الدب و المهاجر
يكول وصلت للنرويج و طلبت لجوء و اخذت اوراق .. النرويج هادئة كلش و حلوة و مرتبة ..
سألوني على البيت و جان بوقتها التسجيل بكيفك ..
اني جاي من العراق و حروب و انفجارات و اصلا اني رايحلهم معوق مفجورة عبوة عليا و رجلي وحدة منهم كلها بلاتين و اعرج بيها و اوراقي وياي و التقارير الطبية امشي و شايلهم بجنطة .. عبالك سلحفاة ..
الحاصل .. سألوني وين تريد بيت …
كتلهم اني من الطفولة و احلم ببيت بمكان هادئ و يمه بحر لو جبال خضراء و صرت براسهم هايدي هي وجدها بافلام الكارتون ..
همه مبتسمين و يسمعون كلامي و عشت اللحظة من كاعد اشرحلهم و المترجم اللبناني ينقللهم كلامي ..
و ذبوني بمحافظة بيوتها مثل الافلام .. بيت يبعد عن بيت فد خمسمية متر لو ميتين متر .. و هادئة كلش ..
و خضار و جبال و بحيرة صغيرونة .. فد شي حلم .. اشجار و زقزقة عصافير .. سناجب ..
المهم ..
اني من وصلت للنرويج طبعا وصلت تهريب .. بحر من تركيا لليونان … و من اليونان لايطاليا حطوني بحاوية و حطو الحاوية بسفينة .. مخلص الحجي لحد موصلت طلعت روحي …
اكو عراقيين باليونان مرة سمعت منهم … كالولي بكل اوروبا اكو افارقة يبوكون بايسكلات .. يعني هاي السالفة بقت براسي …
و كالولي من توصل راح مية بالمية تستخدم بايسكل و حتى اذكر بوقتها كتلهم مو اني اعرج شوية .. كالو عادي اكو بايسكلات 3 تايرات و مريحة و عادي تسوقها ..
والله اخذت البيت و ساعدوني البلدية و المنظمة بتأثيثة و كعدت ..
كمت اطلع اتمشى اتسوك عادي و ارجع .. جانت اللغة عندي مجعمرة بوقتها .. ما اعرف احجي .. و طبعا اكو مدرسة لازم ادخلها و اتعلم بس بعدني جديد ..
ورى اسبوع تقريبا من كعدت بالبيت و اخذت بايسكل 3 تايرات و بي سلة جبيرة .. جنت اعوفة بره بس اقفلة …
و فد يوم جنت نايم بالصالة و سمعت طكطكة .. رئسا كلت البايسكل ..
كمت و اخذت وياي خشبة ..
شايفين توم و جيري من توم يمشي على طرف اصابيعة و بعدين فجأة ينطلق ..
اني كمت امشي مثل توم على كيفي و على طرف اصابيعي لحد موصلت للباب .. و فتحت الباب على كيفي كلش و مطلعت طكة حتى انقض على الحرامي و اخبزة
..
جان افتح الباب و ارفع الخشبة عالي و جمدت
دب
و روح امي و روح ابوية دب ..
دب اني كدامي دب …
هلكد ما خفت و هلكد ما كلبي وكف اليدة مال باب ضاعت خرب بأهلها و اهل اهلها ..
كمت ماكدر اتلمس الباب و روح امي احس نفسي متت ..
ما اعرف شلون رجعت فتت للباب و سديته على نفسي و كمت اصيح بس بالعراقي و ابجي ..
كمت اكول يا الله ما مموتني بالانفجارات و العبوات و ما مغركتني بالبحر من تركيا لليونان و ما خنكتني من التنفس ببطن الحاوية بالطريق لايطاليا هنا تموتني و شلون موتة دب ياكلني ..
يابوية يا يمه لحكولي ..
يمه ابنج راح ياكله دب وراح يدفنوني بالاقساط رجل على صفحة الايد على صفحة ..
انوب اصيح بصوت عالي كلش .. بالعراقي ..
بعدين كمت اصيح هيلب هيلب ..
و اكمز جوى اكمز و اجيب و ادفع غراض على الباب .. خليت التخم كله عالباب و اصيح و ابجي ..
انوب شكو فلم اجنبي كام يجي على راسي .. الشباك تخيلت راح يفوتلي من الشباك ..
كلت احسن شي ادور ياغرفة ما بيها شباك و افوت بيها و اختل بس خلي يطلع الصبح ..
و فتت للغرفة بس هذا الحجي اصيح اني ..
بالغرفة طلعت التلفون و خابرت ولد عراقي كاعد بأوسلو ..
كتله حسن الحكلي طلعلي دب و بباب البيت واكف ..
كالي بس على كيفك احجي خلي افتهم ..
كتله لك دب دب مال زوراء دب ..
كالي ادري ادري عادي هالشي ..
كتله لك شنو عادي دب وروح امي دب و برة يم الباب ..
كالي ليش انت وين كاعد ؟
كتله والله محافظ اسم المحافظة بس هادئة و وصفتله الطريق كم ساعة ..
كال لك هناك اكو دببة و عادي هالشي الناس متعودة ..
بهل الحجي الباب و الجرص كامت تندك ..
اني من كل عقلي كمت افكر اكول اخاف الدب من رهبة الموقف عقلي كام ميجمع افكار كله خربطة و افكار متصير على ارض الواقع اصلا ..
بس سمعت صوت الناس ..
طلعت شفت شرطة و ناس من المنطقة عالصوت جايين ..
غير حضنتهم .. غير عبالك شفت اهلي جوني و امي رجعت للحياة ..
حضنتهم و ابجي ..
همه يرطنون بالنرويجي و يريدون يفتهمون شصار و اني اشرلهم و اسويلهم اوووووووو وصوت مال وحش ..
عبالهم مضروب مخبل .. عاد عالسريع حجيت وي حسن كتله هاك فهمهم اكو دب ..
هو حجى وياهم و كلهم كامو يضحكون ..
و رادو يروحون و يعوفوني .. و جان اركض كعدت بالسيارة مال شرطة ..
كتله لحسن كلهم .. لو اكتل نفسي هسة لو اروح وياهم للمركز منا للصبح و الصبح اروح للبلدية لو على مقر المنظمة مال لجوء و انقل سكني للعاصمة يمك لو أي مكان ثاني مابي دببه بس المهم اخلص منااااا ..
ههههههههههه ضحكو و اخذوني وياهم للمركز مال شرطة و للصبح اني منايم و الصبح ثاني يوم اتصلو بشخص هو المسؤول عني بالمحافظة .. عاد خافو لا اتخبل و نقلوني للعاصمة و حتى الغراض مالتي مرحت اخذتهم هههههههه همه جابوهم و انطونياهم و رحت كعدت بالعاصمة وكعدت بعمارة وبنص العاصمة بس الخوفة ابد مراحت مني لهاذا يومنا …
بشرفكم دب ..
هسة لو دب اصطناعي ماشي ..
دب حقيقي خرب بحظي ..
المصدر : صفحة ابو بغداد
