التنمر

ابني الصغير قبل كم يوم حجالي على جهال وياه يلعبون غالطين عليه و يعيبون عليه لان سنونه الامامية ثنينهم مكسورات .. و اجاني يبجي و كالي الجهال يتنمرون عليا .. اني ضحكت و رحت قشمرتهم بنساتل و شوية حلويات .. رأسا اعتذرو منه و صاحو يلعب وياهم و كامو وين ميروحون ياخذوه وياهم .. هالموقف اني ضحكت عليه صح .. بس بنفس الوقت اكو ذكريات جتي براسي شبعت بجي من وراها .. لدرجة زوجي من اتصل بيا .. كالي والله صاير شي .. كلتله ماكو شي والله ..كال اكو شي صاير و راد يعوف شغله و يرجع عباله صاير شي بيا لو بالجهال … و حلفتله الف يمين .. يله سكت … الموقف الي صار بأبني .. صار وياي بطفولتي بس بكومة اشكال .. اني من عائلة مكونة من ام و بنات تلاثه .. اني جنت اصغر وحده بخواتي … ابوية توفى وفاة طبيعية .. و امي ربتنا … امي جانت تحفر الكاع حتى تطلع شغل … بدت من الخبز .. للخياطة … للحفافه … للشيره .. حتى شيره جانت تسوي لنسوان المنطقة … و جان بيتنا معروف بأسم بيت ام فلانه الحفافه .. اني بطفولتي جنت اتوقع كلمة حفافه هي مهنة عادية حالها حال عمو ابو رعد ابو البايسكلات .. لو عمو ابو خضير ابو الدلالية .. لو بيت خاله ام عمار المضمده .. مجنت اتوقع هلكد راح اسمع كلمات بطفولتي من الجهال … جانو بالمدرسة من يصيرون كبالي (خصوصا الولد) يسوون حركة بيدهم مثل الخيط .. شلون من الحلاق او الحلاقة ياخذ خيط و يحرك اصابيعه بطريقة معروفة .. هيج جانو يسوون كبالي .. عود يقلدون على شغلة امي .. فد يوم رجعت للبيت كلت لماما .. يمه انتي شغلتج عيب ؟؟
امي كالت شنو هالحجي منين سمعتي هالحجي ؟؟؟
كلتلها الجهال يقلدون عليج كبالي و يسوون حركات بيدهم … كالت منو يقلد بس كليلي ابن منو ؟؟
كلتله فلان و فلان .. لبست عبايتها و جرتني من ايدي .. ودتني يم بيت الولد ثنينهم .. و جان تدك الباب بس تدكها مو بيدها .. بحركة كلبها .. قوي تدك .. طلعت مرية و جان تتعارك وياها امي .. طبعا المرية هم تعاركت وي امي و كالتها همه جهال .. و رحنا للبيت الثاني .. و هم نفس الشي بس هالمره طلع رجال .. طبعا الرجال كبل جر ابنه بسطه .. و رجعنا للبيت .. امي كالتلي بنتي الشغل مو عيب .. العيب الي ياكل حرام و يمد ايده للناس … لاتستحين مني .. اني رغم ما جنت صغيرة بس من سمعت كلمة تستحين مني بجيت .. خواتي الاكبر مني اخذوني على صفحة و كالولي ليش متبطلين .. احنا مو بطلنه علمود نساعد ماما .. و صدك همه جانو يساعدوها خصوصا بالخبز لو بالخياطة .. كلتلهم بس اني اريد اكمل .. كالو لعد تحملي هذولة جهال و ترى عادي .. و ثاني مرة لاتكولين لماما لان خطية تنقهر .. كلتلهم بس احنا رحنا لبيوت الجهال و امي تعاركت وي اهلهم معقولة راح يعيدون السالفة ؟؟
كالو اي راح يعيدوها بس مو همه غيرهم .. و حجاية خواتي طلعت صدك .. و تكررت السالفة .. و زادت لدرجة ولد اجاني يكلي اشو هدومج محلوة مو امج خياطة شعجب ممخيطتلج شي مرتب .. وكمت امشي .. لدرجة همه نفسهم الجهال ملو مني .. و اني اصلا جنت ما اطلع بالفرصه برى الصف .. جنت ابقى جوى .. وتقريبا بطلو كل شي .. الا شي واحد بقى طول العمر ويايه و وي خواتي .. بنات الحفافه … بيتنا بالمنطقة معروف .. و صاير نقطة دالة .. مثل مطعم الفلاني او المصلح الفلاني .. اني كل