الشايب

بيتنا السطح مالته سياجه ناصي … يعني اذا اوكف يم السياج راسي يبين من السياج .. جنت من اصعد اشر الهدوم احاول تكون وكفتي بالنص يعني بنص السطح حتى ما ابين من السياج … و مرة لو مرتين حسيت ابن جوارينه يحاول يباوع عليا .. بيتهم مقابيلنه .. هو جانت غرفته فوك و دائما يدرس حتى اخوتي الي من عمره جانو مرات بالبيت من يحجون حالهم حال اي شباب يجيبون طاريه و يكولون عليه هذا ماعنده شي بهل الدنيا غير بس القرايه .. هو شكله حلو و ماعرف ليش اني هم جان عندي فضول اعرف عنه اي شي حتى لو هالشي ضده .. مثل حجاية اخوتي عليه انو هو ميعرف شي بهل الدنيا غير بس القراية .. ماعرف ليش جانت عاجبتني شخصيته .. هو ميختلط بولد المنطقة بس اخوته يختلطون و عدهم هواي اصدقاء بس هو ابد .. جانت تعبر سنة ورى سنة و اني اسمع مقتطفات عنه .. يعني عرفت هو دخل كليه … و جنت مرات من اروح للمدرسة اشوفه صدفه .. جان يسلم بعيونه عليا و يبتسم .. اني جنت اردله نفس السلام هم بعيوني و بأتسامه خفيفه … و مرت سنين بسرعة و ثنينا على نفس الحطه .. هو يشوفني يبتسم و اني اشوفه ابتسم .. بالاعدادية جان اكو ولد دائما يلحكني .. هالولد مو من نفس منطقتنا بس جان جريء كلش .. يعني يمشي ورايا و ميخاف و يسمعني حجي .. الولد شكله محلو و حتى اسلوبه مجان مثقف .. و اكو فرق جبير بين غزل بي كلمات مأخوذة من اشعار لو اغاني .. و بين واحد يكول كلمات ما بيها ربط .. جنت اضحك من اسمع كلامه و هو من يشوفني اضحك يلزك اكثر .. بس والله العظيم اني جنت اضحك مو لان عاجبني هالولد جنت اضحك لان حجيه و طريقة كلامه تضحك .. مرات جان يجي بسيارة و مرات مشي .. و نجحت و جبت معدل زين و دخلت كلية .. الي صدمني انو هالولد لحكني حتى للكلية و طبعا مجان يكدر يجي يحاجيني بس لمحته مرتين .. اني اخوتي جانو يوصلوني للكلية و بأمر من ابويه …احنا عائلتنه كلش محافظة و معروفة بالمنطقة … ابوية اذا جان يكول لاخوتي ذبو نفسكم بالنار و الله العظيم و بدون مبالغة يذبون نفسهم بدون أي تفكير .. و من كالهم اختكم تودوها و تجيبوها ما فكو حلكهم و كامو يودوني و يجيبوني بدون اي تذمر …مره اخوية الجبير يوديني و مره اخوية الصغير يرجعني و مره ابوية يعني كامو يتناوبون على سالفة روحتي و رجعتي من الكلية .. و مثل مكلت هالولد بقى يلحكني و الصدمة الجديدة الي اكبر صدمة بحياتي صارت و عرفت هالولد ميخاف من شي .. انو هالولد راد يشوفني نفسه انو هو ميخاف .. جاب سيارته و عطلها مقابيل بيتنا بوقت رجعتي من الكلية .. و جان نايم جوى السيارة بحجة ديشوف شبيها … اخوية جان من يوصل للبيت يبقى بالسيارة و اني انزل افتح باب الكراج حتى اخوية يفوت السيارة للكراج .. هذا الولد جان كبال بابنا موكف السيارة بحجة عطلانة .. اخوية شافه سيارته عطلانة و طبعا ميعرفه اخوية لو يعرفه جان كتله والله .. كالي فوتي للبيت انتي لان هذا خطية خلي احاول اساعده .. نزل اخويه يساعده و اني شفته و خفت اكول لاخوية هالولد يلحكني وين ماروح .. نزل ساعده عود و شغل سيارته و راح … و بعدها عرفت انو هالولد سوى هالشي حتى يصادق اخوية .. و صادقه و كام بين فترة و فترة يمر على اخويه و ما فات على صداقته وي اخوية اشهر جان اتفاجى انو هو طلب ايدي و طبعا هو جان مرتب هالشي حتى اخاف ينسأل منين عرفت بنتنا يكول ابنكم صديقي و شفتها