الخط الجديد

وحده من الي اعرفهم بلا شرف ولا ذوق و لا حتى احساس … نشرت رقمي بموقع بالفيس بوك من حساب وهمي و كاتبه عليا على اساس اني مو زينه و هالوحدة هيج مجرد غيرة مني سوت هالشي …
و كاتبه كلام اخجل اكوله … ارقام كامت تتصل عليا بنص الليل و الصبح و بالدوام و يحجون كلام يلعب النفس …
تخبلت و حتى كلت لأهلي هالشي …
طبعا سالفة شلون انتشر رقمي افتهمته من واحد من الي خابروني … ورى ما كومة سويت بلوك … كلتله انته منين جبت رقمي كالي منشور بكروبات هواي و حتى انطاني اسم الكروب .. و فتت بالفيس لكيته صدك منشور و كتبت رسائل للصفحة الي ناشرته بس ما ممسحوه … و الي ناشر الرقم اسم بنية هم متجاوب … قررت ابدل رقمي و ما انطي غير بس لأهلي …
و رحت بدلته .. بوقتها ردت رقم سهل .. حتى لو متشابه بي كم رقم … ابو المحل جان عنده رقم بي تلث ارقام متشابهه و هي اخر ارقام … كلتله اريده بدون زحمه واشتريته منه … رجعت للبيت و بديت اسوي البرامج عالرقم نفسه … بالوتساب كتبلي رقم غريب … كتبلي ها يمه … يمه وينج … بعد روحي يمه ابو رجليناتج رجعيلي … اني انصدمت من المكتوب … شنو يمه شنو رجعيلي ؟؟
صار عندي فضول اكتبله … كلتله العفو منو وياي … كال يمه اني ابنج … يمه اني تراب رجلج … يمه ابوس الكاع الي تمشين عليها بعد روحي روحج … كلتله اخي منو انته … كال يمه اني احمد .. وراها مكمت اجاوبه بس مادري ليش ما سويتله بلوك … و بده يدز صور لغراض مال بيت و سجاده مال صلاة … و ايزار مال صلاة .. و سبحة و يكتبلي يمه اتلفلف بغراض يمه يوميا من رحتي لليوم … و من يوم رحتي لليوم كومة كتبتلج بس انتي متردين …
اني عرفت من كلام الولد و الصور انو امه متوفية و هذا رقمها القديم … انقهرت و جاوبته … كلتله اخي هذا رقم اشتريته جديد … كالي ميخالف خليني ابقى احجي وياج ترى من شفت الرقم لحد هسه اني موكفت دمعتي .. اني الوحيد الج يمه .. و كام يخبط بالكلام مرة يكلي اختي ومره يحجي وياي بأسم امه … و اعتذر مني هواي بس طلب مني طلب .. ان ما امسحه و يبقى يدزلي حجي مثل مجان يسوي وي امه قبل … يكول جنت اشتغل بغير دولة قبل ما ارجع لبغداد … و جنت يوميا اكتب لأمي شيصير وياي .. و متعلم على هالشي و حتى ورى متوفت بقى يسوي هالشي … و كام يسوي وياي نفس الشي واني مرات انقهر عليه اجاوبه و احاول اساعده … يوم ورى يوم يوم ورى يوم .. تعلقت بهل الولد … واجه يوم ما كتبلي اني كتبتله وينك شصار وياك علمود موضوع المحل الجديد .. لان هو شرحلي يريد يشتري محل بس ميريد يزعل شريكه لان يريد يفض الشراكه … و جاوبني و كالي يمه ملتهي بالمحل اخذته و جان مكيف و صورلي المحل .. طبعا اني شايفة صورته لأحمد .. الولد ميتعيب … و دلاني محله و قررت اروحله بس ما اكله اني منو لان هو ابد مشايفني بس يعرف صوتي لان بيني و بينه رسائل وتساب صوتيه بس ابد ممتصله بي ولا هو متصل بيا .. و رحت و الغريب بالموضوع هو من شافني قبل ما احجي بقى يباوع عليا ….. بقى مركز …
