت الرقم … و جانت تدور على مشتمل لان عائلتها صغيرة .. و حجيتلها العروض الي بالسجل مال المكتب .. و كلتلها تعالي شوفيهم .. كالت زين اجي .. و ثاني يوم هم اتصلت و هم سألت عالعروض و كمت اشرحلها .. بس اني مو غشيم .. حسيت هالبنية تريد تسولف اكثر من موضوع الايجار الي دتدوره …
و كمت اخذ و انطي وياها بالحجي .. و كامت تسألني على هواي امور و وصلت بيها تسألني ليش تأخرت بالزواج .. كلتلها اني اهم شي عندي هسه ازوج اخوية الصغير و اخلص منه .. و بصراحة اني مو من مويدين فكرة زواج بدون حب .. صح احنا بمجتمع شرقي و هالشي مموجود بس اني من كثر القصص الي قريتهم صار عندي هالشي … و طبعا صدمتني بطلب ابد مجنت متوقعه … كالتلي اذا اكلك اني مقارية قصة قبل و لا احد حاجيلي قصة تصدك .. كلتلها اصدك .. كالت شنو رأيك على وقت فراغك تحجيلي القصص الي انته قاريهم .. كلتلها صدك تحجين .. كالت اي والله .. كلتلها ماشي بس من يجي احد اسد التلفون .. كالت انتو عدكم تلفون بالبيت غير تلفون المكتب ؟
كلتلها اي طبعا … زين ولو هو طلب ثكيل مني .. عادي بليل تحجيلي .. كلتلها تدللين ..و انطيتها رقم الارضي مال البيت و كامت يوميا بليل تتصل و طبعا امي و اخوتي يا ساتر يارب من شافوني اكعد بالصالة و اطول بالحجي .. خبلوني حسسوني اني مراهق .. كل شوية واحد منهم يفوت و يأشر براسه يعني متفاجئين و على اساس همه فاتو بالغلط .. و واحد بيهم من تطلع اغنية عالحب يعلي التلفزيون و يوكف يم باب الصالة يفتحها و و يسوي نفسه مندمج و يأشرلي هههههه اني امد ايدي عالنعال (مكرم القارئ) هو رأسا ينهزم و يسد الباب .. طبعا اني بالمناسبة اتعامل وي اخوتي بميانة كلش لو يصير اعمارهم مليون سنة ابقى هيج احسهم صغار … و همه ابد ميزعلون مني و كلش يحبون تصرفاتي وياهم …و كمت احجيلها كل القصص .. الي قاريهم .. حجيتلها بين القصرين و حجيتلها خان الخليلي و الكرنك …
و حجيتلها كومة قصص … و يوم ورى يوم كمت احب الموضوع لدرجة صار يومي عبارة عن وجودها و صار عندي مثل الواجب المدرسي من جنت صغير … واجبي احجي وياها بشكل يومي و احجيلها قصة .. و شوية شوية كامت المشاعر تاخذ مكان ثاني و كلتلها احبج .. كالت اني هم احبك … و طبعا هالحجي بمرور الايام كالت راح نبقى ببيتنا و جنت اريد بس اشوفها .. طبعا هي موظفة بدائرة خدمية ..
و قررنا بيوم من الايام نلتقي .. اللقاء جان بمطعم قريب من دائرتها .. و رحت .. رحت واني كلي افكار .. اخاف ميعجبها شكلي .. اخاف هي متعجبني ..اخاف الصوت مو مثل الصورة … بس عن نفسي لو شتطلع خلي تطلع اني حبيتها … واريد اكمل عمري وياها .. و افكار افكار افكار بالطريق كله .. وخوف هم .. اول مرة امر بهيج موقف … و رحت و اني اندل دائرتها بس ما اعرف شكلها … طبعا اني عندي سيارة و كلتلها مواصفات السيارة و كلتلها شكلي شلونه .. بس خايف .. طبعا رحت قبل نهاية دوامها بساعة … بحيث شكو موظفة تطلع اكول هيه هيه .. بس تطلع مو هيه … بعدين طلعت حمامه من الدائرة .. الحمامه جانت تباوع عالطرف الثاني من الشارع … لان كالتلي لاتوكف كبال الدائرة اوكف بعيد شوية علمود حجي الناس … حسيت هي .. جان تجي والله جتي .. جتي هيه هاي … جان تجي و تصعد .. كلبي من الموقف حسيته راد يطلع من مكانه و يسلم عليها … صوتها نفسه … جان تكول السلام عليكم .. معرفت اجاوبها و نسيت احنا لازم نروح لمطعم .. جان تكول شبيك .. كلتلها شبيه مصدوم هههههه … كالت زين نروح .. كلتلها اي اسف و شغلت السيارة … و رحنا طبعا الطريق قريب بس بهل الطريق الي ماعبر خمس او عشر دقايق يمكن خمسين مرة درت وجهي باوعت عليها … بس بدون متدري .. و نزلنه للمطعم .. كعدنا بس شنو اني بس اريد احجي .. جان ننزل اكل وطبعا هي ما اكلت هواي .. واني هم ما اكلت بس اريد احجي .. جان تكول عندي شغله صغيرة اريد اكلك عليها .. جان تكول اني مو اسمي وسن … كلتلها هاااااا بدت ..
