الحارس

أشتغلت فترة حارس بمنطقة من مناطق بغداد … المنطقة جانت راقية جدا … اغلب البيوت جانت فارغة و اكو بيوت جانت تنفتح بس خميس عالجمعه (لغرض السهرات) لان ملاك هالبيوت جانو اغلبهم ناس ثكال او ناس بالدولة بذاك الوكت و طبعا يجون شغلة نهاية اسبوع يكضون سهرتهم الليلية و يروحون .. هالحجي بالتسعينات ..

بذاك الوكت اني جنت مخلص عسكرية و ساكن بأطراف بغداد .. و جنت متزوج جديد .. الي شغلني هالشغلة هم حارس و هم بمنطقتنا ساكن .. بس هو يحرس بمكان ثاني بنفس المنطقة..
كالولي جيب زوجتك و جهالك و تعال عيش بالبيت نفسه .. كلتلهم متزوج اني بس ماعندي اطفال .. كالو جيبها .. و انطوني غرفة بالبيت و باقي الغرف مقفلات البوب .. البيت جان مذخر مال ادوية فترة و بعدين انغلق .. و طلبو مني هم ارتب الحديقة يعني اكص اشجار و انظف الكاع ..
الحاصل .. مقابيل البيت الي احرس بي اكو بيت جبير كلش .. بس هالبيت جان بي بس رجال و زوجته .. رجال جبير بالعمر كلش .. بس مبين شخصية .. فد يوم شافني واكف عالحايط داكص الاشجار صاحني .. رحت جان يكلي تعال رتبلي الحديقة الورى … هو بيته بي حديقتين .. افتريت وياه و شوفني الحديقة و جانت زوجته كاعده على ميز مطلعي برى .. سلمت عليها .. و كلتله شوكت تريد ارتبها .. كال بكيفك .. ثاني يوم بديت ارتبها و هو طلع كعد يمي و بده يسولف وياي اني و داشتغل .. سالني كالي انته متزوج .. كلتله اي عمو متزوج .. كال عندك جهال .. كلتله بعد الله مارزقني .. كال زين .. كلتله عمي اني صارلي فترة من اشتغلت حارس هنا و دائما اشوفك انته و زوجتك و ما شفت عندك جهال .. كالي اني عندي اربع بنات .. بس متزوجات و قليل يجوني .. كلتله زين احفاد عندك .. كال عندي بس ميحبون يجون هنا اصلا .. و حسيت انو هو و زوجته يحسون بوحده و من كل عقلي توقعت انو رياجيل بناته ميريدون ياخذوهم يمهم لان خطية كلش كبار .. و بديت يوميا اروح يمه و طبعا كام يطلب مني بعد شغلات اسوي بالبيت مو بس الحديقة .. و بيوم من الايام اني و داشتغل جتي وحده من بناته و زوجها وياها .. طبعا عوائل كلش طاكين و مبين عليهم الفلوس .. عرفني على بنته و على زوجها .. و كالهم هذا فلان حارس و فلاح .. همه سلمو عليا و عافوني و فاتو جوى .. و هو ضحك .. كلتله شبيك عمي تضحك .. كال ميريدون يضيعون وكت لان الثانية عدهم محسوبة .. كلتله لا مو لهل الدرجة .. كال احسب شكد راح يبقون .. و الله العظيم ما طولو نص ساعة و راحو .. و راها بكم يوم جان ماعندي شغل ببيته و جتي بنته غير البنية الي جتي نص ساعة .. طبعا جتي بسيارتها الشخصية و وياها بنات ثنين مقبلو ينزلون بقو بالسيارة (مبينين بناتها) .. نزلت هم مطولت ساعة تقريبا و راحت .. و نفس الشي وي باقي البنات .. يجون على كد السوال و الجواب و يتباوسون و يروحون .. اني انقهرت عليهم مع العلم همه لا محتاجين فلوس و ممحتاجين اي شي اصلا .. عدهم واحد يتسوكلهم الي يريدو .. بس سالفة التنظيف مال البيت جوى جان عليهم و لو همه خطية ميزبلون شي .. بس عليهم ليش .. لان يخافون يفوتون احد غريب جوى لا يبوك شي .. لان امانة الناس زناكين كلش ..