اني محجيت ولا كلمة و جانت بنت خالتي وياي … طبعا بنت خالتي تعرف كل القصة و هم مقهورة عليه … هي حجت و سألت عن شي و طلع ماعنده منه و طلعنا … كالتلي شفتي لج شلون بقى يباع عليج ؟؟؟
كلتلها اي سبحان الله … كالت بقى مركز عليج عبالك حس … كلتلها مستحيل هو مشايفني واني ابد ما اخلي صوري عالانترنت ولا حتى عالوتسب … طبعا هو محل بمنطقة قريبة من منطقتنا … و جان محل البسة نسائية و اطفال و بنفس الوقت جان عارض اجهزة تلفون هم الظاهر يبيع اقساط … و بنفس اليوم الي رحناله كتبلي …. و كتبتله و طلب مني نحجي مباشر … حجينا مباشر و كالي ماعرف ليش اني رغم ما عرفت انتي مشتريه الرقم و هذا رقم امي القديم بس بقيت اكتبلج و تعلقت بيج … كلتله تريد الصدك حتى اني تعلمت على وجودك بكل ايامي … كالي تعرفين مرات اريد اطلب منج طلب بس اخجل … كلتله شنو ؟؟
كال اريد اشوف شكلج .. اني ضحكت … كالي شبيج تضحكين … كلتله اليوم شفته انته … جان يكول لاتكولين انتي ام القميص السمائي الي جانت وياج بنيه … كلتله اي … كال ياسبحان الله و الله العظيم حسيت عبالك اعرفج … و بدينا من يومها نحجي صوت … و جان يدزلي صور اشياء جديدة من يجيب للمحل … و من جان يعجبني شي اروح اني وبنت خالتي نشتري و حتى هدوم جهال اختي من عنده كمنا نشتريها … والولد كام يفتحلي مواضيع عالارتباط و جان صادق جدا وياي … و بيوم من الايام صدفه جنت اني اختي هناك و ردت اسويله مفاجاة امر من يم محله اسلم عليه … و جان افوت للمحل لكيت ولد يمه بس الولد ابدا شكله مو غريب اعرفه … لان هالولد بي شي مميز بوجهه مينسى ابد … عنده وحمه يم خشمة .. لون الوحمه احمر فاتح و مخلي هالولد مميز و مو سهل واحد ينساه حتى لو مرة حجى وياه … هالولد جان ابو المحل مال التلفونات الي اخذت منه رقمي هذا الي بي ٣ ارقام متشابهه … طبعا من وكفته وي احمد واضح همه اصدقاء وميانه .. ومن شافني ارتبك … وراها رأسا سلم على احمد وراح … اني بقيت صافنه بس ما افتهمت و ما ربطت بنفس اللحظة الي صار … و عادي سلمت ورجعت للبيت وبقيت افكر .. بس غبية ما افتهمت و ما ربطت … هو اتصل بيا … جنت احس بأتصاله هو يبقى ساكت من اسكت يريد يشوف اني عادي داحجي وياه لو اكو شي … لان هالاسلوب يستخدمه وياي من نتعارك او نختلف على موضوع … اني كلتله ليش احمد … بس كلتله ليش … جان يكول و داعة امي احبج و صح اني سويت هالشي غلط بس وداعة امي من اول ما شفتج حسيت اريد احجي وياج و صح الطريقة غلط و جذبت اني بس شسوي … ما عندي جراءة احجي وي بنية وجه لوجه … واستحي … (هو من كال هيج كلت اي يعني اكو شي غلط بالموضوع خلي اخلي يحجي كلشي) كلتله احجي من البداية شلون صار هيج … كال اني جنت شريك وي وسام … (وسام صاحب محل التلفوات و ابو الخط) … و شراكتي وياه قديمة … فد يوم اني جنت بالمحل الي بصف محلنا داسولف وي ابو المحل هم صديقي … و انتي جيتي تشترين من محلنا … شفتج من الجامة تخبلت عليج … و ردت اجي للمحل بس كلت هسه اذا اروح هم مراح اكدر احجي وياها لان وسام ديحجي وياج … و هم اصلا اني ماعندي جراءة …