صدفه يم الباب لو بالكراج لو اي شي المهم عنده شي يكوله .. و طبعا اني مثل مكلت عائلتي محافظة وكل الحل و الربط بيد ابوية .. ابوية سأل عن الولد طلعو اهله زينين و هالشي امانة لازم اكولها .. و طبعا امكانيتهم زينه بس الولد ممكمل دراسة و يشتغل وي ابوه .. وافق ابوية و طبعا اني لازم اكول اي لان خلص ابوية اخذ القرار و قبل .. وافقت و تزوجت و اني مجنت رايدته .. و اكيد لازم ابطل من الكليه نزولا لرغبة زوجي .. قبلت و طبعا كعدت وي بيت عمي (ابو زوجي يعني) .. و صرت ام .. جاني ولد و الولد لحكه ولد ثاني و الولد ثنينهم لحكتهم بنية و اخر العنقود هم جاني ولد .. صار عندي اربعه … بصراحة زوجي جان يحبني اني بمرور الزمن حبيته .. بس بمرور السنين اني كبرت و جسمي تغير و شكلي تغير كمت احس هو كام يدور علاقات على الرغم من ولدنه كبرو .. و تفاجئت انو هو متزوج عليا وحده و مكعدها بمشتمل بزيونه … الي وصللي الخبر واحد من ولدي .. واحد من ولدي يشتغل وي ابوه و عن طريق الصدفه عارف هالشي ..طبعا ماخذله وحده صغيرة بالعمر ومطلكة … يعني جانت متزوجه و انفصلت من رجلها و هو رايح ماخذها لان منو تقبل بي بهل العمر وهو بكد ابوها … و ماخذلها مشتمل وحدها .. طبعا اني مسويت مثل الافلام و رحت للمشتمل لان اني اكبر من هالشي .. كلتله و واجهته و هو ما اتهرب من السوال و اعترفلي بكل شي .. و كلتله خلص طلكني .. كالي ما اطلك .. كلتله لو اني لو هي .. ما قبل يطلك و كام يدزلي ناس من اهله و من اهلي و كلهم يلوموني هههههههههه .. يعني مشايفه هيج بشر .. يكولون من حقه .. و الشرع محلل هالشي .. زين الشرع مو محلل هالشي على امور معينه .. اني عندي بمكان الطفل اربعه و كلهم رياجيل و بيهم بنيه حاليا على وجه زواج .. زين شغل البيت ممقصره بي .. اتحداه اذا اكو اي واجبات اني مقصره بيها .. يلوموني .. صرت اني المو زينه و يكولولي فوكاها عمي عيب مرية شكبرج تتطلكين بهل العمر و ولدج رياجيل سكتي و هو اول وتالي يرجعلج قابل راح يبقى وياها … و ابشركم بقى وياها .. بقى وياها و حتى كام ميجي لبيتي .. و متطلكت اني علمود (((((حجي الناس و ولدي صارو رياجيل))))) .. ولدي طبعا ميهمهم اذا انفصل و اذا ابقى وياه .. لان كبرو و هالشي لا يزيد و لا ينقص منهم شي .. و طبعا كلهم يشتغلون و عدهم شهايد .. و عشت حياتي هيج كلت خلص و قبلت بالامر الواقع … ابني الوسطاني حب وحده من منطقة بيت اهلي .. و طبعا عنده علاقة وياها بالتلفونات و كالي اريد اتزوجها .. كلتله روح لابوك خلي يمشيلك بالسالفة .. كالي هسه انتي غير بالبداية تروحين لأمها و بعدين اذا اكو موافقه اوليه اخذ ابوية و خوالي لان اهل البنية يعرفون خوالي .. كلتله ليش همه قريبين من بيت جدك (اقصد بيت ابويه) .. كالي اي بالشارع الكبالهم .. كلتله بيت منو ؟؟جان يكول بيت ام فلان .. طبعا من كال بيت ام فلان كلبي دك بسرعه و كلتله منيلهم بنية صغيرة ذولة .. كالي بنت ابنهم فلان .. طلع يريد بنت ابنهم الي جنت اني احبه .. اني جنت ناسيته بالله العظيم و لا جاي على بالي بهل السنين .. و ابني من كثر ميروح لبيت اخوية و ببيت اهلي .. شايفها هناك و مصادقها طلع و يحبها وهي تحبه .. طبعا مكلت لأبني على هالشي .. و رحت لبيت اهلي و مناك رحتلهم و البنية حلوة تخبل و طبعا مجان عدهم اعتراض على ابني .. و ابني راح لابوه و