راح ابني

اخويه الجبير كلنه نعرفه عصبي و ايده و الضرب … احنا بنات ٣ و هو الاخ الوحيد ولد بيناتنا … ابوية و امي مجانو يحاسبوه من يضربنا لان هو الجبير .. جان يضربنه على اسباب تافهه .. مثلا اذا دزنا على شي و تاخرنا يكتلنه .. اذا صاحنا و مجاوبنه بسرعه نحصل منه كفخه لو دفره .. و من مات ابونه الكتل مالته زاد .. امي جانت تطبك وياه علينه .. و دائما تطلعه هو صح و احنا غلط .. جنا نكرهه اني و خواتي .. ومن نكعد بيناتنا و لوحدنا دائما نغلط و نحجي عليه … بس تحملناه و تأقلمنه وي الوضع و كمنا نسوي الي يريده بسرعه حتى ميضربنه .. و تعايشنه وياه .. و بدينا نكبر على هالحال .. دخلنا مدارس وكبرنا .. من كبرنا عبالنه راح يبطل ضرب بس بقى على نفس الخبال … يعني اني بالاعدادية و اكثر من مره ضربني .. لحد متمنيت مره يموت … و طبعا ماكو اخت تدعي على اخوها هالدعاء بس اني وخواتي دعينا عليه اكثر من مره ..المهم .. دخلت كليه … اول مره بحياتي احجي وي ولد بالكليه ولد غير اخويه … جانت تجربه كلش جديدة عليا و حتى جنت اتلعثم بالحجي مع العلم الموضوع جان طبيعي و كله عالدراسه و عالمنهج … و طبعا البنات الي وياي هم بيهم هواي نفس حالتي .. بس كلنه اتفقنه على شي واحد .. انو هالموضوع طبيعي خصوصا احنا ورانه تخرج و وظيفة و اكيد راح نحتك بشكل يومي وي الرياجيل .. و بدينا شوية شوية نحجي وي الطلاب الشباب بالكلية و طبعا كله بنطاق الدراسة فقط .. يعني لا علاقة و لا حب و لا شي من هالقبيل .. بس من ضمن الطلبه الي التقي بيهم بشكل يومي جان اكو ولد نظراته اليا خجولة .. و دائما من ادير وجهي و عيني تصير بعينه يدير راسه و يسوي روحه ممنتبه عليا (يعني يتهرب بعيونه مني) .. هالولد اسمه نبيل .. وهو صدك نبيل .. جان الوحيد ملتحي بنص الطلبة و اني جنت اتوقع هو ملتحي بسبب الديانه بس بعدين عرفت هو يحب اللحيه و بس … لحيته جانت مو طويله كلش ولا كصيره كلش .. و طبعا اني قبل ما اعرف اسمه سألت طالبه صديقتي عليه .. كلتلها الولد ابو لحيه شسمه هي الي كالتلي اسمه نبيل و يداوم بفلان مرحله .. حتى هي سألتني بوقتها ليش تسألين عليه ؟؟كلتلها يشبه ولد صديق اخويه بس ذاك مو اسمه نبيل … و طبعا اني هم جنت اسوي نفس الي يسوي هو .. من تصير عيوني بعيونه رأسا ادير وجهي … سنتين هو على نفس الحال .. سنتين كامله من الدراسه هو يسوي نفس الشي و الي خبلني هو من يشوفني واكفه بنص طلبه هو يعرفهم .. ميجي يوكف ويانه .. يروح يوكف وي غيرنه .. و بيوم من الايام خلصت دوام و طلعت كالعادة .. لكيته واكف بنفس المكان الي اركب منه الباص حتى ارجع لمنطقتي .. وطبعا هاي جانت اول مره اشوفه هناك .. لحد هسه اتذكر تفاصيل اللقاء رغم وقته القليل .. هو جان شايل بيده جفيه .. و من شافني واجه بوجهي جان يمسح العرك .. مع العلم الجو جان مثالي و مو حار .. بس هو من الخجل جان يتعرق المسكين .. و اجه بوجهي وجه لوجه جان يكلي ست فلان ممكن اتكلم وياج كلمتي بدون زحمه .. اني وكفت بوجهه .. كلتله خير تفضل .. جان يكول اسف والله ترى مو قصدي شي و ابد لا تتوقعين اني اريد اسوي شي غلط .. كلتله زين احجي تفضل شتريد .. كالي من الاخير اني اريد احجي وياج عفيه .. كلتله و انته هسه شدسوي