أم دميعة
بالمدرسة جانت عدنا طالبة صغيرونة شكلا و عمرا … فترة داومت و بطلت بعدين مادري انقلت لغير مدرسة (او اني الي افتهمته هيج)
الحاصل .. البنية جانت فقيرة بس دائما جانت تبجي .. اني مجنت مفتهم شنو السالفة لان هي بالاول ابتدائي واني بصف ثالث بوقتها .. بس الي جنت اشوفة تروح يم الادارة وين هاي الرسومات الي عالحياطين مال زرع و ورد اكو سنادين مال غرفة المعلمات .. هناك تروح تكعد بالكاع وتبجي و بعدين تجيها معلمة من المعلمات تاخذها ..
هالموقف اني شفته اكثر من مرة و حتى اصدقائي هم شايفي ..
الحاصل بطلت البنية ..
وراحت نسيتها بعد وما شفتها بالمدرسة .. صدفة فد يوم ابوية اخذني وياه لبيت صديقة زيارة بنفس منطقتنا بس شوية ليكدام .. صديقة بوقتها جان مسوي حادث و رحت وياه..
شفت البنية نفسها هناك و تذكرتها .. سألت ابن صديق ابوية عليها لان جهال بذاك الوقت و ماعدنا شي نسولف بي غير المدرسة لو اللعب ..
كال هاي جوارينا بيتهم هناك و رئسا شمرله حجاية بنص الحجي (امها خرسة) ..
.. كلتله خرسة امها خرسة ..
كال اي و تحجي كله ابااا ابااا ..
كلتله انت شايفها ؟
كال اي ..
طبعا بذاك الوقت جنت طفل اني و تفكيري محدود حتى لو جنت صف ثالث ابتدائي .. و تفكيري حالي حال الي بعمري .. بس شوية شوية من كبرت عرفت الدنيا شلون ماشية ..
جنت فضولي يمكن و سخيف .. لان كبل كلتله شلونه شكلها و كمت اضحك وي ابن صديق ابوية ..
كال تخرب من الضحك تكول كلمات ممفهومة ..
كلتله امشي يم بابهم نشوفها .. كال امشي و دلاني بيتهم .. شوية ليغاد من بيت صديق ابوية ..
رحنا و طبعا بقينا واكفين ومحد ما طلع و بعدين طلع ابوية من بيت صديقة و صاح عليا و رحنا ..
.. رجعت لبيتنا و ثاني يوم حجيت لصديقي بالمدرسة وجانو بعد جهال كاعدين ..
كلتلهم تذكرون هاي ام دميعة الي تكعد يم السنادين وتبجي ..
كالو اي ..
كلتلهم امها خرسة وتحجي كله ابا ابا ..
واحد من الكاعدين ما اعرفه اصلا .. طلع اخوها ..
كمز عليا و خبزني خبز دفرات و جلاليق .. طلعت السالفة شنو ..
البنية جانت تبجي لان اكو طالبات وياها من نفس شارعهم بنفس الصف وياها .. يكعدون يشاقون وياها و يسألوها على امها شلون تحجي وياهم بالبيت و همه شلون يفتهمون ..
و يتمضحكون عليها مثل ما اني اتمضحكت و ابن صديق ابوية تمضحك ..
وهي تروح تبجي .. زين اخوها ميكدر يكتل البنات و لا يتعارك وياهم .. هي تروح للبيت تحجي لابوها و اخر شي ابوها بطلها سنتين و بعدين رجعها للدوام بغير مدرسة و كملت دراستها البنية ..
طبعا هالتفاصيل عرفتها بعدين ..
الحاصل و الي صار
ورى ما كتلني اخوها صار صديقي .. و السبب بصداقتي هو ست رافدة .. هي جانت المعلمة مال صفهم لان هو بغير صف ..
صالحتنا و خلتنا نتباوس ..
و صار اعز صديق اليا بفترة الابتدائية .. و مشت السنين و كبرنا كلنا … بس كل واحد راح بمكان و بتخصص ..
اني بوقتها انتقلت لغير مدرسة و بعدين داومت متوسطة و اعدادية و السالفة كلش نسيتها .. و هو هم تقريبا نسيته لان ما التقيت بي بعد و ابوية باع بيتنا وكعدنا بالمنطقة بس جوى كلش بالجعب ..
و داومت كلية و تخرجت و توظفت ..
وظيفتي خارج منطقتنا طبعا ..
فد يوم رحت اني و زوجة اخوية علمود لقاحات بالمستوصف .. و بالمستوصف شفت موظفة حلوة .. و كلش عجبتني البنية ..