عالعموم .. فد يوم رحت داغيرلهم ديكور الحديقة الامامية عدهم مرجوحه رادوني افرها و شوية سنادين ارتبها .. الرجال كالي عوف الشغل اليوم وتعال نسولف اني ضايج .. كلتله ماشي .. كالي اني ما احجي كدام زوجتي على بناتي لان تنقهر .. اني بناتي ميحبوني و هالشي من ورايا .. لان دللتهم ازيد من اللازم و ما فد يوم كلتلهم لا .. و من كبرو تعلمو عالسفر .. يوميا بدولة و طبعا امكانية مفتوحه و براحتهم يصرفون .. و تزوجو رياجيل مقاصرين .. بس مشكلة رياجيلهم يسمعون كلام زوجاتهم .. و طبعا للامانة عرضو علينا نروح نسكن يمهم بس العرض جان (حجاية التنكال) .. و اني كلت لزوجتي احنا عمرنا هنا يخلص و هناك يخلص .. على شنو رايحين بعد .. و اصلا زوجتي هم ممقتنعه بسالفة نروح يم وحده منهم .. شوف حتى جهالهم .. من يبوسونه من ورى خشمهم و بس يريدون يروحون .. و كل هالاشياء سببها الدلال .. و كام يحذرني يكلي ديربالك تدلل جهالك اذا صار عندك جهال بالمستقبل .. جنت اضحك اكله هو خلي ادلل نفسي بالاول حتى ادلل جهالي .. طبعا للامانة جان ينطيني فلوس اكثر من حقي بهواي .. تعلقت بي كلش و كمت يوميا اروح يمه .. و كالعادة يجون بناته بشكل اسبوعي بس زيارة سريعة .. يشوفون امهم و يشوفون ابوهم و يروحون .. و بيوم من الايام صبحت على خبر وفاته للأب .. طبعا ما سوو فاتحه و جادر .. كراسي نصبو بالكراج و شغلو قران.. يعني فاتحه رمزية عبالك .. جوي ناس هواي و الشارع انسد من السيارات .. كل الي يجون جان مبين عليهم الترف .. عيني باردة عليهم ..
وراها اني من كل عقلي كلت هسه ياخذون امهم يمهم لان بقت وحدها .. بس ما اخذوها لان كل وحده ملتهية بروحها و بسفراتها و بطلعاتها و طباتها .. جابو واحد (رجال) .. و انطوه غرفة من البيت وهو كام يداري امهم .. و ماعرف ليش مجابو مرية .. مادري ليش .. و هم بقو يجون كل فترة يشوفون امهم بزيارات سريعه و يروحون .. و فد يوم بالغلط الام عثرت و وكعت و لان جبيرة بالعمر عظامها بعد متنلحم اذا تنكسر .. بقت بالفراش نايمه .. و منو يداريها ؟؟
هالرجال الي يشتغل يمهم .. اني جنت اسأل نفسي سوال و زوجتي هم تسأل نفس السوال .. منو جان يسبحها و منو ينظف حاجتها جواها (مكرم القارئ) .. معقولة هو !!!!!!
رجال مخلين و عادي عدكم .. و الام مطولت هواي و لحكت زوجها .. و عرفت همه ليش ما جابو مرية لان ماعدهم وحده يثقون بيها .. بس هالرجال جان سايق فترة طويلة يم واحد من رياجيل البنات .. وثقة كلش و هو اصلا ممتزوج .. انطوه غرفة و كالوله تداريها و انطوه راتب كلش زين .. لان هو امين ..
المهم .. قبل فترة بالصدفة داتابع تلفزيون و شفت بنية عايشة بدولة خليجية .. هالبنية من سمعت اسم ابوها حسيت اعرفها بس مجنت مركز منو هي بالضبط .. و سالت بنتي عليها كلتلها منو هاي .. (طبعا اني صار عندي بنات ثنين و ولد) … كالتلي هاي فلانه الفلاني .. معروفة كلش .. من كالت اسم ابوها تذكرت انو هاي البنية هي بنت واحد من رياجيل بنات المرحوم و المرحومه .. و بدت بنتي تشوفني مقاطع عالانترنت تخص هالعائلة .. شفت بمقاطعهم يحجون عن الاسرة و عن حب العائلة وفوك ظيم الله ينطون نصائح للمتزوجين و نصائح عن العواطف وكل شوية يصورون امهم (الي هي بنت المرحوم والمرحومه) و يكولون هاي مامي و يبوسوها ..
تمثيل .. بتمثيل .. يمثلون عالناس انو همه ملائكة الرحمه .. و همه بيبيتهم جابولها رجال ينظفلها حاجتها لان بس ميأمنون بوحدة غريبة لا تبوك شغلات من البيت .. يحجون بحب العائلة و همه جدهم و بيبيتهم جانو يجون يزوروهم و يبقون برى بالسيارة و امهم تدخل نص ساعة و تنهزم .. و المصيبة بنتي تكول هذولة كلش طيبات و حبابات و معروفات .. وهمه يتمركصن عالبرامج و يحجون بثقة و كلش عجبتني الثقة الي همه يحجون بيها عن الحب و عن مشاعر الاسرة .. الف رحمه على روح جدكم و ببيتكم .. دللوكم و مخلوكم محتاجات شي .. وانتو شي بلاش مو بفلوس عزيتو عليهم (الاهتمام) .. و احتاريتو بسفركم و طلعتكم و طبتكم .. و تاليها هسه تمثلون على وسائل التواصل انتو عوائل متماسكة و قوية جدا و مرصوصين رص بالمشاعر الفياضه .. و المصيبة الناس مصدكة و من هالناس بنتي .. زين هاي شتحطلها و تطيب ؟؟

المصدر :صفحة ابو بغداد