(ابو مريم )

جان دخولي للكلية اول مرة .. ما اعرف شلون اوصفه .. دخت بالطلاب و ملابسهم و ترتيبهم ..اني اذا اريد اقارن نفسي بيهم اطلع صفر و بصفه ست صفار …واحد كمل دراسته بالكمزات .. يروح للمدرسة تكمز بنص الكوسترات و التاتات .. يرجع من الدوام يروح لشغلة بالسكلات وهم شغلته تكمز ..جنت عامل سكلات و ادرس … الي دفعني عالدراسة و خلاني ادرس و احاول اوصل هو رائد ابن ام كرم ..شبي رائد ..رائد جوارينه و امه كرايب امي من بعيد ..جانت امي اذا تريد تضوجني تكلي دشوف رائد شلون صار بلكي تنجح وتصير مثله …..رائد موظف بالضريبة و جان ممشي حاله … يعني يمشي معاملات و يسهلها و ياخذ هالقاسمة الله .. عنده سيارة و مشتمل ملك …و اني ردت اصير مثله بس . لا اكثر و لا اقل …يعني لا ردت اصير زنكين و بيتي خمس طوابق بالكرادة لو بالمنصور .. ولا ردت اركب ماليبو لو سوبر حمره ..جانت امنيتي مشتمل بمنطقتنا الي وحدي ملكي .. و سيارة برازيلي مثل سيارة رائد .. عادي حتى لو لونها جارد .. ميخالف ..المهم ..قدوتي بالحياة و هدفي جان رائد ..طبيت للكلية .. الكلية الي جنت اداوم بيها بيها اقسام مو بس للدراسة ..لا بيها اقسام بشرية …الاقسام البشرية كل قسم وحد ..مثلا قسم المرتاحين .. هذولة مجموعة رافعه خشمها و ميحجون وي واحد ميعرفوه .. و دائما منعزلين ..كلشي عدهم جاهز و حاضر و دائما لبسهم يتغير يوم ورى يوم .. و ابد ميهتمون للمحاضرات بكد ميهتمون للطلعات و التنسيق و العلاقات و اللبس و المودة .. بنات و ولد ..قسم العجوسه .. هذولة مجموعة اغلبيتهم لابسين نظارات و يحبون الدراسة اكثر من كل شي ..و قسم المرتاحين مرات يروحون على قسم العجوسة ياخذون منهم معلومات …قسم الراكضين عالخبزة ..هذا القسم اني انتمي الى ..مجموعة من الطلاب الي يحسبون للدقيقة حساب .. و امنيتهم الوحيدة تخلص المحاضرات بسرعة حتى يلحكون عالشغل …معزولين بس مرات يلتقون وي قسم العجوسة ..و مرات تصير بينهم و بين قسم المرتاحين عركات و اغلب العركات سببها رفعة الخشم و دائما المتضرر يكون من قسم الراكضين عالخبزة حتى لو هو ابو الحق ..والسبب واضح اكيد ..اني جنت اروح بدربي واجي بدربي .. ومرات احجي وي الطلبة على كد الدراسة .. يعني احاول ابتعد عن انشاء العلاقات لان تاخذ وقت مني و يجوز ارسب ..واني رائد براسي لازم اوصله .. واذا ردت اوصل لرائد لازم ادرس و انجح …بيوم من الايام …اكو طالبة ويانا منعزلة .. يعني حتى صديقات ماعدها ..تجي تدرس و تروح .. دائما البنات و حتى الطلاب يعيبون عليها و يكصون بيها و مطلعين عليها لقب المعقدة ..فد يوم جان اكو اجتماع بالكلية و هوسة كلش و الطلبة كاعد يدخلون لقاعة الاجتماعات حشر .. شي يطخ بشي .. باوعت البنية الي يكولون عليها معقدة .. دتمشي و تبجي .. رحت حشرت نفسي بالكوة و وصلت يمها كتلها شبيج تبجين .. كالت ماكو شي ..رجعت كتلها شبيج تبجين .. كالت ماكو شي ..طلع واحد من الطلاب معرفته لهاذا اليوم ولو اعرفه الا اخلص عليه وين ما اشوفه لو الكاه والله العظيم ..طلع جان يكرص بيها و ينفخ يم اذنها و يضوجهاوهي من خجلها متعرف شتسوي و كامت تبجي .. اني معرفت هاذا الحجي الا ورى الاجتماع .. لان جلبتلها .. لحد مكالت الي صار ..من عرفت الحجي منها كتلها ليش مكتيلي بله حتى اعرفه منو ؟كالت ما اريد مشاكل الله يخليك كافي الي بيا ..وراها صار حجي بيني و بينها و جنت دائما احاول اتقرب منها …لحد معرفت تفاصيل عن حياتها ..ابوها متوفي .. هي الوحيدة لأمها .. كاعدة هي وامها ببيت خالها ..خالها يشتغل شغلة بسيطة و حالته على كده ..مرة خالها تسوي مشاكل و دائما تريد تبطلها للبنية .. و دائما تسمعها حجي هي وامها ..تكله لخالها و كدامهم .. بمكان متصرف على دراسة فلانة اصرف على جهالك ..و جهال خالها دائما يغلطون عليها و حتى على امها .. وكح كلش و ميحترمون احد ..و الاضرب بعد .. امهم تعلمهم يضوجون ام البنية و البنية ..