كالت زين اسمعني للنهاية .. كلتلها زين .. كالت اول شي اني اعرفك قبل ما اتصل عالمكتب .. و اعرف حتى بموضوع ايدك .. كلتلها هاي شنو !!!!!!!!!
كالت اني بيت خالتي بنفس المنطقة و اصلا ابن خالتي يجي يمك يزين .. و اني صار سنين اعرفك مو من جديد … كلتلها شلون بله ؟؟ كالت تذكر العائلة الي جانو فوك محلكم كاعدين .. و طردهم ابو الملك .. اني طبعا اتذكر هالشي كلتلها اي ؟؟؟؟؟ كالت تذكر البنات الي جنت تشوفهم عالدرج كلتلها لاتكوليها مريم و صفاء .. كالت بالضبط اني مريم الجبيرة .. من كالت هيج اني دمعت .. كلتلها جذب والله …
كالت والله .. كالت تدري اني ابد منسيتك … عالرغم اني جنت صغيرة بس من جنت تباوع علينا و احنا عالدرج جنت احسك بيك حنيه الدنيا كلها الحنيه الي ما شفتها بابوية والله … و جنت دائما اسأل بنت خالتي من بعيد لبعيد عنك .. و هي جانت تسمع كل شي من اخوها لان اخوها يسولف بالبيت شيصير بالمنطقة حاله حال كل الشباب … و جنت كلش خايفة و متردده اتصل و طبعا اني شفتك اكثر من مرة من اجي لبيت خالتي بس انته مشفتني لان دائما ملتهي بشغلك .. و اخذت رقمك و قويت كلبي و خابرت بحجة اني اريد مشتمل بس احنا الحمدلله وضعنا تعدل وعدنا حاليا بيت ملك .. كلتلها وابوج ؟ كالت الله يرحمه اذا جان زين او مو زين الله يرحمه … كالت اني بيت خالتي جانو ميحجون ويانه من وراه … وهو اصلا ابن خير بس مشكلته جان يشرب .. و ابوه الي هو جدي طرده من البيت بذيج الفترة … و طبعا صار عنده تشمع من ورى الشرب و توفى ..
و ورى وفاة جدي وزعو الورث واحنا اخذنا حصتنه و رجل خالتي ساعدنا بشراء البيت و طبعا احنا البنات درسنا و تخرجنا … و توظفت اني .. و الحمدلله عايشين .. بس جنت ضامه هالشي و ما كلته لحد ما التقيت بيك .. كلتلها هاي قصة .. كالت اي مثل القصص الي تقراهم و حجيتهم اليا مو ؟؟ كلتلها احلى لان هالمرة اني عشت التفاصيل … كالت حظك و قدرك .. كلتلها بس اذا احجي لأحد ميصدك .. كالت يكفي انته مصدك واني مصدكه .. و عشت احلى حب وياها الي ما عبر السنة و ٤ اشهر بين اول اتصال و بين اللقائات كلها .. و خطبتها و تزوجنه و لان هي تحولت ببيتنا .. امها خطية عرضت البيت للبيع و اشترت بمنطقتنا وطبعا لان اني دلال جبتلها احلى بيت و بعد عن بيتنا شارعين .. طبعا من حجيت لأخوتي ما صدكو .. كالو سبحان الله بقيت براسها و تاليها صارت من نصيبك .. كلتلهم قصة .. كالو والله قصة …
……………..
و طبعا ماكو شي حلو يبقى على حاله .. و ورى كم سنة من زواجنه مصار شي ترى هسه اني ابو بغداد داحجي مو عبالكم راح يصير شي لان متعلمين كل النهايات حزينة .. بالعكس عاشو مرتاحين و قصتهم ياهو الي يسمعها يعرف انو الي الك لو شيصير يبقى الك و الحب الحقيقي ميباوع عالعمر .. يباوع عالروح الي بداخل الجسد الي عمره جبير …
و صار عدهم اطفال و ادري بكل الي يقرون القصص يقروها و ايدهم على كلبهم لا يصير شي .. بس هالقصة مصار شي و انتهت على خير .. الحب الحقيقي دائما (يكمل على خير) ليش ؟؟ لان حقيقي ..
و اتمنى للجميع الصحة و السلامة و الخير و الموفقية …