مو دتحجي وياي .. كال اقصد اعرفج يعني .. كلتله و شلون تعرفني يعني؟؟.. كال يعني معلومات عامه … كلتله انته والله عندك خلك و عفته ومشيت … طبعا هو بقى واكف بمكان .. معرف شيجاوب .. و رحت ركبت الباص و سبحان الله الباص من طلع من الكراج اني جنت اباوع من الشباك .. شفته واكف يم حايط و ديدخن .. بس مشافني هو .. انقهرت عليه ماعرف ليش.. وحسيت روحي اذيته … و كمت احجي بيني وبين نفسي كلت بله اني شسويت هسه .. الولد لو من جماعة العلاقات و الصداقات و الخربطه جان عرفت .. لان ماكو شي بالكليه ينظم .. الولد ابد مسمعت عنه كلمه محلوه من الطالبات صديقاتي .. و اصلا هو شكله محترم .. بس قنعت روحي اني الي سويته صح .. لان اني مجايه للكليه حتى احب و انحب … جايه اتخرج و اخذ شهادة .. واني اصلا لو اسوي هالشي اخويه يعلكني من رجليناتي بباب الحوش … ثاني يوم داومت .. جان يجي مقابيلي من شافني واكفه وحدي دانتظر صديقاتي يطلعون من الكافتريا .. كالي اني اسف والله اسف .. بس الله يخليج اخذي هاي الورقة اقريها .. طبعا مديت ايدي اخذت الورقة و محجيت وياه ولا كلمه .. و هو عافني و عبالك انهزم .. طبعا الورقة لحد هسه محتفظة بيها … هي مكتوبه وجه وكفه .. و اني مقريتها بنفس اللحظة لان صديقاتي طلعو .. ضميتها بنص كتاب شايلته .. وجنت كل شويه اريد اطلعها حتى بالمحاضره .. صار عندي فضول اعرف شمكتوب بيها … و كل شوية من اصير وحدي ايدي ياخذها الفضول عالكتاب .. و لو تجي صديقتي لو يجي ولد زميل طالب وياي .. واعوفها للورقة بنص الكتاب … و خلص الدوام وطبعا نبيل اختفى مشفته بعد بذاك اليوم .. حتى جنت اتوقع راح اشوفه يم الكراج مال الباصات بس مشفته .. بس ركبت بالباص هم ردت اطلع الورقة بس جان اكو مريه بصفي مبينه موظفة .. كلت بس اطلعها تقراها وياي و استحيت … بقيت الورقة بالكتاب محبوسه لحد ما وصلت للبيت … و بس سبحت و تغديت صعدت لغرفتي كالعادة .. تمددت عالسرير و طلعت الكتاب نفسه بحجة داقرا … و بديت اقرا المكتوب … طبعا هو مبين جان حتى من كاتب الرسالة خجلان كلش .. طبعا بداية الرسالة جانت بالفصحى بعدين بمرور الاسطر اللغة انكلبت عاميه .. هو معتذر عن الي صار و كايل اني مو من طبعي اسوي هالامور وهاي جانت اول مره بحياتي اسوي هالشي .. و كايل انو هو من اول سنه داومت اني جان يراقبني و يتابع تحركاتي و حتى يعرف اسمي و اكثر من مره لاحكني للمكان الي اركب منه بس ممخليني احس بي .. وشارح وضعه المادي .. طبعا هو الوحيد لأهله و همه ناس على كد حالهم .. هو يشتغل ورى الدوام وي صديقه بمكتب مال فديو كاسيت … يعني يأجرون اجهزة فديو و يبيعون و يأجرون كاسيتات فديو … و طبعا هو معجب بيا و طول هالسنتين جان يباوع عليا و يراقبني حتى بداخل الحرم الجامعي و كال اني من اشوفج بنص اصدقاء اعرفهم ماعرف ليش استحي اجي اوكف و اصلا ماعندي جراءة عيني تصير بعينج … و طبعا مثل مكلت الورقة جانت وجه و كفه مكتوب بيها تفاصيل هواي حتى عن احلامه بعد التخرج .. و اخر شي كاتب اني ماريد شي منج غير اعرفج معرفه وبس حالي حال زملائج و صديقاتج .. بس المصيبه اخجل منج .. و طبعا مأكد على موضوع يعرف اشياء عني ..