مشو عالبنية و خطبها و تزوجو .. و طبعا شفت الولد (الي هو هسه رجال جبير و نسيبنا) عرفني هو و جان هو يتهرب مني من اسلم عليه و اني هم اتهرب منه رغم كل هالسنين و رغم ما كبرنه و اصلا ابني صار رجل بنته بس عبالك مراهقين ننكلب من واحد يواجه الثاني .. و فد يوم صار عدنا مناسبة و هو زوجته ما جتي بسبب انو مسوية عملية برجليها و متكدر تمشي بس هو اجه .. المناسبة جانت ببيت ابني و طبعا هو تكفل ان يرجعني للبيت .. اني وياه وحدنا بالسيارة جان هو يفتح الموضوع .. كالي تذكرين من جنتي تشرين هدوم بالسطح و اني اباوع عليج .. ضحكت كلتله اي فترة مراهقة غير .. كالي تدرين اكو شي انتي متعرفين بي .. كلتله شنو .. كال اني جنت منتظر اتخرج حتى اتقدملج … ضحكت اني كلتله صدك تحجي وسويتها بضحك كلتله لعد ما حجيت .. كالي اني جنت حاجي لاهلي و كلهم يعرفون و حتى خواتي جانو يكولولي ها ابو فلانه (يصيحوني بأسمج) لان يدرون احبج .. و اريد اتزوجج .. بس جنت منتظر بس اتخرج حتى اتقدملج .. جنت ماكدر امشي وراج بالشارع و اكلج هالشي .. لان استحي من الناس و انتو جوارينه يعني شلون اقبلها على نفسي تجي حجاية عليج من ورايا .. جنت اراقبج و جنت امشي وراج بس ولا مره خليتج تشوفيني .. يجوز جنت غبي لان محجيت و غيري الي حجى صرتي من نصيبه .. صح اني هسه كبرت و انتي كبرتي .. و صح هالشي مر عليه سنين .. و صح الي راح ميتغير و لا يتعوض .. بس جنت احبج .. جنت بالكلية من يسألوني اصدقائي ليش متصادق و ليش متحب اكلهم اني احب و راح اخطب بس اتخرج ..بس ميدرون الي احبها محاجي وياها ابد .. ميدرون الي احبها كل الي بيني و بينها سلام بالعيون .. و تاليها رحتي من ايدي .. بجيت بيوم الي عرفت انتي انخطبتي .. امي بوقتها كالتلي ابني كله صوجك و ذبت الصوج بيا لان جنت انتظر اتخرج من الكلية حتى اتقدملج .. و حتى اول جيتج لبيت اهلج ورى متزوجتي اتذكر شجنتي لابسه و شلون ذبج رجلج بالباب وهو راح .. بوقتها ختلت ورى باب الحوش من شفت سيارة رجلج فاتت للفرع و انتظرت تنزلين .. نزلتي و جنتي شايله جيس ماعرف شنو محتوياته و جنتي لابسه عبايه و جنت اول مره اشوفج لابسة عبايه .. ضحكت و كلت شكلها يخبل اذا بالعباية و اذا بلبس المدرسة .. كلشي يلوكلها .. و هم دمعت عيوني لان جنت اتمنى اني اوصلج لباب اهلج و تكونين زوجتي اني مو زوجة غيري … بس ارجع واكول صوجي .. طبعا هو كمل كلامة و حسيت العبره لازمته .. كلتله كافي كل شي راح بوقته و جان حب مراهقة صدكني .. و حاولت بس اسد الموضوع لان لو باقي يحجي جان بجيت اني هم .. و فتحت مواضيع على بنته و ابني حتى بس ينسى .. و من يومها كمت اتهرب منه من صدك لان رغم عمري الجبير بس حرك بيا مشاعر ..و بيوم الي رجعت بجيت .. كلت بس هاي قسمتي و قدري .. و لازم اقبل و الحمدلله على كل حال .. بس للامانة بعد الموضوع ابد منفتح و شفته وراها بفترة و جانت المواضيع عادية .. و طبعا حاليا اني عايشة و مرتاحه وي ولدي و جهالهم و ذاك الشايب عايش وي زوجته .. و كل ميجي هنا للبيت ما اطلعله .. و يكعد شوية وي ولده و يروح .. بس الي مخبلني هي ششافت بي و اخذته .. يعني هم شايب و هم مو حلو و هم صاحب كرش .. و هم عنده ولد رياجيل .. شلون وافقت بي ماعرف .. حتى لو منفصله ماشي .. بس ششفتي بي ماعرف …(الشايب)انتهىاخوكم ابو بغداد سايق التكسي#ابوـبغداد