هالشي و جنت اقرا و انجح .. و صح خواتي بطلو من عمر صغير بس اني كملت .. هالحفافه صرفت عليا مي عينها .. و دخلت صيدله من خيرها .. جنت اطلع من الاوائل .. و كله من خير امي الحفافه والخبازة و الخياطة .. امي ام مثالية .. ضحت بعمرها الصغير و جان تكدر تتزوج و هي جانت حلوة و مقاصرة .. بس خافت علينا … والله العظيم والله العظيم .. امي من جان ابوية عايش متعرف تخبز .. جان ابوية يجيب صمون حجري للبيت … من بدت تشتغل بالبيت و جابت تنور … ايديها مخططة من الجويات .. لان مجانت تعرف شلون تدخل مخدة الخبز للتنور و تتجوى بالصفاح .. و جانت تبجي بينها و بين نفسي و دائما اسمعها تحاجي ابوية .. ومن نصير قريبين يمها تمسح وجهها بالدشداشة و تكول حاره .. (يعني جانت تقشمرنه علساس هي عركانه وهاي مو دموع) … خواتي تعطلت قسمتهن .. بس بالاخير تزوجو .. و بقيت اني .. اني مريت بقصة حب بالكلية .. و الي حبيته والده دكتور و امه قاضيه معروفين ببغداد … جنت دائما اتخيل النهاية قبل متصير … وابد ما كذبت عليه و كلتله امي شنو اشتغلت و شلون عيشتنه وهو اكثر شي حبه بيا بساطتي … و توقعت من راح تصير السالفة صدك راح ينتهي كل شي .. قبل التخرج راد يتقدملي .. كالي اذا نجي لمنطقتهم وين بيتكم بالضبط .. كلتله بس كول بيت ام فلانه الحفافه والف واحد يدليك .. توقعت راح يضحك لو راح يصنف .. كالي زين و كمل موضوعه .. و جاب اهله و جوي و انصدمت بأبوه وامه .. طلعو بسيطين لدرجة جبيرة .. و خطبوني .. و بنفس السنة تزوجنا بس شرطت نكعد بنفس منطقتنا .. لان ماكدر اعوف امي .. هو توسل بيا نكعد بمنطقتهم و امي تجي ويانه لان ماعدها احد .. و امي اقتنعت و كعدت ببيت وياه وامي وياي جتي .. امي الحفافه توفت ورى زواجي بكم سنة .. و جانت مرتاحه كلش وياي الف رحمه على روحها .. ورغم ما طلعنه من بيتنا صار سنين .. بس لحد الان البيت يصيحوله اسم بيت ام فلانه الحفافه .. زين .. اني و الي مثلي .. الي مر علينا الزمن و كبرنا .. منو يرجعلنه حقنه اليوم .. احنا نطلب المجتمع دين جبير .. بوقتنا مجان اكو شي اسمه تنمر .. و ماكو دورات و حملات تثقيفية … جانو يضحكون علينا الجهال لان امهاتنه لو ابهاتنه يشتغلون علمود يعيشونه .. ليش .. ليش اني من اتذكر ورى كل هالسنين ابجي .. مره زوجي حجالي على ولد بطل من المدرسة و جان كلش كلش شاطر ..
كلتله ليش بطل ؟؟؟
يكول جانو الجهال يصيحوله ابو الريحه و من يفوتون من يمه قريب .. يخلون ايديناتهم على خشومهم و يصيحون افففففففف .. ليش يسوون هيج ؟؟
لان ابوه جان سايق مال سيارة تفتح المجاري (نزاح) .. بطل الولد من المدرسة .. بطل وكام يشتغل وي ابوه .. و بذاك الوكت هم صارت عركات وي اهالي الجهال بس ماكو حل للأسف لهل الامور و حتى اليوم بظل ثقافة الانترنت هم ماكو حل و كله مجرد (دعاية) .. يسوون دورات و جلسات و ندوات بس يطلعون بره .. يرجعون لوضعهم .. اني زين تحملت و عادي جنت اخذ الامور بشفافيه .. مع العلم جنت ابجي .. بس كدامهم ابين اني ممهتمه .. كم وحده و واحد مثلي .. كوووومه .. بس شنسوي .. الحمدلله على كل حال .. الف رحمه على روحج يمه .. ما قصرتي بتربيتي حبيبتي انتي و تاج راسي ماما .. اروح فدوه لتراب رجلج شكد تعبتي علمودي وعلمود خواتي ..

المصدر :صفحة ابو بغداد