و كايل اذا وافقتي كل شي يصير كدام الناس و حتى كاتب جمله هو معارف يصيغها و ضحكت عليها .. كاتب كلشي تحت ضوء الشمس ههههه يعني بالنور و مو بالخفاء … و كايل اني راح احاول اجي اوكف يمج و اسلم حالي حال اي طالب او طالبه اذا رديتي السلام معناها موافقه تعرفيني عن نفسج …بس اذا مرديتي السلام معناها انسى كل شي و الورقة معناها صارت تراب و مالها اي معنى … اني بنفس اليوم حجيت كل شي لاختي الاصغر مني .. كالت مبين الولد فقير و الظاهر صدك غرضه مو سيء … احجي وياه يجوز الولد يريدج رسمي … و اذا شفتي سخيف عوفي و خلص .. كلت بيني وبين نفسي صح كلام اختي .. خلي اشوف هالنبيل شيريد بالضبط .. و ثاني يوم طبعا هو يفتر مثل المصرع بالساحه … شايل بيده كتاب على اساس ديقرا بي بس جذب هو جان ينتظر يصير يمي اكثر من شخص حتى يجي يسلم عليهم لان هو يعرف هواي طلبه اني اعرفهم .. بس علاقته بيهم هم على كد الدراسة فقط .. من شاف ولد زميل ويانه واكف جان يجي بحجة ديسأله .. سلم و هو المشكله مفضوح ههههههه يعني سلم و كال السلام عليكم بس راسه و عيونه كلها صارت عليا و حتى ما باوع على صديقه جان ينتظر بس ارد السلام .. اني باوعت عليه و لزمتني الضحكة ماعرف ليش .. رديت السلام جان هو رأسا يدير وجه على الولد صديقه كاله فلان من رخصتك تكدر تجي وياي عندي سوال فدوه .. جان ياخذه و يروح على صفحه .. و طبعا بدو يحجون على سالفة بالمنهج … وراها رجعو ثنينهم و هو ابد ميباوع عليها وهم كل شويه يطلع الجفيه يمسح كصته هههههه خجلان ..المهم .. من يومها كام يجي يوميا يوكف يمنا و شوية شوية كام يحجي وياي و يسألني اسأله عامه عن عائلتي و هو يحجيلي تفاصيل عن شغله بمكتب الفديو كاسيت و عن ابوه وامه و طبعا اني بالمثل احجيله شغلات عن عائلتنه بس ابد محجيت مقابيله بسوء عن اخويه رغم كرهي الى .. جنت احجيله تفاصيل عادية .. يوم ورى يوم هالتفاصيل كامت تزيد و كام يعرف عني تقريبا كل شي واني هم اعرف عنه كل شي .. و بدينا بمرحله جديدة بعلاقتنا .. مرحله اسمها ماكدر اعيش يومي طبيعي اذا ما احجي وياه و هو ميكدر يعيش يومه طبيعي اذا ميحجي وياي .. مرحله اسمها التعلق .. تعلقت بي وهو تعلق بيا .. و اكيد ورى هالتعلق يجي الحب .. حبيته و حبني و راد بشتى الطرق يسوي شي رسمي بيني وبينه حتى اخاف واحد من الطلاب لو الطالبات يجيب سيرتي بسوء .. لان العلاقة جانت واضحه للكل و مستحيل محد يحس بيها .. و جاب امه وابوه و تقدمولي و كالو لاخويه احنا وضع ابنا هيج .. هو صح طالب بس يشتغل و بيتنا ملك و هالولد بس الوحيد النا .. و احنا كبار باجر عكبه ننام جوى التراب و نريد نزوجه .. طبعا اخويه و امي اقتنعو بيهم لان بصراحة الناس و الولد ميتعيبون .. و اذا عالوضع المادي فالرجل يشتغل و مكفي نفسه .. و بنفس الوقت ابوه عنده شغل هم .. يعني ما اكول همه فقراء ولا اغنياء .. بس متوسطين الدخل .. قبلو اهلي و طبعا سألوه منين عرفتها الولد كال بنفس الكليه اني وياها و سألت و عرفت هي ممرتبطة و تقدمت مباشره .. امي شوية جانت ممقتنعه بس اخويه راد يدفعني .. و طبعا حجايته الاولى و الاخيره بالبيت .. وافق .. و تزوجته لنبيل و اني وياه بالكليه .. مراح احجي عن احلى شي بحياتي و احلى ايام عشتها وياه هي ايام روحتنا للكليه واحنا متزوجين .. كعدتنا