حتى مرة شفت كتاب عد البنية ملزكته بلاصق شفاف .. الجهال مشككي حتى يضوجوها ..هي من النوع من تمشي تحضن الكتب و جانت تخلي هذا الكتاب بنص الكتب حتى لحد ينتبه عليه و يصنف ..البنية حبيتها ..بس اني وياها بعدنا ريشنا مكامل .. واصلا مهلسين تهلس ..رجعت للبيت حجيت لأمي موضوع البنية و امها ..امي حجت وي ابوية ..ابوية صاحني .. كالي شوف ..امك حجتلي على الطالبة الي وياك .. احنا بيتنا ملك .. و بيتنا جبير الحمدلله و هذا الشي الوحيد الي مريحني باجر عكبة اذا اموت .. اكو سكف فوك راسك و راس اخوتك ..اني وامك اول وتالي نروح يم رب العالمين ..و خواتك الاثنين وحدة متزوجة و الثانية مخطوبة .. يبقى اخوك الصغير هذا بعده كتكوت ..من اختك تزوج وتروح لبيت رجلها ..نمشيلك على البنية و نزوجكياها و نجيبها هي وامها تعيش ويانا … و ابقو درسو ثنينكم بلكي الله يصلح حالكم و تصيرون فد شي ..بوقتها امي كاعدة يم رجل ابوية ..من يمها كالت اي والله و يصير مثل رائد ابن ام كرم هههههههههههه ..ضحكنا اني وابوية ..عاد رجعنا نكمل الحجي ..كالي انت تشتغل و اني اشتغل و الخبزة تطلع .. و الي خلقنا مينسانه حاشى لله ..و صدك رحت فاتحت البنية و كيفت خطية ..و تزوجت اختي الحمدلله .. ورحنا لبيت خالها للبنية و عبالك جان بس يريد يدفعها ..حتى مطلب طلبات ..عبالك جانت بلوكة على صدرة و بس يريد يوخرها ..و اتزوجنا و جبنا امها كعدت يمنه ..و قررنا منسوي اطفال لحد منتخرج ..و كمنا نروح للدوام سوى و نرجع سوى .. و ما اعرف بوقتها الدراسة صارت سهلة كلش ..و كلشي بحياتي صار حلو .. حتى الشغل كمت ما اتعب بي ..كلشي انفتح بوجهي ..و تخرجنا و هي تعينت بدائرة و اني تعينت بدائرة ثانية حسب اختصاصنا ..و ابوية للأسف توفى الله يرحمة بعد خمس سنوات من تخرجنا و صار عدنا طفلة سميناها مريم ..بس احمد الله و اشكره لحك على مريم و شافها الله يرحمه ..المهم ..امي وام مرتي عبالك خوات و الي يشوفهم و يسمع همه عمات ميصدك .. لان خطية ثنينهم فقيرات ..و اموري وامور زوجتي استعدلت كلش .. و صرت احسن من رائد ابن ام كرم ..و عشنا مرتاحين لحد ما اجى يوم الله ينعله .. زوجتي كامت تحس بوجع بمعدتها .. وجع مو طبيعي ..رحنا لدكتور كال ماكو شي ..وبقى الوجع عدها اضافة للوجع ضعفت بس منطقة البطن مثل مجانت توصفها تكول احسها منفوخة ..و بدت الاعراض تزيد و دم ياستار ياربي يطلع مع البراز (مكرم القارئ)..و رحنا لدكتور ثاني بس معروف عيادته بالسعدون ..كال عدها سرطان القولون .. يعني سرطان الامعاء ..جانت صدمة اليا و الها ..من كال سرطان اني كمت ابجي بس هي مبجت .. خلت ايديها على ايدي وتكلي كافي عيب ..الدكتور واكف …. خطية ..كمت بوست ايده كتله شوف بعد مرة اخاف مو هذا الي تكولهجنت حتى الكلمة اخاف اكولها واللههو بقى يطبطب ايده على جتفي و اني مدنجكتله لا تطبطب عفيه شوف الله يخليك شوف زين ..و هي خطية تجر بيا تكلي كوم ..طلعنا واني اقنع نفسي و اقنعها انو هذا الدكتور غلطان .. ورحنا لدكتور ثاني و ثالث و نفس الشي ..ذبلت كباليكامت يوم ورى يوم تصغر حبيبتيجسمها انتهى و مفاد العلاجراحت حياتي و عمري و وطني وملاذيجنت ادلعها بكلمة ملاذيراحت بعد روحي و روح روحيراحت و بقت منها بس مريمراحت و مشافت الكاع الي اشتريناها سوى شلون كمل عليها البيت ..متهنينا بالفلوسراحت الي جانت تدرسني و تضربني بالشقة اذا اخربط ..راحت الي جانت دائما تضحك من تسمع اسم رائد ابن ام كرمجانت تخرب من الضحك من احجيلها شلون امي تضوجني و تكلي صير مثل رائدو من وراها مشفت الفرح ..لزمت فلوس و فلوس بس متهنيت والله ..امها و امي بقو سويه لليوم .. و مريم كبرت ..نسخة من امها .. حتى تصرفتها ..حتى شيلة الكتب مثلها تشيلها ..الي مصبرني بهل الدنيا بس مريم والله ..و الحمدلله على كل حال( ابو مريم )انتهىاخوكم ابو بغداد سايق التكسي#ابوـبغداد.