الحلم
من صاحني بأسمي الي محد ميعرفة بالجوارين انصدمت !!
شلون يعرف اسمي و احنا جدد بالمنطقة !! مصارلنا ست اشهر بالبيت كاعدين و ماعدنا اي اختلاط بالجوارين … ابوية و امي ثنينهم موظفين يطلعون الصبح يرجعون العصريات و اني ستوني داومت بالمدرسة الجديدة .. حتى بعدني ممكونة علاقات وي الطالبات ..
وكفت و انداريت عليه كلتله انت منين تعرف اسمي اصلا ؟
كالي اني اعرف عليج اشياء هواي .. كلتله منين ؟
كالي اعرف وكبل و لاتسأليني منين ..
كلتله شتعرف بله ؟
كالي اعرف انتي تحبين فلان اكله و تحبين فلان لون و قبل فترة رحتو لمهرجان بابل و قبلها بفترة رحتو لنادي الاطباء مال اسنان الي يم معرض بغداد الدولي بعرس مال دكتورة كرايب امج و حتى بيومها امج ضاعت جنطتها و المطرب بالقاعة ذاع السالفة و لكيتو الجنطة ..
كلتله اش كافي كافي و خفت كلش من حجالي هيج و عركت و صارت وياي صدمة ..
كلتله منين جبت هالمعلومات عني و شلون عرفت هاي الاشياء ..
كالي اني معجب بيج ..
كلتله منو انته ..
كالي اني بيتنا يمكم بنهاية شارعكم و اريدج والله .. كتله لو تروح منا لو تكلي انته منين عرفت هالمعلومات ؟
كالي الي راح اكلجياه متصدكي يمكن ..
كلتله كول ؟
كال اني شفتج مرتين بس انتي منتبهتي عليا و كمت احلم بيج و اشوف هاي الاشياء كلها ..
صدكت والله العظيم بيومها صدكت لان هاي الاشياء ما اعرف شلون عرفها عني ..
عفته ومشيت رجعت للبيت بس تفكيري كله مشغول بي .. بقيت افكر بي اكثر من اللازم .. و ثاني يوم هم لحكني بطريقي للمدرسة .. كالي ليش تتهربين مني و الله اني معجب بيج واريدج .. وكفت كلتله زين مو تكول احلم بيج .. بعد بشنو حلمت ؟
كالي كرايبج قبل فترة توفى بحادث سيارة بالراشدية على طريق الجزيرة السياحية و عندج اخ مات هو وعمرة 3 اشهر ..
كلتله كافي و خفت والله ..
كلتله زين شلون تحلم بيا .. كالي ما اعرف اني من انام دائما احلم بيج و اشوفج .. و البارحة حلمت بيج و جنتي بالحلم رايدة شي و كاتله نفسج عليه ..
كلتله شنو هو ؟
كالي الكوستم المخطط ..
صفنت و فتحت حلكي و ضحكت .. كلتله لا ممعقولة والله .. انت شنو بشر لو شنو ؟
كالي اني معجب بيج ورايدج والله ..
و بدت علاقتي بي .. طيب و حباب و ابن اوادم و فوك كل شي يعرف تقريبا كلشي عن حياتي وعن حياة اهلي ..
جنت التقي بي بس بالطريق من بيتنا للمدرسة .. و بعدين اخذت رقمة و كمت اخابره من اهلي يروحون للدوام و اخوتي الصغار ينامون ..
كمت احبه وهو اصلا يحبني .. و جان دائما يحجيلي على اشياء تصير بحياتي يخليني اصفن و ادوخ ..
جنت اكله انت سحار يكلي لا والله ..
بقت علاقتي بي مستمرة لحد مداومت كليه وهو داوم كليه .. جان يجيني للكلية بين فترة و فترة و طلع يعرف طلاب اصدقاءه يمنا بكليتنا …
جان يخاف عليا من الهوى واني هم كمت اخاف عليه من الهوى ..
تخرجنا و هو مكدر يتعين بس اني عن طريق معارف بابا تعينت .. و هو كام يشتغل وي اخوه الجبير بالشورجة ..
و خلص وصلنا لمرحلة منكدر نعيش واحد بعيد عن الثاني ..
قررنا نتزوج اني وياه .. بس قبل منتزوج كالي حجاية بقت براسي ..
كالي اكو شغلة ورى منتزوج احجيلجياها ماشي !
كلتله شنو هي و طبعا الفضول موتني بس اريد اعرف .. حلفته الشغلة الها علاقة بالبنات ؟
جان يكلي لا ..
كلتله اي شي اني قابله بس اهم شي السالفة مالها علاقة بالبنات و ما خايني ؟
كالي لا والله بعيد كلش تفكيرج ..
و صدك الله وفقنا و تزوجنا و بيوم العرس كالي شغلة .. صح اني ضجت من عنده بس هو يحبني صدك و مشيتها بس مخليت احد من كرايبي لو كرايبة محجيتها الهم ..
طلع لا جان يحلم بيا و لا شي ههههههههههههههه ..
طلع خط تلفونا جان مشترك وي خطهم و يسمع حجي امي كله و امي جانت ممخليه شي متحجي لخالاتي لو لصديقاتها و هو يسمع ههههههههههههههههههه
كلتله لك انت شكد مشيطن منين جبت الفكرة و شلون جتي براسك .
كال باعي والله اني سالفة حبي كله صدك و الدليل هاي تزوجنا .. و انتي جنتي اول تجربة اليا و اخر تجربة .. السالفة و ما بيها .. فد يوم شلت التلفون الارضي ردت اخابر على صديقي .. سمعتج تحجين وي صديقتج فلانه .. جوارينكم بالمنطقة القديمة .. و ما اعرف ليش بقيت اسمع .. حبيت صوتج وحبيت سوالفج .. بعدين كمت انتظرج تحجين وي صاحبتج و جانت امج تحجي بالتلفون .. جنت ابقى انتظرج تجين تحجين حتى بس اسمع صوتج و بنفس الوقت بوقت انتظاري اسمع كلام امج كله .. عرفت انتو الناس الجدد الي بشارعنا و رئسا تذكرت شكلج …
و صدفة شفت فلم عربي لعادل امام صديقة يشتغل ببداله و يسمع حجي ويروح يبلغ بي الدولة ومن يسألو يكلهم هاي حلم .. وقويت كلبي و كلت الحكج و اكلج هيج ..
اذا صدكتي خير على خير و اكيد ورى فترة راح اكلج .. مثل ما هسة كلتلج ..
و اذا طرديتيني ابقى احاول وياج و بلكي الله يلين كلبج عليا ..
و الحمدلله .. حبيبتني و حبيتج ..
المهم جانت نيتي صافية وياج والدليل ثنينا هسة متزوجين واحمدالله واشكرة رزقني بيج حبيبتي ..
كلتله تدري لحد هذا اليوم اني عبالي صدك انته جنت تحلم بيا و هسة اتذكرت شي من دتحجي .. ورى فترة من كمنا نحجي عالتلفون كلتلي بطلت احلم بيج ههههههههههه لان البدالة صلحو الاشتراك موووووووووووو ..
كالي اي ههههههههه ..
كلتله انت اكبر شيطان بالدنيا .. كالي لا والله مو شيطان بس ما اعرف شلون صارت بعد و الحمدلله و الشكر نهايتها تزوجنا.
المصدر : صفحة ابو بغداد