انتظرت لحد ما طلعتي … و رحت سألت وسام شنو اشتريتي من عدنا … كالي اخذت الخط الي نهايته متشابهه و اني اصلا اعرفه للرقم … بنفس اليوم بديت احجي وياج و ماعندي طريقة غير هالطريقة الي اخترتها .. على اساس انتي امي المتوفية و بالمناسبة اني امي صدك متوفية بس متوفية اني و جاهل يعني اصلا مملحك عليها و ما اتذكر غير تفاصيل بسيطة عنها … و السجادة و الجادر مال صلاة و الغراض هاي جانت مال زوجة اخوية ام ياسر … كلتله انته جذاب و متستحي و سديت التلفون بوجهه .. كام يدك و يدز رسائل و يعتذر … مجاوبته لان جذاب و اني من بديت احجي وياه كلتله كل شي اكدر اسامح بي الا الجذب ما اسامح بي … و ورى كم يوم انصدمت انو هو و اخوه الجبير جايين يريدون يخطبوني … و هالحجي اني والله العظيم ما جاوبت عليه و حتى رسائله ما شفتها لان حسيت الي عنده هيج قابلية للجذب ممكن يسوي اي شي و ممكن اصلا يطلع ابو علاقات واني مجرد رقم بعلاقاته … بس من تقدم عرفت هو سوى هالشي لان صدك رايدني … و قبلت .. قبلت و رجعت علاقتي بي و طلع صدك غرضه جان شريف بس راد يتعرف عليا بالبداية و يعرف اطباعي و هو ابد مو ابو علاقات و حسب كلامة يكول اني حتى لو حاظرتني من اول مرة جان هم انتظرت فترة لحد ما اطلع من شراكة وسام و جان هم تقدمتلج بس اكيد ورى ما اسأل عنج اخاف تطلعين مخطوبة لو متزوجة … و تزوجت احمد … احمد وردة و حباب و ممقصر بشي تجاهي او تجاه جهالي … بس اكو شغله بيا يمكن … ماعرف ليش اشك بي … ما اعرف ليش رغم كل الي صار وهو صادق وياي و هاي متزوجين هسه و ابد ما بي قصور الرجل .. بس احسه ابو علاقات … ما اعرف ليش … و المشكلة مكاعدة الزم عليه شي و هذا الي مخبلني … حتى هو مرات يكلي انتي تشكين بيا بس مستحيل تلزمين عليا شي لان اصلا ماعندي شي … وهاي الجملة تخبلني رغم ما هي ما بي شي … بس كل ما اتذكر بدايته وياي و سبب ارتباطنه … اكول اخاف ديسوي وي غيري و هو اصلا عنده بمكان الجهاز كومة اجهزة لان شغلته بيهم من عده الملابس و الاكسسوارات … وفوكاها محله اصلا دائما بي بنات …
هاااا و بالمناسبة .. ورى زواجنه بفترة تعاركت وياه … جنت يمه بالمحل و جوي بنات يشترون و هو لسانه حرير بالتعامل … ورى مطلعو البنات كلتله تعال كلي انته شلون كلتلي قبل الزواج انته ماعندك جراءة تحجي وي البنات و هذا اسلوبك وي الزبائن مال واحد خبره … كالي بابا هذا رزقي وحد و العلاقة تحتاج لهجه و لغة ثانية وحد .. الرزق شيرادله غير تفضلي و تدللين و هلا بيج و تشرفيني بأي وقت .. بس العلاقة عالم ثاني و يرادلها كلام ثاني … قنعني ابن الاوادم و سكتت … بس اشك .. هالرجال راح يجلطني ملازمة عليه شي بس ماعرف اشك .. المهم الله يحفظه اليا و يحفظ الجميع وان شاء الله اطلع غلطانه ولو ادري اني داقنع روحي وهسه يطلع عنده بمكان الوحده خمسه .. ماعرف ..

المصدر /صفحة ابو بغداد