الصبح … نبدل سوى .. نتريك سوى .. و نتمشى سوى .. الله على ذيج الايام .. احلى ايام حياتي .. احبه لنبيل و هو يحبني .. و كمت الزم ايده كبال الكل .. كمنا نكمل دوام و نطلع نتمشى و نكول وين متاخذنه رجلينا خلي تاخذنه .. نفوت محلات نباوع .. الله ريحة ذاك الوقت جتي براسي هسه والله …المهم .. تخرجنا من الكلية و توظفنا ثنينا .. بس هو بمكان واني بمكان .. و طبعا طيله هالسنتين مصار عندي حمل .. و جنت دائما اكله خلي نروح لدكتور يكلي بابا عادي هالشي .. و يضربلي امثال بأصدقاءه او اقربائه يعني اكو ٣ سنين و بعدين اجاهم طفل .. واكو اربع سنين .. اني هم كلت عادي .. بس شوية جنت احس امه وابوه يريدون طفل .. و فد يوم امه سمعتني كلمه و رأسا كلتله اريد اروح دكتوره .. قفلت عليه و تعاركت وياه وهاي جانت اول عركه الي وياه والله العظيم .. و رحنا دكتورة طلع اني عندي مشكله بس تتعالج بس المصيبه تطول .. يعني علاجات و ادوية و شغلة تاخذ وقت .. من رجعنا للبيت بنفس اليوم كلتله شوف .. من هسه .. اني احبك و ما اشوف رجال غيرك بهل الكون .. بس اذا اهلك يريدون طفل واني شغلتي مثل مكالت الدكتوره تتاخر طلكني و تزوج .. جان يبجي .. والله العظيم بجى .. كالي ولج انتي شتحجين و كام يبوس ايدي و اني هم بجيت .. حضني قوي كالي انتي بنتي و ابني و امي وابويه .. ومعليج بأهلي اني احاجيهم .. و كالهم حرفيا .. الي صار و طبعا اهله معترضو و انقهرو عليا و رزلوني ثنينهم لان كالهم كوثر هيج كالت .. حتى امه كامت تبجي كالتلي انتي بنتي .. و اني والله مجان قصدي شي .. و الموضوع انسد .. و سنه جرت سنه و العلاج غيرته و الدكتوره صارت اربع دكتورات و كل وحدة توصفلي دكتورة زينه اروحلها حتى لخانقين رحنا جان اكو دكتوره اسمها ماجدة بذاك الوقت علساس تفتهم بهل الامور وهم مجابت نتيجه و مصار عندي حمل .. ٧ سنوات مصار عندي حمل و الرايح و الجاي يسألني .. اذا اشوف طالبه بأيام الكليه صدفه تسلم عليا و تسألني على نبيل و هم تكول كم جاهل صار عدكم .. كرايب يجون زيارات لبيتنا هم يسألوني .. خواتي ثنينهم تزوجو و حتى اخويه المكروه تزوج و كلهم صار عدهم جهال واني لا .. و طبعا هم كل ميخابرون لو كل ميجون هم يسألون .. السوال هذا وحده جان كفيل يمرضني مرض نفسي .. كمت اكعد بيني و بين نفسي و ما احس على روحي الا واني ماكله اظافيري بسنوني .. راسي يفتر ..و كل يوم انام وي نبيل جوى سكف واحد ابقى اتكلب و اريد اسأله ليش متتزوج غيري و السوال ميطلع من لساني .. و طبعا جنت مستمرة عالعلاج و العلاج جان غالي .. اضرب ابر والله .. و اراجع اكثر من دكتورة .. و اخر شي فقدت الامل .. و بيوم من الايام بدون سابق انذار .. حسيت ذاك الاحساس الي تتمناه كل زوجه .. الله رغم ما هو جان محلو و بي غثيان بس جان احلى احساس زارني بحياتي … احساس الحمل .. و من خوفي من الي بيا كام عقلي يكلي هذا شعور كاذب و الحمل هم كاذب .. و رحنا اني ونبيل و كشفنا و الله على كلمة مبروك الي سمعتها من الدكتورة …احلى كلمة بحياتي سامعتها .. كمت ابوسها للدكتورة و اشمشم بيها … ممصدكة الخبر وكل شوية الزم ايدها اكلها متأكده… هي تضحك تكلي متأكدة .. و صار عندي احلى حمودي بهل الدنيا .. ابيضاني