ساعدتنا اني وزوجة اخوية .. بس بقت براسي لان تخبل ..
من طلعنا من المستوصف كلت لزوجة اخوية و طبعا هي تصير بنت عمي شك المنشار .. كلتلها شفتيها شكد حلوة ؟
كالت ها نويت (و جانت تقصد عالزواج لان اني الوحيد من بين اخوتي ممتزوج) .. كلتلها عمي بس كلتلج شفتيها شكد حلوة مكلتلج اريد اتزوجها ..
كالت والله حلوة و مبينة مؤدبة ..
كلتلها هو على حظي هسة بس اريدها الكاها متزوجة لو مخطوبة .. كامت تضحك وكالت صدك تحجي يعني ؟
كلتلها والله اذا هاي الحلوة صدك ..
كالت تدري منو يداوم بالمستوصف هذا بس هسة ماخذه اجازة ؟
كلتلها منو ؟
كالت فلانة الي بيتهم بظهر بيت عمي فلان ..
كلتلها بله سأليها على هاي الموظفة الله عليج ..
و جان تسألها و كالت هاي مرباية و حبابة و ممتزوجة و لا مخطوبة و بيتهم بفلان مكان يعني بمنطقتنا ..
اني بوقتها مربطت و لا جتي بعقلي راح تكون نفسها اخت الي تعاركت وياه والي امها خرسة (يعني نفسها ام دميعة) .. والله العظيم ولا جتي ببالي ..
و جان اسأل عليها وتطلع هي ..
ما اعرف بوقتها شصار وياي .. يعني جانت مفاجأة و كلت سبحان الله معقولة تصير من قسمتي واحجيلها كلشي .. و فوكاها اخوها صديقي جان و اعز صديق بوقت الابتدائية ..
والله سهلها و تقدمتلها و صارت قسمتي بس اخوها تفاجئ كالي لك والله مصيبة هالدنيا .. يعني تعرفت عليك بعركة من ورى اختي .. و فوكاها صرت صديقي وراها .. و بعدين غطيت سنين و سنين و تاليها طلعت وجيت طلبت ايد اختي هههههههههههههههههه .. طبعا هالحجي ورى الموافقة و تحديد وقت الزواج ..
و تزوجنا و حجيت كلشي الها و هي مجانت تعرف بهل التفاصيل لان اخوها محاجي شي ..
كالت ممعقولة والله .. كلتلها سألي اخوج عمي اني جذاب سألي اخوج ..
و اخوها حجالها ..
سبحان الله .. يعني بقت براسي قصتها و انكتلت من اخوها وتاليها تروح سنين و تجي سنين وتصير مرتي .. و الحمدلله هسة عايشين ومرتاحين و احلى لقب اكوله الها وهي تخرب من الضحك من تسمعة .. من اكلها ام دميعة ههههههههههههههههههه تخرب من الضحك و تكول اذا الله رزقنا ببنية سميها دميعة حتى يطبق لقبك الي لازمة عليا من الطفولة لليوم هههههههههه ..
بالمناسبة هي امها عايشة و الله الله الله على كلب امها وروح امها شكد طيبة .. الله على حب ابوها لأمها الي متحجي ولا كلمة ..
ابوها جبير كلش الله يحفظة … روحه من الدنيا زوجته .. يعني ثنينهم ولا شعرة سودة براسهم بس الي يشوفهم من يكعدون سوية يكول شنو هذولة يمرون بفترة مراهقة متأخرة .. من نظراتهم مبين مدى حبهم وتعلقهم واحد بالثاني ..
طبعا مرتي حجتلي شلون ابوها يحب امها .. تكول لو شكد ما احجيلك على حب ابوية لأمي اكون مقصرة .. يعشقها يموت بيها مووووت و يفتهمها من نظرة عيونها وحتى احنا بالبيت كلنا نفتهمها .. يعني ابد منحس امنا خرسة و ماتنطق .. لان عيونها تحجي مشاعرها تحجي دموعها تحجي ابتسامتها تحجي كلشي بيها يحجي بس لسانها للأسف ميحجي ..
سبحان الله عالقدر .. سبحان الله عالقسمة ..
و اخيرا ..
الله يحفظ اخونا هو وزوجته و يحفظ ام زوجته وابو زوجته ..
والله يحفظكم و يرزقكم القسمة الحلوة .. والمتزوج بيكم الله يرزقه كل خير .
المصدر : صفحة ابو بغداد