يخبل فدوه لروحه … عيونه كبار و شعره اسود كلش و ثخين … طرنا بي من الفرحه … ننومه بنصنا والله مجبناله لا كاروك ولا دوشك .. الليل كله صافنه عليه وابوس بي .. و ابوه يروح و يجي يبوس بي و طبعا صرنا فد وهواسيين اني ونبيل .. نبيل يباوع على اصابيع رجله يكلي ليش اصبعه الجبير شكله مو طبيعي خلي نودي للدكتور لحمودي .. اذا اشوف شوية ركبته بيها حمار رأسا اركض بي للدكتورة .. نخاف عليه من الهوى والله .. وكبر حمودي و صار بصف ثالث ابتدائي .. طبعا من يلعب برى اني وابوه نوكف نباوع عليه .. اذا يوكع ابوه يركض … حتى هو جان يضوج منا يكول ليش كدام اصدقائي هيج تسوون ..جنت اكله ماشي بعد ما اوكف برى بس جنت اراقبه من ورى الباب بدون ميحس .. و من تجي الطوبه يم الباب يدنج (ينزل راسه) يباوع من جوى الباب اني واكفه لو لا .. شلون لوتي ههههه … جان من يشوف رجلي يكول هااا ماما مو كلتي ما اسوي هيج بعد .. حرام عليج تحلفين كذب .. جنت اضحك واسمع كلامه و افوت جوى … و بيوم من الايام جنت نايمه المغربية وهو جان نايم و نبيل جوى ديباوع لعبه مال طوبة مال منتخب العراق .. و فزيت على صياح نبيل كووووووووول … كمت كلت اسم الله شكو .. جان يكعد حمودي هم .. نزل جوى و جان العراق فايز .. اني رحت للمطبخ اسوي عشا و نبيل وحمودي بالصالة و عمو ابو نبيل جان برى .. و خاله ام نبيل نايمه و نومها كلش كلش ثكيل .. فاز المنتخب و صارت هوسة بالشارع و طلقات وموسيقى .. نبيل صعد صوت التلفزيون و جان حمودي يمه .. اني رحت هم فرحانه وي نبيل و البيت كله ضحك .. حمودي مجان موجود .. كلتله وين حمودي كال ماعرف .. طلعنا للطرمة ثنينا لكيناه بالكاع نايم .. لكينا ميت .. حمودي مات بطلقة واكعه على راسه .. حمودي ابني الي انتظرته مات .. حمودي ابو شعر الثخين مات .. حمودي كوم يمه .. شنو هالدم نبيل .. هذا دم حمودي الله عليك احجي الصدك .. هذا الدم مال حمودي ؟؟؟هاي ليش راس حمودي هيج .. ليش مزروف .. لا حمودي عايش مو نبيل .. نبيل شايل حمودي يركض بي بالشارع و يصيح ابني مات .. و اني اركض وياه و اضحك اكله لا حمودي ما بي شي .. دشادتي دم اي دم بس حمودي عايش .. الربطة ملابستها عادي خلي يشوفون شعري الناس بدون ربطة ..ترى عادي والله بس حمودي عايش .. نبيل حمودي عايش مو ؟؟؟ ليش تصيح ليش تبجي نبيل شبيك ؟؟مو حمودي ميحب يشوف شكلك هيج .. شدسوي اوكف على كيفك ايدنات حمودي انلوت لك نبيل شبيك عايش ابني عايش ..عايش حمودي بكلبي و بروحي .. حمودي عايش بكل زوايا البيت .. هنا جان يلعب بالسيارة ام الشرطة .. هناك جان يختل ورى البردة و عباله منشوفه و يفززنه .. اول مره مشى بيها يم هالقنفه تذكر مو نبيل ؟؟ و هنا الحجله مالته انكلبت … تذكر نبيل من كتب اسمه صح شلون كيفنه ثنينا … نبيل حمودي الي انتظرنا كل هالسنين ميروح … بس راح حمودي بطلقة يصيحولها طلقة فرح .. ربي الي ضرب هالطلقة اريده يعيش الي عشته … ربي انته اعرف بحالي ربيييييي .. ربي الي ضرب هالطلقة اريده يحس الي حسيته .. ربي ياخالق حمودي و خالقني .. ربي احلفك بحمودي الي هسه هو يمك خلي الي ضرب هالطلقة يجرب الي جربته ربي انته جبير .. يمك الحساب ربي ..(راح ابني)انتهى اخوكم ابو بغداد سايق التكسي#ابوـبغداد